Ka Nonanona, Volume I, Number 12, 7 December 1841 — Page 45

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." Solomona.
Buke 1. HONOLULU, 0AHU, DEKEMABA 7, 1841. Pepa 12.

KAHI MELE.
HE MAU MEA KAPU I KE KULA SABATI.

Ua kapu e na kamalii,
Ke akaaka mai,
Maloko o ke kula nei,
Ke kula Sabati.

Ua kapu i neia kula hoi,
Ka hawanawana nae,
A pela no ka paani,
Ka lealea ae.

Ua kapu hoi ka walaau,
Ke kamailio no,
A pela no hoi ka lalau,
O ko oukou manao.

Ua kapu no ke hakaka,
Ke alapahi ae,
Ua kapu hoi ke hoopaapaa,
Ke ku e ia hai.

Ua kapu hoi ka lauoho,
I kahi oleia'e,
A paapu i na uku poo,
A ikea wale mai.

Ka lima lepo kapu no,
Ka maka piapia,
Ke kapa ekaeka ou,
Ka lole weheia.

Ua kapu hoi ke puka ae,
Mawaho kamalii,
A haunaele wale mai,
Ke kula Sabati.

Oia mau mea la, ea,
Ua ino - kapu mau;
Mai hana e na kamalii,
Ia lakou a pau.

NO KA MOE KOLOHE. Helu 1.

            Na ke Skua au i hoonoho i kiai no kekahi ekalesia a me kanaka o Hawaii nei. A i ko'u ike ana i ka mea ino e make ai mamua o ka pahikaua, a me ka mai maoli, a me ka hana ino a ko Roma poe, ke manao nei au e pupuhi i ka pu, a e ao aku i kanaka. O ka moe kolohe, oia ka hewa a'u e ike nui ai me ka eha o ka naau, a me ka makau nui, o hiki wawe mai ka huhu o ke Akua, a pau koke i ka hoohiolo ka ekalesia o ka Haku ma keia pae aina, a pau i ke ale ia keia lahuikanaka. No ia mea, ke manao nei au e hoakaka aku i ko ke Akua manao i keia hewa, i lohe na'lii a me kanaka mai Hawaii a Niihau, a i malama lakou i kona ao ana, "O ka mea pepeiao lohe, e hoolohe ia."
          Ma ka Baibala kakou e nana'i, no ka mea, malaila kakou e hookolokoloia'i i ka la mahope.
          Pehea o Ieho va i kona iho ana maluna o Sinai "maloko o ke ahi, a punohu aku la kona uwahi me he uwahi umu hao la, haalulu nui iho la ka mauna a pau?" E hoolohe mai i kana, "Mai moe kolohe oe." Oia; Ua pili ka hapaumi o kona mau kanawai i keia hewa, i ka moe kolohe. Pukaana 20:14.
            E imi kakou i ke kauoha a Iehova no ka hoopaiia o ka mea moe kolohe i ka wa o Mose: "O ke kanaka moe kolohe aku i ka wahine a kekahi kanaka, o ka mea moe kolohe i ka wahine a kona hoalauna, e make io no ke kanaka moe kolohe, a me ka wahine moe kolohe." Oihanakahuna 20:10. Eia kekahi: "A i loaa ke kanaka e moe ana me ka wahine i mareia na ke kane, alaila e make laua a elua, o ke kane i moe pu me ka wahine, laua o ka wahine. Pela oe e hemo aku ai i ka ino mai ka Iseraela aku." Kanawailua 22:22. Oia ka uku o ka moe kolohe i ka wa kahiko, o ka make maoli, o ka hailuku i ka pohaku, o ka make i ke ahi paha! Pono anei? Pehea ko oukou manao e ko Hawaii