Ka Nonanona, Volume I, Number 4, 17 ʻAukake 1841 — KA PUHI UILA [ARTICLE+ILLUSTRATION]

KA PUHI UILA

Eia no maluna ke kii no kekahi ia kupaianaha, iloko o na loko a me na wahi opilopilo kona wahi i noho ai, ma Amerika hema. E hiki no ia ia ke hana i ka uila iloko o kona kino iho, a e hoolele aku no hoi ia mea make iloko o na kanaka a me na holoholona e hoopa ana ia ia. Pela oia e pale aku ai i kona poe enemi: a pela no hoi oia, i hana make i kekahi mau mea, i ai nana. Nolaila ua kapaia ua ia nei, o ka puhi uila. Ua nanaia ko loko, i ikeia ke ano o ka hana'na, a, o kekahi hapakolu ona, ua like loa no ka hana'na me ka lalani kiaha i hoopihaia i ka uila. Ua laweia kekahi puhi uila i Parisa, a ua hoikeia'ku la i na kanaka malaila. Ma ka hoopa ana'ku, ua maopopo lea i ka nui o lakou, he uila no ka iloko ona. Aka hoomaloka iho la kekahi kanaka, a lalau ae la ia i ua puhi nei a paa iloko o kona mau lima a elua. O ka maopopo koke iho la no ia, o kona kuhihewa. No ka mea, hoolele mai la ka ia i ka uila iloko o ua kanaka la, a kupaka oia io ia nei, me ka ue nui, aole okana mai o ka eha iloko o kona kino a puni. Pili mai la ka ia i kona lima, aole hemo iki i ka lulu ikaika. A kokoke pau ka hanu, hookomoia iho la kona mau lima iloko o ka wai, a, o ka hemo aku la no ia. Mai make loa ua kanaka la i kona hoomaloka. KONEDE.