Ka Makaainana, Volume VII, Number 3, 18 January 1897 — Page 2

Ka Makaainana.

2        HONOLULU, OAHU, POAKAHI, IANUARI 18, 1897.

 

LEONE DE BOANE

KA MEA OHUMU KIPI O COADOVA

MOKUNA II.

KE ALOHA I KA IWIHILO.

(Mai ka Helu 2.)

            Nolaila hoi, ua konoia o Gaberiela e haawi ae i kona lio, a mahope iho hoi o kona kokua ana ia Alecasina e hookaawale aku i na kino make o na powa, ua hali mai oia i na lio i lilo pio mai ai mai na powa mai a ka puka o kahipupupu hale, hoopaa ae la hoi i ko Lula noho, i lawe ia mai kona lio mai i make, a maluna o ke kua o ka lio ana e kau a e holo aku ai. Ua palena ole na mahalo pumehana a Leone a me ka lede opio i hookau iho maluna o ka haku hale a me kana wahine, a mahope iho hoi o ka haawi ana aku o laua i kekahi mau apena dala gula i kamaaina o kauhale, ua kau ae la laua maluna o na lio, a hoomaka aku la e hele no ke kulanakauhale, mahope aku hoi ka ukali kahi i kuoe malie aku ai.

            Mahope iho o ka haole ana o ka naita a me ka lede opio no kekahi manawa a pau ae la paha hoi na manao hopohopo iloko pakahi o laua a paleia ae la hoi ke ano puikaika o ka puai ae o naleo, a hiki hoi i ka wa i pahee loa aku ai o na kamakamailio ana a laua, ua loaa ia laua he nui na mea e kamailio ai. Ua hoi ke aku o Leone no kona home ma Noamanade—no kona mau aina laula a me na puuluulu kauhale holomua—no kona ka kela kahiko kaulana a me na kahu lehulehu loa—a no ke ano hoi o ka aina a me ka lahui. Alaila, ua kamilio laua no Sepania—no kona aupuni a no na hooili kaua mau mawaena o na poe Mua a me na poe Karistiano. O keia mea hope, ua ano pili loa ia i ko laua mau puuwai, a, malalo hoi o kekahi hooulu manao ana i oi ae mamua o ka oluolu, ua olelo ad ka wahine opio ui nohea:

            “Aole o’u ike heaha la ka mea e hakaka ai o ka Mua a me ke Karistiano. He mea oiaio loa, no kekahi ohana nui mai laua—o ke koko hookahi—he mau keiki hoi na ka Makua nui hookahi”

            “E ka lede, ke kamailio mai la oe me he Karistiano la,” i panai aku ai o Leone, me ka haule pono aku o kona kilohi ana maluna ona.

            “Malia he kumu no ko’u o ka hana ana pela,” i pane aku ai oia, me ka mino aka iki ana iho. “O ka wahine nana au i hanai mai ko’u wa uuku mai a nui, he Karistiano oia, eia nae, he kakaikahi loa na poe i maopopo ia mea. No Suakini mai oia, o he wahine maikai a naauao oia.”

            “A,” i hooho aku ai o Leone de Boane, i hookikinaia aku e kekahi mea ana hoi i hoao ole iho ai e uumi a e kaohi, “ina paha oe e ae ana e lawe hou aku i kahi Karistiano e ae i hoa nou!” Ua hoopau @@ke oia mai ka luuluu o kona mau manao ponoi iho. Ua haalulu ae o Lula, aka, aole i pane mai. Aole nae hoi oia i huhu, eia nae, ua lamalama a hulili ano waipahe kona maka uliuli poni. Ua ike aku o Leone de Boane i keia, a hoomaka hou aku la e kamailio:

            “Mai manao mai oe ia’u he hoaano a mahaoi, a mai no a ahewa mai ia’u no ka’u kikaho paukiki loa. Ke kokoke aku nei kaua i ke kulanakauhale, a aole paha e hoea hou mai ana he wa pono e ae mamua o keia, nolaila, ua hiki ole ia’u ke hookuu aku i keia wa e kaalo ae. Auhea oe, ua aloha au ia oe mai ka wa mua loa a’u i ike ai ia oe. Ua noho mau kou kii me a’u, he mahele ia no ko’u mau noonoo a pau. A o keia wa maikai loa o ka laulea like ana ka mea nana i hoowaka ae i ka opuu e hoomohala loa aku a ka palena pau o ke aloha a me ke kupaa. E pane mai—ea, e pane mai—ua hooinaina aku anei ko’u aloha ia oe?”

            He mumule ka pane i loaa aku, me ke kulou o ke poo, a me na kuluwaimaka hulalali iluna o kona mau lihilihi kapalili ooi.

            “E Lula anuhea, aole anei hoi au e kapa aku ia oe o ka’u mea i aloha loa ai? Aole anei hoi au e aloha aku ia oe?” Ua kokoke loa ae na lio i nei wa, ua lalau aku la oia i ko ia la lima iaia e kamailio ana. “I ka po nei,” i pakui aku ai oia, me ka olu a ka waipahe launa ole mai, “ia oe e kau ana maluna o ko’u umauma ia’u e paa ana ia oe iloko o keia mau lima, a hoopaa aku la i ko’u ola no kou palekaua—ua manao ae au e lilo no ia i lani nou ma ka honua nei kahi a kou aloha e noho alii ai. Aole anei hoi e lilo ia hauoli e laulea ai no’u nei?”

            Aole oia i unuhi aku i kona lima, aole no hoi oia i puai leo ae; eia nae, ua haalulu maopopo loa ae la oia, a pukukui loa ae la hoi ka akoakoa ana o na waimaka ma kona mau lihilihi kohu silika.

            “E nana,” i kukala ae ai oia, “eia ae ko makuakane me kona poe ukali.”

            Ea ae la o Lula iluna, a ike aku la pela io no. Aole i mamao loa aku, a e hoomaka mai ana e puka mai kekahi mai o na puka nunui o kekahi hale, o Alii (Seika) Baala Tama, a ua heia pu mai la me ia he iwakalua poe maluna o na lio.      

Aole i pau.

 

HAOHAO NO NA OULI.

Pehea ana la Kahoaka o ke Au e Nee Nei?

            Ma ka po o ka la 29 o Novemaba, 1896 iho nei, i loaa ai ia’u he wahi haawina moe, a o ia keia:

            Hele aku nei ko’u uhane a komo i ka Pa’lii a hiki loa no hoi i ke komo ana iloko o ka Halealii a Hale Mana Hooko o kapaia nei i keia wa. Ua noho iho la au iloko a hiamoe iho la, me ko’u ike aku no i na haole e hele ana i o a ianei, a ke ike aku la no au i ka nana mai o na haole ia’u me ke ano hoowaha waha. Hoomaopopo iho la au he hookae ko lakou no’u, no ko’u noho iloko e hiamoe ai, a ke ike aku la no au ma ke ano o ka lakou nana mai ia’u. Ia wa no au i ike aku ai i ko lakou hoomakaukau mai i na puolo me na opeope, a ku aku la a holo me ka haalele ana iho ia’u hookahi iloko o ka hale. A ike iho la au, ua ohiia na mea a pau o ka hale, aohe mea i koe iho. Koho iho la au iloko o’u, no’u ke kumu o keia holo ana o ua haole me na opeope, a me na puolo. O keia iho ia ka’u haawina moe a puoho ai, eia ka he moe.

J. KANUI.

 

Na Kalekale Wehewehe.

            O ka Halealii a Hale Mana Hooko. Ma ka inoa Halealii, he ekolu no mahele: 1, ka hoike loli ole o ka Halealii; 2, ka hoike loli o ka Halealii i halepaahao; 3, ka hoike loli i na hana maalea me ka poholalo.

            O ka mea hoa la o ia mau mahele ke hoea mai ana a ikeia aku.

            O ka inoa hou o ka Halealii ma ka inoa Hale Mana Hooko. Ua maheleia keia hale i na hana: 1, He Hale Kukakuka; 2, he Hale Ahaolelo; 3, he hale no ka hooko ana i na hana a ka lehulehu.

            Ua komo ma keia hale na mahele elua o ka Ahaolelo, ka Hale o na Senetoa a me na Lunamakaainana.

            Ka mea naua ke moe: 1, kona komo ana iloko o ka Halealii a Hale Mana Hooko; 2, ka inoa Kanui; 3, kona hiamoe ana iloko; 4, he kanaka Hawaii ponoi oia; 5, kona aoao i ku ai he kalaiaina; 6, ka hookae ana o na haole m@ ka holo ana a lawe i ko lakou mau wahi puolo; 7, ko Kanui koe hookahi ana iloko o ka Halealii a Hale Mana Hooko.

            No ka Halealii, e kapae i na huaolelo hale, a e koe iho “alii,” a e kapae i ka hapa mua o ko Kanui, a e koe iho “nui,” hoopili aku ma ka we@@u o “alii,” loaa ka haina “Aliinui.”

            No ka Hale Mana Hooko, E kapae ia hale, a e koe iho ka haina “Mana Hooko,” alaila, hoohui mai i ka hapa hope o ko Kanui, “nui,” ma ka walau o ka Mana Hooko, loaa ka haina “Mana Hooko Nui;” hoohui aku me Aliinui, loaa ka haina, o ke “Aliinui,” ka “Mana Hooko Nui.” Lawe mai ka hana a ka Hale Mana Hooko, o ia hoi ke kukakuka a me ka Ahaolelo, loaa ka haina: “O ke Aliinui ka Mana Hooko no ke kukakuka me ka Ahaolelo.” Alaila, e lawe mai i ko Kanui moe ana iloko o ka Hale Mana Hooko a hoopili mai, a e loaa ana ka haina penei: “O ke Aliinui ka mana hooko no ke kukakuka me ka Ahaolelo.” Hoohui mai me ko Kanui aoao i ku ai he kalaiaina, loaa ka haina: “O ke Aliinui ka mana hooko no ke kukakuka me ka Ahaolelo, e kamoe aku ai no kekahi hana kalaiaina,” a i ole ia, “o ke Aliinui ka hoa kukakuka o ka mana hooko nui no ka ninau kalaiaina a ka Ahaolelo.”

            No ka holo ana o na haole me ka lawe pu ana i ko lakou mau wahi opeope. Ina pela ka hoike a ka moe ma ka loli ole, alaila, aole ka moe i nane mai, aka, he hai pololei ana mai ia.

            Ma kekahi ano okoa ae hoi, he mea pono ke nana hou ia ko Kanui komo ana iloko o ka Halealii, a me kona moe ana iloko. He hoike ko Kanui noho a moe ana no ka hookahua ana aku i ke Aupuni, ma kona ano he kanaka Hawaii oia, oiai, he Hale Aupuni ia e hiki ai ke olelo ae, no ke kanaka Hawaii ka hale a me (Kanui) o ka mana.

            O ka holo hoaua ana o na haole me ka lawe ana i ko lakou mau puolo mai loko aku o ka hale, o ka hoike maoli ana mai ia o ka moe i ke ano auhee a me ka haalele maoli i ke Aupuni, ina ma ke ano hoike pololei me ka loli ole o ka hana a ka moe. Aka, i kahi wa, he hoike ia no ke kipakuia. A malia paha, pela io no. Nolaila, nanaia aku.

            Aka, ina e lawe mai ia “holo” me “puolo” a hui aku me na huaolelo “Aliinui,” a me “haole,” alaila, e loaa ana keia manao, penei iho:

            “Holo puolo ke Aliinui i na aina haole,” a i ole ia, penei iho: “E holo ana ke Aliinui i na aina haole (aina e) no kekahi puolo.”

            Aka, o ka mea hiki ke manaoia. O ka “puolo,” he huaolelo ia; o ka “holo” ana o ka haole, he nee a he hele ana ia; o ka haole, he aina e ia. A ma no e huiia o puolo me ka hapa hope o ke Kanui inoa, loaa no ka haina, he “puolo nui.” Nawai la nei puolo nui. Na J. Kanui no paha, ina e nee ana no kahi huakai hele.

            A ina o ko Kanui inoa ke huiia me Mana Hooko, a ua loaa ka haina penei: “Kanui Mana Hooko,” a i ole, “Mana Hooko Kanui,” a he wahi helehelena ia no kekahi pomaikai e ili mai ana maluna o ka mea nana ka moe, mai kahi kanaka kulana kiekie mai, alaila, he hoike ia no ko J. Kanui pomaikai; alaila, na ka leo kono e hoike mai iaia. A i ole ia, eia paha iloko o ka Mana Hooko nui o ke Aupuni e ku nei kekahi ninau kalaiaina, a malia o poha mai, a ikeia ka ukaua o ka puolo a ka haole. Ina he holo; hooholoia. O ia pa-ha.

KILOKILO DIMERATA.