Ka Nonanona, Volume I, Number 15, 18 January 1842 — Page 67

KA NONANONA.

"E ka mea hiamoe, e hele oe i ka nonanona, e nana i kona aoao a e hoonaauao iho." Solomona.

Buke 1. HONOLULU, OAHU, IANUARI 18, 1842. Pepa 15.

HALE PAI PALAPALA.

                Ke paiia nei ma ka hale pai palapala Kauoha Kahiko. Ua paa i ka paiia mai Kinohi a hiki i II Na Lii. Ua paiia ma na hua nui a me ka moakaka.

                Eia kekahi olelo e paiia nei, o ka Ui hou, no na mea o ka Uhane a me ke Akua.
            O ka Himeni Kamalii, a me ka Helu Kakau kekahi. Eia kekahi olelo hou loa; ua kapaia 'He Hele Malihini ana mai keia ao aku a hiki i kela ao; he olelonane i hoohalikeia me he moe uhane la.' Na Ioane Buniana he kahuna pule kaulana ma Beritania i kakau mua i keia olelonane. Eia ke kii e akaka'i:
            O kela kanaka e hiamoe ana iloko o ke kii, o ua malihini nei no ia e moe uhane ana, a o Keristiano kona inoa. Ua unuhiia kekahi mau olelo no Ioane Buniana, i akaka ia oukou kona ano kamahao.

KE OLA ANA O IOANE BUNIANA.

                "O IOANE BUNIANA, ke kahunapule nana i kakau i keia HELE MALIHINI ANA O KERISTIANO, a me na palapala e ae he nui, ua hanau oia ma Eleseto, e kokoke ana me Bedefoda, ma Enelani, i ka makahiki 1623.

                "He kanaka ilihune kona makuakane, he kahuna kuikeleawe, a ua aoia hoi kana keiki, o Ioane nei, i keia hana hookahi. Aole i haaleleia o Ioane Buniana e lilo i ka naaupo e like me kekahi mau keiki ilihune e ae. Aka, ua hoounaia oia e hele i ke kula, a ao no ia i ka palapala i kona wa uuku. He keiki hewa loa no nae ia, i kona wa ui, lilo paakiki loa ia i ka paani, ka uhauha a me ka hoohiki ino. Ua oi aku kona hewa imua o ko na keiki e ae ma kona wahi, a lilo ia i alakai a i pookela no ka poe hana kolohe. Elua mau hewa nae i hana ole ai kela: aole ia i inu rama, aole hoi i moe kolohe; na ke Akua ia i malama mai i keia mau mea ino loa, i haule ole ai kela iloko o ka make ilaila.

                "Iwaena o na hewa a pau ana i hana'i, aole ke Akua i waiho wale ia ia, me he keiki la no ka make. Ua ao pinepine mai kona Uhane ia ia, me ka hooweliweli i kona naau no na mea a pau ana i hana'i. I na la, ma ka hewa kana hana ana; a ma ka po, puoho pinepine ia i na mea weliweli. O ka makau i ka hoopaiia mai e ke Akua, oia ka i hoopili mai ia ia i na manawa hana lealea. O kona waha ka i olioli, a o kona naau ua kaumaha i ka makau Hoopakele mai ke Akua i kona ola i na manawa e kokoke ana ia i ka make. Haule iho la i kekahi manawa