Ka Makaainana, Volume VII, Number 7, 15 February 1897 — Page 4

Ka Makaainana.

 

4          HONOLULU  OAHU,  POAKAHI,  FEBERUARI

KA MAKAAINANA

HE NUPEPA OILI PULE.

 

F. J. TESTA (Hoke),

Ona, Luna Nui a Lunahooponopono

Wahi Noho, ma Honolulu.

KEENA:  Helu 327, Alanui Moi, ma

Waialeale, kokoke  i Alanui Konia.

 

UKU O KA NUPEPA.

No Hookahi Kope       -           $   .10

No Hookahi Malama   -                .25

No Ekolu Malama       -           -    .75

No Eono Malama        -           -  1.25

 

  Ina e hookaa mua ia, peneia ka uku :

No Ekolu Malama       -           $    .50

No Eono Malama         -           -   1.00

No Hookahi Makahiki            -           -   2.00

 

UKU O NA LUNA NUPEPA.

5 Inoa -           -           -           -     .15

10 Inoa-           -           -           -     .20

Maluna aku o 10 Inoa -           -     .25

 

  Aia a elima ia a a kekahi luna mawaho ae o kona inoa iho, alaila, loaa he pepa iaia me ka uku ole.

 

 

POAKAHI,  FEBERUARI 15, 1897.

 

  UA loaa wahi palapala mai nei no makou mai ko ke Aliiaimoku kanaka o Ianuari 30 aku nei mai Wasinetona mai, eia nae, no makou wale iho no ia. A ua hoouna pu mai no hoi oia i na hoike like ole a ko laila mau nupepa no kona haku Alii a me lakou no a pau. O kahi mea ano nui no ma ia palapala, ua hoike mai o a i ka maikai no o ko lakou mau ola a pau. Eia nae hoi, ma na lono telegarapa i loaa ae ma Kapalakiko o ka la 4 nei, ua hoikeia ae he wahi ano omaimai ka ko ke Alii, he anu a he hanupaa, aohe nae he mea e hopohopoia ai; a mamuli ka hoi o ia ulia o ka manawa, ua hoopau ke Alii i na noi no ka ike aku iaia a me na kono no kona hele a panai kipa ike aku. Mawaho ae o ia, aohe mau lono e ae, a e manaolana hoi kakou aohe keia ulia i loaa iaia i ano kukonukonu loa. Ua hoikeia no ma kela lono nupepa ua hopohopo ka kona mau ukali a ua koi aku e kiiia ona kauka, aohe ka he ae o ke Alii. O ka makou wale no, e uwalo ae hoi na leo pule no ke ola o ko kakou Alii.

 

  INA e lokahi ana ka hapanui o na poe hoahu dala a pau iloko o ka Banako Hale Leta e noi like ae e unuhi aku i ka lakou mau dala a hiki i ka huina o $300,000, a iloko paha hoi o ekolu malama e hookaaia ae ai, ke koho nei makou me ka maopopo loa e halawai koke no ke Aupuni e ku nei me ke kuia a me ka bauekarupe. He miliona hookahi paha ko ke Aupuni aie ma ia oihana banako, a ua olohaka loa ka Waihona me kahi hunahuna ole e hiki ai ke hookaa ae. Ua hoikeia mai ia makou aohe e hiki i ke Aupuni ke aie, a o kahi i kokua nui ai i kona nee malie ana imua, ua ana a ua aikena loa i na hana uha ai ano ole e lawelaweia nei.

 

KE ALII MA WASINETONA.

 

  E like no me ka makou i hoike aku ai ma ka helu i hala, ua oiaio loa aia io no ke Aliiaimoku i Wasinetona, a e hooia ana i ka oiaio loa o ka lono mua ua ike oia ia Peresidena Kalivilana, a mahope mai nei hoi ia Misasa Kalivilana ma ke kono ponoi a ia wahine alakai o ia aina a Aupuni nui. Ua lilo na olelo a ko laila mau nupepa i mea ole o ka hoike ano pahenehene ana ae no ko ka Peresidena holo mai ke Alii aku, iaia ka hoi i lohe ai ua hoea aku ko ka lahui Hawaii elele kiekie a pookela loa ma ia kulanakauhale poo; a pela no hoi me ka hoike, me he la o ke ano maoli no ia o ka manao, ua holo a hoolalau aku o Misasa Kalivilana mai ke Alii aku, i ka ike, a i ole ia, i ka lohe ana paha e hiki aku ana ke Alii maloko o ka Hale Keokeo.

  Ua oiaio nae hoi ua hele io no ka Peresidena, e like me na mea i hoikeia e na nupepa, i kakahiaka nui wale o ko ke Alii wanaao o ka hiki ana aku, a wahi mai nei hoi o ka Kapena Pama hoike i ka nupepa Kuokoa namu a i hoopukaia ae i ka auwina la Poaono nei, ua haalele aku ke Alii ia Bosetona me ka lohe mua ole ia e na poe kakau nupepa o laila, a ole loa no hoi i kona poe kamaaina o ka noho ana aku o laila, a pela no hoi e ko Wasinetona poe. Aia wale no ka maopopo ana a ua hala ke Alii a ua hiki i Wasinetona, a ia wa wale no auanei i pikokoi ae ai ko laiia poe kakau nupepa e hui a e kamakamailio pu. Ina paha i lohe mua ia, piha ke ala a me kahi hoolulu kaamahu me ka lehulehu, e ake ana o ka ike iki aku, a oi loa aku paha hoi, e na poe kakau nupepa uhane ole.

  Aia ko Wasinetona poe, mai ke kiekie a ka haahaa, ke kuwalawala la e ake ana o ka ike a hoolaunaia aku imua o ka Elele Alii Kiekie o ka Lahui Hawaii. Ina e auiia ae ka nana ana ma na mea a makou i lawe ano nui mai ai mai na nupepa mai o laila, i hoounaia mai e ka oluolu o ko ke Alii kanaka a e hoopukaia aku nei ma ka aoao mua o nei helu, alaila, e ikeia iho no aia ko kakou Alii ke ike a ke hoaoia mai la e na lede a me na keonimana Amerika, a aole loa hoi e na ano Amerika hoopalaimaka e like la me ko kakou nei poe. O na wahine a me na kane ia e ake la e ike, a o na wahine no nae hoi ka oi loa aku, a e lilo hoi nei hiona i mea na kakou e haakei ai.

  I ke Alii malaila, aia oia ke hoike la iaia iho, i kona ano a me koua kulana imua o na poe i hoino ai iaia me na olelo kupono ole, i loaa a i laweia aku mai na kane a me na wahine i hoopilimeaai, pai a hoomalimali hoopunipuni iaia, aka, ua kumakaia hilahila ole aku iaia mahope iho o ka lawe ana aku i na mea a pau e loaa ana mai iaia a me kona mau pili aku. Ae, aia oia imua o kela poe e hoaoia mai la, a na lakou no hoi paha ia e kilo mai i na mea i oleloia nona. He mea oiaio loa nae hoi, o kona hoea kino ponoi ana aku nei ilaila a ke hui la he alo a he alo me na poe o na anuu a pau, he mea nui ia e pale ae ai i na mea i olelo wale ia nona a me kona lahui. Ae, o ke kanawai mana a oolea loa ma ko ke Ao nei mau Kauawai, o ia ka hoopai no na mea i hanaia mai i ka wa i hala ae, a aia ka lahui poo o Amerika Huipuia ke hookolokolo ai la i ko kakou  Alii malalo o ia kanawai imua o ko ka lehulehu aha hookolokolo, a o ka nanaina aku, me he la e lilo ana ka olelo hooholo i mea nona a no kona lahui e oluolu kupono ai. Ke manaolana nei makou pale, a pela io mai no auanei hoi.

  O ka mea oi loa aku nae hoi a ka lahui e hauoli ai, e like no me kona hoopahaohao ana ia kakou o nei i kona la i haalele mai ai no ka hele ana aku ma keia huakai, pela no oia e hoopahaohao la i ko o poe, a o ka oi loa aku hoi, aia oia ke hele ia me ke kamailio nui ole, oia hoi me ka mumule, a he haawina ku pono loa hoi keia na kakou (kona lahui) e hoomaopopo ai a hookolo like aku ma ia moali a ma ia meheu. Aohe mau hiohiona pili kalaiaina no nei huakai ana, aka nae hoi, malia o oili ae. Iwaena o na poe i hoohele kamailio aku iaia, ua ae ole oia iaia iho e alakoia aku iloko o na kukai olelo pili kalaiaina ana. A iwaena no hoi o na poe i kamailio aku iaia ua hoopuka ae no eia i kekahi mau olelo pane pokole a ku i ka naauao. Eia iho kekahi o kaua mau pane, i hoikeia ae e kekahi nupepa o laila, oia hoi, i ka wa ka a kekahi wahine i ninau aku ai iaia ina pana he manaolana kahi ona ao koua hoihoi hou ia ae ma ka nohoalii, ua oleloia ua pane aku ka oia: "Oiai, he ano kanaka no au, pela no ko'u manaolana." No keia pane ae la, ke oiaio nae hoi, aohe mea a ka manao e loiloi ai, oiai, ua kupono loa, a he naauao maoli no, loaa ole he mea na kahi e hoino aku ai, e like paha hoi me lakou nei ma ae. E noho no kakou me ka hauoli mau nona, a me ka manaolana mau no hoi e hoea mai ana he wa e hooi loa ia aku ai o ko kakou hauoli ana nona.

 

"KE ALEALE NEI KA WAAI."

 

  Eia hou mai no nei mau telegarama i keakeaie ma ko laua ala au moana, mai ke Kuokoa namu mai o ka Poakolu iho la:

  HAKI IA KOLE--E hookolo aku ana o Makinile i ka Kalivilana kahua alakai hana e pili ana ia Hawaii. O na mea pili loaa Aupuni wale no ke noonooia ana ma ke kau kuikawa o ka Ahaolelo. E kakali ana ka hoohuiaina a no ke kau mau iloko o Dekemaba ae. Aia ke Kuikahi ma ke kulana kupilikii loa o ka poino. Hoopoino loa ko ke Alii ikaika ume a hooni manao. Heaha hou aku ka'u e hana ai?

  KOLE IA HAKI--HE keu a kou hoinoino i ko'u manao. No keaha la kou mea i ninau mai ai ia'u no ka mea e hana aku ai? Aia hoi oe i Kahua. Ke hoouna aku nei au ia W. O. S. (W. O. Kamika) i ou la. I hana hoi au pela i mau ai ka noho'ua iliwai like o ko'u mau ohana pili kalaiaioa a me kaua. E akahele mai oe ia Konola Makalena. Ua noonoo pono ole o Limaikaika a me Atekinesona me na hua kepau pai-palapala. O ko'u akenui loa aole la au i hanauia.

 

  A ma kona helu no hoi o ka auwina la Poalima nei, ua hoopuka hou ae no ke Kuokoa namu ia mau telegarama hou i keakeaia no ma ke ala, penei iho:

  HAKI IA KOLE--Awiwi mai. Hoouna mai i mau pahu piha dala. E holo ana Oia no Enelani i ka Iubile. Ua "wahawaha" o Seremana a me Saulebure ia kakou. Hele mai no hoi oe. Lawe mai ia Haida, Kauka a me Kupa.

  KOLE LA HAKI--He Hui Hege no anei ko laila? Aohe dala. Aole e hiki ke hele aku. Hoi mai. Waiho aku na Kamika a me Kakina e lawelawe i ka hana. Haha a hoolono no ka hoihoi hou ia ae o kahi a o laua pu no paha hoi (ma ka nohoalii).

  [Na makou ponoi iho na olele i apoia. O ka Hui Hege (Hagey Institute), o ia ka hui e ku nei maanei no ka lapaau aua i na poe punihei loa i na waiona. Malia aia paha lakou la ma o ke inu aui loa mai la i ka waikeke a me ke kemapena, a ua pono hoi e lapaau aui ia no ia ma'i eha o ke poo. L. H.]

 

  Hoomakeaka no hoi paha keia mau telegarama ae la, a me he la eia paha lakou nei ma ae ke haohao nei i kahi i loaa mai ai o na lono e hoopuapuaiia aku nei e na wahaololo elua a makou e auamo nei. Ua auiaui loa no hoi paha lakou ia makou.

 

  Pahaohao no hoi na haua o ke