Ka Makaainana, Volume VII, Number 14, 5 April 1897 — Page 8

8 HONOLULU, OAHU, POAKAHI, APE RILA 5, 1897.

Ikea ko ke Alii Ano.
(Mai ka aoao ekahi mai.)

ka hoomaikeike loli ae o ka manaoino haalele loa a na elele o ko oukou poe pakaha i hoaiai mai ai. E hoohalikelike ae ana oia i keia mau ano like ole a e hoahewa aku ana hoi oia i na kumu mai o keia hewa karaima e kue ana i ka pono Ka ristiano a me ka hoomalamalama ana. Ua oi loa ae ka lilo i mea hoihoi ole loa ia e ka lehulehu ma Wasinetona nei o ka manao o keia poe keonimana kupaianaha e hoohui mai ia Hawaii ia Amerika nei. E kue aku no na wahine o Amerika nei a hiki i ka hopena loa i kekahi manao e hoopaumaele hou ai i ko makou hanohano makee lahui ma ka hoohui ana mai i kekahi aina uuku i aihueia mai ka lahui e kekahi aluka o na poe powa. Ina e hoea hou mai ana kahi ano poe Amerika hoi hope hoohaahaa i Wasinetona nei, e hala wai no lakou me ka hookipa puanuanu loa ia. Aole loa he ninau me makou ina he Demokarata a he Repubalika paha, aka, o ka manao Amerika oiaio maoli, a ina aole ko makou poe kanaka e kakoo ae ana i ka hanohano Amerika, alaila, na makou wahine no ia e hana aku." * * *

Kolekole na Iwi i ka La.

                Ma ka po o ka Poakahi a ao ae ka Poalua, la 29 o Ma raki, ma Haneoo, Hana, Maui, ua hueia o Misasa Kamala, wahine a Misita J. Kekahuna e ka mea i ike ole i ka manaonao, a i komo ole hoi ke aloha iloko. Ua make o Misasa Kamala i ka malama o Feberuari, la 20, a kanuia i ka la 21, a ua like me hookahi mahina me na la keu. O ke kumu o keia kiiia ana e hue, ua waiho pu ia he kanawalu dala ($80) me ka lei gula. Ua hueia a waihoia ke pani o ka pahu mawaho o ka hale kupapau me kekahi mau holoku, he holoku silika akala a he holoku pahoehoe.
                Ua waiho wale ke kino me ka paa no i ka lole, ua lilo na dala he kanawalu me ka lei gula. Nui ke kolohe. Ua manaoia he Kepani ka mea nana i kii e hue. Malaila ka Hope Maikai Nui o Hana kahi i huli ai i ka mea nana i hue a i lawe i na dala me ka lei gula, aole nae i loaa ke kolohe. Nana no.
P. KAUIMAKAOLE.
Hana, Maui, Aperila 2, 1897.
                [Ua lohe mai makou i ka make ana ka o kela wahine, ua kauia he mau hapaha kini ma na maka, i mea poi iho; a i ka hookomoia ana i ka holowaa, he $60 hou iho, hui he $80 i kanu pu ia me ia. He naaupo keia hana ma ko makou manao, no ka mea, "na ka make no e kanu i ka make," a e malama hoi i ke dala no na poe e ola ana mahope nei. Ina he aloha ka mea i manaoia, he mau hana okoa ae no ko ia ina i manaoia e lawelawe a e hooko aku. L. H.]

                Eia o alanui Liliha ke pahonohono wale ia nei no maluna iho o ke kua-la, a e aho no nae hoi ia mamua ae o ka nele loa. Ua pau ka mauu o na aoao i ke kalepaia e na paahao a pau pu me ka nahelehele.

Hoopaiia no Elima Makahiki.

                O ka Poaono nei ka la i hoopaneeia mai ai no ka hoolohe ana i ko D. W. Ko beta hihia, aka, no ka manaoia o piha aku ke keena o ka Aha Apana i na poe hele makaikai wale aku no, ua hooholoia i kakahiaka Poalima nei e hooloheia ai. Auwina la Poaha, ua hemo oia mai Kawa malalo o $5,000 bona a ua hoi no lalo o Ewa me ka wahine a u pii pu mai no i kahi kakahiaka ae. O laua like no ka hele ana a loko o ke keena hookolokolo o ka Aha Apana i ka hora 10. Aohe lala e ae o ka ohana Walakahauki malaila. Ua ku ke kane imua o ka Lunakanawai Apana, noho hoi ma kekahi noho me ka nana me ka lohe aku no i na mea a pau, ua like nae hoi ia me ka ole iaia, he mea minoaka wale ia no.
                Na ka Ilamuku i heluhelu ke kumu hoopii, a ma ka pane ana hoi i ka ninau a ke kahu o ka Aha, ua ae aku oia i kona hewa. Ua hoopaiia mai oia no eono malama hana oolea me na koina. A pela no i hanaia ai a piha he umi kumu hoopii. I ka umikumamakahi hoi, ua ku ae o Kuhina Kupa, ka Loio Kuhina no ka manawa, a noi e hoopau wale ia ia kumu hoopii a me na kumu e ae, oiai, ua lawa ka hoopai, no ka mea, ma ka ae ana o ka mea hoopiiia i kona hewa, ua pakele na inoa o na keiki opio ana i kolohe ai mai ka moolelo o ka Aha a lilo ole hoi i mea e pakaukau hele ia ai. Ua aeia keia noi a ua hanaia pela. Ua loaa ka huina hoopai piha o elima makahiki i keia kakauolelo i pau i ka Ahahui Opiopio Karistiano haole. Mahope iho ua aloha a honi oia i kana wahine iloko o ka Aha, a pela no ka hoi mahope hou iho no ma ke keena o kona loio, a kauia ma kekahi kaapio a lawe loa ia e kekahi makai no Kawa, kahi ona e paa nei. E hoopukaia ae ana paha oia iwaho e hana ai, a i ole ia, iloko aku no paha.

Ulia Pakalaki Manaonao.

                I kekahi kaa panee e holo ana ma ke ala palua (kuwiki) ma Keoneula, ma ke alo o ko J. K. Kaulia wahi noho, a i kikepa ana aku e holo pololei loa, i kahi wa o ke ahiahi Poakahi i hala, ua haule aku la o Lum Achi, luaui o Kale Aki. Ua hookui ka oia i kekahi pou telepone hou, a hina oia a kaa malalo o ke kaa a aeia na wawae e kekahi huila a hakihaki pu, maluna iki ae o ke opuupuu kuekue. Aole oia i ikeia aku, aka, i loheia aku i ka uwe mai i ka eha. Ua kaikai koke ia aku oia no ka halemai Pake a kauoha koke ia ekolu kauka haole, a na lakou hoi i oki na lala i poino. Iloko no o na hooikaika ana, ua aili mai la no kona aho.
                Wahi mai nae hoi o ko makou lohe, no ka nui loa ka o kona eha, ua hooki koke oia i kona kamau ana. He aoo oia o 70 makahiki a keu. Malalo no o na lawelawe a hooponopono ana a kana keiki, ua hoolewaia ae kona kino i ka auwina la Poalua ae a nalo ma ka ilina Pake iuka o Pauoa, malalo o na lawelawe haipule ana a ka Rev. H. H. Paleka. Ua hooko ke keiki i ka hana hope loa o ke aloha makua maluna ona.
                Kakahiaka Poakolu i malamaia ai he aha nieniele e ke Koronero, a ua hooholoia i make no oia mamuli o kona hemahema a aeia ai e kekahi kaa-panee a poino na wawae a elua. He poe Pake wale no na lala o ke kiure.

KELA A ME KEIA.

                E nana ae i na hoolaha hou.
                Kokua ae i na Ma'i Lepe ra i na po.
                Aohe kaua o Eu ropa mawaena o Helene a me Tureke. Pehea aku ana la?
                Aia o Sweet Emalia, oia hoi, o Emalia Kaihumua i ka halemai pupule i keia wa.
                Ua kapu ke komo a oki ana i na mea ulu o luna o ka aina o Kamanaiki, Kalihi.
                Poakolu iho paha e holo aku ai ka mokukaua mikanele Hoku Ao no Kapalakiko e hoomaemaeia ai.
                Ma ka mokumahu Kinau o ka la apopo e holo hoomaha aku ai o Kimo Poe no kekahi mau pule hoomaha ma Hawaii.
                Ua make mai nei ma Okalana, Kaleponi, i Ma raki 21 iho la, o Kauka S. G. Taka. He ma'i ma ka puuwai kona i make ai.
                Elua mokumahu au moana o ka Poaha iho mai Kapalakiko mai, o ka Mariposa no ka Hema a o ke Kopetica hoi no ke Komohana.
                Na ka mokumahu Au seteralia i lawe mai nei i ipuhao hou o 9 tona, he pauma a me ke kano no ko Lahaina hale wiliko, ka Paionia Mila.
                I ke ahiahi nei i make emoole ai ka wahine a J. Naholowaa, ma ko laua wahi noho mauka o Hauhaukoi. E hoolewaia ana no i nei auwina la, hora 3:30.
                Ke nui nei ka aihueia o na mea kanu iloko o na poho mai na lanai hale aku. E akahele na haku hale a pela no hoi me kolohe o ka po a me ke ao pu no.
                Poaha iho e holo aku ai ka Haku Bihopa o Honolulu a me kana wahine no Enelani ma ka Hema aku nei, maluna o ka mokumahu Mariposa. Me ia na pule ana a na hoahanau o kona kihapai.
                He ahi ka i holapu ae i ka Poaono nei a me ia po iho i n a kumalaau opiopio o ke kahua hooulu mea-kanu kuahiwi o ke Aupuni mauka loa o Makiki. Ua manaoia he ahi puhipaka na kekahi poe o ka aeia ana e hele a kiola paha i ke poomuku kika a kikalika paha, o ka maloo iho hoi o ka mauu, wikiwiki ka a ana a hiki ole ke hoopio koke ia. A ua pio nae hoi i nei wa.
                Aia ko Kauka Ma re keena hana i keia wa ma ka hale o Kakalaika, kokoke i Pelekane.
                E holo aku ana ka mokukaua Nene Ahiu no Waimea, Kauai, i keia la. A ke hoi mai, holo loa no Mokupuni Fanina, a maanei mai no ka e huli hoi hou mai ai.
                He hookuku kinipopo Pelekane ka i malamaia i ka auwina la Poalima nei mawaena o kekahi poe wae o luna o ka mokukaua Nene Ahiu a me ko uka nei. Ua haule na poe au kai i ko ka aina nei poe.
                Iloko o 17 la holo mai Kikane, ku mai la ka mokumahu Monowai i ka auwina la Poaha iho la. Hora 9:30 o ia aumoe ae no i holo loa aku ai no Kapalakiko me ka ukana a me na ohua mai keia awa aku.
                Ma ka Au seteralia o ka Poalua iho la i hoea mai ai ka Rev. J. Usebona, ke pani a me ka hope oiai ka Bihopa o Honolulu e kaawale ana i ko na aina e. Ua ukaliia mai oia e kana wahine a me ka laua keikikane hookahi, a aia ma ka Hotele Hawaii e noho nui nei.
                He 10 poe i kaulimaia e ka Haku Bihopa o Honolulu i ke ahiahi Poakolu iho la maloko o ka luakini Pake o Sana Petero, he ehiku kane a ekolu wahine. A i nehinei hoi, i ka pule awakea ma ka luakini aku o Sana Anaru, he 31 poe i loaa keia hoomaikaiia, 19 kane a 12 wahine, o na poe opiopio nae hoi ka hapanui. Pihakui ka luakini. Ilaila ae na luina a me na koa malina o ka mokukaua Nene Ahiu.
                Ho ra 9 a. m. paha o ka Poaono nei i hoea mai ai ka mokumahu Gelica iloko o 10 la holo mai Iokohama mai, kona awa hope loa. Maluna mai ona ke Kuhina Pake hou no Wasinetona a e kona ohana a me na ukali. No ke ku ana ma kela awa hope a lawe mai i kekahi poe ohua, aohe na ohua i aeia e lele mai iuka nei. Ua pili mai no nae hoi i ka uwapo a hoolele i na ukana. Ua holo loa aku oia no Kapalakiko i kakahiaka nui o nehinei mahope o ka uhao lanahu a ukana ana.

Olelo Hoolaha.

Ke papaia aku nei na poe a pau mai ke komo a oki ana i na mea ulu o luna o ka aina o Kamanaiki, ma Kalihi, me ka loaa mua ole o ka ae mai kekahi mai o na mea no laua na inoa malalo iho. Ina e loaa aku ana me ke kue i keia hoolaha, hoopiiia no lakou e like me ke kanawai. ANTONE RICARDO. FRANK R. HARVEY. Honolulu, Aperila 1, 1897. apr. 5—3ts.

Hoolaha Hoonee.

E hoonee aku ana o Kauka H. V. Murray i kona keena oihana a ma kahi noho mua o R. Kakalaika, kihi o na alanui Alakea, Beritania me Uniona, i Aperila 1. apr. 5—3ts.

H. W. Schmidt & Sons.
(H. W. KAMIKA & KEIKI)

He Pakaukau ka i Hookaokoaia no na Koena Lole a me na Waiwai e ae, a e hooliloia aku ana me ka emi loa, a i ole no hoi ia, ua like me ka haawi wale. Loaa mau mai na Waiwai Hou ma kela a me keia mokumahu. He 25 pa-keneta ka hoemiia iho o na waiwai kahiko a pau loa. Alanui Moi, kokoke i Halehai. mar. 15—1yr.