Ka Nonanona, Volume I, Number 1, 6 July 1841 — Page 2

2 KA NONANONA [IULAI,

KA NONANONA
Honolulu, Oahu, Tusede 6, 1841

                Ua hiki mai nei kekahi mau misionari hou ewalu mai Amerika mai, 4 kane, 4 wahine.
                O Mi. Dola, he kahuna pule a me kana wahine; ua hoonohoia laua ma Punahou e ao i na kamalii a na misionari Amerika ma keia pae aina.
                O Mi. Boneda, he kahuna pule, a me kana wahine, ua hoonohoia laua ma Kohala.
                O Mi. Parisa, he kahuna pule, a me kana wahine, no Oregona laua, ua manao no nae laua e noho maanei i keia manawa. E holo ana i Hawaii a ma Kau paha e noho loa ai.
                O Mi. Rise, he kumu ao, a me kana wahine, no Oregona no laua, a ua manao laua e noho maanei, a maopopo ka pono o ka holo aku i Oregona. Nani wale ka lokomaikai o ke Akua i ko Hawaii nei!
                Ua holo pu mai me lakou kekahi haole hana waki, o Boadamana kona inoa, a ke hana nei no oia i kana hana maikai maanei. Pomaikai paha kakou a pau i kana hana, no ka mea, he nui wale na wati kuli i keia wa iho nei, no ka hana wati ole.
                Holo pu mai no hoi kekahi haole kaomi aila kukui o Kudela ka inoa. Manao oia e noho ma Koloa, e kaomi aila. Waiwai iki paha na kanaka o Kauai i kana hana. Na lakou e hoiliilii i na kukui a kuai me ia.
                Ua hoi mai Mi. Hupa, a me Keaka me kana wahine hou, a me kona kaikuwahine, a me ke kaikamahine i holo aku ai i Amerika mamua.
                He mau haole Amerika e ae kekahi, he mau kanaka kuai, o Sulivana a me Anatona ko laua inoa.
                He nui wale ka waiwai kalepa ma Honolulu nei i keia manawa, aole okana mai.
                O ka nui o keia mau haole malihini, he poe haipule.

                I ka la 3, o Aug. 1840, holo aku la Binamu ma, i Amerikahuipuia, ma ka moku Falora.
                Aia maluna o ua moku la elua haneri tona kopaa, a me ka molakeke, no keia pae aina aku, a me na ili kao 16,000.
                E Kauahi, ke ninau aku nei au ia oe, ina i kuaiia ua mau ili kao nei ma Nu Ioka, a loaa mai ka hapaha no kela ili, keia ili, ehia dala iloko olaila? A ina ua kuaiia ua mau ili nei ma Honolulu no na dala 200, a lilo aku kekahi mau dala hou ae, he 50 no ka moku, ehia dala i koe no ka mea nona ka waiwai? E hai mai.

                Ma ia la hookahi no (Aug. 3.) holo aku la na kanaka Iapana ma ka moku Halekini i Kamesekaka me ka manao e imi i moku malaila e hoi aku ai i ko lakou aina. Aloha ino ia mau kanaka! mai make lakou ma ka moana, aka, ua hoopakeleia e ke Akua, a ua hookipa aloha ia maanei e na misionari a me na haole. Ina paha hiki aku lakou ia Iapana, a ua aeia mai e komo, (no ka mea, he kapu loa ia aina i na kanaka no na aina e mai,) a e hai aku i na mea a lakou i ike ai, oluolu iki mai paha ko laila poe alii, i na kanaka Kristoano, o na aina e. E kipakuia mai no nae paha lakou, no ke kapu.
                E Haleole, ke ninau aku nei ka Nonanona ia oe, heaha ka latitu, a me ka lonitu o Kamesekaka, a ehia hoi na mile mai Honolulu nei a hiki ilaila? Ehia hoi na mile mailaila aku a hiki i Iapana? E hai pololei mai oe. Eia kekahi ninau, no ke aha la, ke kapu loa o ia aina o Iapana i na kanaka no kahi e mai? E ninau aku oe i ka mea i ike, a hai mai ia'u. Malama paha loaa ole keia mau mea ia Haleole, a nolaila, na Kahulanui e hoakaka mai.

                I keia mau la iho nei, mai ka la 22 o Iune a hiki i ka la 27, he pule hoomau ma Waialua, aole nui loa na kanaka i hele a lohe i ka ke Akua olelo, aole hoi makaala loa ka poe i hele mai. Ua lana no nae ka manao o kekahi poe, a ua komo ka noonoo iloko o kekahi poe hihia, a me kekahi poe paakiki.

                I ka la 25 o Iune ku mai ka moku Koulika no Kolumebia muliwai mai. Ua loaa mai kekahi mau palapala no Oregona mai, a ma na moku imi aina, i holo aku nei. Ua hiki aku ilaila na moku Winisani a me ka Naia, 22 la ka holo ana mai ia nei aku; aole komo keia mau moku iloko o ke Kolumebia, no ka ikaika o ka makani a me ka ino o ke kai. Nolaila holo lakou ma ka akau i ke kowa o Iuana, malaila, ku na moku. Aole mea poino o lakou.