Ka Makaainana, Volume VII, Number 9, 1 March 1897 — Page 2

HONOLULU, OAHU, POAKAHI, MA RAKI 1, 1897.

LEONE DE BOANE
KA MEA OHUMU KIPI O COADOVA
MOKUNA III.
ANO POLULUHI A HAKUMAKUMA.
[Mai ka Helu 8.]

                Aole i maopopo pehea la ka loihi o ko de Boane moe ana, me he la nae ua paewa ka pawa o ka po a ala ana oia i kekahi hanakuli nui ma kekahi o na puka. Ua eu ae oia ma kona wahi moe, a e hoolono ana i keia walawalaau, holo paukiki aku ana o Gaberiela me kekahi kukui e a ana ma kona lima.
                "Ha— e Gaberiela—o oe mai la ia? Heaha ke ano o keia haunaele?"
                "Aia he poe kanaka iloko o ka malapua, e kuu haku,—he aluka nui o lakou."
                "Iloko o ka malapua?"
                "Ae. Me he la ua pinana mai lakou maluna o ka pa-pohaku, a i ole ia, ua hou ia mai ma ka puka-wai. Aka, aia lakou la, a he mea maopopo aohe o lakou manao maikai no kaua. E hiki no ia kaua ke holo aku a pakele ma ke alanui."
                "Eia nae," wahi a ka nai ta, iaia e awiwi ana i ke komo i kona mau aahu oiai no oia e kamailio ana, a lalau aku la hoi a paa mai la i kana pahikaua maikai, "heaha ke ano o keia poe kanaka?"
                "Ua nana aku au iwaho ma kekahi o na puka-aniani o hope," i pane aku ai ka ukali, "eia nae, ua hiki ole loa ia'u ke hoomaopopo aku. O ka'u mea wale no i hiki ke ike aku ua lako lakou me na mea kaua, a ua hele mai hoi lakou me he la no kekahi hana lapa — Hamau! Aia la, hemo ka puka! Awiwi, o lohi loa paha auanei!"
                Eia nae, ua lohi loa io no. Owai la lakou o ke kue ana mai i ka hale pela, ma ka muliwai mai ko lakou hele ana mai, a ua onou nui mai i ka puka o hope me ke noi mua ole ina paha he mea hiki ia lakou ke komo aku iloko. Ua lele aku o de Boane a ke kahua hamama mawaho iho me kana pahikaua ma kona lima, a ia wa no i kuku aku ai imua ona he puulu o na kanaka puipui ano nanaina hiena, he hookahi o lakou e paa ana he kukui lamalama o ka ho a koke ana iho, a pa iho la hoi kona malamalana ano hauliuli panopano maluna o kona poe hoa ahiu a hiena.

MOKUNA I V.
KE ANA KUAHIWI.

                O ko de Boane noonoo mua iaia i halawai ai me keia poe pahaohao, he poe makai paha lakou no ke kulanakauhale; eia nae, ua pale koke ia ae no ia manao ma o ka oili ana ae no o ka pane i ka wa kupono no keia hoohuoi i ulu koke ae ai iloko ona. Ma kahi mua, ina he poe luna hooko kanawai lakou no ke aupuni, i loaa hoi he mana ku i ke kanawai no nei ano hana a lakou, aole loa lakou e imi aku i wahi ano e loa no lakou e komo ai iloko o ka hale; a, ma kekahi ano iho hoi, o ia paha hoi ka mea ku loa i ka pololei, aohe keia poe i hoaahuia me na aahu i ikeia o ko ke aupuni poe lawelawe. I ka kakou kaeaea hoi i hakilo pono loa aku ai ia lakou, ua hoomaopopo aku oia ua hoaahuia lakou a like loa ke ano me ko na powa i loaa ai ia laua i kekahi po mamua iki iho. A aole no hoi o keia wale, aka, ua hoike mai ko lakou hiohiona, ma o kona ike aku ma o na lamalama la e o lapalapa ae ana ka ula, i ka like loa o ke ano hiena. He hookahi mea hou ae ana i hoomaopopo aku ai, no ka mea, he mea ano pahaohao a hoohikilele ia; a o keia mea hoi, oia no ke alakai o keia poe hiena. He kanaka loihi a ano ikaika oia, i hiki na makahiki i ka hookahi-hapalua o keia ola ana; me kekahi lae kiekie a piha pono; hulalali lipolipo na maka; he ihu loihi a wiwi, i like me ka nuku aeko, me na pukaihu hakahaka i aneane loa e ahuwale mai, a me kekahi waha e hoike mai ana i ka manao akahele a piha hiena. O ke aao Araba no kona aahu, eia nae, ua hoike ae na kukuna o ka lamalama aia aku malalo o ia aahu ulaula hauliuli he aahu kila hulalali. He mea oiaio loa he hookahi wale no kanaka ma Sepania i hiki ke hoike ae e like me ia ke ano, a oia no ke alii kaulana o na powa—o Miramolina i weli nui ia. Ua pahola koke ae keia hooia maluna o ka naita iaia i ike aku ai i keia kanaka ano e, a malalo hoi o keia hoomaopopo ana aku ona, ua kuemi hope aku oia a ka paia pohaku, me ka paa loa ana iho hoi o kona lima i kana pahi; no ka mea, ua manao iho oia i nei wa ua maopopo loa iaia ke ano a me ka hana i manaoia ma nei huakai o ke aumoe.
                "Pehea iho la hoi nei?" wahi aku ana, me ka haliu pono ana ae o kona nanaina maluna o ke alii. "Heaha ka manao o keia huakai kupono ole o ka po?"
                "E kuu naita Karistiano," i pane aku ai ka powa, me ke ano malie a hoomaopopo ole ae, me he la, ua lawe wahi manao wale aku no oia, "i hele mai nei au e kono aku i kou hiki ae ma kekahi wahi ou i makemake loa ia ai. E holo mai anei oe me a'u?"
                "Aole loa au e hele aku me kahi mea aia a ike au i ke kumu no ia mea; a ia wa no auanei hoi, e maikai a e lawa pono loa ia kumu."
                "Ua hiki loa no ia'u ke pale aku i kou hooluhiia ma ia mea, e lohe oe e ka naita," i hoomau aku ai ke alii powa me kekahi minoaka maopopo a kuio loa. "Owau nei la he mea i ninau ole ia mai ko'u mana, a mai ka'u kauoha aku hoi aohe hoohalahala ana. Aia ma Coadova ko Abederamana hoomalu ana; aka, no Miramolina hoi, aia kona hoomalu ana ma na wahi a pau o kona leo e loheia ai! Ano, e ka naita, ke kauoha aku nei ka moi kuahiwi ia oe e hele pu mai me ia! E hele mai anei oe?"
Aole i pau.

Puhi Ahi i Kekahi Mala Ko.

                I kahi wa o ka po Poakolu, la 8 o kela mahina aku nei, ua hamu ae ke ahi i kekahi mala ko o ka Hui Kopaa Kohala. Ua kohoia no he hana na ke kolohe a i ka noii pono ia ana mai nei, ua paa elua kanaka maoli. Maalea no ka hoi ka hanaia ana, hiloia ka manu a eiwa paha kapuai ka loihi, alaila, kukuniia ma kekahi aoao mai a mahope o ka a ana no elua hora paha a oi, loaa aku nei kukaepele a me ka pulupulu i hoomakaukau mua ia, a pela iho la i hanaia ai. O ke kumu mai ka o nei hana, ua manaoino a ua ohumu kela mau mea i ka haole no ka loaa pono ole o ka uku. Ua hookolokoloia mai nei laua a ua waihoia no ke kau kiure ma Kona. He $2,000 paha ke poho o ka mahiko. Ua hoopaaia o Senatoa Linekona Holokene i loio no ka mahiko.

                E alawa ae e na makamaka heluhelu i ka makou mau moolelo e puka aku nei, me ko laua mau kuhinia like ole, a na oukou ia e nuu iho.

E Kipa a e Ike Ae.

                I kela hoa oiwi o kakou, ia S. M. Kamakau, ma ka halekuai waiona o Lovekeoe Ma, kihi o na alanui Nuuanu a me Marine. He heahea a he oluolu oia, a ua loihi kona kamaainaia ma ia hale, malalo o kona mau haku mua elua, i pau. O na waiona maikai wale no ke loaa malaila, a pela no hoi me na waina Kaleponi maikai loa. Oluolu na kumukuai, a pela no me na hookipa a kuka pu ana me ua hoa la malalo o kona mau haku hou.

Buke Banako Nalowale.

                Ua nalowale aku he Buke Banako Hale Leta ma ka inoa o JOHN KALUHI, ma ke ano kahu no Maraea Kahai, a nona hoi ka Helu 2407. O ka mea e loaa AI, E loaa no he uku makana ke hoihoi mai ma keia Keena.

DR. C. A. PETERSON,
(KAUKA PI TASONA),

Ua Nee Ae Oia a ka Helu 28 ALANUI EMA. NA HORA KEENA:―8-10 A.M.; 2-4 a me 7-8 P.M. nov. 30 TELEPONE 752. 3ml

Robert Napunako Boyd
(I TALIA)

He Ana-aina a he kokua no hoi ma ka hooponopono ana i na waiwai paa, huli ana paha i na Buke o ke Aupuni, a pela aku. Keena Hana: Mauka iho o ka Hale Leta, maluna ae o ka haleaina Pake, Alanui Betela. apl 13-mp

E HOOPAA POHO

I kou Hale a me na Pono o loko mai ka poino ana i ke Ahi me ka ―HUI― Panihakahaka Ahi Springfield WAIWAI IO, $4,105,374.75. Oluolu a Haahaa loa na hoouku ana. W. F. WILSON, Agena, Helu 209, Alanui Kalepa, Honolulu. [fby. 15―6ml.]

HUI HAWAII KUAI AINA.
NA LUNA NUI.

JAS. H. BOYD.................Peresidena
J. K. KAULIA.............Hope Peresidena
C. A. LONG....................Puuku
ENO CH JOHNSON..............Kakauolelo
JOS. PAAKAULA............Luna Hooia
W. C. ACHI........Luna Hoohana

NA LALA O KA PAPA ALAKAI.

J. K. KAHOOKANO, R. W. WILCOX, J. W. BIPIKANE.
                He Hui i kukuluia no ka hookuonoono a kokua ana i ka lahui Hawaii; ua makemakeia na Hawaii a pau loa e komo mai i ka Hui. Honolulu, Ianuari 11. jan. 11―1yr.

S K PUA,
He A gena no na Waiwai Paa

He Mea huli i na Kuleana Aina i mea e maopopo ai; He Mea Ohi i na Aie i hiki ole ke Ohiia e na Poe no lakou na Aie, a He Mea Hana i na Ano Palapala Pili Kanawai a pau. KEENA HANA:―Ma ke keena o R. W. Wilikoki, Alanui Konia. aug. 31―1mk.

HALEKUAI LAHUI KALAHIKI

Helu 405, Alanui Moi, ma Waikiki aku o Alanui Nuuanu, ma ka aoao mauka, ke keena mua o ka "Hawaii Holomua." Ma ia halekuai o na oiwi e loaa ai na anoi a me na paihi o na ano hou loa, e laa Na Kalakoa, Na Keokeo, Na Makalena, Na Kinamu, Na Huluhulu, Na Lihilihi, Na Kamaa o na Kane, Wahine me Keiki a pela aku. Oluolu no ke kuai ana. Aohe hewa ke kipa mai e ikemaka, a aohe no hoi he kunukunuia no ka hoikeike ana i na mea kuai. M. PALAU, Luna Nui. ok 14-tf

HELE HOOLUOLU
O. R. L. Co.
MA NA POAONO A ME NA LA PULE.

E haalele mai no na Kaamahu i na hora 9:15 A.M. a me 1:45 P.M., a hoea hou mai i Honolulu nei ma na hora 3:11 a me 5:55 P.M. Na Palapala Uku Puni Papa 1. Papa 2. Manana - - $ 75 $ 50 Mahiko o Ewa - - 1 00 75 Waianae - - - 1 50 1 25 F. C. Smith, Agena Ohua a Palapala Nui. feb 10-tf