Ka Nonanona, Volume II, Number 1, 7 Iune 1842 — Page 1

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." Solomona.
Buke 2. HONOLULU, OAHU, IUNE 7, 1842. Pepa 1.

Moanalua, Mei 23, 1842.

KE KEIKI KAAWE.

                E Kamika e, Aloha oe
                Eia ko'u manao ia oe, ke hoike aku nei au, a na ka Nonanona ia e hai aku. Eia ke kumu o keia hewa, i ka la hoomalolo aku nei, hahaki iho o Akaina i ka ipu ai maka, a waiho aku la i ka hale kiai ma ke kihapai. A i kona hele hou ana aku, nana aku la ia, ua pau ka ipu o loko. Hele aku la ia i ka hale o Buhipaka ma, i aku la, ua pau ka ipu o kuu wahi hale i ka aihue ia.
                I mai la o Buhipaka ia ia, "e kii hoi aku oe i mau ipu, e lawe aku a loko malie paha, o kii hou aku, ua maa iho la". Ae aku la ia, kii hou aku la i mau ipu, a waiho hou aku la iloko o ka hale. A i ke ahiahi o ka la Sabati, hele aku la ua mau keiki nei, o Kaelemakule a me Peahinui, komo aku la kekahi iloko o ua wahi hale nei, a haawi ae la i kekahi, holo aku la laua a loko o ka hau, wahi iho la o Kaelemakule i kana ipu, ai iho la laua, a koe ka alualu, hoihoi aku la na ka puaa, a kiola aku la, aole nae i ai ka puaa. Ike mai la o Buhipaka; i mai la, ma hea kau ipu? i aku la ua keiki nei, "no kai ka'u ipu" I mai la kela, e hai mai oe; ua loaa olua ia Nawaa. Makau iho la ua keiki la, ae aku la, "Ae, ua hewa maua, ua kii aku nei i ka ipu," a kakahiaka ae o ka la noa, o ka la 23 ia, hookolokolo ia iho la laua, a ili ka hewa iluna o laua, o ka uku iho la no ia. Lohe ae la ka makuakane o Peahinui; i mai la ia ia, "mai ai mai oe i ka makou ai, o ko wahine ke ai mai me makou, o ka aihue aku la no kau ai". Hilahila iho la ua keiki nei, huli aku la ke alo i kuono. Ike aku la ka makuwahine i ka lio e holo mai ana, puka ae la ia ma ke kala o ka hale, nana aku la; puka ae la ka wahine a ua keiki nei, e hele i ke kula, a ku lakou mawaho o ka hale, hawele ae la ua keiki la i ka malo i ka paia o ka hale, a hooae la i kona puu iloko o ua malo nei, kaawe iho la. A lohe ka makuwahine i ka leo i ka auwe ana, holo aku la ia iloko, nana aku ka hala, ua aneane ia e make. Ue nui ae la ia, a wehe ae la i kona puu, holo mai la ka wahine, ue ae la; olo ae la ka makena, ue ae la koha mau makamaka a me na mea a pau: a mahope ola hou ae la ua keiki la. No ka hilahila keia make ana la ea. Auhea oukou e na keiki imi naauao mai hoohalike oukou me keia keiki ka naaupo.
Na KAPAHI.

KA POPE MA KAUAI.
Kauhakeke, Maraki 31, 1841.

                Auhea oukou, e ka poe naauao mai Hilo a Niihau. Eia kuu manao hoakaka ia oukou, no ka mea, ua hookolokolo iho nei au me kekahi kumu Pope ma Kauhakeke, i Pilaa nei, i ka la 31 o Maraki.
                Eia nae ke kumu o ko maua hookolokolo ana. He keiki, ua hala na makahiki 17, a ua paa oia ma ka aina. Malaila, ua mau kona noho ana maluna o ka aina; hele no oia i kela la hana keia la hana o ke Alii, a me ko'u la hana; pela no ka hele ana o ua keiki la a hiki i ka wa