Ka Makaainana, Volume VII, Number 25, 21 Iune 1897 — Page 2
| This text was transcribed by: | Kawena Komeiji |
| This work is dedicated to: | Tatiana Maumausolo |
HONOLULU, OAHU, POAKAHI, IUNE 21, 1897.
LEONE DE BOANE
-----
KA MEA OHUMU KIPI O COADOVA
MOKUNA VI.
HE PALAPALA.
[Mai ka Helu 24]
"Ua hoailona mai anei oe ia'u?" i ninau aku ai o Leone.
"Ae," i pane aku ai ka paele. "Ua manao au o oe o Leone de Boane, ka Naita o Noamanade."
"Owau io no. Heaha kau hana me a'u?"
"No ka haawi wale aku no i kekahi palapala, e ka mea maikai."
"Mai ia wai mai?"
"Na ka palapala no hoi ia e hoike ae nona iho." A i ke kauwa hoi i kamailio mai ai pela, ua unuhi ae oia mai loko ae o kekahi ekeeke o kona --- he palapala maluna o kekahi ilihipa maikai loa, ua hoopaaia hoi me kekahi lipine ulaula a ua ailaia me ka wapa polu.
"Eia nae hoi, aohe inoa i kakauia mawaho iho, "wahi aku a ka naita me kona hoohulihuli ae i ka palapala iloko o kona lima.
"Eia nae, nau no, e like no paha hoi me ka mea e loaa iho aua ia oe ke weheia ae. A pela no auanei hoi i pau ai ka'u huakai ahailono."
Me keia ua onou aku ka paele i kona waapa a kaawale mamao ana mai kapakapa, a ua hakalia ole iho no hoi ua kaawale loa aku oia mai kahi e loheia aku ai.
"Eia he epa iloko o keia," i hooho ae ai o Gaberiela. "Aia aku no he poino ke poo mai la ma kahi kokoke, o hilinai ia mea. E hookuu aku ia kaua a hoea hoi iwaena o ka muliwai."
"Alaila, e lawe aku i ka'u hoe, oiai hoi au e nana pono ana i keia palapala," i panai aku ai e de Boane.
Ua hana aku o Gaberiela e like me ka mea i kauohaia aku ai iaia, a aole i emo iho hoea hou ana ka waapa iwaena o ka muliwai. Iloko iho hoi o ia wa ua okiia ae ka lipine silika e hoopaa ana i ka palapala o ka naita, a iaia hoi i wehe ae ai, ua hulili ae la kona mau maka me kakahi olino okoa ae, a oi loa ae hoi ka pana pumehana ana o kona puuwai.
Ua kakauia ma na kahakahana hua-palapala Arabia, i kahaia me kekahi lima palupalu loa, a penei iho na olelo:
"LEONE DE BOANE - Ua makemake au e ike ia oe i nei ahiahi. Aia no he pilikia no kaua a elua. Ua pouli a ua hakumakuma hooweliweli mai na lani, a eia ae ka iao. Eia kekahi uhane ino ke hoolilo nei i ke ea ma o a maanei o kaua me he laaumake la. Hele mai i o'u nei, oiai, ua makemake au i kau ao mai. Hele mai i o'u nei, no ka mea, a haawi aku no au i ke ao a uwalo ana ia oe. Ke kau ae ka mahina maluna pono o ka piko o ka mauna, a uhola mai la hoi kona kukuna hope loa maluna o ke kulanakauhale nei, hele mai a ka puka-pa kokoke loa i ke alahaka nui, e puka aku ana i ka wai o ka muliwai mai ka malapua aku o kuu makuakane. Hele mai, a e kikeke akahele mai maluna kekahi kia, a e hookomoia mai no oe. Ma kou akahele a kupaa, ua hiki loa ia'u ke hilinai me ka hopohopo ole. He mai - mai no a hoohala. Nau au e like me ka'u i olelo ai. LULA."
No kekahi manawa loihi mahope iho o kona heluhelu ana i ka palapala, ua nana pono loa iho o de Boane i ke kakaulima moakaka maikai o ka palapala. Mahope iho na opiopi hou ae oia a hoihoi iho la iloko o kona poli, a lalau hou aku la i kana hoe a hoomaka hou aku la e hoe, me ka haawi ae i na kauoha i kona ukali e u hoe no kauhale. Iaia i hoea hou aku ai i kona keena ponoi ua heluhelu hou ae oia i ka palapala a kaomi ae la i kona mau lehelehe. Aole loa he wahi olelo iki i puai ae mawaena ona a me kona kanaka no neia mea. Ua ulelohi a kaumaha uluhua ke kaalo ana aku o ka la, a i ka wa i uhi mai ai e ka poeleele, ua holoholo ae oia ia loko o kona keena me ke lelele o ka oili a me ka hopohopo. Mahope iho o kahi wa ua kahea aku oia ia Gaberiela, a ninau aku la aia la mahea ka mahina kahi i kau ai.
"He hora kee a puka ae, e kuu haku."
"E hoike mai ia'u ke kokoke ae i na kuahiwi."
Aole i pau.
-----
Na Beritania no Mua.
Oiai hoi, aia ke kalele no ka pono o kekahi hoomanaoia ana o ka La Poa Kiulai e ka lehulehu o Kapalakiko mamuli o kekahi mau haawina makahiki mau o $3,000 mai ke aupuni kulanakauhale mai, e hoomaopopoia nae paha hoi ua lulu ae na makaainana aloha aina o Beritania Nui e noho nei maanei he $3,500 no kekahi hoomanao kupono ia ana o ka Iubile o ka Moi maikai. Aole no paha hoi e kupono ole ke pakui ae aole i nui loa na poe Pelekane e like la me na poe Maleka e noho nei ma keia kulanakauhale.
Nupepa News Letter [Palapala Nu Hou] o Kapalakiko.
-----
He keiki uuku maoli o 8 makahiki ka i ku ma ka lima akau i ka poka a kekahi mea hoomaamaa ki pololei makai e Kukuluaeo i ka Poaono, la 5 nei. Ua maa no ka i ka hele mahope e kau hoailona ai, a i nei hana ana hoi, ku oia. No ka maopopo ole ole ka aole oia i makaukau, aka, kani e ka pu. He mea pono loa keia ke noiiia.
NA MOKUPUNI.
---
Na Lono Huikau no ka Paeaina Holookoa.
Olioli Makahiki Piha a me ka Lawaia Mano Kulaia.
Ke panee hou aku nei au i mau mea-ai no kou papaaina, a kou poe makamaka a me na kini e nuu iho ai:
HOOMANAO LA HANAU.
Ma ka la 9 iho la, ua hoomanao ae o Misi Ane Kahele ma kekahi papaaina i luluu i na ono o kela a me keia a ka puu e momoni ai, no ka piha ana o ka makahiki mua o kana kamalei o ka hanu ana i na ea o keia ao. Ua akoakoa ae he anaina nui malaila o na poe i konoia, e hoonuu ana i na kohi kelekele a ka Puukolu. A i ke kolu o na papaaina, ua hoomakiliia ae he wahi kapala poi a hiki i ka ike pono ia ana aku, ua paa na maka o kekahi, pilipili na lauoho a paele na lole. Ua hiki no, he hana poo puaa no ia. "He puaa nui no nae, ua holo loa ka puaa."
He hula Europa a me ka uhaku kikala na leoleo o ia po, a hookuu i ka pili o ke ao. Guru no na hana. E hooloihiia na la o ka lei.
LAWAIA MANO.
Ma ka la 10 ae, ua hele aku ka Hope Makai Nui a me kekahi poe kanaka i ka uhai kao, i mea kupalu mano. Ua loaa elua kao me hookahi lio wiwi, i mea lealea no ka la kulaia o ka Na'i Aupuni ma Keanahoomoe.
Ma ka la 11 mai i hiki kino ae ai ka Hon. G. N. Wilikoki, S.W. Wilikoki, Hope Makai Nui J.H. Coney, C.H. Bishop, J. Gandall, C.W. Spitz, Lunakanawai H.K. Kahele, S.K. Kaeo, R. Fountain, W. Ellis, E. Lowell, M. Kanehe, a he lehulehu aku o na haole a me na kanaka, i hiki aku ka huina i ke kanaha a oi.
Mawaena o na hora 7 me 8 a.m., ua paa ae i ka makau hookahi pihi waha nui eono kapuai a oi aku. A mawaena o na hora 1 a 2 p.m., ua paa hou hookahi, aneane no e like me kona mua. Hapalua hora paha mahope iho, ua paa hou hookahi, aneane no e like me kona mau mua ae, a o ke oki no ia a hiki i ka hoi ana o na poe makaikai, a koe aku no na poe ai ia ano i'a, o ke ake no o ka loaa hou ae.
He ma-u mau wahi hua mokihana ia o Haupu nei e lawa ai no o kahi lei.
KIU MEA HOU.
Lihue, Kauai, Iune 12, 1897.
HALEKUAI LAHUI KALAHIKI
Helu 405, Alanui Moi, ma Waikiki aku o Alanui Nuuanu, ma ka aoao mauka, ke keena mua o ka "Hawaii Holomua."
Ma ia halekuai o na oiwi e loaa ai na anoi a me na paihi o na ano hou loa, e laa
Na Kalakoa, Na Keokeo,
Na Makalena, Na Kinamu,
Na Huluhulu, Na Lihilihi,
Na Kamaa o na Kane, Wahine me Keiki a pela aku.
Oluolu no ke kuai ana. Aohe hewa ke kipa mai e ikemaka, a aohe no hoi he kunukunuia no ka hoikeike ana i na mea kuai.
M. PALAU, Luna Nui.
14-tf
Hoolaha Hoohui.
I keia la i hoohui ae ai o Alexander Cockburn a me Alexander Lindsay, Jr., no Kailua laua, Kona Akau, Hawaii, malalo o ka inoa hui o Ka Hui Kalepa o Kona (The Kona Trading Company), no ka lawelawe ana i ka oihana hookomo a kalepa waiwai laulaha ma Kailua i oleloia, Kona Akau.
Kailua, Nov. 25, 1896. jn 14-2t
Hoolaha Hoohui.
Ua hookomoia mai o John K. White, o Hookena, Kona Hema, Hawaii, i keia la i lala no ka Hui Kalepa o Kona (The Kona Trading Co.), e lawelawe ana i ka oihana hookomo a kalepa waiwai laulaha ma Kailua a me Holualoa, Kona Akau, Hawaii.
Kailua, Maraki 31, 1897. jn 14-2t
Hoolaha a ka Lunahooponopono Waiwai.
Ua koho pono ia ka mea nona ka inoa malalo iho i Lunahooponopono Waiwai no ka waiwai o HANA KUKONA (w) o Honolulu, Oahu, i make.
Ma keia ke hoikeia aku nei ka lohe i na mea a pau he mau koi ka lakou ma ka Moraki a palapala e ae paha, e hoike koke mai i ka mea nona ka inoa malalo iho nei iloko o eono malama mai keia la aku, a i ole, e hoole loa ia mahope o ia manawa. A o na poe a pau he mau aie ko lakou i ka mea i make, e awiwi lakou i ka hookaa koke mai ma ke keena o S. K. Kane, ma Alanui Papu, maluna o ka Halekuai Rula Gula.
S. K. KA-NE.
Lunahooponopono Waiwai o ka waiwai o Hana Kukona (w), i make. my 31-5
William Kamali.
Pena Hale o na ano a pau, Kau Pepa a Lu One paha, e like me ko oukou makemake. Ua hiki ke hoohinuhinu i na Umeke, Pakaukau, Pahu-ume, Moe, Puniu, i hiki ole ke hoomaemae hou ia. Ua hiki ke hookoia na hana me ka eleu loa a o na kauoha a pau mai na kuaaina mai ua hiki ke hookoia. He oluolu loa ka uku ma ke kuka olelo ana. E kipa mai e na makamaka, mai poina.
Keena hana, ma ko S. K. Pua keena, Helu 7 1/2, Alanui Konia.
Wahi Noho, Kapalama. mar 15-6m
He 13 Apana Aina Kuai.
Ma Kawananakoa, Nuuanu, e kokoke ana i ko Kakina ma home. He 50 kapuai a oi ka laula me 100 kapuai a oi ka loa o ka apana hookahi. He oluolu loa ke kumukuai o keia mau apana aina nani, aia iwaena o ka olu wehi o na kuahiwi o Nuuanu. He 15 kapuai ka laula o ke alanui, e hui ana me ke alanui o Nuuanu. E hookomoia mai ana ka wai kaulana o Luakaha ma na paipu hao.
E ninau i na mea i koe ma ke keena o R. W. Wilikoki me Sobrebro, ma alanui Konia, Helu 1/2.
ED. A. WILLIAMS.
Helu 514, Alanui Papu, ma Ewa iho o Pa Aloha.
-----
He mea kuai lako hale o na ano a pau loa.
-----
He mea Hana Pahu Kupapau, a Hooponopono Hoolewa.
E hoolakoia no na Kaa Kupapau, na Kaa pio ame na Kaa-ohana.
Ina no e ninau iaia, e loaa no na Pohaku Kia Hoomanao no na He Kupapau.
-----
O ka Ialoa kekahi hana hiki loa iaia aia ia malalo o ka lawelawe ponoi ana a Ed. A. Williams, F. D., he mea i puka pono mai ka Kalaka Kula o ka Ialoa Maikai ana iloko o Mei, 1894.
--- NA TELEPONA ---
Keena, Helu 179 - Kauhale, a me Kahea Po, Helu 816.
nov9-mp @