Ka Makaainana, Volume VII, Number 13, 29 March 1897 — Page 7
HONOLULU, OAHU POAKAHI, MARAKI 29, 1897. 7
NA AINA MAMAO.
-
Mau Lono Huikau mai kela a
me keia Wahi Like Ole.
Aoia no ke Koi a na Mana.
Aohe hopohopo a hoohuoi ana, wahi a ka mea kakau o ka nupepa Manawa o Ladana e noho la ma Atenai, ina e hoonohoia ana o Kama'lii Keoki o Helene ma ke poo o kekahi Aupuni kuokoa ma Kerete malalo o ke kulana Kama'lii, e ae laelae loa no ka lahui Helene holookoa a me na poe Kerete i na kumu koi a na Mana, a e unuhiia aku no na pualikoa Helene. Wahi no o ka manao o ua ma kakau la, aole loa e pono e hooleia ia mau hoolala hoohana ana me na kumu koikoi kupono ole Ua hoohuoi loa na poe Kerete me ka Europa mau olelo a ua hilinai a manaoio paa loa ia hoi aohe ala e ae mawaho ae o ka hoohuiia aku ia Helene a i ka Tureke hoomalu ana paha, a ina hoi e haawiia aku ana na lakou no e wae a e koho no lakou iho, e kaa no ko lakou ake a hoihoi loa malalo o ka noho kuokoa ana malalo aku o ka hoomalu ana a kekahi Kama'lii Helene.
Kuikahi na Mana - Noonoo Enelani.
Penei iho na olelo o kekahi lono palapala o Ladana o Maraki 8 nei: "Ua pakuikui olelo ia ae maanei eia ka he aelike maopopo loa mawaena o na Mana e pili ana no na hana oolea e lawelaweia ai no ke kue aku ia Helene, ke hoole oia e hooko mai me na koi a na Mana ma ka unuhi ana mai i na pualikoa Helene mai ka Mokupuni o Kerete a i na aumokukaua Helene hoi mai na kai o Kerete."
Oiai hoi, ua pane ae o Helene i ka na Mana palapala koi like, i hoikeia aku ma ka helu i hala o KA MAKAAINANA nei, heaha ana la auanei hoi ka na Mana e hana aku ai no ka hooponopono ana ia Kerete. Malia o aeia aku e like me ka Helene koi, aole e haawiia aku kona kulana kuokoa, aka, e waiho aku na ka lakui e koho no lakou iho, a o ka hopena paha hoi o ia, o ko Kerete hoohuiia ae ia Helena oiai, o ka iini nui ia o na kanaka Kerete, he poe no i ano like loa me na Helene ma na ano a pau.
Ua hoikeia ae no hoi ma Ladana ia la, ua malamaia ae he halawai ana o ka Aha Kuhina mahope koke iho o ka loaa ana aku o ka Helene pane, a i ka pau ana ua holo aku ka Makuisa Saulebure no Winisoa e kuka pu ai me ka Moi. Nui ka ka pioloke ma ke Keena o ko na Aina E. Mamuli hoi o ka Helene pane, ua nui ka hauoliia a ua pii hou ae hoi ka hilinaiia ma na kahua hoaie dala malaila a ma Europa aku
Bulegaria me Serevia e Kokua Like.
Ua loaa ae hoi i kekahi nupepa o Nu Ioka (New York Journal) mai kona mea kakau ma Atenai, i ka la 6 nei, na lono e hoike ana na koi aku o Bulegaria e hui me Helene a me Serevia ma ke kue like ana aku i na poe Tuke e noho la ma Masedonia, ke ulu ae hoi na hana e kupono ai o ia hana like ana aku. Ke ulu io ae hoi keia, ua like no ia me ke kinai make loa ana i ko Tureke noho hoomalu ana iloko o Europa a kipaku aku hoi iaia iloko o Asia. Aia ka hapanui hewahewa loa o na pualikoa Helene iloko o Tesale, ma ko Masedonia palena, a aia hoi he 20,000 poe Helene iloko o Masedonia, i lako pono me na mea kaua, kahi i kakali ai no ka hoailona e puoho ae a kue aku i ka mana o ke Suletana. Ke nee la hoi no ka palena o mua he umi a he umikumamalima paha tausani o na poe koa pualu Helene, me he la me ka manao maoli no e komo kaua kue aku i ko ke Suletana aina. He mea hiki ole loa ke hoonuinui wale ia ae no na olelo no ke ano kupilikii maoli io no o ke kulana.
Noi e Kue Ole aku o Beritania Nui.
Iloko o ka Hale Makaainana Beritania ma ka la 9 nei i noi aku ai o Sa Wiliama Venona Hakota, ke alakai Liberala, i ko Aupuni no kekahi ae paa ia mai aole e hoohanaia na pualikoa Beritania ma ka aoao kue aku i na Helene mamua ae o ka uiia ana mai i ka Ahaolelo. Ua hoole nae hoi o Misita Balafoa, Haku Mua o ka Waihona Waiwai, e hoopaa aku i ke Aupuni ma ke ala a Sa Hakota i makemake ai, eia nae hoi, ua olelo ae oia ua ake na Kuhina e manao iho ka Ahaolelo ua hana lakou me kekahi hoomaopopo pono iho i ke koikoi, a ma ka aoao hoi o ke kuokoa o Kerete a me ka maluhia o Europa.
Liuliu o Helene - Hoinoia o Rusia.
Eia iho kekahi olelo o kekahi palapala mai Atenai o Maraki 6 nei: "Ua manaoioia e kauoha koke ia aku ana ka hoakoakoa mai o na koa. O ke kaheaia ana o na koa kuikawa e liuliu a e hoomakaukau, ua like no ia me ka pane maoli ana aku i na palapala like a na Mana. Ke hoino a ke hoahewa la na nupepa kokua ia Rusia mamua no kona apuhi. Ua like ka ikaika loa o ka manao kue ia Rusia e like la me ia ia Geremania. Ua hoinoia ke Za no kona kulana hookaumaha i keia aina (Helene), o ka hoopakeleia ana o kona ola e kekahi hoi o kona mau Kama'liikane."
Na Lonolono Helene-Kerete.
Nui loa ka hopohopo o ke Kama'liiwahine o Wale no ke kulana o kona kaikunane, ka Moi Keoki o Helene, a ma kahi hoi o kona hoi no ko laua wahi noho me ke kane, aia no oia ke noho la ma Ladana me ke ake e loaa aku na lono maopopo loa no ka Helene kulana e lawe ae ai.
Ua hoouna koke ia aku iaia na lono o na nupepa, i mea hoi nona e maopopo koke ai. Ua telegarapa ae ke Kuhina Beritania e noho la ma Atenai i kona Aupuni i kona manaoio ua hiki loa no ke loaa he hooponopono maluhia loa ia i nei wa, oia hoi, mahope koke iho o ka Helene pane i na Mana.
Ma ka manao hoi o na adimerala o na aumokukaua e ae, ke panikuia na awa e Kerete, e hui pu ia aku ma ia hoohana like ana me na awa o Helene.
A mai Kanea, Kerete, mai hoi o ka la 6 nei keia lono: "Ua hoopae ae na aumokukaua o na aina e he 500 kanaka ma Selino. O na lono no ka manao ma ka aoao mai o na Mana e haawi ia Kerete i kona kulana kuokoa, ua lilo ia i mea hoihoi ole loa ia iwaena o na kipi, oiai, o ka hoohai aku me Helene ko lakou ake. Ua eena ae no hoi na poe Musulamana ma nei manao haawi kuokoa aku."
Nui ka hopohopoia ma Viena o hoole o Veritania Nui i ka hui pu aku e hookikina ia Helene. He ekolu wale no o na Mana nui eono i hui ae ma ka manao e paniku pu loa ia na awa o Helene me ko Kerete, he kukoa ana hoi ia i na manao o na adimarala kuwaho e ae, o ia o Auseturia, Geremania a me Rusia. E kiai makaala loa ia aku ana ka na aumokukaua Helene ke holo aku no Awa Volo.
Oihana Kaua Moana Beritania.
Oiai e kukai kamailio ia ana no na kohokoho hoolilo o na aumokukaua moana iloko o ka Hale Makaainana ma Ladana la 8 nei, na olelo ae o Sa Kole Dilike ua manao oia ua emi mai ka makaukau o ka oihana kaua moana, o, ka oi loa aku paha hoi, ma ka lawa ole i na lutanela, na wiliki a me na poe paoahi, a o kekahi no hoi, aohe i nui kupono ka papa hoohana no ke kapili ana i mau moku hou. Ua oleloia ae nae hoi o G.J, Gosene, Haku Mua o ka Papa Adimarala, ina e hele ana o Beritania Nui i ke kaua i ka la apopo me elua o na Mana moana, e ikeia no na oi loa aku ka ikaika o na aumoku Beritania ma ka heluna me ke ano no o kona mau moku.
William Kamali.
Pena Hale o na ano a pua, Kau Pepa a Lu One paha, e like me ko oukou makemake. Ua hiki ke hoohinuhinu i na Umeke, Pakaukau, Pahu-ume, Moe, Puniu, i hiki ole ke hoomaemae hou ia. Ua hiki ke hookoia na hana me ka eleu loa, a o na kauoha a pau mai na kuaaina mai ua hiki ke hookoia. he oluolu loa ka uku ma ke kuka olelo ana. e kipa mai e na makamaka mai poina.
Keena hana, ma ko S.K. Pua keena, Helu 7 1/2, Alanui Konia.
Wahi Noho, Kapalama. mar. 15-6m
-
H.W. Schmidt & Sons
(H.W. KAMIKA & KEIKI)
Loaa mau mai na Waiwai Hou ma kela ame keia mokumahu.
He 25 pa-keneta ka hoemiia iho o na waiwai kahiko a pau loa.
Na Palule Hulahulu, he $1 50 me $1.80 mamua, he 90 keneta pakahi i nei wa; na Palule $1.00 mamua, he 50 keneta pakahi i nei wa.
&c., &c., &c.,
Halekuai, ma ka Hale vona Holo, Alanui Moi, kokoke i Halehai.
mar. 15-1yr.
-
HALEKUAI LAHUI KALAHIKI.
Helu 405, Alanui Moi, ma Waikiki aku o Alanui Nuuanu, ma ka aoao mauka, ke keena mua o ka "Hawaii Holomua."
Ma ia halekuai o na oiwi e loaa ai na anoi a me na paihi o na ano hou loa, e laa
Na Kalakoa, Na Keokeo,
Na Makalena, Na Kinamu,
Na Huluhulu, Na Lihilihi,
Na Kamaa o na Kane, Wahine me Keiki, a pela aku.
Oluolu no ke kuai ana. Aohe hewa ke kipa mai e ikemaka, a aohe no hoi he kunukunuia no ka hoikeike ana i na mea kuai.
M. PALAU, Luna Nui.
ok 14-tf
-
Robert Napunako Boyd
(ITALIA)
He Ana-aina a he kokua no hoi ma ka hooponopono ana i na waiwai paa, huli ana paha i na Buke o ke Aupuni, a pela aku.
Keena Hana: Mauka iho o .k Hale Leta, maluna ae o ka haleaina Pake,
Alanui Betela. apl 13-mp
-
Hoolaha Manao Hooko a Kuai
a ka Mea Paa Moraki.
I kulike ai hoi me na hoakaka ana o kekahi Moraki i hanaia e J.E. CHAMBERLAIN, o Honolulu, Oahu, ia Helen Boyd, Kahu Waiwai, o ia wahi like no, ma ka la 7 o Maraki, M.H. 1895, a i kopeia ma ke Keena Kakau Kope, Oahu, iloko o ka Buke 151, ma na aoao 499 me 500, ke hoolahaia aku nei ma keia ua manao ka Mea Paa Moraki i oleloia e hooko aku i ka Moraki i oleloia no ka uhakiia o ke kumu aelike, oia hoi: no ka uku ole ia o ke kumupaa me ka ukupanee pu i ka wa i kauohaia ai no ka hookaa ana.
Ke hoolahaia aku nei no hoi, mahope iho o ka pau ana o na pule ekolu mai keia la aku, e hoolahaia aku no ka waiwai i hoopaaia ma ua Moraki la no ke kuai a e hooliloia aku no ma ke kuai kudala, akea ma na keena kudala o W.S. Luce, ma Alanui Moiwahine, Honolulu i oleloia ma ka Poakolu, la 31 o Maraki, M.H. 1897, ma ka hora 12 awakea o ia la.
Kuike ke kumu, ma ke dala gula o Amerika Huipuia.
I ka mea kuai mai na lilo palapala.
HELEN BOYD, Kahu Waiwai,
Mea Paa Moraki.
No na mea e ae i koe, e ninau ia A. Rosa, Loio no ka Mea Paa Moraki, Helu 13, Alanui Kaahumanu, Honolulu.
Hanaia Honolulu. Maraki 8, 1897.
-
Penei iho ka hoakaka o ka aina e hooliloia aku ana:
O kela apana aina a pau loa e waiho la ma Kalii a me Pauwalu, Koolau, Mokupuni o Maui, nona ka ili o 10 5-11 Eka, i hoike a hoakakaia maloko o ka Palapala Sila Nui (Aina Aupuni) 1899, a i hooliloia hoi i ka Mea Hana Moraki e A.K. Kekapa, ma o kekahi Palapala Kuai i hanaia i Iulai 18, M.H. 1881, a i kopeia ma ka Buke 70, aoao 360.
mar. 8-4ts.