Ka Nonanona, Volume I, Number 7, 28 September 1841 — Page 25

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." Solomona.
Buke 1. HONOLULU, OAHU, SEPATEMABA 28, 1841. Pepa 7.

Palapala 2.
Honolulu, Sep. 16, 1841.

E na hoahanau ma Wailuku;
          Ma kela palapala a'u, ua hoikeia aku ka mea e haunaele ai na ekalesia o Hawaii nei, oia hoi, o ke komo wale ana o na kanaka o keia ao me ka naau kahiko. Ma keia, e hoakaka aku au ia oukou, i ke ano o na hoahanau pono ole, noho kapulu, hana ku e, a me ka hokai, e noho nei.
          Eia kekahi mau ano o lakou;
          1. Ua palaka lakou ma na mea o ka uhane. Eia na mea e akaka ai ka palaka, aole ikaika lakou i ka malama i ka pule mehameha; pale wale aku lakou i kela olelo a ka Haku ma ka Mataio 6:6, no ka pule ma kahi nalo, a noho hiamoe lakou e like me na wahine puupaa elima, no ka mea, aole aila iloko o ko lakou ipu kukui. Ina he kanaka manaoio kekahi hoahanau, ina ua malama loa ia i ka pule mehameha, no ka mea, oia ka pule i makemake nui ia e ka poe haipule io; oia hoi ka pule, e loaa nui mai ai ka oluolu o ka naau, a me ka waiwai o ka uhane. Ninau pinepine au i na hoahanau hihia, i ko lakou malama ana i ka pule malu, a hoole maoli mai lakou, aole malama. Noho wale no lakou me ka launa ole aku i ko lakou Makua ma ka lani, no ka mea, aole he wahi aloha ia ia iloko o ko lakou naau.
          2. Eia kekahi ano o ia poe hoahanau pono ole, aole o lakou makemake nui i ka ke Akua olelo. E nana ia lakou iloko o ke kula 'ai a ka la' a iloko o ka halawai i ka la Sabati paha, a ma ko lakou hale iho kekahi, ua akaka anei ko lakou manao e huli a lohe i ka olelo Hemolele? Pehea? I ko'u ike ana, aole; aole loa. Ma na olelo lapuwale, na olelo akaaka, henehene, paani, apiki, a me na olelo no na mea o keia ao, ua makaukau lakou; ma ka ke Akua, ua hemahema loa. E niele ia lakou i ke pooolelo a ke kahuna, a me ka hoakaka ana, aole loaa, aole ekemu iki mai, a o ka 'ai a ka la' aole paa naau iki; me he kupapau la lakou iloko o kela kula maikai. O na kanaka manaoio, ono loa lakou i ka olelo a Iehova; i ko lakou manao, ua oi aku ia i ke dala a me ke gula, a ua ono ia mamua o ka ia makamaka; nolaila, hoihoi ko lakou naau i ka hele i ka hale o ke Akua, a me ke kula ma ka olelo hemolele, a me ka lawe nui i kona waiwai a waiho iloko o ko lakou naau. Aole pela na hoahanau noho hookamani, he mea liilii loa ka olelo a ke Akua ia lakou. Aole anei pela ko oukou ike ana?
            3. Eia no hoi kekahi ano o na hoahanau pono ole, o ka makemake i na mea o keia ao. E nana i ka lakou hana ana; ina he hana hoolimalima dala, a me ka uku e ae paha, he ikaika ka hana; a ina hoi no ke Akua, a no ka uhane paha ka hana, he nawaliwali a me ke kekee, a me ke kapulu. O ka poe kuai lole, kuai lio, kuai ai, uku pono lakou me ka oluolu, a me ka aua ole; aka, ina kuai lakou i ka ke Akua olelo, aole uku pono; uku paewaewa wale no.