Ka Nonanona, Volume I, Number 23, 10 Mei 1842 — Page 107
107 KA NONANONA. MEI,
Lahainaluna, Mar. 30, 1842.
Aloha oe e ka Nonanona, ke hai aku nei au ia oe i ka mea hou au i ike iho nei, a he mea haoli loa no hoi. I ka ha o ka hora hele aku la makou me na'lii a me na kanaka i ka halawai. Ku mai la o Balawina e hai i ka olelo o ka halawai ana. I mai la ia, "E haalele i ka inu rama a me ka waina, a heluhelu mai la oia i ka olelo i kakauia, penei.
"O makou ka poe i kakau ia ka inoa ma keia palapala, ua hui makou e imi i mea e pau ai ka inu ana i na mea ona a pau ma keia pae aina.
"Nolaila, ke hoohiki nei makou i mua o ke Akua a me na kanaka, e waiho loa aku i na mea inu a pau e ona'i. Aole e inu rama, aole e inu waina, aole ia mea aku ia mea aku e ona'i. Aole e inu hoomahui; aole inu no ke aloha, aole no ka lealea, aole makou e kuai, aole haawi aku ia hai, aole e hana i kekahi o keia mau mea a pau ma ke ano ku e i keia ae like ana; aka e hana no makou i na mea a pau i ku pono ia makou ke hana, i mea e pau ai ka inu ana o na kanaka a pau."
A lohe ke alii o Kamehameha III i keia olelo ana, alaila ku mai la oia e kakau i kona inoa ma keia pepa hoohiki, a hai mai la hoi i kona manao penei.
"Owau kekahi i makemake e kakau i ko'u inoa ma keia pepa. Aole nae no keia olelo ana'e nei kou manao ana e kakau i ko'u inoa ma keia pepa; aka hoi, ua noonoo e no au mamua, a maopopo no ia'u ka hewa o ka inu rama. Eia nae ke kumu o ko'u noonoo ana i ka hewa o ko'u inu ana i ka rama. Ua hooliloia mai hoi au, he makua no na mea a pau, a me ke aupuni a pau, a me ka hooponopono maluna o na'lii a pau, a nolaila, hilahila maoli no hoi au, aole no hoi au e pono ke hoopakiki ma ka inu rama. Oia ke kumu o ko'u kakau ana i ko'u inoa ma keia pepa."
A kau iho la ia i kona inoa; oia hoi ka mua o na inoa a pau i kau ai.
Kamehameha III.
Kekauluohi.
Haalilio.
Kanaina.
Keoni Ana.
Ioane Ii
Leleiohoku
Kekauonohi.
Keliiahonui.
Paki.
Mose Kekuaiwa.
Lota Kamehameha.
Alexander Liholiho.
William Lunalilo.
Iane Loeau.
Berenise Pauahi.
Abegail Maheha.
Oia hoi ka poe alii i kakau i ko lakou inoa a'u i ike ai i kela wa hookahi, a o ka poe hoi kekahi i kohoia, a me ka poe lunakanawai, a owau no hoi kahi. A mahope iho, kakau iho la na mea a pau, o na hulumanu a me na alo alii a pau, a me kekahi poe alii no hoi ma ia hope iho. A ike na mea a pau i ke kau ana o ke alii i kona inoa, a me ko na 'lii a pau, alaila nui ka hauoli o na mea a pau e inu ole i ka rama. Alaila manao iho la au, o ko ke Akua hora keia e hoopau ai i neia mau mea ino e make mau ai; no ka mea, ua waiho ia na mea a pau loa iloko o kona lima, e hiki no hoi ia ia ke lu aku i na mea ino a pau loa. Ia wa no, olioli iho la no hoi au i ka pule a ka poe haipule io, a ua ko io maoli no hoi ka lakou pule ana i ke Akua penei.
E ko makou Akua, e hoohuli ae i ke alii nui ma ka pono, a me na'lii a pau loa, a e hoopau ae i na mea hewa a pau mai keia aupuni aku. No ka mea, ua olelo no ke alii mamua penei. "Ke haawi aku nei au i keia aupuni a pau i ke Akua, a o ke kanaka i ao i ka palapala a malama i ka pono o ke Akua, oia ko'u kanaka," A e hpohuli mai oe i ke alii e like me kona haawi ana i keia aupuni a pau i ke Akua."
Oia no hoi ka pule a na mea haipule e pule nei i ke Akua, a ua ko io no ia mea. PAULO KANOA.
Lahaina, Maui, Mei 4, 1842.
E Limaikaika. Ua hoihoiia mai nei Kinimaka i keia la, hora eha. E hai aku oe ma ka Nonanona, eia kona mea i hoihoi ia mai nei. Ua noho malie loa oia i keia mau makahiki ekolu, ma ka