Ka Nonanona, Volume II, Number 1, 7 Iune 1842 — Page 4

4 KA NONANONA. [IUNE,

KA NONANONA.
Honolulu, Tusede, Iune 7, 1842.

HE MANAO HOAKAKA.

                Auhea oukou, e ka poe lawe i ka Nonanona; eia no keia manao hoakaka ia oukou; ua pau ka makahiki mua o ka Nonanona. O ka pepa 24, o ka hope no ia o kona makahiki akahi. E pai hou ia ana no nae i keia makahiki hou, a o ka pepa akahi no keia. Elua pepa i ka malama hookahi e like me mamua, a o ka uku no hoi, he hapawalu, he haawi koke ia mai iloko o na malama kolu; a ina hakalia ka uku ana mai, a pau na malama ekolu, alaila, ekolu hapaumi ka uku. Ina ma ka waiwai o Hawaii nei ka uku, he hapaha.

NA MEA HOU.

                I keia mau la iho nei, ku mai la ka moku Merelani mai Mesiko mai, a eia kekahi mau mea a makou i lohe ai ma na palapala ana i lawe mai ai.
                1. Ua aneane kaua ko Mesiko me ko Amerikahuipuia. O ka paa ana o kekahi poe kanaka Amerika i ka hao ha hala.
                2. Eia kekahi; I ka malama o Feberuari ua holo mai kekahi moku kalepa, mai Nu Ioka mai, i Valeparaiso, a malaila mai a hiki loa ma Hawaii nei; o Pitoria kona ina. Ua manaoia, he mau misionari maluha iho, aole nae akaka loa. Iloko o Augate paha ku maanei.
                3. He olelo hou ka makou i lohe iho nei no Farani mai. Ke olelo mai nei ke kuhina nui, aole hiki ke hooko i na kuikahi, no ka mea, aole i ae ke alii i kela mau olelo. Pela mai o Guizot, maloko o kana palapala. Nolaila, aneane maopopo ka manao maikai o ke alii o Farani; ua lokomaikai paha ia ia kakou. Aole paha ia e koi mai i na'lii, e laweia mai ka barani, a me ka waina mauka nei. Pono i na lii a me na kanaka ke nana i ke ano o keia mea. Ua haalele ke alii a me ka poe malalo ona i ka inu rama, a i keia wa ua lokomaikai mai ke Akua, no ka mea, pae koke mai keia lohe i ka manao maikai o ke kuhina nui o Farani. E kupaa kakou me ka hoomaikai aku i ke Akua.

KA AHAOLELO MISIONARI.

                I ka la 4 o Iune nei, pau ka ahaolelo. Eia kekahi mau mea i hooholoia iloko o ka ahaolelo o makou.
                E holo ana o Emesona i Lahainaluna, e kokua i ke kulanui; a o A. B. Kamika (no Oregona mai) kona pani hakahaka ma Waialua.
                E haalele ana o Gulika ia Koloa a e noho ana ia ma Oahu nei; e hai i ka olelo a ke Akua ma kela wahi keia wahi.
                E hoi ana o Lapona ma Lahaina, e lapaau, a e hai aku i ka olelo maikai i na haole no na moku kohola malaila.
                Ua komo o Kauku Iuda no Honolulu nei iloko o ka hana a na lii a ua pau kona noho misionari ana.

KA MAKE.

                I ka la 25 o Mei, make ke kaikamahine uuku o Kauka Aneru, no Kailua. Elizabeth W. kona inoa. Ma Honolulu nei kahi i make ai; o ka hi kona mai, e like me ka mai o na keiki a Kamika a me Keaka Amara i make iho nei. He 11 malama a me na la he 12 ko keia kaikamahine. Ua eha ka naau o na makua, aole nae he manao ino. "Na ke Akua i haawi mai a nana no i lawe aku, a e hoomaikaiia kona inoa," wahi a laua.

Ka Nonanona.
Na LIMAIKAIKA e hoopuka'ku.