Ka Nonanona, Volume I, Number 17, 15 February 1842 — Page 80

80 KANONANONA. [FEBERUARI,

                Eia keia manao hou, i keia mau la hele mai nei ka makou kumu mai Waimea mai, a ua pule hoomau makou. Ua nui kanaka. Ua hele mai ka poe pope a pau e noho ana i ka halawai, ua kamailio pu me ke kumu, ua oluolu. I ka la Sabati ahaaina makou i ka ahaaina a ka Haku: akahi no a hanaia keia oihana ma keia aina. Eha hoahanau hou i lilo, a bapetizo ia. Aloha oe,
Na'u na ABELA KAHIKIAE.

Ianuari 17, 1842.
                Aloha oe e ka Nonanona, Eia ko'u manao ia oe; i ko makou halawai mau ana me na hoahanau, me ka paipai ia makou iho; a me ka hoike aku i na mea ano ino, ua ae mai kekahi poe e haalele, aole e puhi hou i ka baka, a, mahope pupuhi hou no. He mea kupanaha ka ae ana e haalele, aole ka e hana e like me ia.
                Nolaila he kaumaha ko'u naau i ka hoi hope ana o kekahi poe. Eia kekahi, e na makua mea keiki: eia ko'u manao ia oukou, mai hoopai i ka oukou mau keiki me ka lima paumaele, a me ka waha haumia; e ao mua oukou ia oukou iho, e haalele oukou i na mea ano ino a pau. 1 Tesalonike 5: 22. Eia kekahi; i ko'u lohe ana i ka manao o kekahi keiki uuku, ewalu ona makahiki. Hoopai aku la ka makuahine o ua keiki la ia ia; i mai la kana keiki ia ia, "no ke aha la oe e hoopai mai nei ia'u, he puhi baka no hoi oe, hoopai ana no hoi oe ia'u;" nolaila noonoo iho la ka makuahine me ke aloha aku i kana keiki. No ia leo a ke keiki, ke manao nei ka makuahine e haalele i ka baka. Na S. KUAANA.

HONOLULU, Oahu, Ianuari 24, 1842.

                Aloha oe e ka Nonanona. He wahi manao hoike ia oe, Ua make o Kawahalea, i ka la 21 o Ianuari, i ka hora 12, awakea, oia hoi ka hora hope o ke kakahiaka, kona make ana. I kona wa e ola ana, hooikaika aku la au ia ia, a me ka'u niele nona iho.
                E mihi oe. Ua ike paha ke Akua i ka nui a kau hana hewa ana, a me kau hoino ana ia ia? Ae mai o Kawahalea.
                Ua hewa io au, he nui kuu hewa, he nui kuu mea i hana hewa ai i ke Akua. Nolaila, olelo hou aku la au. E hooikaika, e hoomanao ia Iesu. Oia ka'u olelo ia oe i kou wa e ola ana ma keia ao. Ae mai la kela. I kona wa i kokoke ai e make, hawanawana mai oia ia'u, a me makou; e uwe mai oukou ia'u, a i ola aku au, i ike aku au i ka oukou uwe ana mai. A mahope, hoomanao hou oia i ke Akua.
                Nolaila, aole i maopopo loa kona pono, he kanalua kona, iloko o kona manao. Na WAIAUIA.

HONOLULU, Novemaba 8, 1842.

                E ka Nonanona e, Aloha oe.
                I ko'u noho ana ma Hauula i Koolauloa, ike iho la au i kau ninau penei. He kahu lio o Kapaekukui i noho ma Puna: a i ka wa i houluulu mai ai oia i kona mau lio iloko o ka pa, hele ae la o Kanekoa, i aku la oia penei, "Aloha oe, e Kapaekukui me kau mau lio hookahi hanere." Pane mai la Kapaekukui, "Aole he hanere na lio o'u, aka, ina i haawi hou mai oe i na lio i like ka nui me neia poe lio, a haawi mai no hoi alikealike me ia, a haawi hou mai no hoi i 7 1/2 lio, alaila ua loaa ia'u