Ka Makaainana, Volume XI, Number 5, 30 January 1899 — Page 3
KA MAKAAINANA: HONOLULU, IANUARI 30, 1899. 3
NA PALAPALA
(Aole maluna iho o makou ke koikoi o na hala a me na hewa no na manao e hoopukaia ana malalo o keia poo, aka, aia no ia maluna o na poe na lakou i kakau mai.)
O ka Oihana Makai, he Oihana
Aloha Makamaka Anei Ia?
E KA LUNAHOOPONOPONO:-
E oluolu mai no'u ke kau wahi kowa no ke poomanao e kau ae la maluna:
Penei iho kahi moolelo: Ma ke Sabati, Ianuari 8 nei, ua loaa pono aku la kekahi ahapepa piliwaiwai ia Bob (Pukiki), he makai, ma ka hale o Ah Ipa (Pake) ma Pukoo, Molokai nei. Ua komo aku keia makai iloko a hopu i ka pepa a me ke dala, aka, i kona ike ana ia Kealoha (k), he kanaka Hawaii, (a oiai, o ka nui iho he poe Pake,) ua waiho hou iho la oia i na mea a pau i paa i kona lima mamuli o kona aloha iaia. A aole no hoi i hopuia keia poe haihai i ke kanawai. No keia hoi ka'u i ninau ae la e like me ia maluna ae.
O ke ano o keia makai, he Pukiki paha oia a no ka lahui Norewai mai paha. He opiopio i piha ole ka 20 makahiki. Aohe ike i ka heluhelu Hawaii, a he oki loa aku hoi i ka heluhelu kanawai ana, a pela paha hoi oia i hana ai me ka naaupo i ke ano o ka Oihana Makai, a hookuu wale ai oia i na poe kue i ke kanawai. O ke kumu no i loaa mai ai o keia hana naaupo ana, o ia no ka nana ole ia o ke kanaka kupono e na poo oihana maluna ae o Bob, aka, na nanaia ma ka ili a me ka hoohiki, a pela i ala mai ai keia hana. A oiai, he uku paa ko keia Bob, he $20 o ka mahina, o ia anei ka waiwai o ke dala a ke Aupuni iaia, e ohi oia i ko ka mahina a e hookuu wale oia i na poe haihai kanawai?
Ko'u manao no ka pepa piliwaiwai, aole ia hana akahi akahi ma keia mokupuni, aka, ua loihi a ua ewe i ka Mokupuni o Molokai ma kekahi mau apana e like me keia, ma Kaunakakai, Kamalo a me Pukoo. Oiai nae, o ka lahui Pake mai Kina mai, o lakou na poe e hoowalea a hoomalimali mai no hoi, a ke puni aku oe, o kou hoi hele no ka hope, a pela au e minamina nei i kekahi mau keiki Hawaii e hoowalea nei i keia hana hope ole. I ka wa e uhai mai ai ke pakalaki, o ka hoi nele no ia, pilikia ka wahine, pilikia na keiki a me ka ohana, a heaha ka hope? He uwe. Uwe i keaha? Uwe i ka nele, uwe i ka pilikia o ka ohana, aohe dala eloaa ai o kahi paiki palaoa e ola ai. Nolaila, ke paipai aku nei au i na makai o ka Mokupuni o Molokai nei, e ala, pau ka hiamoe ana. E wehe i ka huluhulu a e hume i ka malo o ka wiwo ole no ka hopu ana i na poe piliwaiwai.
O kekahi hana akamai a keia poe Pake, o ia ka waihoia ana o ke dala he wahi okoa, ma ke kuaiia ana o na pihipihi, a i ole ia, he mau maka kukaepele paha no ka 5 keneta pakahi, a o ia iho la ka mea e pili ai o lalo. Nolaila, aia ihea o Henry Luuloa? Eia ke kupu, ka eu, makaalaia.
I mea nana e hooiaio mai i ka hoolaha maluna ae, ke hoike hou aku nei no au penei: Ma ka po Poalima nei, Ianuari 20, ua pepa iho la o Kekahuna a me Kaimi a me Billy (boy), he wahi hapa paele, ma ka hale o Kekahuna. No ka manawa mua, na kaa ka laki ma ka aoao o kahi paele, a mahope iho, ua kaa ka laki ma ka aoao o na inoa i hoikeia maluna. A oiai e laki mau ana na inoa maluna ae i na wa a pau, nolaila, ua aie pinepine mai la kahi paele i na inoa elua maluna ae a hiki i ka huina o $5 me ke koe no o kekahi mau dala iloko o ka pakeke o keia paele, o ia ka na inoa elua i koi aku ai e uku mai oia i kona aie, aka, aohe nae he ae o keia paelea no ia ae ole, ua hao maoli keia mau inoa maluna ae i na pakeke o keia paele, a ua nahaehae ka lole.
WILLIE.
Ianuari 21, 1899.
-
Nani Wale ka Lohe Ana i ka leo
o ka Ogana.
E KA LUNAHOOPONOPONO: -
E oluolu mai kou ahonui e hookomo iho ma kahi kaawale o kau hiwahiwa i keia mau mamala olelo e kau ae la maluna:
Oiai, ua hoea ae keia haili aloha i ka auwina la Sabati o Novemaba, la 27, 1898, mai waena ae o kekahi o na hoa e noho ana ma ka pa hoomalu o na ma'i ma Kalihi, no ka mea, o ka lua ia o na Sabati a Rev. J. Kekipi a me kona mau hoahana o ka Hoomana Naauao i malama ai i ka hana haipule maloko o ka lukini o ka Pa Ma'i. A oiai lakou e hooho ana me ka lakou mau leo mele maloko o na paia laahia o ua Betela la, a puka nawele loa aku la na kohina leo mawaho o ia mau paia, kaui iho la ke u a ke kamahele a hoaiai ae la i keia mau huaolelo - "Ina o kela mau leo mele a na opio o ka Hoomana Naauao e mele mai la i ka inoa o Iehova o na kana a e hele pu ia me ka leo o ka pahu ogana , ina ua oi loa aku ka nani a me ka maikai e like me ka Davida i olelo ai ma Halelu 150, pauku 4, e i ana: - 'E haalelu aku laia me me ka pahu kani a me ha haa ana; e halelu aku Iaia me ka pahu kaula a me ka ohe,'" a na keia haili aloha i hoolalelale ae i na poe ma'i e noho ana malaila, a hanaia iho la kekahi palapala noi dala no ke kuai ana i ogana no ia luakini, ma ke ano he makana ia na ka Hoomana Naauao ia luakini no ka manawa pau ole a ua noa hoi i na hoomana a pau e malama ana i ke anaina haipule malaila ke hookani ia ogana me ka hana ino ole, a ma ia ua hookauwa maoli ia aku la no ke kahu, oia o Rev. J. Kekipi, i komite no ia apana hana.
A ma kona hooikaika ana ua loaa mai la keia huina dala he kanaonokumamalima me ka hapaua ($66.50), mai waena o keia poe no lakou na inoa malalo nei:-
Ka na poe ma'i o Kalihi, o ia keia:-
A.P. Kaipo .................... $3 00
David Kamai ....................... 50
Aki (Pake) ........................... 50
Aarona Nonohiaulu ............. 1 00
Ruth Kamaalea...................... 1 00
Ka na poe mawaho: -
Mrs. Sarah Kaipo................... 1 00
Mrs. E.M. Kaholoaa................ 50
Mrs. Kailimai Aarona.............. 100
W.L. Beku............................... 5 00
Jno. H. Soper........................... 10 00
S.M. Damon............................. 10 00
J.A. King................................... 5 00
Hoa-aloha................................. 1 00
Moiwahine Kapiolani.............. 10 00
Cash......................................... 1 00
S.K. Kane................................ 2 00
M.E. Foster............................... 10 00
A Friend.................................... 3 00
Joseph Heleluhe........................ 1 00
A mai keia huina aku i kuaiia ai no ka ogana he kanaonokumamalima dala ($65) a koe he hookahi dala me ka hapalua ($1.50) ma ka lima o ke komite no ke kuai ana aku i mau buke himeni, a i ka hora 11 a.m. o Dekemaba 24 loheia iho la ka leo o ka ogana ma na paia o ua luakini la a o ia ka wa i puai ae ai o kela mau huaolelo e kau ae la maluna - "Nani wale ka lohe ana i ka leo o ka ogana," oiai o Misi Alice Kekipi e hookani ana i kekahi mau leo o ke Cyclone, o ia o "O how Lovely" a me "Merrily goes our Bark" a o keia mau leo ae la na mea nana i puana ae i kela mau huaolelo maluna ae. A ma ke Sabati ae hoi i hoene pu ai me na leo kileo maoli a he kuio no i ka nani a me ka maikai i kulike me ke ano haili i loaa ai i ke kamahele oiai na la mamua aku. A o keia paha na hooponopono ana a ke Akua ia Pa Ma'i i keia mau la, oiai na la i aui aku la he okoa na mea i hanaia, aka, iloko o keia mau la, he keu a ke ano e loa, a he mea hoi na ke kamaaina o ia wahi i nalowale no kahi mau la loihi a hoea hou aku ke komo koke ana iho o na ninau hoohuoi no kaia mea kani. Aole wale hoi o ia, o loko no kahi o ka pa, he ku i ka maiau na lawelawe hana ana a keia Luna Nui hou i oi pa-umi aku i ka na Luna Nui mua. Ia wa, he lepo ka mea ikeia ia loko, aka, i keia wa, o ka uliuli o ua mea kanu kau e ike aku ai a me ka uliuli pu o ka pa i ka mauu, a he mea hoi ia e oluolu ai na maka ma ka nana ana.
Aole wale o ia ua hana maikai a keia Luna. Eia kekahi i na luna mua e hiki mau ana na palapala hoopii a na ma'i i ka Papa Ola no ka lawa ole o na mea-ai o kela a me keia ano, aka, i keia luna, ua ike mua oia i na hemahema e hiki mai ana, a ua hoolako mua e oia ia mau hemahema; a aole no hoi o ia wale, o ka oluolu no kekahi, o ia hoi, o ka hui launa pu mai me na ma'i ma ka paani hoomakeaka ana a he wahi kaaka hookikina ole mai i na ma'i e like hoi me na luna mua ke kuikuiia. Ma ia ano no i hanaia e lakou, ua nui ka mahuka o na ma'i i ka ike i ke ino o na luna a hu mai ke aloha o ka ohana.
O keia ka lawa o ka'u mau hoomaikeike ia oe. e ka Lunahooponopono, a nau no hoi ia e huai pau ae ma na kihi eha o Hawaii o kaua.
Me ka mahalo,
ADAM P. KAIPO.
Kalawao, Ianuari 19, 1899
-
W.C. Achi Enoch Johnson
Achi & Johnson
He mau Loio a Kokua ma ke Kanawai
Keena Hana: Helu 10, aoao Komohana, Alanui Moi. nov. 28-tf
-
Morris K. Keohokalole,
Louis K. McGrew.
Keena: Helu 15, Alanui Kaahumanu Honolulu, ko A. Rosa Keena mua. Boroka Hale Dute, Hooponopono Buke Helu, Imi Moolelo Aina a me na Agena Lawelawe Laulaha. Sept 26-tf.
-
Nalowale.
He Lei Hulu Manu O-O, ma ka la Nu Ia nei a mahope mai, mawaena o kahi noho o Uilama Kamaki, ma Kalihi, a me Keoneula. E loaa no he uku makana kupono i ka mea e loaa ai a hoihoi mai ma keia keena.
jn. 10-4t.
-
Halekuai o Kukima
-
Ma Ewa o Alanui Nuuanu, Helu kahiko maluna o ka papainoa 59. Helu hou maluna ae o ka Puka komo, 210.
-
E Hooliloia aku ana na Waiwai a pau, e laa na Kalakoa Keokeo, Kukaenalo, Alapia, Huluhipa, a pela aku, me ka mau no o kumukuai emi loa i like ole me ko na halekuai e ae.
Na Paleili o na Kane me Wahine, na Papale Kane, Wahine me Keiki, na Paa Lole Piha o Kane, a pela aku a he nui loa hoi ke helu papa aku. Emi a emi loa, aohe lua ma ka emi.
Oiai hoi, ua hala ae nei na la kulaia a ua pau hoi ka wa o ke Kuai Hoopau ana i malamaia iho nei no Hookahi Malama ma keia Halekuai, e hoomanao mai no na hoa'loha he oluolu a he emi mau no kumukuai maanei ke kipaia mai. E hoao mua mai no ka pono i ikemaka i ka oiaio a me ka pololei.
Goo Kim.
nov. 28-3m,
-
ED. A. WILLIAMS
Helu 514, Alanui Papu, ma Ewa iho o Pa Aloha.
-
He mea kuai lako hale o na ano a pau loa.
-
He mea Hana Pahu Kupapau a Hooponopono Hoolewa.
E hoolakoia na na Kaa Kupapau, na Kaa pio a me na Kaa-ohana.
Ina no e ninau iaia, e loaa no na Pohaku Kia Hoomanao no na He Kupapau.
-
O ka Ialoa kekahi hana hiki loa iaia aia ia malalo o ka lawelawe ponoi ana a Ed A. Williams, F.D. he mea i puka pono mai ka Kalaka Kula o ka, Ialoa Maikai anailoko o Mei, 1894.
- NA TELEPONO -
Keena, Helu 179 - Kauhale a me Kahea po
Helu 815.