Ka Nonanona, Volume I, Number 5, 31 August 1841 — Page 19

I841,] KA NONANONA. 19

                Pela ke ano o na eka; nui ke ko ma kahi eka, he hapa wale no ma kahi eka. Eia paha na mea i like ole ai. He eka nui ko kekahi, elua paha, a oi aku i ka lua, ua kapaia no nae, he eka, a ua helu ia me na eka i ana pololei ia. Eia kekahi; aole malama pono kekahi poe i ko lakou eka, nolaila ua ino, uuku ka hua. Aka, eia ka hewa nui, aole paa koke ka mea wili ko, nolaila, ua haule ke ko ilalo. Ua maloo kekahi, a ua popo kekahi, a ua pau kekahi i na holoholona. Ua nui ka waiwai i poho ma Wailuku no keia mea hookahi. Aole i poho i kela makahiki wale no, i keia makahiki kukahi, no ka mea, no ka hoopanee nui ana i kela makahiki, aole wili i ka wa pono, he hapa wale no ke ko e ulu ana i keia manawa.
                He nui no ke ko i kanuia i na la paahao. Aole akaka na eka. Hookahi haneri paha eka hou i kanuia i keia makahiki; aole nae i maikai loa ia ko i ka nana aku. Ua pau i ka maloo kekahi, a ua pau i na holoholona kekahi.
                I kekahi manawa hou, e hooakaka hou au ia oe i ka pono, a me ka hewa hoi, o ka ulu ko ana ma keia aina.
Aloha oe. Na'u na GELINA

KA NONANONA.
Honolulu, Sepatemaba, Tusede, 3, 1841.
KE KUMU ONA.

                Ua inu rama ke kumu kula ma Waikiki, a ua ona loa; Ua hakaka no hoi ia me kana wahine, a ua hoi ka wahine i Maui. Nolaila ua laweia kana kula e Ii, a ua haawiia ia Kaaukai. No Lahainaluna mai keia kumu ona.
                Ua inu rama a ona no hoi kekahi kumu e ae ma keia wahi. No ke Kulanui no hoi oia.
                He mea kaumaha loa keia. He nui ka poho. Poho ka hooikaika ana a na kumu ma Lahainaluna; poho na dala i lilo malaila ma ka hana hale, a me ka hanai i na haumana i ka ai, a me ka lako i kela mea keia mea; he nui loa na dala i lilo ma Lahainaluna; aole pau i na tausani he 30, a ua poho kau wahi o ia waiwai nui i keia mau keiki ona. Ua poho ko laua wahi ike; he waiwai nui ia e pono ai ke aupuni, ua oi aku ka ike mamua o ke dala, wahi a Solomona, a he oiaio no kana. Aka, ua poho keia waiwai minamina i ka rama. Ua poho no hoi ko laua pono, a me ko laua uhane paha i keia inu ana: aole komo ka mea ona iloko o ko ke Akua aupuni.
                Ua pono no nae e kipaku i keia kumu ona ma Waikiki, no ka mea, he mea hoowalewale ia iwaena o na kamalii. Lim.

NO KA PALAOA.

                Ma Amerikahuipuia, ua pau i ka aiia na paona palaoa he 12,000,000, i ka makahiki hookahi. He 13,000,000 kanaka ma ia aina. Ehia paona palaoa i pau i ke kanaka hookahi?
                Auhea oukou e na kanaka o Kula ma Maui, eia ko'u manao ia oukou, e hooikaika iki i ke kanu palaoa; no ka mea, ua palapala aku nei au i Amerika, i mea kawili palaoa, a me ka mea kanana. Limaikaika.

NO KA NONANONA.

                Eia ka nui o ka luakini ma Kaumakapili, ma Honolulu nei; 125 kapuwai ka loa, 60 kapuwai ka laula, a 12 kapuwai ke kiekie o na paia.
                E Kapoookamoku, eia keia mau ninau ia oe. Ehia kapuwai huinahalike iloko o ua hale nei? Ehia hoi kapuwai paa? A ina e lilo 36 kapuwai huinahalike i ke awai, a 3 4-8 kapuwai huinahalike i na kanaka pakahi, ehia kanaka e noho iloko o ua luakini nei, a piha pono? E hai mai oe. KAMIKA.

KAUA HOU.

                Ua aneane kaua ko Beritania me ko Amerika. No ka aina ka hoopaapaa ana, aia no ma ka aina o Maine. Olelo na'iii o Beritania no, lakou kela wahi aina, a hoole ko Amerikahuipuia, a nolaila ka pilikia. Aole nae akaka loa ke kaua.