Ka Makaainana, Volume VII, Number 2, 11 Ianuali 1897 — Page 6

Ka Makaainana.

6          HONOLULU OAHU, POAKAHI, IANUARI 11, 1897.

 

IOSEPINE

KA

EMEPERESE PUUWAI OLU O FARANI.

 

MOKUNA VII.

IOSEPINE MA MALAMAISONA.

            Ua hele o Napoliona i Aigupita, no ka mea, ua manao oia ia ke alanui pokole a kau aku ai iluna o ka nohoalii o na Burebona. Ua aikena oia i na alii na lakou e hookele ana o Farani, ma o ka lakou hoohaahaa ana i ko Farani kulana hooponopono aupuni, a mamuli no hoi o ko lakou hawawa a me ka naaupo, ua hoohaiki wale ia ka noho ana kuokoa o ka lahui, a pela oia i hooholo iho ai e olepe ae ia lakou ke hiki mai ka wa kupono. No ia mea, oiai kona mau kapuai e kuoe hele ana ma na kapa o ka Muliwai Nile, aia no ke kalele ikaika ana a kona noonoo ma Parisa. Ua leta mai oia ia Iosepine, e hoike mai ana i kona manao hoi koke mai, a e kauoha mai ana i kana aliiwahine e kuai i home no laua ma kahi kokoke i Parisa.

            Aia he apana aina, he umi paha mile mai ke kulanakauhale poo aupuni mai, a elima paha mile mai Vaseile mai, i kapaia o Malamaisona. O keia apana ka Iosepine i kuai ai a hoolilo aku he hookahi haneri tausani dala i ka hooponopono a me ka hoomaemae ana.

            Ua lilo keia kuai ana a Iosepine i mea hauoli loa no Napoliona, a ua pakui iho oia i na hoo lilo koikoi

 maluna o ka ke aliiwahine no ka hoakea ana, hoomaemae ana, a me na hoohiwahiwa ana, me na kia mabala hoomanao, na kii pena, a me na lako hale nani he nui. A mai ia manawa mai ua lilo ia i home punahele no laua.

            Iloko o ka haulelau, ia Iosepine i hoomana ae ai mai kona waiho ana i na palapu o kela ulia, ua haalele aku la oia ia Palomabiere a hoi ae la i Malamaisona. Malaila oia i noho ai i ka hooilo me Hotenese, a me ne lede o ke aloalii, kona mau hoa hoolaukanaka.

            Oiai o Napoliona ma Aigupita no hookahi makahiki me ka hapa, e piha mau ana ko Iosepine kakela me na hoaʻloha--o na lede a me na keonimana.

            A no ka mea, ua ike ko Iosepine poe enemi--na pilikaua o kana kane--i ko Napoliona ano lili, ua hoouna mau aku la lakou i na lono he lehulehu iaia, e pili ana i na poe e pipili mau ana i ko Iosepine home, i ke ano o ko lakou noho ana, a me ka lakou mau kukai olelo a kamakamailio ana.

            No Hotenese, he oi aku oia a kahi kaikamahine wahapaa, a o ke kolohe a me ka epa kana mea hoihoi loa.

            Iwaena o na poe i hoi pu mai me Iosepine mai Italia mai, he wahi kauwa Italia kekahi, o Kareta kona inoa. He wahi kanaka ano ohila a makau wale keia, aka, he pipili loa a he makaala i na kauoha a pau a Iosepine.

            I kekahi ahiahi, ua loaa mai la he kauoha ia Kareta e kauholo aku ia Iosepine, a me na lede e ae e hele ana i ka holoholo iloko o ka paka. A no ka mea, o ko Kareta wai olu ia, ua liuliu koke iho la ia no ka ukali ana aku i na lede.

            Ia lakou e hele ana, a mamua o ko lakou komo ana aku iloko o ka malu o na laau, ua ike aku la lakou i kekahi mea kino eepa e oili mai ana mailoko mai o kahi pouli o ka nahelehele, ua aahuia me ka lole keokeo. Hookokoke mai la au uhane lapu la ia lakou nei, a i ka ike ana o kahi kauwa Italia, au hoomaka koke ae la ia e uwa me ka haalulu, a kuupau aku la i kona mama holo no kauhale, me ka haalele ana i na lede. Aka, no ka nui o kona makau i ke alualu aku a ke lapu mahope ona, ua hilikau kona mau wawae a walawala oia a moe a maule ilalo.

            Ia Kareta e holo la me ka uwa ana, ua lilo ia i mea akaaka loa na Hotenese, e hauoli ana i ka holopono o kana mea i hoolala ai. Aka, i kona ike ana nae i ka waiho a maule o ke kauwa a kona makuahine, ua hikilele oia a hoomaopopo iho la oia i ka hala loa o kana wahi ano paani mawaho aku o ka mea kupono. O kela uhane lapu, he kokoolua kauwa no ia no Kareta, i hoaahuia malalo o na hooponopono ana a Hotenese.

            I ka pohala hou ana ae o Kareta me ka poino ole i loaa i kona kino, ua pau ae la no ko Hotenese pihoihoi, a ua lilo kela wahi Italia i pio mau na kana mau hana kolohe. He punahele loa a he pipili loa no hoi oia ia Iosepine, he hooulu hua loa nae hoi o Hotenese iaia.

            O ka rumi moe o Kareta, ua hookaawale wale ia no ia mai kekahi rumi mai me ka paku lahilahi. Ma keia paku i hou ai o Hotenese i puka e kupono ana ma ke poo o ka moe o Kareta, a hoolewalewaia he pakeke wai maluna pono ae o ke poo o ka moe, a ma ka huki ana i kekahi kaula e palahuli ai ka pakeke wai maluna o ke poo o ka mea e moe ana. Aole wale o keia ke kolohe i hanaia, aka, weheweheia ae nei na laau ku e ka moe a paa lihilihi, e pau ai ka moe i ka helelei i ka wa o ka mea nona ia e hoi aku ai e moe. A oiai o ko Kareta maa o ka hoi no e hiamoe me ke kukuiole, nolaila, aole oia e ike ae i kona make.

            I ka makaukau ana o na mea a pau, hoi aku la o Hotenese me kona hoa kokua i kana mau hana kolohe ma kekahi rumi iho, iaia no a kau aku iluna o moe, ua helelei koke iho la ka moe, a o ke kanaka, o ka moe, mokaki ana ilalo. Iaia i hoomaka ae ai e uwa, ua hanini koke iho la ka pakeke wai maluna ona. A no ko Hotenese ike hoi he wahi kanaka makau wale kela i ka moe, ua auwe aku a oia me ka i ana: "Auwe no ka hoi e! Pehea la kona pono, no ka mea, ua piha loa kela pakeke wai i ka moo."

            Iloko o ko Kareta puiwa no keia mau poino i loaa iaia, a me ka makau hoi no kona lohe ana i na huaolelo "moo iloko o ka wai," ua hoomaka koke ae la oia e uwa me ke kahea ana, "Holina! holina! Pau au i ka moo e, pau au i ka moo e!"

            He mea lealea wale iho la no iaia Hotenese a me kona wahi hua.

            Aole i pau.

 

Wahi Ano Imihala Paha.

            Kakahiaka Poaono, Dekemaba 26, i hele aku ai o Makaikiu D Kaapa a me kahi poe e ae a ko N. Monowa keena e noho a e moe nei ma ke kua o ka halekuai o ka Hui Tong On Jan, ma ka hale uinihepa o Paiko, ma alanui Nuuanu aenei, a ua loaa aku he ekolu kini opiuma malalo o ka moe. Ua hopuia o Monowa a ua hemo mai malalo o ka belaia. Na kekahi kiu keia i hele a hoike i ka Halewai, a me he la no i ka nana aku, he wahi ano imihala keia hana, no ka mea, ua pololei ka heleia ana aku a loaa kela mau kini opiuma malalo o kona moe e waiho wale ana no me ka huna ole ia. (O keia Monowa, oia no ke kakauolelo a Loio P. Numana e hakali hele nei me na aahu paihi.) Me he la ka hoi ua manao ka Lunakanawai Apana e like me ia maluna ae, oiai, ma kona hookolokoloia ana i ka Poaono, la 2 nei, ua hookuuia oia. Ua olelo ponoi mai o ua o Monowa ia makou ina ka e lawa pono na olelo ike ma kona aoao, hoopii oia i ke kiu Pake nana nei hana imihala wale iaia na ka ohumu ino, a ua ike a maopopo loa no ka ia i ua hoalahui imihala la ona.

 

            Ahiahi Poaha nei i uniki ao ai no kela pa huiahuia Kanoelani ma Ariena Hele, a ua nui no na poe i hele aku e ike i ka niuniu ana o na keonimana a me na lede, a ua ku ao i ka mahalo ia e ka lehulehu i hiki aku.

 

Robert Napunako Boyd

(ITALIA)

He Anaaina a he kokua no hoi ma ka hooponopono ana i na waiwai paa, huli ana paha i na Buke o ke Aupuni, a pela aku. Keena Hana: Mauka iho o ka Hale Leta, maluna ae o ka haleaina Pake, Alanui Betela. apl 13-mp

 

C. B. DWIGHT

[KALE KUAIKA.]

Mea Hana Pohaku Kaekae Alanui, na He Kupapau a me na Kia Hoomanao Mabala.

 

            E loaa no oia ma kona wahi noho ma Koiuiu, Honolulu nei. Telepona Helu 833. 17-lmk

 

S K PUA,

He Agena no na Waiwai Paa

He Mea huli i na Kuleana Aina i mea e maopopo ai;

He Mea Ohi i na Aie i hiki ole ke Ohiia e na Poe no lakou na Aie, a

He Mea Hana i na Ano Palapala Pili Kanawai a pau.

KEENA HANA: --Ma ke keena o R. W. Wilikoki, Alanui Konia. aug. 31-lmk.

 

DR. SLOGGETT

(KAUKA SOLOGETE),

Kauka Lapaau me Oki

Kokoke ma kahi noho o H. W. Schmidt,

Esp., Alanui Beritania, Manamana.

            O kona makaukau loa, aia i na Mai o ka Maka, Pepeiao, Ihu a me ka Puu.

            Manawa Noho Keena: Hora 8 a 10 a. m.; 1 a 2 p. m.; 7 a 8 p. m.

Telepone Helu 701.

nov 16-2m

 

HALEKUAI LAHUI KALAHIKI.

Helu 405, Alanui Moi, ma Waikiki aku o Alanui Nuuanu, ma ka aoao mauka, ke keena mua o ka "Hawaii Holomua."

Ma ia halekuai o na oiwi e loaa ai na anoi a me na paihi o na ano hou loa, e laa

Na Kalakoa, Na Keokeo,

Na Makalena, Na Kinamu,

Na Huluhulu, Na Lihilihi,

Na Kamaa o na Kane, Wahine me Keiki a pela aku.

            Oluolu no ke kuai ana. Aohe hewa ke kipa mai e ikemaka, a aohe no hoi he kunu kunuia no ka hoikeike ana i na mea kuai.

            M. PALAU, Luna Nui.

            @k 14-@f

 

MORIKAWA,

Ka Oi Ma Kana Hana.

Ua nee ae nei kona hale hana mai

Alanui Betela a i ka Halelio o

Akana, Alanui Konia, mauka

o Alanui Hotele.

 

Amara a @ea Hana Kaa me ke Kapili

Kapuai Hao Lio

Oluolu loa ka uku o ka hana, i hiki ole i na poe e ae ke lihi launa aku.

jun 8--3ml.

 

C. E. Williams me Keiki

            Ed. A. Williams, Luna Nui.

Helu 611, Alanui Moi, ma Ewa iho o ka Pa o Aiguptia.

 

He mau mea kuai lako hale o na ano a pau loa.

 

He mau mea Hana Pahu Kupapau a Hooponopono Hoolewa.

 

            E hoolakoia no na Kaa Kupapau, na Kaa-ipo a me na Kaa-ohana.

            Ina no e ninau ia laua, e loaa no na Pohaku Kia Hoomanao no na He Kupapau.

 

            O ka Ialoa kekahi hana hiki loa ia laua, aia ia malalo o ka lawelawe ponoi ana a Ed A. Williams, F. D., he mea i puka pono mai ka Kalaka Kula o ka Ialoa Maikai ana iloko o Mei, 1894.

NA TELEPONA

Keena, Helu 179--Kauhale a me Kahea Po.

            Helu 815.

            nov @mp.       @@ 5-mp