Ka Makaainana, Volume VII, Number 4, 25 January 1897 — Page 5

Ka Makaainana.

HONOLULU, OAHU, POAKAHI, IANUARI 25, 1897

 

"KE ALEALE NEI KA WAI."

   Ua puoho mai nei ko luna poe no ke poo e kau ae la maluna, me ka olelo haohao iho o ka wai hea la keia e aleale nei.  Ke waiho aku nei no makou ia mea a na ke au o ka manawa e hoike mai i ke ano o ia wai.

   Eia nae, aole loa ia o ka wai o ka hoohuiaina, e like la me ka mea a ka lima akau o ia makamaka i moeuhane ai i ua la mamua aku nei.  Ke hala ole ka makou koho, e ike iho ana no paha oia i ua wai la e aleale mai pei.  Malia he wai iloko o ka malie, a i ole ia, iloko paha o ke oehuehu, a i ole ia, iloko no o na ano e ae o ke au o ne ouli o ka manawa.  Nana aku no kakou.

   Ua hoike aku makou ma ka helu i hala no kekahi mau telegarama i keakeala ma ke ala o ka ho@a mai ia nei, mai ke Kuokoa namu mai, a eia iho no nei mai ia wahaolelo mai o kakou a makou e noho ona a poo nei ma kona helu o ka Poaono nei:

   KOLE IA HAKI--Ma ka mokumahu Miowera, ma ke ala ae o Aukalaua:  Ua hoea hou mai nei o Limaikaika ia nei.  Heaha la ka'u e hana aku ai iaia i nei wa?

   Oiaia hoi e kali aku ana i ka pane no kela maluna ae, ua hoi aku o Misita Kole a kona hale aekai ma Waikiki no ka hoolohe ana heaha la ka na ale ( a nalu) ahiu e kamailio mai ana.

   Na ka Mokumahu Kopetica nae hoi i lawe mai i keia mahope iho mai ia Haki ia Kole:  E lilo aku ana o Sherman (Seremana) i Kuhina Nui.  Ua manao au ua make loa ka manao hoohuiaina aia iloko o ka lua pa-u--eia nae, e hiki ana no paha ke hoopakele ae i ke kuikahi.  Mumule loa ke Alii.

   Olo ka pihe hauoli o ka aoao hoohuiaina i ka oili-a-maka loa ana ae nei @ J. Lota Kaulukou a kukala akea ae la i kona hilinai ma ka manao hoohui aku ia Hawaii nei me Amerika Hipuia, me ka olelo ae aia wale no ka ma ia keehina e loaa ai he ola i ka lahui Hawaii.  Aole no nei he mea hou loa, aka, e kala kahiko no i ikeia ai oia a me kona ano.  Ma kahi nui o ka loaa, malaila oia, he ole ae hoi kona nana ae no hai, oia hoi, no ka hapanui nui loa o ka lahui oiwi.

   Ke haliu ae kakou i hope, mai lalo ae kona p@ ana a kau i ka panepoo loa o ka hanohano i hiki ke hooiliia aku e kekahi Moi maluna o kekahi makaainana, a i kona haule hou ana ilalo, ua iamo a kuho oia mai ke kulana o ka hilinaiia a i ka hilinai ole ia, a ma kahi hoi ona i nanaia aku ai ma ke ano alakai a lilo i alakai ole.  Aka, eia oia ke hoao hou nei e imi aku i wahi nona e ike a e hilinai hou ia mai ai e na poe ana i kue a i hoino aku ai.

   E hoomanao kakou oia ka makua o na hana hookelakela hanohano a ake uhaai wale i ko ka lehulehu waiwai i na kau ona i noho ai iloko o ka Ahaolelo, e laa me ka aie miliona, ka hoohui i ma paemoku a pau o ka Pakipika nei malalo o ka Moi Kalakaua ma ke kulana emeperoa, ka hoala ae i mau kahua kulanui, ka mokukaua Kaimiloa, a pela aku a lehulehu wale.  Oia ke kakauolelo a J.M. Kapena i hoounaia ai ma ke ano elele i Iapana, a hooholoia ai ke kuikahi o na Kepani e komo nui mai nei i o kakou nei e opa pu nei ia kakou oiwi i ka paia a i kumupali.  No makou iho, ua hala ka hie nona, a e haaheo no ka aoao hoohuiaina iaia a e hiki, ua, ana ka lahui nona.

   Ua waihoia mai nae hoi a na ke kanaka i noho ma ke kulana Loio Kuhina no kekahi mau la helu pokole loa a hoi hou ilalo i ke kulana Ilamuku e like la me Kaulukou e kukala ae iaia iho no ka poai hoohuiaina, e like me kana i hoike ai i ka mea kakau o ka ohua palemo alaula a puka ae i ke alaula o ka Poakolu iho la, e olelo ae i kona poe ewe oiwi aia ke ola ilaila a ma ia keehina a me ia kahua a kulana.  Muhee no ka hoi ua o Kaulukou la.  I ka nana aku, he alualu dala no ke kumu, i hiki ai no paha hoi ke loaa mai ke dala no na mea ana e makemake ai, e like me kana i hoopaa moraki koke iho nei i ko ka wahine aina o uka o ke awawa o Nuuanu.

   Pehea la i manao ai ko kakou poe hoohuiaina o ke kanaka ia e hiki ai ke hooia aku i ka lahui a me ke Aupuni Amerika "he alakai oia iwaena o kona lahui," ina ua hiki ole iaia ke hookaa i kona mau aie?  Ma kona kokua ana i ke komo mai o ka lahui Kepani, pehea la oia e kupono ai e hooia aku i ko Amerika poe aohe makemake o kona lahui ia lahui?  E noke wale no paha hoi oia, aohe no e hilinaiia mai, no ka mea, ua ike maopopo mua ia no kona ano.

   A ua ukaliia ae nei hoi oia e Kale Hapakini, he mea i noho kakauolelo a hope malalo o ka inoa mua, a i ka pau ana o ka mua, na kau ae oia ma kona wahi a iloko hoi paha o na kamaa i minaminaia ai o paholehole i ka lomiia o na wawae maluhilui o ka maau hele ana i ko hai wahi o ka po.  Ua ano like no laua ma ia manao hookahi, eia nae, aole laua he mau oiwi alakai, no ka mea, e like no me ka mua, pela iho no me ka hope, e kala no i nalo aku ai ka hie a me ka hilinaiia mai ia laua aku.  E aho no ka hoi na poe ake loaa ole a me ko kuaaina poe noho ilihune a ano naauao ole, oiai, aia ka makee a me ke aloha io iloko o ia poe.

   Ke oleloia nei e hoounaia aku ana o Kakina i Wasinetona ma ka aoao o ka Ahahui Hoohuiaina, no ka hooikaika ana i k@la manao ma kahi ona i kipakuia mai ai, a ke mau la no paha hoi kona hoihoi ole ia malaila, a ma ka mokumahu Pekina o ka la 29 iho oia e holo aku ai.  Ua loheia ae no hoi e ukali pu aku ana o Kaulukou.  Akahi no a loaa ko Kakina hoa kaulua kupono, o ke diabolo.

   E hoomanaoia i ka wa o makou nei a me kahi poe oiwi lehulehu e ae i hopuia ai a hoopaaia ma Kawa me ka hala ole i ka la 7 o Ianuari, 1895, a i na la mahope iho, ua opaipai na kuli o ua o Kaulukou, a no ka makaku o hopuia oia, awiwi ai e alapoho i ka apu auhuhu a ke Aupuni, o kahi hana i loaa mai i uku no ia apu, o ia kahi kulana Notari Lehulehu.  Ole loa no hoi a mau wale ka moepoo ana.

   Oiai laua e noho ana i ke aki, ihea ka hoi ia wa, hoomaopopo ae ne ka wa e hiki mai ana i ike ole ia.  Aole laua i noonoo, aka, loaa mai no ma ka akau, lu aku no ka hema, a i nei wa hoi, ua kau pono laua maluna o na papakole o laua.  Hilahila ole no hoi na poe i noho i ke ulakolako a haule, me ka noonoo ole ae paha hoi i ka hai i luhi ai iloko o ka hune a me ka hoomanawanui "ma ka hou o ka lae e ai ai oe i kau."

   Ia  m@kou no hoi e noho pio hala ole ana iloko o Kawa, ua laweia ae ka lono o laua nei a elua kahi ma ka aoao ikaika i ko na oiwi hoohiki a huli ma ka aoao hoohuiaina.  O ka makana i loaa mai no ia luhi o laua, he @alo.

   Malia, iloko o ia wa a me nei wa no hoi kahi; ua po@na loa o Kaulukou i na hua manako, alani a me ahui maia ana i painuu aku ai e hookupu ia Komisina Balauna.  He okoa oia ia wa, he aloha aina; i nei wa hoi, he hoohuiaina oia, ua nalo kona aloha aina ma ke kua.  Kupaianaha no hoi paha ka ke Akua hoololiloli ana ana ae i ko ke kanaka manao.  He mea maikai nae hoi ia, akaka lea ana kikania, a he ulaa a uhuki wale aku no ke hiki mai i ka wa kupono.

   No ko Kaulukou ake loa no hoi paha e ike ia Wasinetona i wikiwiki ai oia @ hoike akea ae iaia iho, i apo koke ia ae paha.  Ua lohe mai makou nana maoli no ka i hou poo aku no, o lilo ka ia kulana i kahi mea okoa aku; a ua lohe pu ia mai no hoi aia a hoomaopopoia ke ola o kona ohana mahope nei, alaila oia ae e hele.  No ka lono mua, ke hilinai nei makou; a no ka lono hopeiho, aohe o makou hilinai (?) iki e hoohaahaa ana oia iaia iho, oiai, ua hilinai oia aia ilaila e ola ai ka lahui Hawaii.  Eia nae, aohe o makou wahi haohao iki no kahi mea ana e hana ai nona iho.

   Ina ua hauoli loa lakou nei ma ae no ka lilo ana aku o laua nei ae, oiai no nae aohe ia he mea ano hou loa ia makou, ua hiki, hookuuia aku, i loaa ai ia mau hoa o Kalua a me Kepoikai ma.  Aohe a ko ka lahui aoao mea e uwe ai, aka, e hauoli kakou ua kaawale aku ia poe kumakaia.  O lakou wale no ka paha na poe alakai i koe iwaena o ka lahui?

   No makou iho, aohe a kakou mea e hopohopo ai, aka, ua hiki loa ia kakou ke hookuu aku i ka aoao hoohuiaina @ hukihuki aku i na opala nahelehele a waiho iho i na poe maikai i ike i ke aloha aina oiaio me kakou.  He lehulehu loa o ia poe oia iwaena o ka hanauna hou, a o ka makou no ia e uwalo aku nei--e hoomau i ke kupaa iloko o ka makee a me ke aloha.

   E like hoi me kekahi lono i loaa mai nei, ua haawiia aku ia Generala Seremana (General John Sherman) ke kulana Kuhina Nui iloko o ko Makinile Aha Kuhina a ua aeia aku ka e ia.  Ina pela io, alaila, he puupuu oolea keia ia Hawaii nei.  O keia Seremana kekahi mea kue loa i ke Kuikahi Panailike iwaena o ko Amerika Huipuia poe loea kalaiaina alakai a he kue maopopo loa hoi oia i ka ninau hoohuiaina.

   Aole no hoi ia o kahi puupuu hookahi, aka, eia hou iho no ia lono i loheia mai nei, oia hoi, ua koho hou ia o Pekina (Geo. C. Perkins), he Kiaaina mua no Kaleponi, i hoa n ka Aha Senate nui.  He mea kue loa no oia i ka ninau hoohulaina.

   A pau ae la hoi ia, aia no na nupepa alakai o Kapalakiko ke huai ae la i na manao kue hoohuiaina.  Ke ahulau loa ae la keia ma'i iwaena o ko laila mau nupepa, a ke laha loa aku la hoi i ka loa a me ka laula.  No keaha mai la hoi keia loli ano e ana?

   Ke lohe aku nae hoi kakou ia lakou nei ma ae, ikaika ka holomuku o ka manao hoohuiaina

   (Hooma@a ma ka aoao ewalu.)