Ka Nonanona, Volume I, Number 17, 15 February 1842 — Page 79

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." Solomona.
Buke 1. HONOLULU, OAHU, FEBERUARI 15, 1842. Pepa 17

Kaununui, Niihau, Oka. 16, 1841.

                Aloha oe e ka Nonanona; Eia au ma ka welau komohana o ke aupuni o ke alii. He wahi mehameha ko makou, a i keia mau la, ua hiki mai nei oe ka hoakamailio. He pono kau i hookaka mai ia makou. Nolaila, aloha au ia oe. A eia no ka'u e hoike aku ia oe. He oihana hou i hiki mai nei iwaena o makou i keia makahiki i hala ae nei. Ua kapaia na ka Pope. He aha la keia mea a ka pope? He mea kupaianana i kuu ike ana aku! He mea e no paha la! Me he mea la kupono i ko ke Akua makemake i ka olelo ana mai o ka poe nana i hoolaha mai nei. Aka, i kuu ike ana ia ia, ma ka hoomaopopo ana, he kue i ka ke Akua, a he hooke i ka ke alii; nolaila, e hoike aku au ia oe i kana hana maanei. Ina i kuhihewa au i kona ano, e hoike pono mai oe ia'u, no ka mea, he kuaaina au. Penei ka hiki ana mai ma Niihau nei. He wahine, o Kahuanuioloalu kona inoa. He wahine ia na ke Kahumoku, na Limalimaiole. No keia aina no, a ua noho aku i Honolulu. A i keia makahiki, holo mai nei no ia wahine a hiki ma Kaununui nei. I mai la. "Eia ka mea maikai la. Eia ke Akua hou no kakou. He Akua waiwai, he Akua lealea. Ua ae na'lii i keia Akua. Ua huli o Kekauonohi nona keia aina. Ua huli Kuakini; a ua huli o Kauikeaouli ke alii nui, no ka lawe ana o ka Farani i kona dala, ua pau lakou i ka huli, eia no mamuli o keia Akua hou."
                I mai la kela wahine ia'u e huli au mamuli o ka Farani, a hoi aku ia i Honolulu e olelo aku i kana kumu, a nana no e hooili mai i ka lole ia'u. I aku la au, nolaila ka! no ka waiwai e huli kaua mamuli o ka pope? Ae mai la, "ae; nolaila, mamua ua hooikaika wale au mamuli o ka olelo a ke Akua, aole i loaa iki ia'u ka waiwai; aole akahi dala, aole hainaka hookahi, aole pine iki, aole loa no. Eia ke Akua waiwai." Kaena ae la ia imua o kanaka. I aku la, "Ea, e nana mai oukou ia'u, he kapa maemae ko'u; aole pela i kela manawa, he Akua maikai keia, he Akua waiwai. I aku la au, "Aole pela o Iesu: aole no i haawi mai ia i ka lole, a i ke dala e huli na kanaka mamuli ona. He mea hoopunipuni keia au i hana mai nei, o hoi oe, aole au e ae aku i kau." Pela wau, no ka mea, i kuu ike ana he kue keia i ka Iesu hoohaumana ana, a me ka Petero, a me ka Paulo. Aka, ua ae no kekahi poe o keia aina. Ua haalele lakou i ka ke Akua olelo, ua haalele i ka'u kula, aole i ae i ko ke alii kanawai kula. Ua hele na kamalii, na kane, na wahine i ka lealea, i ka hula, e like me ka wa kahiko. A i keia manawa ua akaka ka hewa o kekahi kumu a lakou, ua kolohe maoli ia i na haumana wahine ana, a ua hoouku ia i ka hana, aia no ia ma ke alanui: a o ka nui o na haumana ua hoi mai. Ua ike, wahi a lakou, i kela mea wahahee, ua maopopo ka hoopunipuni o kela Akua waiwai, ua pau ka makemake.