Ka Nonanona, Volume I, Number 1, 6 Iulai 1841 — Untitled [ARTICLE]

Eia no keia malihini hou; akahi no au a hanau mai, a o koʻu inoa, ea! aia no maluna iho. Ninau paha kekahi me ka haohao, nohea mai oe? Heaha kou ano? A heaha hoi kau hana i hele mai nei? E hai pololei aku no au. Ma Honolulu koʻu wahi, a e ike auanei oukou i koʻu ano; he ano maikai paha, he ino paha; he kumu ao no au, a o kaʻu hana, ea, eia no, o ka hoonaauao aku i na kanaka o kela ano, keia ano, e launa pu ana me aʻu. Penei kuu manao e hana aku ai. 1. E hoike aku i na mea hou e hoea mai ana ma keia pae aina. 2. E kokua mamuli o na kula kamalii o Hawaii nei; e paipai i na kumu, a me na luna, a me na makua, a e hoike aku imua o na haumana i na mea e naauao ai he nui wale ke ano. O kaʻu hana nui keia. 3. Ke manao nei no hoi keia Nonanona, e kokua iki aku mamuli o ka pono o naʻlii; e hai aku i na kanawai hou, a me na oihana hou, a o kuhikuhi aku i na mea e pono ai, a me na mea e poino ai ke aupuni. Ina no nae ike au i ka hana kokee a naʻlii, aole oʻu manao e hana, e hoike aku no au, me ke aloha no nae, a me ka haahaa, aole me ka hoino wale, a me ka hookiekie wale. E naʻlii, mai hoowahawaha oukou i keia wahi kumu uuku, no ka mea, ua mahaloia mai koʻu inoa e kekahi alii hanohano kahiko, a ua hooliloia ka nonanona i kumu ao no na kanaka a pau. Aole oʻu manao e keakea i ka oukou hana, aole loa, manao no au e kokua ikaika aku mamuli o oukou. 4. Eia hoi kekahi hana aʻu, o ka hoike aku i ka pono o ke Akua. He kauwa au na Iehova, a o kana hana, oia kaʻu e hanaʻi. O na mea ku pono i kona makemake, oia na mea aʻu e mahalo ai a e lealea ai hoi, a o na mea ku e ia ia, oia kaʻu e paio aku. Ma ke aloha no nae au e olelo ai, aole oʻu manao e hoino wale aku i kekahi, 5. Eia koe, aole hiki iaʻu ke hana wale me ka uku ole. No ka mea, he kino koʻu,

a pehea la ke kino, ke ole ka ai a me ka ia? E, auhea oukou, o ka poe aʻu e kokua aku ai, e uku pono mai oukou i kaʻu hana, o make loa auanei au i ka pololi a me ka nawaliwali, e like me koʻu mau hoahanau, o ke Kumu Hawaii a me ka Lama Hawaii. Ua haule no laua iloko o ka luakupapau no ka makemake ole ia a me ke kokua ole ia. Mai hana mai iaʻu pela. Aloha oukou.