Ka Nonanona, Volume II, Number 1, 7 Iune 1842 — Page 4

1842.] KA NONANONA. 4

                Ma na hua.                                                                                  687
                Ka poe ike iki i ka heluhelu.                                                      191
                Ka poe heluhelu pono.                                                              738
                Ma ka helu Naau.                                                                       345
                Ma ka helu Kamalii.                                                                   131
                Ma ka palapala aina.                                                                  344
                Ma ka helu kakau, Hoike Akua, a me ke kakau lima.               25
                Ua hoike mai na makua kekahi ma ka heluhelu.
                Menei; Wailuku                                                                         207
                Hamakua                                                                                        71
                Makawao a me Kula                                                                  126
                Kahikinui                                                                                       18
                                                                                                                      422

                O ke kula Moo-olelo ekalesia kekahi i hoike mai, he poe makua ka nui o lakou. 40
                Ua maikai iki na kula i keia makahiki, ua mahuahua iki ka naauao, a me ke akamai. Aka, he nui no ka hemahema i koe. Eia ka mea o na mea a pau e poino ai na kula, o ke kolohe o na haumana. Aole o kana mai o ke kolohe a me ka walaau: nolaila, aneane hiki ole i kekahi poe ke hoomanawanui. Ahea e pau keia hewa nui hookahi?
                He mea e hauoli nui ai, ka mahuahua ana o ka naauao a me ka ike ma keia pae aina. He mea makemake nui ia i pau na keiki o Hawaii nei i ka lilo i poe akamai loa i ka heluhelu, a i ka helu; i ka palapala aina, a i ke kakau lima kekahi. Nolaila, e pule na hoahanau a pau loa i ka Haku, i kokua mai ia mamuli o keia hana, i hiki wawe ka naauao, a me ke akamai, i loaa i na kanaka a pau loa ka noonoo, a me ka ikaika i ka hana. He mea pono hoi, i noi aku kakou i ke Akua e haawi nui mai i ka Uhane Hemolele, a e hoohanau hou mai i ka naau o na haumana a pau iloko o na kula. Pela, ua pakele loa lakou i ka hewa nui i hiki mai i keia mau makahiki, aole lilo aku i ka diabolo, aole lilo aku i ka Pope-pakele no. A pakele no hoi i ka make mau, a e komo auanei lakou iloko o ka lani. Pomaikai io ka poe i komo iloko olaila.
                Pau ko'u manao. Na'u na ke Kahu.

Wailuku, Aperila 22, 1842.
                E Limaikaika.
                I ka la au i holo aku mai Wailuku nei i Lahaina, ua hoomaka makou e hoike kula ma Wailuku nei. Ekolu la hoike. A po aha, he ahaaina maoli. Hele nui mai na makua a me na kumu, a me na haumana. He ahaaina maikai ia. Aole hana uhauha kekahi, no ka mea, aole rama, aohe barani, aole waina i ike ia ma keia hana. O ka wai anu, oia ka makou e inu ai; nolaila ua pono ka noho ana. A i keia la, aole nalulu ke poo o kekahi o makou no ka inu ana inehinei. E na lii a me na hoahanau, a me na maka ainana, pela oukou e hana'i i ka oukou ahaaina ana, alaila, pau ka hauoli a me ka ino ma keia pae aina.
                A pau ka makou ahaaina ana, alaila, kamailio nui makou. Ikaika ka manao o na hoahanau: o Kaauwai a me Batamea ka i hai mua aku i ko laua manao. Nui ka ikaika o ko laua, ma ka lokomaikai o ke Akua i ko Hawaii nei poe, i kona hoopau ana i na mea ino, lapuwale ma keia pae aina, a i kona haawi ana mai i ka pono oiaio i mea e pani i kolaila hakahaka. Ua olioli au i keia kamailio ana, a pau ia, hoi me ka maluhia makou i ko makou mau wahi e noho ai.
                Ua pau ko'u hoakaka ana i keia manawa. Na'u na GELINA.