Ka Nonanona, Volume I, Number 6, 14 Kepakemapa 1841 Edition 02 — Page 23

1841,] KA NONANONA. 23

moku nei. He moku manuwa maikai loa ka Pikaka a he nui ka waiwai i poho ia ia. No ke aupuni o AMERIKAHUIPUIA KEIA POHO.

WAIALUA.

            Ma Waialua no au i keia la (Sep. 9) a hoi mai nei. Anapuni au i ka aina o ke 'kula mahiai' malaila, aole nae i heluia na eka i keia wa. He ano maikai ko kela kula; he 16 haumana, a ua oluolu lakou i ka hana a i ke kula no hoi. Mahiai lakou me na bipi a me na oo; waele ko, kanu kulina, kanu papapa, kiai i ka pua bipi ma ke kula, hookahe wai, hana hale, a me na hana e ae, i makaukau lua lakou i ka hana naauao, a me ka ike. Ua ike au i ke kulina, he maikai loa, a pela no hoi ka papapa. Nana au i kela wahi aina, manao ae la au i na aina i mahiia ma Amerika, ua aneane like, a pii mai la ke aloha i ko'u aina.
          Ua hahaoia i ka pohaku ke kahua o ka hale pule hou ma Waialua; eia kona nui, 87 kapuai ka loa, 48 kapuai ka laula. Hiki wawe paha ka paa ana o ia hale, no ka mea, ua ahu ka laau, a me ka puna, a ua kokoke na pohaku. Aia no nae i ka ikaika a me ka hoomanawanui o na hoahanau nana e hana. E na hoahanau o Waialua, i nui ke aho, mai kanalua, a kuihe, a hoomolowa, aka, e hookanaka; a emo ole ka paa ana o ko oukou hale.
          Ua mahuahua iki ke anaina Halawai i ka la Sabati ma Waialua i keia wa; ua pale ka palaka nui o ia wahi, a ua lana hou ka manao o kekahi poe i ka olelo a ke Akua.
          Ua oleloia he nui ka palaka o na hoahanau ma Ewa. Pela no ma Honolulu nei, ua piha na halepule i ka la Sabati, aole nae piha na naau o na hoahanau i ka uhane o ke Akua. He nui wale ka hiamoe, ka nanea, a me ka hoomaloka maoli. Auwe kakou, ke noho palaka kakou iloko o Ziona! E, e ala hou kakou, e koli i na kukui, a e makaala, o hiki koke mai ke Kane mare a pihoihoi kakou. LIMAIKAIKA.

HE NINAU.

            He haole ma Oahu nei; aole ona inu ki, aole hoi ina kope, o ka wai wale no kona mea inu, aole hoi ono ua haole nei i ka wai i waiho liuliu ia iloko o ka bakeke, a iloko o ka huiwai paha. Aole wai kokoke loa i kona hale; mai kona hale aku a hiki i ka punawai maikai, he 150 anana paha. Makemake keia haole e kii aku i wahi wai inu nana i na la Sabati a pau, aka, ua keakeaia oia e na makai. Papa ikaika na makai. Nolaila eia kuu ninau ia oukou e ka poe naauao, hewa anei keia haole ke kii aku oia i bakeke wai i ka la Sabati? Pehea ke kanawai o na'lii? Pehea hoi ke kanawai o ke Akua?

HE PAPA HOIKE I KA POE HANA HEWA.
Na Kekuanaoa i haawi mai.

            Ianuari, Inu i na mea ona, 5; Moe kolohe, 18; Aihue, 22; Hoopunipuni 5; Uhauha, 1; Hoohaunaele, 1; Kuamuamu, 2; Piliwaiwai, 15.
          Febe ruari, Inu i na mea ona, 22; Moe kolohe, 27; Aihue, 15; Inu rama, 1; Hoopunipuni, 10; Hoike wahahee, 1; Hookamakama, 4; Hoohaunaele, 27; Kuamuamu, 4.
          Maraki, Inu i na mea ona, 1; Moe kolohe, 49; Aihue, 20; Inu rama, 16; Hoopunipuni, 4; Uhauha, 12; Hoike wahahee, 1; Hookamakama, 2; Hoohaunaele, 22; Kuamuamu, 2.
          Aperila, Inu i na mea ona, 2; Moe kolohe, 73; Aihue, 17; Inu rama, 43; Hoopunipuni, 33; Uhauha, 9; Hookamakama, 17; Huna hewa, 11; Hoohaunaele, 55; Kuamuamu, 7; Puhi ahi, 1; Hoomana kii, 5; Puewahine, 5.
          Mei, Inu i na mea ona, 22; Moe kolohe, 26; Aihue, 25; Inu rama, 24; Hoopunipuni, 7; Uhauha, 2; Hookamakama, 12; Hoohaunaele, 2; Kuamuamu, 1.
          Iune, Moe kolohe, 14; Aihue, 11; Inu rama, 19; Hoopunipuni, 2; Uhauha, 3; Hookamakama, 12; Huna hewa, 1; Hoohaunaele, 9; Kuamuamu, 1; Pili waiwai, 15.
          Iulai, Inu i na mea ona, 20; Moe kolohe, 8; Inu rama, 2; Hoopunipuni, 7; Uhauha, 1; Hookamakama, 2; Huna hewa, 2; Hoohaunaele, 2.
          Ma keia papa maluna iho, ua hoikeia mai ka nui o kela hewa keia hewa i hanaia ma Honolulu nei, a i hoopaiia hoi i keia mau malama i hala ae nei. Aole nae no keia wahi wale no keia poe; no kahi e mai kekahi. E nana i ka nui o ka moe kolohe ma keia wahi; 227 i hookolokoloia iloko o na