Ka Makaainana, Volume VII, Number 3, 18 Ianuali 1897 — Page 1

Ka Makaainana.

 

BUKE VII--Ano Hou                        Honolulu, Oahu, Ianuari 18, 1897.     HELU 3

 

HUAKAI A KE ALII.

 

Ike Pono i ka Hau-oki o ka Hikina o Amerika Haipaia

 

            O na olelo o na nupepa ka makou i hoike aku ma ka helu i hala e pili ana i ka huakai a ke Aliiaimoku, a ua hauoli hoi makou i ka loaa ana mai nei o ka Palapala Helu 3 a kona kanaka a he pomaikai nui hoi ia no na makemake heluhelu a pau o KA MAKAAINANA nei.  (He wahi manu ai-laiki ka i lele mai a komo iloko o ko makou keena i ka auwina la Poakahi i hala, a na kekahi mau wahine oiwi elua i ike i ke komo ana oiai laua e noho ana iloko.  Ua hopuia e makou ponoi a hookuu hou ia no.  Eia ka auanei he palapala loihi mai na aina e mai ka ia wahi manu i ahai mua mai ai i ka ouli a i kakahiaka Poaha iho la i loaa ai).  Mahope iho ka hoike a ka makou hoa'loha no ka lakou huakai ma ia aina malihini:

PARKER HOUSE,

BOSETONA, Dekemaba, 26, 1896.

MR F. J. TESTA, Aloha Karisimaka me Hape Nu Ia oe:--

 

            Eia makou i Bosetona nei i keia manawa a'u e kakau nei.  I ka hora 8:30 o ka po nei ko makou hiki ana mai ianei [i anei].

            La 19, hora 8:30 p. m., haalele i ka Hotele Kalepono no ka uwapo, kau maluna o ka mokumahu liilii, oia hoi, he ferry (mokumahu holoholo muliwai).  Haalele i ka uwapo hora 9 no ke kaa-ahi o Okalana (Oakland), hiki ilaila i ka hapalua hora 9, aohe nae hoi i ike aku i ka nani o ia wahi, no ka mea, @ne po, aka, o ka nui o na kanaka, o ia ka'u mea i ike, a o ka nui o na kaa-ahi e haalele ana ia po no na ala like ole, he 6, e holo ana no ka akau, no ka hema a no na alanui o ka hikina, a o ko makou kaa, o ia ke kaa no ka hewa.

            Haalele makou ia Okalana i ka hapalua o ka hora 12 eia pono, a hiki makou i Loso Anegelese (Los Angeles) i ka hora 2 30 a ka auwina la Sabati me ke ku no nae he umikumamakahi mau wahi hoolulu mamua ae o keia wahi.

            He kulanakauhale nui no keia, aole nae hoi e like aku me Kapalakiko, aka, he maikai no; piha na alanui a me ka hale hoolulu i na kanaka o kela a me keia ano lahui, no ke ake e ike i ka Moi o Hawaii.  Ua lohe mua lakou ma na telepone a ma na nupepa no hoi no ko ke Alii kau auaa@al@@@ o ia laina kaa-ahi, o ia ko lakou mea i hele mai ai.  Mai kahi loihi mai kekahi poe, he ole nae ia loa i ke ake e ike ia Hawaii imi loa.

            Haalele makou i ka hale hoolulu i ka hora 3 p. m., e holo ana no ka hema, a hiki makou i Iuma (Yuma) i ka hora 10:55 o ia po.  O keia ka palena mawaena o na Mokuaina o Kaleponi a me Arizona.  He aina maloo keia.  Haalele ia laila i ka hora 11 a. m., hiki i Benesona (Benson) i ka hora 8:21 a. m. o ka Poakahi, la 21.  Eia no keia wahi i Arizona, a ua like no keia wahi me kahi a'u i hai mua ae nei.  Haalele ia laila no Ele Paso (El Paso).  Aia keia wahi i ka Mokuaina o Nu Mekiko (New Mexico).  He wahi maikai keia.  Hiki makou i ka hora 4:40 o ka auwina la, a haalele ia laila no Sana Anatonio (San Antonio).  Aia keia kulanakauhale i Tekasa (Texas).  Hiki makou ilaila i ka hora 2 o ka auwina la Poalua.  He kulanakauhale nui keia, aka, o ka nanaloa nae he lepo, aohe ano hiehie, kuakuanea a maloo, eha na maka ke nana aku.

            Haalele ia laila i ka hora 2:30, hiki i Nu Oleana (New Orleans) i ka hora 7:30 o ke kakahiaka Poakolu.  He kulanakauhale maikai no keia, nui no a piha no i na kanaka.  Ua like ke noho ana o keia mau wahi a'u i hai ae nei me ko kakou ka mehana, a ua like loa ke ea.  O ka nui o na wahi i kuia e ko makou kaa mai Okalana mai a hiki i Nu Oleana, he 46, oia hoi, na ku ana no ka hoopiha wai a me ka lanahu, aole nae au i helupapa aku nei no ia mau wahi, a o ka loa mai Okalana mai a hiki i Nu Oleana, he 2,489 mile i holoia e ko makou kaa ahi iloko o 3 la a oi, oia hoi, 3 po ame 3 ao, alaila, ua like makou me Iona i noho ai iloko o ka opu o ka i'a nui, he 3 po a me 3 ao, pela hoi makou iloko o ke kaa-ahi.

            O keia laina kaa-ahi, o ia ka Pullman Co., a na oleloia o keia ka laina kaa-ahi holo loa a puni o Amerika nei; ua hiki ke holo a kanaono mile i ka hora, aka, o ka pepa kuhikuhi manawa ka mea nana e kaohi mai ai i na enegini mahu.  I Nu Oleana, pau ka holo ana o keia kaa, a kau aku la makou he kaa okoa no ia hui no nae.

            Haalele makou ia Nu Oleana i ka hora 7:55 a. m. o ka Poakolu no Wasinetona (Washington), e holo ana ma ka aina

 

( E nana ma ka aoao elima.)

 

HAULE IA EWE ALII.

 

Luuluu ke Kane, na Keiki a me ka Ohana.

 

            He wa i hala e i ikeia ai ka e@i pu mai o ke kino a me ka oluolu o ke ola o Misasa Kalua-apana Elena, wahine a Kapena A. C. Simerson, a he mau mahi, na no paha i hala e i hoi aku ai oia no ka aina hanau e hooluolu ai, eia ka auanei o ka hei ana no ia a waiho na iwi me kona poe.  Ua hiki mai kona hopena, mahop o ka hoomailo ana o ka ma'i maluna ona, ma Kahaluu, Kona, Hawaii, i ka auwina la Poalima, la 8 nei.  Hoea aku ke kane ma kona moku, ka mokumahu Mauna Loa, e kali wailua mai ana kela i kai o Keauhou kahi i maneleia aku ai e ka ohana a me na makamaka.  Oiai ka moku ma Kailua, ua loaa ae ka lono telepone ilaila a lohe ke kane, a me ka naau mokumokuahua a ike i ka mea i koe o ka wahine, ua lele mua ke aho.  A maluna aku no o ia moku i hoihoi loa ia aku ai ia ukana o ka luuluu a me ke kaumaha paumako la awakea no Napoopoo, no ka hooko ana hoi e like me kana i kauoha ai e waihoia kona mau iwi me kona poe i hala mua.  Ia auwina la no, maloko o ka luakini o ia wahi, i malamaia ai ke anaina haipule maluna o kona kino, malalo o ka lawelawe alakai ana a ka Rev. W. M. Kalaiwaa, i kokuaia e ka Rev. W. N. Lono a me kahi mea okoa ae i loaa ole ia makou kona ino.  Pau ia, na hoihoiia aku ka lepo i ka lepo "e hoomaha iloko o ka maluhia" no keia la hope anoano a eehia.  (Ua hoihoi hou mai no ka moku i ko Keauhou poe o ka hele pu ana aku, a ma ia hope iho i holo loa aku ai no kana huakai hooko hana.)

            Ma kela anaina haipule a me ka hoolewa na ohua o ka moku, a iwaena hoi o ia poe o Samuela Paka, W. H. Konuwela, W. G. Iwini, a me kahi poe lehulehu e ae.  Aia iloko o Maraki ae e piha pono ai ke 39 o kona mau makahiki, aka, ua kuu e aku la no nae hoi ka lohi o keia ao inea.  [Ma kekahi helo o ka Buke VI. o KA MAKAAINANA nei i hoike aku ai makou i kona mookuauhau).  Ua kau iho maluna o ke kane a me ka laua mau keiki ekolu (hookahi kaikamahine a me elua keikikane) ua haawina o ka luuluu, a ke @u aku nei hoi makou me lakou.  O ke kane ka like ole i ka hala ana aku o ka wahine o na la opio, oiai, e hooko ana no oia i kana hana, aka, i ke alo no na keiki a pau a popoi nui iho la i na maka o ko lakou hoa'loha oi aku ma nei ao.

            Eia mahope iho he mau olelo hoalohaloha i loaa mai nei mai na hoa'loha oiwi o laua like o ka aina oiwi hookahi.

Hoalohaloha a na Hoa'loha ma Kau.

Ia Captain A. C. Simerson,

            Mokumahu Mauna Loa, Awa o Nonuapo;

Me ka paumako:--

            NO KA MEA, ua oluolu i ka Ikuhai Kiekie Loa iloko o Kona ihiihi, kapukapu a hoano mau loa, e apo mai i ke ola o Kanamamo, Mrs. Kaluaapana A. Simerson, ma ke ao o Kupau, malama o Kaelo, M. H. 1897, ma na aekai o Kona, kou aliiwahine i aloha nui ia, kekahi hoi o na pua'lii nenehiwa o "Kona kai opua i ka lai, opua hinano ua malie," a na waiho mai ia oe me na lei aloha e, e paiauma aku ma keia ao mauleule; a

            NO KA MEA HOI, o makou iho kou mau hoa'loha oiaio o ke one oiwi, e noho ana ma ka Ua Haao, me ka manaopaa i pupulimaia a paa i ka poli, ke hooholo nei:

            1--Hooholoia, O makou iho a me ko makou mau ohana, ke komo pu nei me na manao paumako e hui pu me oe a me na keiki, no na manao walohia no Mrs. Kaluaapana A. Simerson;

            2--Hooholoia, O makou iho, ke noi nei i ke Ikuhai Kiekie Loa, e haawi mai ia oe a me ka olua mau keiki i na haawina hooluolu o Kona lokomaikai palena ole;

            3--Hooholoia, hookahi kope o keia hoalohaloha ia Captain A. C. Simerson a hookahi kope i ka nupepa KA MAKAAINANA.     

            (WM. THOMPSON,

            )WM. J. YATES,

            )J. H. WAIPUILANI

Waiohinu, Kau, Ianuari 11, '97.

 

Hoalohaloha a na Hoa'loha ma Kona.

HE WALOHIA, HE KANIKANA-@- AU, HE U ALOHA KEIA NO MRS. KALUAAPANA SIMERSON.

"Oili pulelo ke ahi o Kamaile.

Lele hoaka no iluna e Kamahualele,

O ka lahui a ka ipo ahi papala

O ka alawa iki a ka manu o Kaula,

O ke kau moa wale iho no ilua o Leinoai,

O ka noho wale mai no ka Lehua i ke kai,

Mea okaikai ana ka manao iloko

I ka i ana mai, ua ikea kaua a.

            Ia Captain A. C. Simerson a me au keiki;

 

Me ka luuluu:--

            O makou iho me ka haahaa, kou mau hoa'loha ponoi e noho ana ma Kona, Hawaii; a no ka

 

(E nana ma ka aoao ewalu.)