Ka Nonanona, Volume I, Number 23, 10 Mei 1842 — Page 109

109 KA NONANONA. MEI,

                Eia kekahi; olelo kekahi poe haole noho malie a me ka maikai, e pono no e kau hou ke alii i ke kanawai, e papa ana i ka rama, aole e hoopaeia iuka nei ma keia pae aina a puni. I iho la kekahi, "huhu auanei na lii o Farani, a hoopilikia hou mai." Hoole keia poe haole, aole huhu: ua hilahila loa i kela hana ana mamua. Na na lii e noonoo i keia.

KA MELE
HE KANIKAU ALOHA NO KAUHIAHIWA, KO MAKOU HOAHANAU I MAKE AKU LA.

Aloha nui oe e Kauhiahiwa,
Ka haumana o ke kulanui i make aku la.
I hele aku la e noho pu me Iehova;
Ka Makua mana loa.
Piha ka lani a me ka honua i ka mana,
Ua ike aku oe i kona kini lehu e hoonani ana, kona poe anela hemolele.
Kona poe koa a me kona umi tausani tausani hiki ole ke lehu aku.
Ko laila poe pono a pau,
Aia oe ke ike la i ke kamakoa nui ikaika, lanakila.
Ke Alii nona na wahi a pau loa
Ike oe i kona mau pitimana,
A me kona poe hookani pahu.
Lohe oe i ka leo o ka Vironeri e kani ana,
A me ka Violaumi e hone ana,
I kona mau Lira e oeoe ana,
Kona mau pahu kani e nunulu ana,
Na mea maikai a pau kau e ike la.
Aia hoi ka leo i poe mai maloko o ka puaneane
I lohea ma na kihi a pau o ka honua,
A me ko makou aina nei.
"E hoonani ia Iehova nani loa,"
E halelu aku no kana mau hana mana,
E mililani aku ia ia ma ke aouli o kona hanohano.
E kanikau ia ia, e like me ka manoanoa o kona nani.
E hula aku me ke kani ana o ka pu.
E haa aku ia ia me ka Violaumi, a me ka Lira,
E halelu aku me ka pahu kani a me ka haa ana.
E halelu aku ana me ka pahu kaula, a me ka ohe,
E halelu me na kimepala kani nui,
E oli me na kimebala kani iki,
E hoomaikai me na kimebala kani kiekie,
E wailana me na mea hanu,
Kui ka hekili ma kona mana,
Ka leo i lohea maloko o keao polohiwa.
Maluna o ka mauna o Sinai,
He uila ka maloko o ke ao,
Hoike ae la ka, ka malamalama i kona ano,
Hai ma ka lani i kana olelo.
Wehe mai ka Baibala i ko ke Akua manao,
O ka nani kupanaha i hoikeia i ka la Penetekota.
A me ka anapu i loaa ia Paulo i kona hele ana,
A me ko Elia pii ana maloko o ka puahiohio i ka lani a me kona hoomaloo ana i ka wai o Ioredane.
Ka ke Akua hana ma Aigupita.
Na mea e ae he nui wale,
Na ke Akua wale no neia mau mea,
O neia mau mea a pau kau e ike la.
Aia hoi oe i kahi ao mau loa, po ole,
E Kauhiahiwa e!
Aia hoi oe maloko o kahi hiluhilu,
Kuu ke kino, manaolana ka uhane,
Make lanakila ana, haalele i keia ao,
E lele aku i ke ola mau, nani e!
Ke noho nei makou i ke ahulau o ke ao nei,
Ke ao nei pokole o ka noho ana,
Aole liuliu a pau koke no,
Na la nae pokole nei,
O kou aloha e oni nei,
Pau kou ike ana i ka lapuwale,
Ke milimili la oe i ka maikai loa
Pau ka luhi, pau ka eha, pau ia Iesu,
Maha e, maha loa. HALEOLE.

AHAOLELO MISIONARI.

                O ka la apopo, oia ka la i hoakakaia no ka ahaolelo o na misionari. Aole nae pau mai. Eia no o Wini, Gulika, Lafona, Aneru (no Hawaii) a me Bihopa, oia wale no. O ka hiki mai no nae koe o kekahi poe.
                Ua Oleloia, o ka hoi mai koe o ka moku kalepa o Merilani (Maryland) no Mekiko mai (Mazetlan;) a nana no e lawe mai i ka palapapala he nui mai Amerika mai.

NA LIMAIKAIKA e hoopuka'ku.