Ka Nonanona, Volume I, Number 1, 6 July 1841 — Page 4

4   KA NONANONA  [IULAI,

olelo pu ai me ke kumu, alaila e malama no lakou ia waiwai, i mea e uku ai i kekahi kula, a ina he waiwai kaumaha i ka malama ana, alaila, e lilo kekahi hapaumi o ia waiwai i ka luna kula nana e malama.
                8. Ma na wahi a pau loa i mehameha na kamalii no ka pono ole o na hale kula, e olelo aku no ka lunaauhau o ia wahi i na kanaka, a e hana no lakou i hale kula e like me ka olelo a na luna. E hana pu no hoi na kuewa, no ka mea, aole ia he hana i pili i na'lii wale no, he hana ia e pono like ai na makaainana, a me na'lii, he hana aupuni no hoi ia, e pau loa'i na kuewa a me na hoopili wale i ka hana.
                9. Eia na kamalii kupono i ke kula, o na kamalii eha makahiki mai ka hanau ana, a maluna ae olaila a hiki i ka umikumamaha makahiki. A ina he keiki ka kekahi kanaka i kupono i ke kula, aole i hiki i ka walu o kona makahiki mai kona hanau ana, aole hoi i hoouna mau kona makua ia ia i ke kula, alaila, aole e kuuia kela makua i ka hana o ka poalua o ke alii, a me ko ke konohiki ke lehulehu kana mau keiki, aole hoi e hoomahuahuaia kona aina, aole hoi e kii kela makua i ka laau ma ke kuahiwi, i ka laau hoi a ke alii i haawi iho nei i na makaainana. Ua kapu ia laau i na makua hoouna ole i ka lakou keiki i ke kula. Aole hoi e lawaia kela makua ma na kai a ke alii i haawi ai no na makaainana. Ua makemake kela makua i ka naaupo, nolaila, e pili no ia ia kela mau kapu o ka wa naaupo.
                Aka, ina he keiki nui, ua hala ka walu o kona mau makahiki, a hele ole oia i ke kula, alaila, aole o ka makua wale no ke hewa, o ke keiki no hoi kekahi; e hele no ia keiki i na la paahao a pau loa o ke alii nui, a me ko ke konohiki. Aole e kuuia na keiki a pau i hele ole i ke kula, e hele no lakou i ka hana.

(Aole pau.)

                O ka mea akamai i ka noonoo, e hoakaka mai ia i keia haawina ma ka helu.
                I aku la o A ia E, o ke kumu kuai i kuu lio a me ka noho lio, he $130 ia, aka, ua oi pa 9 ke kumu kuai i ka lio i ko ka noho lio. Ehia na dala o ka lio, a o ka noho lio no hoi? Owai ka mea ike?

NO KE KANAWAI MUA.

                Ninau ae la ke kumu i kekahi keikikane, "Ua aloha anei oe i kou mau makua."
                Ae mai ia, "Ae."
                "Ua aloha anei oe i kou hoahanau, a me kau kumu?"
                Ua ae koke oia, "Ae; ua aloha pono wau ia lakou."
                Ua olelo hou aku ke kumu, "Ua aloha aku anei oe i ke Akua?"
                A kulou iho la kona poo ilalo a mumule loa iho la ia.
                Aole ae mai, no ka mea, aole akaka ia ia kona aloha. Aole paha ia i malama i ko ke Akua kanawai mua, "E aloha aku oe ia Iehova me ka naau a pau."
                Auhea oukou, e na kamalii, ua aloha anei oukou i ke Akua maikai me ka naau a pau?
Kumu Kamalii.

NO NA MOKU.

KU MAI.

Iune 24, Elenora, Bareneta, Ladane, 8 malama, 16 barela aila.
Iune 25, Koulika, Beretika, Kolumebia.

HOLO AKU.

Iune 21, Pikaka, i Kolumebia.
Iune 21, Na'lii i Kauai.
Iune 28, Elenora, e imi kohola.
Iune 30, Hawaii, i Hilo.
Iulai 2, Geloseta, i Hawaii.

                Auhea oukou, e na kanaka maoli a me na haole naauao, ma keia pae aina? Ke noi aku nei au ia oukou, e imi oukou i na mea e pono ai ka hanauna hou o Hawaii nei, a e haawi mai: na ka Nonanona e hoolaha aku.
LIMAIKAIKA.

                E paia ana ka Nonanona, ma ka hale paipalapala o na Misionari Amerika, ma Honolulu. Elua pepa i ka malama hookahi, oia hoi 24 i ka makahiki hookahi, o Tusede ka la e hoolaha aku ai.
                Eia ke kuai ana, hookahi makahiki, hookahi hapawalu, ke uku koke ia mai, iloko o na malama 3, mai keia la aku; ina mahope aku o na malama 3 ka uku ana, ekolu hapaumi ka uku.

NA LIMAIKAIKA, e hoopuka'ku.