Ka Nonanona, Volume II, Number 3, 5 July 1842 — Page 10

10 KA NONANONA. [IULAI,

wale ai ka ohana a Beniamina? Ua lawe pio paha lakou ma ka aina e? Ua pau paha i ka luku ia e ko lakou poe enemi? Aole. No ka moe kolohe ana o kekahi poe ma Gibea o Beniamina, a no ka manao paa o ko Beniamina, aole e hoopai ia hewa, nolaila, ua pau lakou i ka pepehiia e ko lakou poe hoahanau, e ka Iseraela. Pono e heluhelu ia na mokuna 19, a me 20, a me 21, o ka palapala Lunakanawai, i akaka lea ka loa, a me ka laula, a me ka hohonu o keia hewa, o ka moe kolohe. E nana no hoi ma Samuela lua, ma ka mokuna 13. Manomano ka ino o ka moe kolohe. Aole pau i ka ike ia ma keia ao. Ma kela ao e hiki mai ana paha, e ike kakou.

NA MEA PONO OLE MA HAWAII.

                Olelo na haumana pope ua papa ka lakou kumu Farani ma Kailua ia lakou, aole e pono lakou ke hana. Eia ka hewa, aole i ae mai ke Kanawai o ka aina e noho kekahi poe i ka wa hana aupuni. Aka, manao na haumana pope, o ka lakou mau kumu no ko lakou mau lunakanawai; nolaila hakaka pinepine na haumana a me na kumu pope i na lunaauhau, a i na lunakanawai no hoi. I keia mau la aku nui hele ke kumu Farani ma Kailua ia Malo ka lunakanawai, me ka huhu loa, a me ka leo nui, no ko Malo ae ole ana e kuu wale aku i kekahi haumana pope i pili i ke kanawai. I ae la ke kahuna Farani, me ka huhu "aole oe e lunakanawai maanei. I aku la o Malo, "ea e hoolohe mai oe; like pu; Aole au he lunakanawai, aole oe he kahuna." Pela laua i haha hana ai, hoole aku, hoole mai, hoole aku, hoole mai, a maalili wale ka huhu.
                Ma kela mau malama aku nei, hele kekahi kahuna pope ma Kapalilua nei e hoohaumana i na kanaka halawai oia me kekahi kanaka maimai. I aku ke kahuna ia ia, "mai oe." Ae mai la kela. Olelo hou ke kahuna, "pono oe e bapetemaia, a ola oe." I mai ka mai, "alia, aole akaka." Kahaha ke kahuna, "kahaha, aole pono oe e alia, kauoha mai ke Akua ia makou e hele mai e bapetema ia oukou e ola oukou." Pela laua i kamailio ai a hoi aku o Kaelemakule nana i hai mai ia'u. Ia manawa hele kekahi haumana pope i ka hale o kekahi mai pehu ma Honokua, i aku ia ia, "Ea e wikiwiki oe e bapetemaia oiai maanei ke kahuna a ola oe." I aku ka mai, "ea, e ola anei?" Ae mai la ka pope. "Ae; ua bapetemaia kekahi makapo makai a ua kaakaa loa na maka, ua ike lea! a ua bapetemaia kekahi lolo, a ua ola, ua hele! mai kanalua oe e wikiwiki oe e bapetemaia." Noonoo iki ka mai a olelo mai, "makemake au e ola." O ka hele mai no ia o ke kahuna a bapetemaia ua mai la me ka manao e ola oia: noho oia a anahulu, a anahulu a hala he malama. Olelo oia i kekahi o ka poe puni ole i ka pope, "ka! wahahee keia aoao! I mai lakou ia'u e ola au ke bapetemaia, eia ka, ua kakali wale au a--a hiki i keia wa, aohe ola, oia mau no kuu mai, wahahee keia aoao." Pela lakou e hoohaumana nei i na kanaka ma Hawaii nei, aole anei kela i like loa me ka olelo a ke Akua? E nana oukou ma Tesalonike 2. mok. 2; 9, 10, 11.
POLEBA.

                6. Eia kekahi mea pono ole au i ike ai ma Hawaii nei. O ka pai aina me ka hookolokolo ole. Penei.