Ka Nonanona, Volume I, Number 18, 1 Malaki 1842 — Page 86

86 KA NONANONA. [FEBERUARI.

puni. He hana maikai keia. E na 'lii a me na kanaka ma Kauai, e malama loa oukou i ua kula la; e kokua ia ia me ka molowa ole a me ka hoomaloka ole. Mai manao oukou e pomaikai ana na kanaka o Kauai, ke ole ka naauao; aole loa pono ka lahuikanaka naaupo.

Honolulu, Oahu, Feberuari 14, 1842.
                Auhea oe e ka Nonanona?
                E pono ia oe ke hoolaha aku i keia manao malalo iho nei, ma na wahi a pau au e hele ai ma keia pae aina. Eia ua manao la; i kekahi ahiahi, hele aku la au ma Polelewa, kono mai o'u hoahele e komo iloko o kekahi hale kuai rama; ae aku au, "ae, e hele iki kakou e nana i ke ano o ka lakou hana," hele aku makou; nana aku au he nui na kaikamahine e hele ana me ka ona; kahaha iho la au me ke kanalua; i mai kekahi kaikamahine ia'u, 'ua hehena au;' i aku au ia ia, 'mai hana hou ea;' ae mai oia, ae. A mahope iho kiai aku la au a ike i na keikikane a me na kaikamahine, e noho ana na kaikamahine ma na uha o na haole me ka olelo ino, pelapela, a haumia a me ka hoopailua. Alaila noho iki hou makou a kokoke e kani ka pu alua, oia ka hora ewalu; nui loa mai la ka haunaele, a me ka aneane hakaka. A no keia haunaele ana, hookaawale na haole i ka puka no ua mau kaikamahine nei, a pau lakou malaila e pee ai, i ka makau i na makai. E, auhea oukou e na makua, ke ninau pakahi aku nei au ia oe e kela mea keiki keia mea keiki. No ke aha la e hele nei kau mau keiki i ka inu rama? Eia paha, no ka ike ana paha o kau keiki i kou inu rama a me kou puhi baka, nolaila, lalau kau keiki a hana e like me kau hana ana: nolaila pono ole kau keiki, lilo i mea auwana, i hehena, a i mea lapuwale. E Auhea oe, aloha ino kau mau keiki e haalele oe i ka rama, e ka makua inu rama ole, e ao oe i kau mau keiki me ke akamai, no kou hawawa paha i ke ao ana. Eia ka pono, a ike oe e kolohe ana, eia ka mua, e ao aku me ka oluolu, a i lohe ole, e hahau ma ka lima a ma ka lemu paha; ina he hewa uuku e hoemi i ka hoopai; ina he nui mahuahua ka hoopai e like me ka nui o kona hewa. E hana oe i keia mau mea a i lohe ole, kau oe i mea kaumaha iki, a pela aku ka panee ana e like me kou manao: aia a lanakila kou manao maluna o ke keiki, alaila pono, pela oe e ao ai. Aloha oe.
Na'u na K.

KA PAKE KAAWE.

                I ka la 24 kokoke i ka wanaao, kaawe o Keoni Pake ia ia iho a make loa. Ia po e moe ana ia me ka wahine a kekahi Pake, a loaa iho la laua i na makai; lawe aku na makai i keia wahine a paa i ka hao; noho o Keoni iloko o kona hale e kaawe koke iho ma ke kaola o ka hale. He oiaio ka olelo o Solomona, 'hahai ka poino i ka poe hewa.' Ka lua ia o na Pake i kaawe.
                I ka halihali ana i ke kupapau i ka lua, he nui na mea kani, a me na kanaka a me na Pake. He hanohano no ke kanu ana. Eia no nae ka pono i ko'u manao, ina i kaawe hou kekahi, e kanu koke iho ia, mawaena konu o ke alanui, i hehi na kanaka a me na holoholona a pau maluna ona. Pela ma na aina naauao.

HE WAHI MANAO NO GEORGE BUSH.

                Eia kona manao; o ka poe kuai lio me ia mamua, (he lehulehu ia poe,) e hoihoi iki mai ma kona wahi, a nanea e kau i kona hoailona ponoi maluna o lakou, i akaka nana mamua, a i hiki ole i kekahi ke hoohewahewa a me ka aumeume paha.

KA MAKE O KEAWEAWEULA.

                I ka la 14, o Feb. kona make ana. Aoe i lohea kona mai e make ai.

NA LIMAIKAIKA e hoopuka'ku.