Ka Nonanona, Volume II, Number 4, 19 July 1842 — Page 14

14 KA NONANONA. [IULAI

keia episetole, iwaena o oukou la, na oukou e heluhelu hou aku ia i ka ekalesia o ko Laodikeia; a e heluhelu hoi oukou i ka episetole mai Laodikeia mai." 1 Tes. 5: 27 "Ke kauoha aku nei au ia oukou ma ka Haku, e heluheluia'ku keia episetole i ka poe hoahanau a pau loa.' Hoih. 1: 3. "E pomaikai ana ka mea e heluhelu a me ka poe lohe i na olelo o keia wanana."

NO KA MOE KOLOHE. HELU 6.

            Ma na helu i kakauia mamua a i paiia ma ka Nonanona, ua ike kakou i ka mea nana i papa mai mamua ma Sinai, me ka leo ikaika, "Mai moe kolohe oe." Ua ike kakou i ka hewa maoli o ka moe kolohe ana, he mea ia e poino ai ke kino o ke kanaka, a he mea hoi ia e make ai kona uhane. Ua ike kakou i ka hahai ana o ka poino i ka poe moe kolohe i ko Sodoma poe, o ke Lii o Hivi a me kona poe i ka Iseraela ma ka waonahele, a me ka ohana a Beneamina. Ua ike kakou, o ka moe kolohe, he mea ku e loa ia i ka lokomaikai mai o ke Akua, a he mea hoi ia e lilo ai ke kanaka malalo o ka holoholona. Aole anei he pono kakou e ninau aku me ka oiaio, a me ka makemake e ike, "Pehea kakou e pakele ai ia mea haumia e make ai? Heaha ka kakou hana i ole i paa kakou iloko o ka upena a Satana, i ole e hooleiia kakou iloko o ia kiolepo inoino loa? Oia ka mea a'u e hoakaka aku ia oukou.
          1. Eia ka mua: Mai launa pu me ka poe kolohe, a me ka poe i hoowalewale mai. I aku la o Paulo i ko Korineto poe, 1 Korineto 15: 33. "O ka launa aku i ka hewa, oia ka mea e ino ai ka noho pono ana." Eia ka Solomona 5: 8 no ka wahine kolohe: "E hooneenee loa aku ia i kou hele ana mai ona aku, mai hookokoke aku oe i ka puka o kona hale."
          Pono anei e pule, "Mai hookuu oe ia makou i ka hoowalewaleia mai, e hoopakele no nae ia makou i ka ino," a pau ia pule ana, alaila e hele aku a launa pu me ka poe hoowalewale mai? Aole anei ia e like me ka pule i ke Akua, i ole i eha ka lima, alaila e hookomo ia iloko o ke ahi? Aole anei he eha? Heaha ka mea e ole ai?
            2. E malama pono i ko oukou mau maka. O ka maka oia ka puka kahi i komo ai ka ino iloko o ka naau. Eia ka Petero no kekahi poe i ka wa kahiko, 2 Petero 2: 14. "Ua niua na maka i na wahine moe kolohe." Eia ka Ioba; 31: 1. "Ua hana au i kanawai no kuu mau maka; a no ke aha la au e nana aku ai i ke kaikamahine?" Pela oukou. E hoomanao i ka Iesu olelo, Mataio 5: 28. "O ka mea e nana wale aku i ka wahine i mea e kuko hewa aku ai ia ia, ua moe kolohe no oia me ia ma kona naau." Mai nana wale aku o kupu iho ke kuko a mahuahua ka makemake o ka naau, a hihia auanei.
            3. E kiai oukou i ko oukou mau lehelehe, e malama i ko oukou elelo. O ke kamailio ma na mea ino, oia ka mea e alakai i ke kanaka i ka moe kolohe. Nolaila ka Paulo papa ana'ku i kona poe hoahanau, Epeso 4: 29. "Mai hoopuka ae i ka olelo ino mai loko mai o ko oukou waha." E pule kakou e like me Davida, Halelu 141: 3. "E hoonoho mai oe, e Iehova i mea kiai ma kuu waha,
          "A e malama mai hoi oe i ke pani o ko'u mau lehelehe."
          A pau keia pule, e noonoo, e kiai, e makaala i maemae ka olelo o ko oukou wahi, i ole e hihia malaila. Mamuli paha, e hoakaka hou ma ia mau mea.