Ka Makaainana, Volume VII, Number 17, 26 April 1897 — Page 2

Ka Makaainana.

 

2                      HONOLULU, OAHU, POAKAHI, APERILA 26, 1897.

 

LEONE DE BOANE

MA MEA OHUMU KIPI O COADOVA

MOKUNA V.

HE HAKAKA KAMAHAO.

[Mai ka Helu 16.]

 

            "O ka mea mua nae hoi," wahi mai a ka powa, "e ae hou oe ia oe iho e paluluia ou mau maka; no ka mea, ina paha mamuli o na ulia a keakea ana a na ouli o ka manawa, e hele aku oe me ka lanakila, aole loa o'u makemake e lawe aku oe i kahi ike o na alanui pahaohao au e hele aku ai."

            Ua ae maalahi aku ka naita, a pela no hoi me kona kanaka; a i ka wa i paa pono ai o ko laua mau maka, ua alakaiia aku laua mai loko aku o ke ana-alakaiia aku ma na ala kikeekee-no kekahi wahi mamao loa; a i ko lakou ku ana, ua lohe ae laua i ka hamumu mai o ua leo lehulehu loa ma o a maanei.  I ka wa i weheia ae ai o ka palulu mai na maka aku o ka kakou kaeaea, ua ike iho la oia aia oia iluna pono o kekahi wahi palahalaha uliuli, i puni na aoao a pau me na kumulaau nunui, a ma o a maanei ona ua akoakoa mai he elua a ekolu haneri paha o na kanaka ahiu a nanaina hiena.  Ua hiki iaia ke ike aku i ka piko o kekahi puu kiekie o kekahi mauna aole i mamao loa aku maluna ae ona, nolaila, ua koho iho oia aia ka paha hoi oia iluna o kekahi honua papali kiekie o ka Morena.  Iloko o ka aui hookahi ana a ka maka i hoomaopopo ai oia i keia mau mea a pau, no ka mea, aia kona manao nui loa maluna o na hiena haihai kanawai e hoopoaipuni ana iaia.

            "E Leone de Boane," i puai leo mai ai ke alii, "eia mai kau pahikaua.  Ina oe i makemake i mea oi ae o ke kaumaha, e loaa no ia ia oe."

            "Aole, aole," i pane aku ai ka naita, me ka puili awiwi a hoihoi ana ae i kana pahi milimili, ana no hoi i ike koke aku ai iloko o ke awihi ana, "he pahi oi ae mamua o keia aole loa i hanaia e kahi lima kanaka.  Ua hana keia no'u iloko o kekahi mau hakaka hahana ana, a malia o kokua mai no ia'u i nei hana ana.  E loaa no anei hoi ia'u he palekaua?"

            "Ae.  E wae oe e like me kou makemake a ku hoi i kou iini."  Ua huli ae o Moramolina i kekahi o kona poe ukali, a ua lakou hoi i lawe mai he umikumamalua palekaua.

            Ua wao ae o de Boane i kekahi mea i hana maiau loa ia, he kila maikai i hele a hinuhinu, aole no hoi i oi loa ae ka nui mamua ae o ka loa o kona lima mai ka hai aku; a i ka wa i hoopaaia ai na kaula-ili a paa pono i kona lima, ua hoike ae la oia i kona makaukau e hoopapa aku.

            "E hookuu mai i ko'u hoa paio e ike aku au iaia i keia wa." wahi aku ana.

            "Heaha ia, ea!" i hooho leo nui ae ai ke alakai powa, me ka huli ana ae i kekahi poe kanaka e nonoho ana i ka honua iwaena o na kumulaau, "auhea ka hoi o Tariki?"

            "E na anela hemolele!" i pu ana ano paupauaho ae ai o Gaberiela iaia i ike aku ai i ke kanaka i hoolohe mai la i keia leo kauoha.

            A i hewa ole ai no hoi kona hooho ana ae pela.  O ka naita huluaa loa no hoi kekahi i hiki ole ke pale ae i ka maoela e holo poaipuai ana i kona pauku kono hoolookoa.

                        Aole i pau.

 

            He 17 o na haumana kane o na Kula Kamehameha i hala aku no lalo o Waialua i kakahiaka Poalima, la 16 nei, e kukulu ai i na halelole, no ka iho aku o ke kaoo nui i kakahiaka Poakahi a ilalo o laila e hoomaha a e hooluolu ai.  O ka huli hoi nui mai paha hoi koe o lakou.

            Ahiahi Poalua, la 13 nei, mahope o ka hala ana o umi ia ma ke alualu akaku ma ka moana mawaena o Lanai me Kahoolawe, ua oili hoi mai la ka mokukaua Hawaii Kaena me Adimerala Balaunu o ka Oihana Makai.  He neo kahi mea i loaa, aka, he eha mau kini i pau ka opiuma o loko i loaa ma kahaone o Manele, Lanai.

            Poalima, la 16 nei, ka piha ana o ko ka Rev. Makua Leolono iubile ma ka oihana laa.  Ua 75 ona makahiki i nei wa a he ohana ola loihi kona.  I ka 118 makahiki, make kona makuakane 101 kona makuahine, a he 92 hoi o kekahi kaikuahine ona.  Ke manaolana nei makou nona e hoolohiia mai no kona ola no kekahi mau makahiki loihi hou aku.

            He pahu-hae hou ko Kawa i nei wa, a ua hauoli o Kiaaina Le a me kona hope Kamana.  Aia iluna pono iho he kii ilio, he hoike ana ka ia no ka hamuia o na poe hana hewa a hiki i ka paa pio ana, pela ka o Kamana i hoakaka ai.  I ke kukuluia ana ka iluna, ua ku Ialani mai na paahao mamua pono me ka hemo o na papale, oiai paha hoi he mau leo pule kahi a ua Kamana la.

            Ua hooia mai nei ke Aupuni Iapana i ka hilinaiia o ka Kanikela-Kenerala Simamura mau lawelawe ana i ua hana no ia aupuni maanei ma ka hookiekie ana ae iaia a ke kulana Kuhina Noho, he hanohano hoi i loaa ole i kona mau mua.  No ia mea, ua haawi ae na Kepani alakai i kekahi papaaina hoohanohano nona i ke ahiahi Poaha, la 15 nei, ma ka Hotele Hawaii, a ua uhene ae no ka hana Aupuni ma ia kahua.

 

Hoike Make o Hookahi Hapaha.

 

            Iloko o Ianauri i hala, he 52 ka nui o na make o Honolulu, o ka hapanui aia iwaena o keiki liilii loa.  Penei e akaka ai: Malalo o hookahi makahiki he 14; hookahi a elima, 4; elima a umi, 1; 10 a 20, 2; 20 a 30, 5; 30 a 40, 5; 40 a 50, 7; 50 a 60, 4; 60 a 70, 5; maluna o 70, 5, huina, 52.  A mai loko mai hoi o keia huina nui loko mai hoi o keia huina nui, he 14 poe i lawelawe lapaau ole ia.  Ma ka hoohalikelike ana me ko na makahiki mua eha, e ikeia ai o keia ka oi, penei:  1893, 38; 1894, 48; 1895, 49; 1896, 51; 1897, 52.

            No Feberuari mai hoi, he 38 ka huina o na make, he 12 hoi o ia poe i lawelawe lapaau ole ia.  He 6 na make malalo o hookahi makahiki; 1 a 5, 3; 10 a 20, 4; 20 a 30, 4; a 40, 7; a 50, 4; a 60, 4; a 70, 1; oi ia 70, 5; huina 38.  Ua emi hoi nei malama i ko na makahiki mua aku, a penei iho e akaka ai:  1893, 46; 1894, 45; 1895, 45; 1896, 78; 1897, 38.  Iloko o 1896 ka oi loa a he 40 hoi ka emi iho o nei makahiki i ko ia makahiki no ia malama like.

            A no Maraki aku nei hoi, he 51 ka heluna nui o na make, he 14 o ia poe i lawelawe lapaau ole ia.  He 8 na make malalo o hookahi makahiki; 1 a 5, 5; 5 a 10, 2; 10 a 20, 6; 20 a 30, 9; 30 a 40, 5; 40 a 50, 4; 50 a 60, 4; 60 a 70, 4; maluna aku o 70, 4.  Iloko o keia heluna he 29 kane a he 22 wahine.  Ma ka lahui hoi, he 27 Hawaii, 9 Pake, 5 Pukiki, 5 Kepani, 2 Pelekane, 2 Maleka a hookahi lahui e ae.  A ma ka hoohalike ana hoi me ko ia malama like o na makahiki eha i hala ae, e ikeia no penei:  1893, 46; 1894, 45; 1895, 45; 1896, 63, 1897, 51.

 

Oki Mare o ke Anuu Hemolele.

 

            No Kailua, Kona, Hawaii, ma ka lono no ka hoopuiwaia o ko laila poe i ke ku ana aku o ka mokumahu Helene a hoopa e aku ekolu ohua, oia o C. L. Waita, Peresidena o ka Hui Mokumahu Waila, S. G. Wiala a me Loio Balu.  Ua hooi loa ia ae ka hoohikileleia i ke komo ana aku o keia poe ekolu iloko o ka Aha, kipakuia ko loko poe e hele no waho, a paniia na puka.  Eia ka hoi he hihia oki no C. L. Waita a me kana wahine, no ko laua noho pono ole.  Ua aeia ke noi me ka hana nui ole.  Ia po iho i hoea aku ai ka mokumahu Kinau a hoihoi mai la ia lakou no Honolulu nei.  La Pule i hala, la 11 nei, i ku aku ai i o a moku hoi mai ka aelike mare i kahi la ae, Poakahi.  Holo no ka hana.  I Honolulu nei no ka i hoopukaia ai ka palapala a ua holo like ka hoi mawaena o na aoao a elua.  Me he la nae hoi ka wahine ka i hana i ka hewa.

 

            Poaha, la 15 nei, i hanau mai ai ka wahine a Kaliko Holo he kaikamahine, a i ka Poaono mai hoi ka Kale Spencer wahine, he kaikamahine no.  Lehulehu mai nei ka hoi kakou.

 

E Hoomaka ana i Nei La

NO

Hookahi Pule Wale No!

E Haawi no Makou i ko Makou Poe Kuai Mai i ke Kuleana a Kuai ai i kekahi

Huina Nui no Kahi Mea Uuku!

 

Kalakoa Amerika........................        30 i-a no $1

Makalena Kuniia........................        14 "      "  1

            "           ".........................          12 "      "  1

Ie Kuniia...................................          10 "      "  1

Keokeo......................................          20 "     "  1

  "        ......................................          15 "      "  1

Kukaenalo................................           15 "      "  1

Keokeo Kihei, 81-iniha laula, 16 keneta no ka i-a.

Keokeo Kihei, 81-iniha laula, 20 keneta no ka i-a.

Keokeo Kihei, 90-iniha laula, 22 1/2 keneta no ka i-a.

Lilina Uhi Pakaukau, 37 1/2 keneta no ka i-a.

Kalakoa Laholike..................20 i-a no $1

Makalena Kikokiko Keokeo, 8 i-a no $1.

Keokeo Pale Uluna, 42-iniha laula, 8 i-a no $1.

Lihilihi Paku, 3 1/2 i-a loihi, $2.50 no ka paa.

Kawele Holoi Waha, $1.25. $1.50, $1.75 no ke kakini.

 

O na Wawai o ke Kau i Hala

E Hooliloia aku no ma ka 15 keneta o ka I-a.

Ua like ka waiwai io o keia ae la mai ka 25 a 30 keneta o ka i a.

15 I-a Keokeo Aahu..........................$1

12 I-a Keokeo Aahu........................... 1

34 Kakini Papale-kapu o Kane, 45 keneta pakahi.

Kihei Uhi-moe, $1, $1.25 a me $1.50 pakahi.

Kawele, 35 keneta, 55 keneta, 75 keneta a $1 o ke Kakini

 

Hapalua Pu Kumukuai no na Papale Laiki me Huluhulu.

Mai Hookuu i nei Wa e Kaalo ae, oia, Aohe Mea e Hookoeia ana.

 

L. B. KERR

HALEKUAI LA HUI KALAHIKI

Helu 405, Alanui Moi, ma Waikiki aku o Alanui Nuuanu, ma ka aoao mauka, ke keena mua o ka "Hawaii Holomua."

Ma ia halekuai o na oiwi e loaa ai na anoi a me na paihi o na ano hou loa, e laa

Na Kalakoa, Na Keokeo, Na Makalena, Na Kinamu, Na Huluhulu, Na Lihilihi,

            Na Kamaa e na Kane, Wahine me Keiki a pela aku.

            Oluolu no ke kuai ana.  Aohe hewa ke ipa mai e ikemaka, a aohe no hoi he kuuu unuia no ka hoikeike ana i na mea kuai.

            M. PALAU,   Luna Nui.

            ok14-tf

 

HELE HOOLUOLU

O. R. L. Co.

MA NA POAONO A ME NA LA PULE.

            E haalele mai no na Kaamahu i na hora 9:15 a. m. a me 1:45 p. m., a hoea hou mai i Honolulu nei ma na hora 3:11 a me 5:55 p.m.

Na Palapala Uku Puni

 

                                                                        Papa 1.                        Papa 2.

Manana                                                           $.75                 $.50

Mahiko o Ewa                                                 1.00                .75

Waianae                                                          1.50                1.25

 

F. C. Smith,

Agena Ohua a Palapala Nui