Ka Nonanona, Volume I, Number 5, 31 August 1841 — Page 18

18 KA NONANONA. [AUGATE,

ae, e like me ka olelo ma Io. 3. Aole lakou i hapalaia iloko i ke koko o ke keikihipa, aole hoi i hoohuliia ko lakou naau i ka uhane maikai o ke Akua. Nolaila, aole hiki ia lakou ke kupaa ma ka pono; i ka wa hu wale mai ka hewa, o ko lakou haule no ia, no ka mea, aole kumu e paa ai. Ua ono maoli ka naau kahiko i kela hewa i keia hewa, i ka lealea o ke kino a me ka waiwai o keia ao; ua kamaaina loa ka moe kolohe, a me ka hoopunipuni, a me ka hookiekie, a me ka huhi a me ka hoomaloka, a me ke kuko hewa, iloko o na naau kahiko a pau, a nolaila, aole e hiki ia ia ke hoohua mai i na hua ku i ka maemae, a me ke aloha, a me ka makau a me ka manaoio.
                He hapa wale no paha na hoahanau i hoohanau hou ia, a nolaila, ike pinepine kakou i ka haunaele iloko o na ekalesia o Hawaii nei.
                E na hoahanau o'u a pau loa, penei kuu manao aloha ia oukou, e haohao mau loa i ko oukou naau iho, me ka makau, o hoopunipuniia mai oukou; mai manao, ua loaa lea mai ka naau hou, aka, e hoomau i ka hopohopo ia oukou, a e noi mau loa aku i ke Akua ma o Iesu la i naau ku i ke ola.
                Ua pau keia, aole nae i pau kuu palapala ana ia oukou; ma kela pepa paha, olelo hou,
                Me ke aloha nui iloko o ka Haku.
LIMAIKAIKA.

HE NINAU.

Aloha oe e ka Nonanona.
                He malihini au, he kanaka no ka aina e, he haole; nolaila maopopo ole ke ano o na hana a pau ma Hawaii nei. Eia kekahi mea a'u i ike ai me ka maopopo ole.
                I kuu hele ana ae maloko o ka pahaae o kekahi kanaka, ike aku la au i ke ahi e a ana, he ahi kahumu; ku iho la au ma ua ahi la a puka mai la ua kanaka nei, me ka manu palehu ma kona lima, ua pau loa na hulu i ka uhukiia, aohe koe, ua pau loa a maemae no ke kalua ana. Nana aku la au, e ola ana ka ka manu! Ninau aku wau ia ia, E kalua ana ka hoi oe i ka manu me ka pepehi ole mamua? Kainoa e pepehi e a make alaila huki i na hulu! Lalau koke aku la au i ka manu; wili ae la i kona poo a make, haawi aku i ua kanaka la, a ninau malie aku ia ia, no keaha oe e hana ino i ka manu a hana eha wale aku ia ia? I mai la ua kanaka la ia'u no ka pahi ole. Aka, i ko'u manao aole no ka pahi ole, no ka mea, i kona puka ana mai noloko mai o ka hale, o kona kii ana no ia i ka pahi e kaha'i i ka opu a hemo na naau.
                Oia ke kumu o ko'u ninau. Eia ka ninau. No keaha la e huki ai i ka hulu o ka manu kalua me ka pepehi ole ia mamua?
                Honolulu, Aug. 1841. Na'u na ?
                Ua loaa ia'u keia ninau; ua like ua kanaka nei me kana palahu; he mau holoholona no laua elua. Nonanona.

WAILUKU, MAUI, Au gate 10, 1840.
E Limaikaika.
                Aloha oe. Me kau kauoha ana mai ia'u, ke hoakaka aku nei au ia oe i na eka ko i kanu ia ma Wailuku nei, a me na paona ko paa i hanaia e ka poe Pake, a me na galani molakeke kekahi.
                Menei ke kakau ana a Kuihelani iloko o kona buke:
                Na eka 61. Na paona ko 84,547.
                Galani molakeke 6,114.
                No ke 'lii ponoi, ka aina i kanuia ma ka paahao, 4,973 paona.
                Eia ke ano o ke ko o ka poe eka:
                77,660 paona ko ulaula,
                6,887 poana ko keokeo.
                84,554 paona ko.
                Ke ano o ko ke 'lii.
                576 paona ko ulaula,
                4,397 paona ko keokeo.
                4,973 paona ko.
                Ke manao nei au, e haawi ia oe i wahi papa hoike ko ma na eka pakahi, i ikeia ka like ole o ke ko i kanuia e ka poe eka. Aole nae e haawi nui.
                Eka 1, 51 ipulepo, 1,315 paona ko, 76 gal. molakeke.
                Eka 2, 37 ipulepo, 985 pao. 55 1/2 gal.
                Eka 5, 111 ipule. 2,796 pao. 166 1/2 gal.
                Eka 8, 28 ipule. 720 pao. 42 gal.
                Eka 20, 582 pao. 34 1/2 gal.
                Eka 21, 1,505 pao. 88 gal.
                Eka 52, 2,213 pao. 142 gla.
                Eka 57, 350 pao. 20 gal.
                Eka 59, 1,460 pao. 90 gal.