Ka Makaainana, Volume VII, Number 7, 15 February 1897 — Page 7
| This text was transcribed by: | Gloria Vlachos |
| This work is dedicated to: | Na Lei Hulu I Ka Wekiu |
Ka Makaainana.
HONOLULU, OAHU, POAKAHI, FEBERUARI 15, 1897. 7
-----
NA AINA MAMAO
-----
Mau Lono Huikau mai kela a me keia Wahi Like Ole.
Haku Saulebure me na Ninau Nui.
Ua apono ka Hale o na Haku ma Ladana, Ianuari 20, i ka olelo hooholo pani i ka haiolelo mai ka Nohoalii. Ma ka Haku Saulebure haiolelo, ua pai ae oia ia Haku Rosebore no kana kahua i lawelawe ai e pili ana i ke kulana alakai no ka poai Liberala. Ua olelo ao oia ua loaa i ka Moi ka mahaloia e ke ao naauao no ke kulana hoopono o kona au noho alii, a iloko hoi o ia wa ua lilo oia i mea e hooikaika ai no ka hooholomua holoiea loa ia o ka noho hooponopono aupuni ana malalo o ka manao a me ka makemake o ke kumukanawai.
E pili ana hoi i ka ninau o ka Hikina, ua ae o Haku Saulebure no ka wa i hala, ua loaa i ka Ela o Bedonafila a me ia pu na hoohaoi a haohao ana no ka naauao o ke kahua hoohana e kakoo aku ia Tureke. Ua moakaka loa ua hana o Bertiauia Nui i kekahi kuhihewa ma ka haole ana i ka manao i waihoia mai e ke Za o Rusia iloko o 1853 no ka hoomaopopo a hoomoakaka n@a i ko Tureke kuleana a mana, a e apo koke ia aku no ia ano mauao me ka hauoli loa ina e waihoia mai ana i nei wa. Ke noonoo nei ua Mana i na mea e hiki ai ke hoopakele i ka Emepaea o Tureke, a ua ae laulaha like ia no hoi ina e hooleia mai ana na hooponopono a hoomaemae ana i manaoia, alaila, e hookeia aku no paha hoi na lawelawe oolea maoli ana. Ua paa loa ka manao o kekahi o na Mana ano nui aole ola e hiki aua ke hooloihiia aku ka hopena awahua o Tureke aia wale no a ae a haawiia ae na hoomaemae kuio i o manaoia.
E pili ana hoi ia Aigupita, ua manaoia e noho paa aku me Katuma ma nei mua koke iho a mahope aku paha.
Ua upoipoi aku oia i na mea i manao wale ia no ka hoea mai o ka milenio e pili ana i ke kuikahi aha-uwao Anagelo Amerika, eia nae, ua manaolana oia e lilo aku ana ia i mea e panai akahele aku ai i na olelo hooholo a ke kahi aha hookolokolo ma kahi e ke kaua.
No ka Hoomaemae ia Tureke.
Ua hoolahaia ae ma Ladana, Ianuari 21, na kukai palapala pili oihana mawaena o Rusia a me Beritania Nui, a ua ikeia ua noi aku ka Makuisa o Saulebure i Okatoba 20 na na Emebasedoa ma Kouakinopela e hoolala a e hoomaopopo ae i na hoomaemae ana a na Mana e hooikaika aku ai e hookoia. Ua pane mai ke Kuh@na o ko na Aina E o Rusia e noho ana ia wa i Novemaba 18, e olelo ana ua hooholo ke Za ua hiki ole ka ae mai e hookoia aku na hana hookikina oolea e kue aua i ke Suletana. Aka, ma ka la 25 mai no, ua loaa mai he palapala hou ma ke ano nui ua ae ke Za i ka manao o ka Makuisa o Saulebure a aole ua hoi e kue e ao aku i ka Emebasedoa Rukini e pili ana i ka lawelawe a hookikina oolea aku ina hoi e kuemi hope ana ke Suletana a hoole e hooko aku i na hoomaemae ana i hooholo a i waiho lokahi ia aku e na Emebasedoa. A i ka hopena hoi o Dekemaba, ae o Farani i ko ka Makuisa o Saulebure mau manao koi hoohana, i ae mua ia hoi e Gerema nia, Auseturia a me Italia.
hopohopo Rusia ia Enelani me Farani
Ke pii ae la hoi ko Rusia ano lilili i kakahi kuikahi ano makamaka mawaena o Euelani a me Farani, a aole wale no hoi i hooweliweli aku ia Farani, aka, ke paa la eia ma kona manao oia a me Auseturia wale no na mea kuleana nui e olelo ai ma ka mahelehele a me ka hooponopono ana me Tureke. He kaua aku ana no paha hoi ka hopena mai o keia ano e mawaena o ua Mana nui e pili ana no kau wahi lihi o Tureke, ke hooholoia hoi e kinai pio loa ia kona noho malu ana ma Europa. Aia nae hoi ke holoholo a ke kaaloalo la mawaena o ke Kaikuono o Benika a me ke Dadanele he beluna o 40 o ko Enalaui mau aumokukaua, a iwaena hoi o ia beluna he 11 mau mokukaua nuuui o ka papa ekahi. Hookokoke no ka hoi ka Liona ma kahi e upoi koke aku ai i ka Bea.
Ko Makinile Aha Kuhiwa.
Eia iho kakahi mau loaa kalai aina e komo aku ana i ko Peresidena Makinile Aha Kuhina i manaoia: John Sherman (Seremana) o Ohio, Kuhina Nui; Lyman J. Gage o Ilinoe, Kiuhina Waiwai; Rusell A. Alger o Misigana, Kuhina Kaua; James Wilson o Iowa, Kuhina Mahiai, a me John D. Long o Masakuseta, Kihina Moana.
Na Hunahuna Laulaha.
E noho hoomalu aku ana no na Ilalia ia Kasala, me Aferika.
Aia he lono ma Ladana, Enelani, no kekahi mau lono ano kupilikii loa ma Iohanesebuga.
Ua lonoia ma Pekina e waiho aku ana o Wana Wenesao, Kiaaina o Ki-li, i kona kulana no ka elemakula loa a e pani ae ana o Li Hana Kana iaia.
He kuikahi ka Kuhina Nui Olone e hoouna ana i ka Aha Senate no kekahi aha-uwao me Beritania Nui no ka noonoo aua i ka pelena o Alasaka.
Ma ka la 2 nei i manaoia ai e kakauinoa ma Wasinetona ka aelike aha-uwao e pili ana i ka ninau hoopaapaa mawaena o Beritania Nui a me Veneauela.
E paina aloha hope loa pu aku ana o Emebasedoa Baiada o Amerika Huipuia me ka Moi o Enelani, ke Kama'lii o Wale, a me Kuhina Nui Haku Saulebure.
Ke olalo la ka o Riusia ina e kue aku ana na Mana Europa ia Tureke me ka hanaio, alaila, o ka wa ka ia e luku laulaha ia ai o ka mahele Karistiano o ka lahui.
O ke Duke o Ioka, keiki a ke Kama'lii o Wale, he 32 ona mau makahiki i keia wa, a oia hoi ka lua aku mahope iho o kona luaui e pili kokoke loa la i ka nohoalii o Enelani.
Ma ka la 4 nei i kakauinoa ai ka Moiwahine Kahu Aupuni o Sepania i ka hoolala no ka hoomaemae hou ana ia Kuba. I ka Poaono mai e hoolahaia ae ai ke ano nui.
Ua loaa aku maluna o ke kino o kekahi powa kaulana o Tureke o ka pepehi koke ia ana mai nei he $4,000 a me kekahi buke hoomanao e hoike ana he 192 poe ana i pepehi powa ai.
Aia ka he mau kukai hoohaua io ke lawelaweia la no ka hoouna aku i kekahi puali Anagelo Italia e kue aku i na poe Derevise, pela kahi lono mai Roma i loaa ae ma Ladana, Ianuari 21.
O ka hakaka mawaena o Ko beta a me Fitisimona ioloko o Maraki ae, e keakeaia aku ana paha hoi ia e ke Aupuni, eia nae, aohe mau hoolala aua i maopopo lea ae uo kahi e malamaia ai Iwaena o na poe pili ma Nu Ioka, o ka inoa mua ka mea ikaika loa.
Aia ke manao la ke Aupuni o Iapana e hoemi mai i ka heluna o na koa e ku la ma Wei-hai-wei, oiai hoi e kali ana no ka hookaa hope loa ia mai o ke poho kaua a Kiua, me hookahi puali (bataliona) o na koa helewawae iloko o Mei ae.
Ke hopohopoia la e ala hau, naele kipi hou ae ana no ma ka Mokupuni o Kerete, aia ka ke hoopu la a he wa wale no a puoho ie ae. A ke hopohopo la hoi na Tuke ma Konakinopela o puoho haunaele ae hoi o laila i ka wa o ka la haipule Mohamedana nui o ka Ramadana e kokoke la e hoea pono ae.
Mai ka huina mai o 211,993,993 iene i ukuia e Kiua ia lapana, wahi a ka hoike a kekahi nupepa kepani, ua laweia ae, a ia ole ia, aia ma ke ala e hiki aku ai i Iapaua he 101,891,317 iene, a o ke koena iho o 110,092,176 iene, aia he 100,666,576 iene ua hoahuia iloko o ka Banake Enelane a he 9,425,760 iene iloko o ka Banake o Geremaoia.
E like me na lono i loaa mai, aia ka hapanui loa o na lanakila ma ke aoae o na kipi o Kuba, a ua hoohilahilaia o Generala Weila no kana mau hana hoomainoino kohu heina loa a ua kauohaia ae ka oia e hoi hou. Ua haalele aku ka oia ia Sana Kalela a ke hoi hou la no Havana, kahi ka a na kipi e hookokoke loa aku la me ka hoohahani loa.
-----
O Kamaa Wale No!
-----
Pomaikai no ka Mea Ilihune.
-----
Ma keia mua aku he 5% ke hoolaweia ana no kela a me keia kuai ana ma ke dala kuike ma na waiwai a pau o ko makou halekuai. E hoomanao ua kau moakaka ia kumukuai kuike maluna o kela a me keia mea no ka kuai aku. Nolaila, he pomaikai ke kuai ma o ko makou nei halekuai, ua like me he 10 pa-keneta a oi ma na wahi e ae i kau moakaka ole ia kumukuai.
Mamuli hoi o ka nui o ka makou hana i ka makahiki 1896 i pau iho la i konoia mai ai makou e hana aku e like me keia ae la, i mea hoi e pomaikai ai o ko makou poe kuai mai a e hoomahuahua loa aku ai no hoi kahi i ka makou hana. O kamaa wale no ka makou e lawelawe nei, i loaa mai ma ke kuai kukaa a ua emi loa iho i ka ko na poe e ae maanei; a nolaila, pela no hoi paha e hoemi loa ia iho ai kumukuai o na kamaa i hiki ole i na wahi e ae ke hoohoa mai.
No ka oluolu, ka heahea a me ka hookipa maikai mai ke kumu i pii mau ai o ka makou hana, a ke hauoli nei no ia mea. Aia ka makou mau kamaa ma na wawae o na poe kupono a pau mai Hawaii a Niihau. E kipa a e hoao i ko makou Halekuai Kamaa, a ua hoihoiia hela a me keia ke komo mai, ina no aole e kuai ana.
Hui Kamaa o na Poe Hana
D.B. DAMIKA
Luna Nui.
Alanui Papu, makai mai o ke kihi o Monikahaae. Jry. 25-tf.
-----
HELE HOOLUOLU
O. R. L. Co.
MA NA POAONO A ME NA LA PULE.
E haalele mai no na Kaamahu i na hora 9:15 A.M. a me 1:45 P.M., a hoea hou mai i Honolulu nei ma na hora 3:11 a me 5:55 P.M.
Na Palapala Uku Puni
Papa 1. Papa 2.
Manana $ 75 $ 50
Mahiko o Ewa 1 00 75
Waianae 1 50 1 25
F. C. Smith
Agena Ohua a Palapala nui
feb 10-tf
-----
Hui Papa a Kukulu Hale Oahu
(OAHU LUMBER & BUILDING CO)
Leleo, Alanui Moi, kokoke i ke Kahua o ka Hui Alahao & Aina Oahu
-----
Poe Kalepa Laau, Hana Aelike a me Kukulu Hale.
Poe Hookomo Mai a Hoelilo
aku i n
Puka, Olepelepe, Kui, Pepa, Peua, Aila, Na Pone Kamana,
A pela aku, a pela aku.
Tel@pone 53, Pahu Leta.
@@@@