Ka Makaainana, Volume XI, Number 9, 27 Pepeluali 1899 — Page 2

Ka Makaainana.

 

KA MAKAAINANA, HONOLULU: FEBERUARI 27, 1899

 

Na Hoopuni Kaua Nui

——

I Lilo a i Paa ma ko ke Ao Nei Moolelo

——

[Mai ka Helu 8.]

 

TEBE, MA BEOTIA, A. C. 1252.

            He ahaaina nui ka i haawiia e Pilidasa, kekahi o na poe ohumu kipi, ia ahiahi a ua konoia hoi o Pilipi a me Akiasa, na kiaaina Lacedimonia, a o laua hoi na mea i hookipa hiwahiwa loa ia.  I ko laua pumehana loa ana me ka waina e hiki ole ai ke hoomaopopo ae i kahi mea, aka, o ko laua mau lealea wale no, ua hoomaka na kipi no ka hana, a, ma ka mahele ana ia lakou iho iloko o elua puali, ua hoomaka aku la lakou ma ka mohai maalahi ana ia Pilipi a me Akiasa.

            Ua hele pololei aku o Pelopidasa a me kana puali no ka hale e nohoia ana e Leonetidasa, kekahi o na poe hookaumaha wale, a i kona hoalaia ana hoi mai ka hiamoe mai, ua hopu iho i kana pahikaua a uhau mai la i ke kipi mua i hele aku ai imua ona a make loa ma kona mau kapuai; eia nae, ua loaa aku iaia he @oa paio oi loa aku o ka holomua ma o Pelopidasa la.  Me ka awiwi loa keia oiwi Tebe koa i hoomoe aku ai i ka mea hookaumaha wale ma ka aoao o ka hoa makee aina i poino mua iho.

            Mahope iho o keia hoao huluaa ana, ua hui awiwi ae na poe Tebe i kipakuia me ka puali o na poe aloha a makee aina, a ua hoopuni aku hoi i ka papu.  Aole no hoi i e@o iho, ua konoia na Lacedimonia e haawi pio; a na keia wahi hana kaulana, i hoouluia e ka noeau o Pelopidasa, a i hookoia hoi me ka aneane e holookoa loa e kona mau lima ponoi, i loaa ai ko Tebe kuokoa.

            He mea minamina nae hoi ka hiki ole ke pakuiia ae ua paa mau loa aku ia kuokoa: he mea olelo wale ia no ma ka moolelo no ka hanohano a no ka holomua paha o Tebe, ua lilo kuokoa loa wale no ia no kahi hanauna hookahi.  O Pelopidasa ka hoa’loha a hoahana pu o Epaminonodasa, a me ia kanaka kaulana hoi—kekahi o na poe kaulana loa o ke au kahiko—i puka ae ai a nalo aku ka la o Tebe (Thebes, Boeotia).

 

HOOPUNI EKOLU, A. C. 334.

            Mahope iho o ke ka@a kaulana o Kironea (Chaeronea), a hoomoeia aku ai na kuokoa o Helene ma na kapuai o Pilipi o Macedona, he mea manao ake loa e oi pookela, @a hoonoho ae ia moi i kahi halekoa ma Tebe; eia nae hoi, ua puoho aiuka ae lakou a lukuia na poe Macedonia.  Ua kaalo aku o Alekanedero, ke keiki a Pilipi, a @ ai mahope mai o ka N@ Kowa o Temopile (Thermopylae), i lilo hoi i mea ola mau ia Leonidasa a me kona poe o Sepata, komo i Helene a n@i pololei aku no ke kulanakauhale kipikipi.  Ma ke ala, ua olelo ae oia i na poe e ukali ana iaia, “Ua kapa mai o Demotenese ia’u ma kana mau haiolelo ana he keiki au ia’u i hoopio ai ia I@ria; ua kapa mai oia ia’u he opio piha lealea pono ole ia’u i hoopai ai i na poe Tesalania; e hoike aku hoi kakou iaia i nei wa, malalo iho o na paia o Atenai, he kanaka au i oo pono.”

            O kona hoea ana aku i Beotia, e like me na mea hana e ae ma kona ola ana, ua hookoia aku no ia e like me ka hooholoia ana.  Iaia i hoea aku ai i na paia o Tebe, ua lawa nona ke koi ana aku i ka haawiia mai o Penika a me Porotuluso, na alakai hoeueu o ke ala kipi.  Eia nae hoi, ua pane ano hoowahawaha mai na poe o Tebe ma ke koi ana mai e haawiia aku ia lakou o Pilota a me Anetipata, na kenerala a hoa’loha o Alekanedero; a ua ike iho ke alii opio i kona konoia e lawelawe aku i na hana oolea o ka hooili ka@a aku ia lakou.

            Ua haawi mai o Tebe i na kokua ana i kona luaui, ua hoomaka aku no hoi i ka haawi ana aku i ka hoopai me kau wahi kaukaulua a ku ole iho no i ka hoihoi.  He ka@a kaulana ka i hooukaia, a ma ia hoi i hakoko ai na poe Tebe me ka manao ikaika a huluaa loa; eia nae, mahope iho o kahi paonioni loihi ana, o na poe Macedonia i haaleleia aku mahope iloko o ka papu, ua hao aku i na poe Tebe mahope, oiai hoi na ko@ o Alekanedero ua nou mai ia lakou mamua, ua pau loa lakou i ka hookauliiliiia.  Ua laweia o Tebe a hao wale ia.

            Ma ka hao wale ia ana o keia kulanakauhale, ua hoike ae kahi wahine kulana kiekie i kona ano huiuaa a makee noho’na maemae i kamahao loa hoi e kupono ole loa ai e kaaloia ae iloko o ka mumule.  No ka nui mai hoi o ka ui o keia wahine, ua pue aku la kekahi aliikoa T@racia, i mea no kona manao e hookoia ai; a ma ia hope iho, ua hoomaka aku la e koi no kana mea nui i ake ai, no kona hoike mai hoi i kahi ana i huna ai i kona lako hoohie nani.  Ua hahai mai ua wahine manaopaa la, nona ka inoa o Timocelea, ua pau iaia i kiolaia iloko o ka punawai, a kuhikuhi mai la no hoi iaia.  Iaia hoi e kulou iho sua ma kae o ka waha, e nana ana me na maka anunu @ loa @ mau lako waiwai nui la, ua hoeu ae keia wahine i kona ikaika a pau, kulai aku iaia a haule iloko, a hailukuia iho me na pohaku a make loa.

Aole i pau.

——

Ahai ka Pupuhi no Manila.

            Nui ka pioloke o kekahi poe o kakou a ua hoouluhua aku hoi i ka Oihana Makai i ka La Pule, la 5 nei, me ka ninau ana no A. P. Stanmore, he paioa koa Pi Gi mamua a luna nui iho nei no ka haleauau Lala Loihi ma kahi o Kimo (C. J. Sherwood), ka luna nui mua i hale no Manila me ka pokeokeo ka, wahi o ka oleloia.  O ke kumu o keia pioloke, he poe kahi i uku dala i ua Pita la, ka inoa waena ia o keia Stanmore, no ke kuai i ka haleauau, a ua waiho dala aku kahi poe me ia malalo o kahi mau apana pepa hooia wale no me kahi waiwai panai ole i loaa mai, a ua ike a maopopo ole hoi ka Oihana Makai i kona wahi i nalo ai.  Ua heo aku paha hoi oia ma ka mokumahu hali koa Scandia (Secanadia) i na auwina la La Pule nei me ka hoike ole iho i keia poe e holo ana oia e huli ia Kimo i hala mua.

            O keia no ka hua i loaa mai no ka hilinai makehewa ana, oiai hoi, aohe ona waiwai e hoolilo ai, no ka mea, no Makapolena Ma ia haleauau, a ike nui iho la nae hoi i ka hana a ka Norewai a puhala@iu aku la.  Ua lohe mai makou he $1,000 a Hanale Vida i uku ai iaia malalo o kahi apana pepa hooia wale no, a mahope aku no ka hoi e hana ai i ka palapala hoolilo kupono.  He $200 na Keoki Patesona, he $600 na kahi ae, a pela aku a piha paha he $2,000 a keu A heo aku la nae hoi kela me ka pokeokeo.

            Mai ia wa mai a hiki i nei la, aohe mea i hanu i kona meheu.  Eia no ka hoi keia poe ihepa, aohe no i pau loa aku.  Ua lawelawe hana makou me ia a he hoopono oia ma na ano a pau e hoohuoi ole ai no kahi e hana ana oia e like me keia ano iho la.  Me he la e ao aku ana paha hoi oia i na poe Filipino i ke ano o ka huli awiwi ana i ke dala me ka luhi a hana nui ole.  I uku paha hoi no kela epa a apuhi@a ana o Hanale Vida, he mea no hoi i kamaaina i na pua, ua hoonohoia aku oia i luna nui no ua haleauau la a eia ke noho nei malaila.

——

Makemake Loa Paha ia Nei.

            Ua hoao kekahi o na koa o luna o ka mokumahu hali koa Ohio e mahuka i ka po La Pule, la 12 nei, ma ka lele ana iloko o ke kai a au mai no uka nei.  Eia nae hoi, ua ikeia manao no @ia e ke koa e ku kiai ana a hoaoia mai e kaohi iaia ma ke ki ana mai i kekahi mau p@ka a he ole no ka maliuia aku.  Ua au loa mai la no oia a pa@ i ka uwapo o Buru@, a ilaila hoi oia i paa ai i ka hopuia e ko uka nei poe a hoihoi hou ia no ka moku.  Pomaikai no paha hoi kakou i ka haule ole ana iho o nei pakui hou i ko kakou heluna lahui mahope nei, oiai hoi, aohe i makemakeia ia ano poe.

——

Lehulehu na Loio Hou.

            Ke lehulehu nei no na poe loio hou ma o kakou nei.  Ua aeia iho nei o B L Marx, kakauolelo a Loio Haki, ukali kaahele pu no Kuhina Kupa i Amerika Huipuia a kakauolelo iho nei no ka Ahakuka Malu.  I lawa no hoi a huli hoi mai nei o Lorina Anaru, ua aeia oia e lawelawe loio.  A pela no hoi me Jerome Wallace Ro aine, o ka Mokuaina o Wasinetona.  O ka hope loa iho nei, o Francis Brooks o Masakuseta a me Monotana.  Lehulehu launa ole mai na poe loio malihini a ano kamalii o kakou i nei wa.

——

Peki no ka Auau Kai.

            Kakahiaka nui o ka Poalima, la 17 nei, i kuemi hope ai ke kaa hali mea-ai o kekahi Pake ma ka uwapo waapa, a pela no i peki ai a haule iloko o ke kai.  Ua piha ke kaa me na mea-ai ulu no na mokukaua.  Na kekahi keiki hoehoe waapa i lele aku iloko o ke kai a hoopakele mai i ka lio, a me ka hana nui i hanaia ai a kau hou mai iluna o ka aina.  Ua lele mua ke kahukaa Pake iuka nei a koe ai oia mai ka auau kai pu ana me kona lio, ka kaa a me na mea-ai.  Mahope iho ke kaa i hoopakeleia mai ai me ka poino nui ole.

——

Morris K. Keohokalole, Louis K. McGrew

            Keena: Helu 15, Alanui Kaahumanu Honolulu, ko A. Rosa keena mua.  Boroka Hale Dute, Hooponopono Buke Helu, Imi Moolelo Aina a me na Agena Lawelawe Laulaha.

 

Sept 26.—tf

——

HALEKUAI BIPI O WALA.

(METROPOLITAN MEAT CO.)

            Ke hoikeia aku nei ka lohe i na poe a pau ua makaukau loa keia halekuai bipi e hoolako aku i na ano io holoholona maikai a momona, e laa ka bipi, hipa, puaa, a pela aku, i na poe a pau e makemake ana.  E loaa mau no i na la a pau, mai kakahiaka a ahiahi, koe ka La Pule.  Na na poe lawelawe oiwi maoli no e hoomaopopo aku i na poe oiwi e kipa mai ana.

 

G. J. WALLER,

Luna Nui.

fby. 20-6m

——

HALEKUAI LAKO HALE

WING CHAN CO.

Helu @06 Alanui Nuuanu, mauka iho o ka Hale Kaawai

Helu 4 Kahiko.

——

Malaila e loaa ai na lako hale nani a maikai, e laa @a

Noho I@, Ko-ki, Pela, Moena, Ipu-pua, a me na Waiwai e ae he nui loa.

 

            Emi loa ke kumukuai o ka Moena, aohe lua e like ai.  Mamua o ke kuai ana ma na wahi e ae, e kipa mua mai maanei.

            Mai poina i ko makou helu, 406 Alanui Nuuanu, mauka aku o Alanui Beritania

 

fby. 20-6m