Ka Nonanona, Volume II, Number 6, 16 ʻAukake 1842 — Page 21

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." Solomona.
Buke 2. HONOLULU, OAHU, AUGATE 16, 1842. Pepa 6.

HE WAHI NINAUHOIKE NO KA AOAO POPE.
(E nana i ka aoao 13.)

            I. Heaha ka ha o ke kuhihewa o ka poe pope?
          D. Eia, o ka lakou olelo ana i ka pope, a i ka ekalesia o Roma paha, he hala ole ia; aole e hiki ia ia ke kuhihewa, aole hemahema kona ike; aole hiki ia ia ke ao aku i kekahi mea hewa, a kekahi mea kekee, a oiaio ole paha. Hemolele loa kana ao ana ma na mea a pau; nolaila pono na kanaka a pau e manaoio i ka ka pope, a hana hoi ma kona manao, aole ma ko lakou iho. O ko lakou manao ana i ka pope, ua like me ka olelo a ke Akua, Tes. II. 2: 4, "Me he akua la e noho ana iloko o ka luakini o ke Akua, e hoike ana ia ia iho, oia ke Akua."
          I. Ua olelo anei ka poe pope pela?
          D. Oia no; he nui wale ka lakou hai ana mai pela; aia iloko o na palapala a lakou. Oia ka Belamine, he kumu kiekie ia a ka pope ma Roma. Penei kana palapala. - "Ina e manao ka pope e kauoha aku e hana kanaka i na mea hewa, a e papa aku hoi oia i na mea pono, mai hana, ma ia hope aku, pono ka ekalesia e manao ia mau hewa, he maikai; a e manao ia mau mea pono, he hewa.: Bell, de Pontiff. Roma, lib. 4. Cap. 2. Aole i oleloia, e hiki i ke Akua ke hoolilo i ka hewa i pono, a hoololi ae i ka pono i mea ino, aka, i ko lakou manao, hiki ia hana i ka pope.
          I. Pehea ka manao o ka poe hoole pope ma keia mea?
          D. Eia ko lakou manao; Aole loa i lilo kekahi kanaka ma ka honua nei i lunakanawai kiekie loa maluna o ka ekale sia o ke Akua, a hiki ole ia ia ke kuhihewa, i pono na haipule, a pau ke manaoio i kana wale no, a hana ma kona manao wale no ma na mea pili i ka uhane.
          I. Pehea e akaka ai ia wahi?
          D. Ekolu mea e akaka ai.
          1. Aole i olelo na lunaolelo a Iesu, ua kiekie lakou me ia. Aole lakou i hookano pela, Kr. II. 1: 24. "Aole no makou e hookoikoi maluna o ko oukou manaoio; aka, ke kokua nei makou i ko oukou olioli; no ka mea, ke ku nei oukou ma ka manaoio."
          2. He mea ku e ia manao pope i ke kauoha a Iesu, Pet. I. 3; 15. "E makaukau mai oukou e hoomaopopo aku i ka poe e ninau mai ia oukou i ke kumu o ka lana ana o ko oukou manao." Ioane I. 4: 1. "Mai manaoio aku oukou i ka poe uhane a pau, aka, e hoao aku i ka poe uhane, no ke Akua mai paha, aole paha." Na keia kanaka kela kanaka e hoao i na uhane, i akaka ka mea pono a me ka mea hewa; aole i oleloia, na ka pope wale no e hoao.
          3. Eia kahi mea i ike pinepine ia; o na alakai kanaka a me na kumu kanaka, ua alakai hewa lakou i na kanaka. Puk. 32: 5. "A ike aku la o Aarona, hana iho la ia i kuahu imua i ke alo o ia mea; hea aku la o Aarona, i aku la, E, apopo,