Ka Nonanona, Volume I, Number 22, 26 April 1842 — Page 102

102 KA NONANONA. [APERILA,

KA AHAOLELO O NA LII A ME KA POE I KOHOIA.

                Ma Maui no au a hoi mai nei. He nui na mea a'u i ike ai, a e pono no ke paiia, aka, ua piha e keia pepa. Ma kela pepa paha e paiia na mea o Maui.
                O ka ahaolelo o na 'lii ka mea nui a'u i ike ai, a eia malalo kekahi mau mea a lakou i kuka ai i keia mau la. Ua ae mai lakou i ka pai ana ma ka Nonanona, aole nae pau na olelo i loaa ia'u ma keia pepa. Aole holo lea keia mau mea, ua noonoo wale no.
                Ma ka ahaolelo ana, ua kaawale na 'lii maoli, a me ka poe i kohoia. Iloko o ka ahaolelo alii, aia no o Kauikeaouli, Kekauluohi, o Kekauonohi, o Paki, o Keohokalole, o Leleiohoku, o Kealiiahonui, o Kanaina, o Ii, o Keoniana, a me Haalililo.
                Iloko o ka ahaolelo o ka poe i Kohoia, aia no o Malo laua o Kapae no Hawaii; o Davida Malo, laua o Kamakau no Maui; o Halai no Oahu, a o Davida Papohaku no Kauai. I ko'u ike ana, maikai ka ahaolelo ana; ke imi pu nei i na mea pono ai ke aupuni. Mai ka hora 9 o ke kakahiaka a hiki i ka hora 12 ka manawa e ahaolelo ai, i kela la i keia la.

                Aperila 18. I ka iwa o ka hora halawai na 'lii, a kamailio i ka hihia, no ka hopu ole o na Makai i ka poe e ku wale ana ma ke alanui, a kii ia o Kuakamauna a kauohaia'ku la oia e hana.
                Kamailio no hoi na 'lii ke komo mai o ka poe i kohoia, a holo ka olelo e imi kaawale ka poe alii, a kaawale noi ka poe i kohoia.
                Kamailio no hoi na 'lii no ka hihia o na makaainana; no ka hele i kahi loihi, a maopopo ka hewa o na luna. Kamailio ho hoi lakou no ka molowa o na makaainana i ka hana, aole nae i holo ka olelo.
                Eia ka olelo i hooholoia.
                E holoi i kekahi hua ma ke kanawai XXVII, Aoao 124, pauku 3 ma ka hope o ka pauku. Eia ka hua holoi, "eono" a eia ka hua hookomo hou "elua." Penei e heluhelu ai, elua dala no kela kanaka keia kanaka i hoihoiia pela.
                A pau ia olelo ana, hookiia ka hana, apopo halawai hou.
                Aperila 19. I ka iwa o ka hora halawai na 'lii, a kamailio lakou no ka hihia ma Hilo i Hawaii, no ka palapala hoopii a Kaapa. No ke kapu o ka niu, a me ke ao kula i na lunakanawai, a me na hookolokolo, a hoopau ae la na 'lii ia mau mea. A kamailio hou no hoi lakou no ka ia ku, ua kapuia ka ia hookahi o na ia ku ke loaa i ke kanaka, aole kapu oia ia.
                A hoopau no lakou ia hana, manao lakou, aole hihia no ia mea, a waiho lakou a hiki mai o Kuakini, alaila kamailio hou ma ia mau hihia. A kamailio hou no hoi lakou no ka hele ana o ke kanaka i kahi loihi e hana'i i ka la paahao, aole pono ia hana i kahi loihi, e hele ai ke kanaka.
                Kamailio hou lakou, no ka hele ana o ke kanaka i kahi loihi loa, a hala na la paahao; a e uku no ia i kona mau la i ke 'lii a me ko ke konohiki.
                A kamailio hou lakou, no ke ku ana o ka lepa hana i kahi loihi o ka hana, a hina e, aka, e ku no ka lepa ma kahi kokoke o ka hana, malaila e hina pono ai ka lepa. A kamailio no lakou no ka lawe ana mai o ka luna i na ia eono, no ka la hana, a loaa ole, lilo mai na la o kanaka e imi i na ia eona.

KA KE AKUA BUKE.

                Ua oi ka maikai o keia buke mamua o na buke e ae a pau loa. I ka manawa a oukou e heluhelu ai e pule aku i ke Akua e ao mai i ke ano o kela pauku o keia pauku.

NA LIMAIKAIKA e hoopuka'ku.