Ka Nonanona, Volume I, Number 17, 15 Pepeluali 1842 — Page 82

82 KA NONANONA. [FEBERUARI.

mea ino maoli, e like me kona ino maoli. Eia ua mea ino nei, o ka heenalu. I ko'u noho ana ma Ohikilolo nei, nui loa ka palaualelo o na kanaka o keia wahi, no keia mea ino i hoike ia mai nei. O keia mau ahupuaa ekolu; huipu lakou ma keia hana palaualelo, o na keiki, a me na makua.
                Eia ko'u mea i manao ai, he hewa ka heenalu; i ka poi ana mai o ka nalu o Kaea i Ohikilolo nei, hele nui mai na kanaka i ka heenalu, o ka noho no ia a hala ka wa pono o ka hana weuweu. Oia ka'u mea i manao ai he hewa ka heenalu. Eia wale no ka wa e hana ai. O ka hora 5 o ke kakahiaka, a me ka hapalua iho, a o ke ono no hoi. Oia ka mea o'u i manao ai, he hewa ka heenalu ia manawa.
                Eia kekahi mea a'u i manao ai he hewa ka heenalu: O ka palaka maoli kekahi mea o'u i manao ai, ua hewa ia hana ana. Aka, ea? O ka palaualelo ka hewa nui loa; Oia ko'u mea i manao ai' ua ku e i a olelo o ke Kalaiaina, a me ka ke Akua olelo. Eia ka'u olelo i manao ai, ma ka Hebera 11: 1—13. Pela ko'u manao hoohalike. Ua manaoio no paha lakou i ka mahi ai, aole nae lakou i hoomau ma ia hana maikai.
                Eia kekahi mea pilikia o'u, no na keiki, i ka paa mau i ka heenalu, i keia la kula, kela la kula: O ka hewa nui i loaa mai ia'u i ko'u mau malama eono i noho iho nei ma Ohikilolo nei.
                Hoike pinepine aku la au i na makua e malama i ka lakou mau keiki, aole nae hoolohe mai; nolaila, ke nonoi aku nei au ia oe e Mataio Kekuanaoa, e kapu ka heenalu ma Ohikilolo nei, a me na wahi heenalu no o keia paeaina a pau.
Na PAALUHI.

POINO.

                I ka la 9 o Feberuari, pii iluna o Mi. Farani he kamana, laua o Wilamakini, he hoahanau, e kokua ana ia ia e kapilipili i kekahi kaola, o ka hale pule hou o makou, a haule iho la laua ilalo maluna o ka papa hahi, a eha loa. Ua haki ka iwi wawae o Mi. Farani; elua wahi i haki ai. Aole i haki kekahi iwi o Wilamakini; ua eha loa no nae. No ka laau kahi a laua i ku ai ka hewa; he wahi laau nawaliwali, a hai iho la; o ko laua poino no ia.

NA KULA.

                Ua pilikia na kumu kula ma Oahu nei i ka uku ole ia. Pela no hoi ma Kauai. Ua oleloia, kokoke haalele na kumu i ke ao, no ka uku ole ia. No wai keia hewa? No na kumu anei? No na kahu kula anei? No na'lii paha?

                Ua ku mai nei kekahi moku kiakolu, o Chacabuco kona inoa, no Valeparaiso mai; ua lawe mai ia i kekahi ukana, a me na palapala mai Amerika mai. Na ka moku kalepa, o Lausanue i lawe mai i keia ukana i Valeparaiso, a ua hooiliia maluna o keia kiakolu. Ua holo ka Lausanue i Beritania.
                I ka la 11, hoi mai la ke kiakolu o Joseph Peabody no Paniolo mai; o Dominis ke kapena. Eia no Mi. Ioane; ua paleia kona nawaliwali.
                I ka po aono iho nei, ku mai ke Kaulika me na'lii Beritania elua; eia na inoa, Sir George Simpson, a me Dr. McLaughlin. He mau alii oluolu a me ka lokomaikai o laua. Ua kokua pinepine o Dr. McLaughlin i na misionari ma Oregona.
                I ka la 13 Ku mai ka moku Biwa no Beritania mai,

Na LIMAIKAIKA e hoopuka'ku.