Ka Makaainana, Volume VII, Number 10, 8 March 1897 — Page 1

Ka Makaainana.

 

BUKE VII---Ano Hou Honolulu, Oahu, Maraki 8, 1897. HELU 10.

 

HUAKAI A KE ALII.

 

Mau Olelo Hoohoihoi a Ku no i ka Moolanalana Manao.

 

Ano hoi, ua hauoli makou, ua loaa hou mai nei he palapala hou ia makou, a o ia hoi ka

Palapala Helu 5,

mai ko ke Aliiaimoku kanaka ponoi, e noho a e luakaha pa mai la ma Wasinetona. Eia iho a eia mai ua palapala la:
THE SHOREHAM,
WA SHINGTON , D.C. ,
Feberuari 15, 1897.

"E hauoli oukou a e olioli nui hoi, no ka mea, ke kokoke mai nei ke aupuni o ka lani."

E ka makamaka,

Aloha, ea:--

Ke hoolauna aku nei no wau ia oe me kela mau huaolelo ae la maluna; aka, e kala mai, no ka mea, aohe na'u ia olelo, aka, o ia kekahi olelo a ka Haku i hoopuka ai. Aole i papaia ke kanaka no ka hoopuka ana i ka olelo a ke Akua, koe wale no ka hoololi a pakui hou iho.
"Maikai Waipio,
Alo lua na pali."
o ia na hoike a ke Kilokilo, Dimerata.

Pau ae la keia, nee aku kana no mua.

Eia no makou i ke kikowaena o ka Repubalika o Amerika nei kahi i kuakaha ai me ke ola maikai. E hai aku au ia oe i ka mea oiaio. Alua wale no o makou pule ia nei, aohe puuwai uahoa i koe o keia kulanakauhale ua lomia e ka inuwai a pepe haalele, mai na poe i ka panepoo a ka lopa haahaa loa, a hookahi wale no mamalaolelo,--E hoi, e noho i ko--. O ia ka olelo nui a puni o Wasinetona nei, a pela no ko na kulanakauhale e ae. Ke hele mai nei ko na wahi loihi poe e ike i ke Alii, mai Nu Ioka mai. Piladelepia, Kikako, a me kekahi mau kulanakauhale e ae a nui loa; aohe a lakou hana o nei, aka, no ke ake wale no e ike i ke Alii, mea ole ka loa he mau haneri mile ka mamao, o kane, o ka wahine, a he kaao ia na lakou ke loaa aku i ke alanui.

Ina e lohe mua ia ka ke Alii wahi e hele ai, e piha mua ana ia wahi i na kanaka mamua o ko makou hiki ana aku, me ka wehe mai o na kane i ko lakou mau papale. Ina no makou e hele i ka pule, ke hiki aku, ua piha o waho. He poe hele ole paha kekahi mamua i ka pule, a no ka lohe ana i ko ke Alii hele, nolaila, hele ai lakou; he piha ka halepule a kuku iluna e like ma na hale keaka, a i ka wa e pau ai o ka pule, e puka e ana keia poe a kuku laina mawaho, a i ko makou manawa e puka aku ai, ina hookahi mea hele mai e aloha i ke Alii, e pau loa ana keia poe a pau i ka hele mai, a e ku ana makou iwaenakonu o lakou no ka hapalua hora a hora okoa no paha hoi i kekahi manawa.

Nui na poe Senatoa i hele mai e ike i ke Alii, a pela no na poe o ka Hale Ahaolelo; a o na poe i hele ole mai, ua hoouna mai lakou i ka lakou mau wahine a me ka ohana, a o ka oi aku, oia o Pekina (Geo. C. Perkins), Senetoa o Kaleponi. A pela iho no hoi me Lunamakaainana Hilibona, no Kaleponi no, e hele mau mai ana oia me kana kaikamahine e himeni me makou ma na mele Hawaii. A pela no hoi ko Nu Ioka mau Senatoa.

O na poe hanohano a kiekie o keia wahi, he oi aku ko lakou, makemake i ke kanaka Hawaii maoli. No ko'u Hawaii maoli ana, ua lilo ko lakou kiekie a waiwai i mea ole, oiai, ma ka lakou mau anaina ike a pau, e kiiia mai ana wau e hele mai ke poo o ka hanohano a i kona hope a me na poe iho malalo. He mau Konela a he mau Mekia ko'u poe na lakou e lawe, ma ko lakou mau kaa ponoi, me ka olelo mai no o lakou ia'u, ua hanana ko lakou home ia'u I na manawa a pau, o ko lakou hale, no'u ia home, (a koe hoi ka olelo ana mai no'u pu me ke kihapai o Edena). Aohe e like me ko kakou poe o laila ka uahoa a kulipaa, a ia no paha hoi ke kumu o ka Ioli hikiwawe loa, no ko makou Hawaii no a pau loa, mai ka Lani iluna a ka honua ilalo.

I ka Poalua nei, la 9, ua haawi o Peresidena Kalivilana i kana aha ike hope loa i na Luna Aupuni o na Aine E a me na aliikoa a me ka lakou mau wahine. Ua konoia na poe a pau, a koe no ke Kuhina o ka Repubalika o Hawaii. Ninau aku wau ia Mekia Arms a me Mekia Mills (he mau aliikoa laua), heaha ka mea o Haki i hele ole mai ai? Olelo mai laua, aole o laua noiia i na anaina ike a pau a ka Peresidena. ninau hou aku wau, no ke aha hoi? "No ka mea," wahi mai a ka pane, "oia kekahi Kuhina mai kekahi Aupuni e mai? Olelo hou mai laua, "O na poe a pau i hoounaia mai malalo o ke Aupuni o Dole, aohe i hoihoia." ilaila la, pau ae la ko'u pohihihi, a lawe ae la au i ko'u kulana hookohukohu, me he la owau kekahi o na Kuhina ia po, a i ole, he aliikoa paha

 

THE CAIRO, WASHINGTON, D.C.,
Feberuari 16, 1897.

 O ka huaolelo "Hoohuiaina" ma Wasinetona nei, he kupapau ia i hele a palopolana, a o ia ka huaolelo hoihoi ole ia e ko nei poe ke hoopukaia ae. E lohe ana no oe ma na huina alanui, a iloko o na hotele, a ma na wahi no a pau o ke kulanakauhale nei, a pela no i na poe Senatoa i hele mai e ike i ke Alii. I kou manawa e hoopuka ai no ia mea; a no keia ana oe i ka ninaninauia a pili wale.

I keia la iho nei makou i nee mai nei no keia hotele (The Cairo), no ke kumu, o na lumi a makou i noho ai i ke Shoreham, ua paa mua i ka hoolimalimaia e kekahi poe no ka la 4 o Maraki, o ia ka la o ka Peresidena hou e noho mai ai, a e noho mai ana ia poe i ka la 26 ae nei, nolaila, nee mai nei makou ianei.

He hotele nani keia, koe wale no ke kaawale loa mai ke kaona mai. Aloha a nui loa,
JOSEPH HELELUHE.

Aia ma ka Hale Oiwi.

Na iini a me na makemake a pau o ke kane a me ka wahine i ake o hoolako i ko laua hale me na mea a pau e pono ai o ka noho maikai ana. He hoihoi loa ka ona oiwi opio o ia halekuai i na makamaka a pau loa e kipa aku ana a ke ninauia hoi no kahi mea e makemakeia ana na makaukau loa oia a me kona poe lawelawe e hoomaikaike mai me ke kunukunu ole.

Malaila e loaa ai na ipukukui, na lako pa me aniani, na kapuahi me na pono a pau e pili ana, na lako piula, na pahi me na o, na puna, na upa, kna lako paahana kamana, he nui loa ke helupapa aku. Oluolu na launa ana a oluolu pu no hoi me na kumukuai.

E hewa ole no kakou ke noonoo ae no ka Hale Oiwi, Wile Kaimana, Ona, a e kipa ae ilaila e ike ai iaia mamua ae hoi o ka hele ana kau i na wahi e ae. O ka oiwi ka mua a mahope aku hoi na poe e ae. 8-3-2.

 

Ma ka mokumahu Malulani o ka auwina la Poalua iho la i holo aku ai o Lunakanawai Kaapuni Kaaka no ka malama ana i ke kau kiure o ko Kauai Aha Kaapuni ma Lihue. Mamuli o ke onawaliwali o ko laila Lunakanawai, na kauoha ka Lunakanawai Kiekie i kekahi o ko nei mau Lunakanawai Kiekie e holo e malama i ke kau. He mau loio lehulehu kekahi i holo pu aku. Ua huli hoi mai no ka Lunakanawai me kekahi loio ma kamokumahu Kino Maki o kakakhiaka Poaha nei.

 

E POWA IKE ALII.
Lono Hoohikilele o Hoopio i Kona Ola me ka Laaumake.

He mea e nei lono o ka loaa ana mai nei ma ka mokumahu Amseteralia o kakahiaka Poalua iho la, e hoaoia ana ka e powa I ko ke Aliiaimoku ola me ka laaumake. Ma Wasinetona keia lono i puka mua ae ai, mamuli o kekahi lono telepone i hoounaia aku mai kekahi wahi loihi. Wahi mai nei o ka Kapena J. A. Pama hoike palapala i ka nupepa Kuokoa namu, ua kauohaia mai oia i ka Poaono, Feb. 13, e hele aku i ke kahua telepone mamao, a iaia i hiki aku ai, pa e ana he leo ma ka olelo Hawaii ke kamailioia ana mai. Ua hoao oia e kukai olelo namu pu, eia nae, aohe i aeia, nolaila, ua hai (pela) pakahi ia ae na hua palapala, a o kana ia i kakau ai a lawe a haawi i ke Alii, a na ke Alii no hoi i unuhi ae me ka olelo pu ae i ke ano like loa me na lono palapala i loaa e aku mai Honolulu aku nei. Elua ka wa o ke Alii a me kona kanaka, J. Heleluhe, i kukai kamailio pu ai me keia poe hoa'loha ma ka uwea telepone, i akaka ole hoi iaia owai la ia poe. A ma kana ao aku hoi, ua hoikeia ao i na nupepa a ia lakou hoi, wawa loa ia a loaa ae i Kapalakiko ma ke telegarapa.

Ma na hoike a kekahi poe nupepa, ua oi loa aku ke olalau a hiki ole hoi ke hilinaiia, oia nae hoi, ua hilinaiia no e kahi poe me ka nui o ka hoopihoihoi a hoopiolokeia o na poe e noho kokoke aku ana, me ka ui aku a ui mai no ka oiaio o nei mea. Ua nui ke kohokohoia o na poe na lakou nei hana, eia nae, aohe mea i maopopo, aka, ua hilinaiia nae hoi eia ka na hoa'loha o keia Aupuni ke ohumu nei e hana aku pela.

Penei iho na olelo i loaa ai i ka Poaono, Feb. 13, 1897, ma ka Hotele Soahama (Shoreham Hotel).

"MY DEAR SISTER:--Ua loheia mai nei e holo aku ana o Kakina e powa i ke 'Lii, nolaila, e hai ku i keia lohe me ka hakalia ole; e hai aku i na nupepa. He goes by this steamer."

"Dated at Honolulu, Hawaii."

O na huaoelo haole mua, eia ke ano: "E kuu kaikuahine aloha." O na lalani haole hope loa, penei:--"E holo aku ana oia ma keia mokumahu." "Kakauia ma Honolulu, Hawaii.."

Ua hoikeia ae e na nupepa o ke kumu ka ia o ke Alii i haalele ai ia hotele a hoi aku he hotele oka, eia nae, ke nanaia ae ma ka J. Heleluhe palapala e puka aku nei no ma nei helu, he okoa loa ke kumu. Oia a me Kapena Pama, ua like loa ka laua hoike ma ia mea.

Poaha iho na mokumahu Alameda me Kina mai Kapalakiko, o ka mua no ka Hema a o ka hope iho no ke Komohana.