Ka Makaainana, Volume VII, Number 14, 5 April 1897 — Page 7

HONOLULU, OAHU, POAKAHI, APERILA 5, 1897. 7

NA AINA MAMAO.

Mau Lono Huikau mai kela a me keia Wahi Like Ole.
Kuikawa Bulegaria me Monotenegero.

                No Sana Peterobuga kekahi lono i loaa ma Ladana, Maraki 18, e hoike ana ua hoouna aku ke Aupuni o Rusia i kekahi telegarama ia Kama'lii Nikita o Monotenegero a me Kama'lii Feredinana Bulegaria e ao aku ana ia laua e malama loa ia ke kulana kuikawa ma ko laua mau aoao ma ka ninau e pili ana ia Kerete.
                A mai kekahi mea kakau nupepa mai hoi o Konakinopela, aia he aelike mawaena o ke Suletana a me ke Za nana hoi e hoololi ano nui loa ae i ko Rusia komo keakea pu aku me na Mana e ae. Ke ui ano hoomalimali la hoi ke Suletana ia Enelani mamuli o na hookikina ana o ko ka lehulehu manao, a o ka hopena aku hoi o ia ka i maopopo ole. No ka Moi Keoki hoi, aole loa e hiki iaia ke kauoha aku ia Konela Vascso e unuhi mai me ka hoopilikia ole i kona leialii. Ina nae hoi e hoopaakiki loa aku ana na Mana i ka unuhiia mai o na pualikoa elua mai ka palena o Tesalonia, alaila, e paleia ae no ka hopohopo ana ke ala ae o ke kaua. O lakou no na makai, e pono e hana aku lakou ma ke ano he mau lunakanawai hoopono a oluolu. E hoopaakiki aku lakou i ka haalele like o na pualikoa Tureke me Helene i ka wa hookahi, a pela auanei hoi e oluolu loa ai ko na Helene manao.

Panikuia o Ke rete, Koe o Helene.

                Poakolu, Ma raki 17, i hoomaka io ia ai ke paniku ana ia Kerete, wahi a kekahi lono mai Atenai i loaa ae ma Ladana. Me he la nae hoi aohe pana he paniku ana i na awa o Helene no kahi maopopo ole e hoea mai ana. Aia nae hoi na poe kipi ma Kerete ke kukulu la i na papu ma na wahi hooili kaua kupono loa malalo o na alakai a kuhikuhi ana a na aliikoa Helene.
                Aohe nae hoi i maopopo loa e paniku io ia aku ana na awa o Helene, eia nae hoi, ua manaoia ma Atenai ina e panikuia ana o Helene, o ka hookomo ana no ia i na Mana mawaena o na pilikia elua. E hoike okoa ae i ko lakou kokua ia Tureke, a i oleia, e lilo ana lakou i poe hoike no kekahi paio ana mawaena o na mea elua, a ua akaka ole hoi ka maopopo loa ae o ia hopena mamua o ka Europa i ake ai e manaoio aku. Ua hoikeia ae nae hoi ua papa o Farani i ka hoounaia aku o na pu a me na lako kaua no Kerete.
                No A tenai mai nae hoi kekahi lono o Maraki 21, e olelo ana, i kulike ai hoi me ke kuahaua i hoopukaia e na adimerala o na aina e, ua hoomaka io ia ke panikuia ana ia Kerete i ka hora 8 o ia kakahiaka. Ua maopopo loa nae hoi aia keia paniku ana i na poe Karistiano wale no maloko loa aku o ia aina, a aohe hoi he nui o na hoopopilikia ana i na poe Mosolema mai keia hana a na Aupuni Karistiano eono o Europa.

Launa Pololei Enelani me Helene.

                Ua hoomaopopoia hoi malaila ua hoopaakiki aku o Enelani i ko na Mana haawi aku ia Helene i elua pule mamua ae o ka hooko ana aku o na mokukaua kuwaho i ke paniku i ka Pireuso, ke Awa o Atenai a me ke awa o Volo ma Tesale, a ua kokua ole loa hoi i ko Rusia manao e kaua aku na pualikaua kuwaho ma Kerete i ka pualikaua Helene e noho la malaila malalo o Konela Vasoso a kono aku i ko lakou unuhi aku a hele. Ua maopopo aia no ka o Haku Saulebure ke hoomau la i ka launa pololei ana me ke Aupuni Helene, eia nae hoi, aohe manao pili oihana e pili ana no ka Enelani hana ma nei mea i hoike akea ia ae. Ke kokua maikai loa ia la o Moi Keoki e kekahi poe i ike ole ia ma na aloalii o Sana Peterobuga, Ladana a me Kopenahagena. Ua loaa ia Helene keia oihana lawelawe malu me kona lilo ole. No ia mai ke kumu i ulolohi loa ai o na kukai ana.

Kuahaua na Mana no ke Kuokoa.

                Ma raki 17, ma na kai o Kerete, i hoike ae ai na adimerala o na aumoku hui i ke kuahaua a na Mana nui i manao ai e haawi aku maluna o ia Mokupuni i aupuni kuokoa, malalo aku nae hoi o ko ke Suletana noho poo ana. Ua hoike ae ua kuahaua la ua hooholo paa loa na Mana e like me ia maluna ae, a ua hooholo like hoi lakou i na kanawai i manaoia e hooponopono ai i ka lawelaweia aku o kekahi hoomalu aupuni ana o ke ano kuokoa, e hoihoi hou mai i ka noho'na maluhia a me ka hooko kanawai a e hooia aku hoi i kela a me keia mea, me ka nana ole ae i kona ano lahui a hoomana paha, i ke kuokoa, ka maluhia o ka waiwai, ka hoala hou ia ae o na hana mahiai a me na hana okoa ae, a me ka hoeueuia aku hoi o na hana e hooholomua ai i ka aina.

Makemake ke Suletana i ka Maluhia.

                Ua loaa ae he lono ma La dana, Maraki 17, mamuli o ko ke Suletana ake e hoomauia ka noho'na maluhia, ua makaukau oia e unuhi mai i na pualikoa Tureke mai Kerete a e haawi aku i ka mokupuni ia Moi Keoki e noho a e hooponoponoia aku e Helene me ka noho pu a hoomalu aku o ke Suletana, e lawe ana hoi no ia noho hoomalu ana ae maluna aku ma kekahi uku makahiki mau. Ma kekahi hoike no a ua telegarama la, ua kupono loa ka keia i ka manao o ka Aha Kuhina Helene a me na poe Mahomeda o Kerete, oiai, ua ake lakou i ka hoohuiia ae mamua o ka noho kuokoa ana. Ua oleloia ae no hoi ua hooki koke ia na kukai ana no nei manao e ko na Mana keakea ana aku.

Manao e Hoolilo ia Cuba.

                Ua haalele aku o Generala Weila ia Havana ma kekahi mokumahu i Maraki 22. Aohe i maopopo kona wahi o ka holo ana, eia nae, ua oleloia ma kekahi lono mai Maderida ua hoike aku oia i kona Aupuni haalele iho ana oia ia Havana no ka hoomau i kana mau hoohana kue i na kipi ma na mahele waena me hikina o Kuba. A ua loheia ae hui aia ka ke Aupuni Amerika a me ke Kuhina Sepania ma Wasinetona ke noonoo hou la i kela hana kahiko o ke kinai ana i ke kaua ma Kuba ma o ka ukuia aku o kekahi poho e ia mokupuni ia Kuba a o ia hoi ka panai no ka ikeia mai o kona kuokoa. Ua oleloia ae no hoi ma ko na kipi aoao, wahi a ka lono, aohe lakou e ae ia manao, no ka mea, ua maopopo loa no ka ia lakou aia ma ko lakou aoao ka lanakila a ua kokoke loa e hoea mai ka manawa no ia mea. He mea makehewa loa hoi no lakou ka ae ana e uku i kahi poho, oiai, ua like loa no ka ia me ka noho pio mau loa ana aku malalo o Sepania, oiai, he aie nui hewahewa no hoi kahi o lakou ke loaa ka lanakila. O ka uku mau ana aku i ka ukupanee ia Sepania, ua like no ka ia me ka noho ana a lakou e paio la.
                He makaukau loa o Senoa Sagasata, alakai o ka aoao Liberala, e lilo i Kuhina Nui no Sepania, ina e hookuu ana ka Moiwahine Kahu Aupuni iaia e wae i Aha Kuhina, a ua hilinai loa hoi oia ua hiki iaia ke unuhi ae ia Sepania mai kona mau pilikia a pau.

Nee Kaena a Generala Weila.

                Ia Generala Weila i ninau kamailio ia aku ai e kekahi mea kakau nupepa, ua hoike ae oia i kona hoowahawaha loa no ka na nupepa mau kamailio ana, a ua kaena ae oia me keia ano: "Eia ko'u mau mahele koa ke hooko aku nei i ka maluhia i nei wa me na nuku o ka lakou mau pu. Aohe he mea e loheia ana no ka maluhia ma na apana o Pina dele Rio, Havana a o Matanazasa paha aia au a hoomaka aku e hana ma ke ano nui, e hoohahani ana, uhai ana a e hopu pio ana i na kipi ma na aoao a pau. O ia ano haawina like no ke hanaia aku ana ma na apana hikina mahope koke iho hoi o ko'u hoomaka ana aku i na lawelawe hana ana ma ia aoao o ka mokupuni."

Na Paemoku Ooloku Kipi Pilipine.

                Wahi a kekahi lono mai Maderida, o Maraki 21, ua hooili hou ia he kaua ma ka apana o Manila, Paeaina Pilipine. Ua lele pualu aku ko ke Aupuni mau pualikoa i na kipi maloko o ko lakou mau auwaha. He 300 ka o na kipi i make, wahi a ka oleloia, a ua lehulehu loa na poe i eha. Ma ka aoao Aupuni, aole i oi aku i ka iwakalua poe i make a i eha.
                Ua hookohuia o Pi rimo de Rivera, Kapena Generala o Maderida, i mea e pani aku ai ia Generala Polavieha, Kapena Generala o ka Paeaina Pilipine i kauohaia aku e hoi no ka home. Ua oleloia ua hoowahawaha loa o Polavieha no ka nele o ka loaa aku o na kokua kupono iaia mai ke Aupuni aku. Aohe i mahaloia ko de Rivera hookohuia ana, no ka mea, ua manaoia oia he kanaka i nele me ka haawina hooikaika hana.

E Kipa a e Ike Ae.

                I kela hoa oiwi o kakou, ia S. M. Kamakau, ma ka halekuai waiona o Lovekeoe Ma, kihi o na alanui Nuuanu a me Marine. He heahea a he oluolu oia, a ua loihi kona kamaainaia ma ia hale, malalo o kona mau haku mua elua, i pau. O na waiona maikai wale no ke loaa malaila, a pela no hoi me na waina Kaleponi maikai loa. Oluolu na kumukuai, a pela no me na hookipa a kuka pu ana me ua hoa la malalo o kona mau haku hou. *

                I ka mokumahu Kaala i huli hoi mai ai i kahi wa mamua o ke awakea Poakolu, Maraki 23, ua loaa mai he waa ua palahuli a e lana ana, ua hoohuli hou ia ae, a he kanaka lawaia ko luna ua hele a nae iki. He nalu nui ka ka i poi iho i kona waa a hoolana pu ia. Ua aoo ka ua mea la, nona ka inoa o Kailimai. E ole no oia e oku ae i kona mau lima a peahi mai, ikeia ai e ko ka moku poe a hoopakeleia, mawaho aku nei no o ko kakou mau kuaau. He 70 a keu kona mau makahiki.

HELE HOOLUOLU.
O. R. L. Co.
MA NA POAONO A ME NA LA PULE.

E haalele mai no na Kaamahu i na hora 9:15 A.M. a me 1:45 P.M., a hoea hou mai i Honolulu nei ma na hora 3:11 a me 5:55 P.M. Na Palapala Uku Puni. Papa 1. Papa 2. Manana - - $ 75 $ 50 Mahiko o Ewa - - 1 00 75 Waianae - - - 1 50 1 25 F. C. Smith, Agena Ohua a Palapala Nui. feb 10-tf