Ka Makaainana, Volume VII, Number 7, 15 Pepeluali 1897 — Page 6

Ka Makaainana.

 

HONOLULU OAHU, POAKAHI, FEBERUARI 15, 1897.

 

IOSEPINE

KA EMEPERESE PUUWAI OLU O FARANI.

 

MOKUNA VIII.

IOSEPINE KA WAHINE A KE KANIKELA MUA

 

[Mai ka Helu 6.]

 

            I na hora o ke aumoe, no ka nui loa o kopa maluhiluhi, haule aku la oia iluna o kona moe no ka hooluolu ana, aole nae no ka hiamoe ana, no ka mea, ua holo aku ia mea he hiamoe mai kona mau maka aku, a moe malie wale iho la no oia iluna o ka moe me ka lia ana.  Pela no oia i hiaa malie ai a hiki paha i ka hora 4 o ka wanaao, a ia manawa oia i lohe aku ai i na kamumu kapuai wawae i kamaaina iaia e pii mai ana i ke alapii.

            Ala koke ae la o Iosepine a hele aku la me na kapuai wawae mama e halawai me kana kane.  Lalau mai la o Napoliona i kana wahine, apo mai la iaia a hoopili aku la ia Iosepine i kona umauma, a hooia iho la i ka wahine aole oia i kamailio iki i kekahi mea okoa no kona lawe ana i ka hoohiki o ka oihana, no ka mea, aole oia i makemake i mea okoa kona mea nana e mahalo mua iaia, aka, ua iini oia o ko Iosepine leo ke hoomaikai mua mai iaia no kona pii ana ae ma ke kulana e hiki ai iaia ke hoomalu i ka Emepaea o Farani.

            Mahope o ka laua mau kukai olelo ana me ka hauoli, haule aku la o Napoliona iluna o kona moe no ka hooluolu ana no kekahi wahi manawa pokole, a haawi mai la ia Iosepine i ke aloha “gude naita” me ka i mai:—“apopo kaua hoaumoe ma ka halealii o Lakemabuga.”

            I kekahi ia ae, ua halawai ae la na kanikela ekolu ma Parisa.  Aole i loihi ko lakou kukakuka ana mamua o ka hoomaopopo ana iho o kona mau hoa kanikela i ka pakela oi ae o ko Napoliona makaukau ma na hooponopono a me ka mawehewehe ana i na ninau kalaiaina pohihihi.  Ua hoikeike aku oia i ka hupo o ka laua mau hoolala ana, a ua hoohuli mai la ia laua e hoapono a e hooia i kona naauao a me kana mau hoolala ana.  No ia mea, ua ike iho la kona mau hoakuka he mea hiki ole ia laua ke paio aku me Napoliona, a ua ano wiwo maoli no laua iaia, nolaila, ua nee ae la mana hooponopono piha iloko o ko Napoliona mau lima me ke keakea ole ia.

            Mahope koke iho o ka lakou mau kukakuka ana, ua haliu ae la o Abe Siesa a pane ae la ia Talerana a me kekahi poe me ia, “E na keonimana, ke ike nei au ua loaa ko kakou haku.  Ua hiki ia Napoliona ke hana i na mea a pau oia wale no, a ua oi loa aku ka pono o ka ae ana aku mamua o ka hoouluulu kue ana no ka manawa pau ole.”

            No keia wahi kaua kuloko pahaohao nona ke kumuhana i hooko koke ia me ke kahe ole o kekahi wahi kulu koko, ua aie nui o Napoliona ia Iosepine no ka Iosepine mau hana hoolaulea, aole wale hoi i na hoa’loha o kana kane, aka, i na poe koikoi e ae no hoi o ka aina, oiai o Napoliona ma Aigupita.  Ua ike no hoi o Napoliona ia mea, a ua hoike mau aku o Napoliona ia aie ona i kana wahine.

            Ia kakahiaka ana ae, ua haalele iho la o Napoliona me Iosepine i ko laua home, ke Kakela Kaneterine, a hoi aku la no ka halealii o Lakemabuga.  A oiai, aole keia o ka halealii poo aupuni, aka, ua like ia me ka paepae e hehi aku ai i na ipuka o na Tuileri, ka home kaulana o na moi Farani.

            No elua mahina ko laua noho ana ma Lakemabuga.  Iloko o ia manawa ua hoolilo nui o Napoliona i kona noonoo ma na mea e hooholomua ai i na hana kuloko o Farani, a mawaho ae o ia aole he mau mea ano nui i ikeia, koe wale iho no paha ka mare ana o Murata me Kelalaina, ke kaikuahine o Napoliona, he wahine i kaulana no ka ui.  O Murata hoi kekahi o na aliikoa o Napoliona.  Ua malamaia ko laua mare ana me ka hanohano nui, a no kekahi manawa loihi akahi no a ike hou ia he mare o ia ano, me he mare ana ia no na alii hanau o ka aina.

            E pii mau ae ana ko Napoliona ohohiaia e na makaainana i na la a pau, a pela pu no hoi me ka onipaa mau ana o kona kulana.  Aole i loihi mahope mai, ua kaukai mai la o Farani holookoa e ike i ke kanikela mua loa e hoi ae a e noho maloko o ka home o na moi o Farani.

            I keia wa, mamua o ko Napoliona hoi ana iloko o na Tuileri, he ano ole ia home alii.  Mamuli o ka inainaia o na alii, ua hanainoia ua halealii la; ua wawahiia na lako o loko, a o na kii i penaia a Lui XIV, i hoolako ai no ka hoonani ana i kona mau paia, ua pau i ke kiolaia a hanainoia no noi malalo o na kapuai o na kanaka.

Aole i pau.

 

Papalua ua Luuluu

            Ma Haena, Kauai, Ianuari 23, mahope o ka hoomailo loihi ana a ka ma’i akepau, ua aili ae la ke aho hope loa o Lui K. Titcomb, i ke 30 o na makahiki ma nei ola ana.  Ua haalele iho oia mahope nei e u aku nona he wahine a me eono mau keiki, a me na kaikuaana a me na kaikuahine lehulehu.  Aia me ka wahine na haawina luuluu papalua, oia o Misasa Haua K. Titecoma, no ka mea, haawe hoi i ko ke kane, a mahope iho nei hoi i ko ka makuahine, ia Misasa Anageline Kuhiau, a makou no hoi i hoike kau ai ma kekahi helu i hala, a ke panai aku nei hoi makou i na komo pu ana aku e kaana ma ia haawina luuluu.  Mokumokuahua wale!

 

Make ia Kanikela Hawaii.

            Ma ka mokumahu Kulanakauhale o Pekina i loaa mai nei he lono i ke Aupuni ma o ka Loio Kuhina la ua make o C. P. Hail, Kanikela Hawaii ma Kobe, Iapana, i ka ma’i @amola-poki i Ianuari 18.  No kahi wa i hala ae i holapu ai ka ma’i malaila a me ka nui no hoi o ka poino iwaena o na poe Europa o laila.  He lala oia no ka hui kalepa o Walsh, Hall & Co. o ia wahi Lehulehu @a hana hookipa a lokomaikai ana i panai mai ai ia Loio Kuhina Kamika a me Kauka Wahie, oiai laua ilaila i ka imi ike a me ka makaikai.

 

Haule Iloko o ka Wiliko.

            No Hakalau, Hilo, Hawaii, he lono no kekahi mau pule i hala ae ua haule kekahi paahana Kepani me na kamaa kaumaha nunui iloko o ka nau wiliko o ka halewili o Hakalau.  Mamua ae o ka hiki ana ke kokua aku iaia, ua palahe pu kekahi wawae ona a ke kuli.  Ua okiia ka wawae palahe e Kauka Kamikana, a make no nae oia i kahi la ae.

 

Mau Mahele Kuleana i Hooliloia

            He 25 mau mahele kuleana iloko o ka hui mahiko o Ewa i kudalaia e Kimo Mogana i ke awakea Poaono, Ianuari 30, a ua lilo ia L. L. Makanalese no $167 pakahi, he $100 ka waiwai io ma ke alo.  A he 15 mahele o ka Hui Hau Lehulehu no $85 a he 16 no $81 pakahi ia J. A. Makuna.  Ia wa no, he apana aina o 28 ½ eka, e pili pu la me ka halekula Euelani o Kalihi-uka, ua lilo ia Ferede Harisona no $516.

 

E Kipa a e Ike Ae

            I kela hoa oiwi o kakou, ia S. M. Kamakau, ma ka halekuai waiona o Lovekeoe Ma, kihi o na alanui Nuuanu a me Marine.  He heahea a he oluolu oia, a ua loihi kona kamaainaia ma ia hale, malalo o kona mau haku mua elua, i pau.  O na waiona maikai wale no ke loaa malaila, a pela no hoi me na waina Kaleponi maikai loa.  Oluolu na kumukuai, a pela no me na hookipa a kuka pu ana me ua hoa la malalo o kona mau haku hou.

 

Robert Napunako Boyd

(ITALIA)

He Ana-aina a he kokua no hoi ma ka hooponopono ana i na waiwai paa, huli ana paha i na Buke o ke Aupuni, a pela aku.

Keena Hana: Mauka iho o ka Hale Leta, maluna ae o ka haleaina Pake, Alanui Betela.

apl 13-mp

 

DR. C. A. PETERSON,

(KAUKA PITASONA),

Ua Nee Ae Oia a ka Helu 28

ALANUI EMA.

NA HORA KEENA:—8-10 A. M.; 2-4 a me 7-8 P. M.

nov. 30            TELEPONE 752.        3ml

 

C. B. DWIGHT

[KALE KUAIKA]

Mea Hana Pohaku Kaekae Alanui, na He Kupapau, a me na Kia Hoomanao Mabala

——

            E loaa no oia ma kona wahi noho ma Koiuiu, Honolulu nei. Telepona Helu

$33.     fby 17-1yr.

 

NO KE KUAI.

            He hale o Elima Keena, hookahi makahiki o ka paa ana, a me Elua Apana Aina ma Kalia, Waikiki, ma ka mahele aina o Bruce Waring & Co., e hooliloia aku no i ka mea e makemake mai ana.  Aia keia wahi ke pili kokoke la ma kahi noho o E. S. Boyd.

            KUMUKUAI:—$1,000; $500 ma ke kuike a ma ka Moraki ke koena no ekolu ma kahiki ma ka 8 pa-keneta ukupanee.

            No namea i koe, e ninau ia.

 

BRUCE WARING & CO.,

a i ole, ia F. J. TESTA, ma ke keena o keia nupepa

sep 7-mhp.

 

HUI HAWAII KUAI AINA.

NA LUNA NUI.

JAS. H. BOYD.......................            Peresidena

J. K. KAULIA........................            Hope Peresidena

C. A. LONG...........................            Puuku

ENOCH JOHNSON..............            Kakauolelo

JOS. PAAKAULA.................            Luna Hooia

W. C. ACHI...........................            Luna Hoohana

NA LALA O KA PAPA ALAKAI.

J.K. KAHOOKANO

R. W. WILCOX

J. W. BIPIKANE

 

            He Hui i kukuluia no ka hookuonoono a kokua ana i ka lahui Hawaii; ua makemakeia na Hawaii a pau loa e komo mai i ka Hui.

 

Honolulu, Ianuary 11, 1897.

jan11—1 yr.

 

HALEKUAI LAHUI KALAHIKI

Helu 405, Alanui Moi, ma Waikiki aku o Alanui Nuuanu, ma ka aoao mauka, ke keena mua o ka “Hawaii Holomua.”

 

Ma ia halekuai o na oiwi e loaa ai na anoi a me na paihi o na ano hou loa, e laa

            Na Kalakoa,                Na Keokeo,

            Na Makalena               Na Kinamu,

            Na Huluhulu,              Na Lihilihi,

            Na Kamaa o na Kane, Wahine me Keiki a pela aku.

 

            Oluolu no ke kuai ana.  Aohe hewa ke ipa mai e ikemaka, a aohe no hoi he kunu unuia no ka hoikeike ana i na mea kuai.

 

M. PALAU, Luna Nui.

@

 

C. E. Williams me Keiki

Ed. A. Williams, Luna Nui.

Helu 611, Alanui Moi, ma Ewa iho o ka Pa o Aigupita.

——

He mau mea kuai lako hale o na ano a pau loa.

——

He mau mea Hana Pahu Kupapau a Hooponopono Hoolewa.

 

[Kii]

E hoolakoia no na Kaa Kupapau, na Kaa-ipo a me na Kaa-ohana.

Ina no e ninau ia laua, e loaa no na Pohaku Kia Hoomanao no na He Kupapau.

——

            O ka Ialoa kekahi hana hiki loa ia laua, aia ia malalo o ka lawelawe ponoi ana a Ed A. Williams, F. D., he mea i puka pono mai ka Kalaka Kula o ka Ialoa Maikai ana iloko o Mei, 1894.

NA TELEPONA

Keena, Helu 17@—Kauhale a me Kahea Po, Helu @15.

nov @-mp.

feb. 3-mp.