Ka Makaainana, Volume VI, Number 26, 28 December 1896 — Page 2
2 HONOLULU, OAHU, POAKAHI, DEKEMABA 28, 1896.
Kulana Kahu Luakini.
Ua loohia iho nei ka Rev. J. Waiamau me ka ma'i ano kukonukonu loa, a mamuli ka hoi o ia ua loloia kekahi aoao ona, a ua loheia mai nae hoi eia ke pii ae nei kona oluolu. No nei pilikia i loaa iaia, ua waiho oia i kona kulana kahu no ka luakini o Kaumakapili, pela ka makou lohe mai, a o ka Rev. E. S. Timoteo o lalo o Waialua ia e lawelawe nei no ka manawa a loaa ae ka mea nohopaa loa. Ke manaolana nei makou oia no ke noho loa iho. Aia ka a ano oolea loa ae ka oluolu o ka Rev. J. Waiamau, ua manao kana keiki hiapo e hoihoi aku iaia i Kona e hooluolu loa ai.
-
Hala ia Kamaaina.
Me ka emoole a me a maopopo mua ole i kikooia mai ai e M. Makinane o na lima menemene ole o ka Make a lawe aku la i kona aho i ka auwina la o ka La Karisimaka nei, ma kona wahi noho mauka o Puunui, kihi o na alanui Kauka me Liliha. Eia nae, no kahi wa i hala ae kona ano nawaliwali ana a akeia aku la, me ka akaka mua ole ua kokoke loa mai kona wa.
Ua hiki mua mai oia i Honolulu nei iloko o1857, mai Nu Ioka ma ke ala mai o Panama. He hana okomo pulupulu moku kana hana i lawelawe mua ai i kinohi malalo o Poka, a mahope iho, iloko paha o 1862, i wehe ae ai oia i halekuai nona ma alanui Beritania, ma ke kahua o ka hale hoomana Pake malalo ae o Kaumakapili. Mahope loa mai kona uwai ana ae i kana oihana kalepa a ke kihi akau o na alanui Kalepa me Papu, a he hou loa iho nei hoi ke ku ana ae o ka hale uinihepa nani e lawelaweia nei o kana oihana e na keikikane ekolu, ka hana hoi ona i kamaaina loa ia ai a puni ka Paeaina nei.
He 65 makahiki i hala ae o kona hanauia ana ma ka Apana o Clare, Irelani. Eia ke u nei nona kana wahine a me na keiki eha, ekolu keikikane a me hookahi kaikamahine. Ua malamaia ke anaina pule kupapau nona ma kauhale i kahi auwina la mai, hora 3, e ka Ekalesia Katoika Roma, a kanuia oia a nalo ma ka ilina o Maemae.
-
No ko Kama'lii Kalanianaole hoeha ana ia Tome Loika, mea ohi dala o ka Hui Kukui Uwila Hawaii, ua hoopaiia oia o ka Lunakanawa Apana i kakahiaka Poaha nei e uku i $5 a me na koina, ma o kona ae okoa ana i kona hewa. Ua hoike aku ke Alii na hoohaahaaia oia o kela opio ohi dala, a nolaila, ua kuiia o ia. I hele aku kela mea e koi i na dala no na kukui uwila o ka Home Makuahine Kapiolani. Na A. Rosa ke Alii i pale.
Kama'lii no Bolabola.
O kela Keikialii Polapola lima muumuu nona ka inoa o Taarautua, i hoea mua mai ai maluna o kekahi manuwa Palani a ku hoike ai imua o ka Aha Kaapuni maanei ma ke ano he hoike ma ko J. Kapilikea Sumner aoao, ma kekahi hana a kona kaikuahine i hoopii ai i kona hope manaei, ua hoea hou mai nei oia a eia ke hoohala nei i keia mau la ma o kakou nei. Iaia i hiki mua mai ai, ua hookipaia oia e ke Aliiaimoku iwaho o Waikiki ma ko J. Nawahi la i hoolewaia ai. O ka Moiwahine Kanemake no hoi kekahi i hookipa a i hoolaulea iaia ia mau la. He pili ka oia no Ninito, ka wahine a Kapilikea
-
Poaha, auwina la, i hoomaka ai ka hoomaha ana o na Aha Kiekie me Kaapuni a hoomaka hou e hana i nei kakahiaka. Oluolu loa na kakauolelo a me na poe paahana e ae o ia Oihana.
He hoolewa Pukiki nui ko ka auwina la o ka La Pule i hala no M. Silva i make i ke ahiahi Poaono aku. Oia ka luaui o M. G. Siliva, ona o ka halekuai Heiau o na Paikini. Ua holo ae kekahi mahele o ka Puali Puhiohe Lahui.
Alahula na alanui i ka po Poaha nei, i na poe hele i na halekuai lehulehu, a o alanui Papu aku no paha hoi ka oi loa aku. Ua hele puhi ae ka Puali Puhiohe Lahui ma ke alo iho o na halekuai ia po, a ua nui ko lakou hiaaiia e ka lehulehu.
Ma ke kohoia ana o na luna hou o ke Komopani G. i malamaia i ka po Poakolu, la 16 nei, na koho hou ia o J.M. Kea i Kapena, o S. Lui Kekumano i Lutanela Ekahi ma kahi o Kale Wilikoki i waiho no kona ma'i, a o Gus Rose i Lutanela Elua.
He aha hulahula Europa ke haawiia ana e kekehi poe opio iwaho o ka Paka Kuokoa, Pawaa i ka po pau o nei makahiki a komo loa aku i na hora mua o ka La Makahiki Hou. E kipaku ana ua poe opio la e hulahula ana ia po i ka makahiki kahiko a e apo ae ana hoi i ka makahiki hou.
Ua kuu akea ia ae ka mokumahu Manua Loa i ka po Poaha nei no ko ka lehulehu hele ana e makaikai ia luna ona. Ia po no i hoikeia ae ai ka ikaika noii o kona kukui uwila a ua ahuwale na puu na owawa a me na kualono. Pela no hoi me na kukui hoomalamalama i na keena o luna. Ua nui a lehulehu no na poe i hele aku e makaikai.
Ma ka helu i hala, ua paewa makou ma ka hoike ona aku na Jas. F. Morgan (Kimo Magana) e Hoolilo aku na aina a makou e hoolaa nei i na hoolaha manao hooko a kuai moraki. O ka mea pololei, o ko Misasa Konale Makamu, na Kimo Mogana ia e hoolilo aku, a o ko Keoki Uanu ma iho hoi; na Kibona Luika. E nana a e hoomaopopo ae i keia hooponopono ma neia helu.
KELA A ME KEIA.
-
ALOHA HAPE NU IA a pau loa!
E nana ae i ka Yee Chan hoolaha hou, a e ike hoi i na kumukuai emi o na waiwai like ole.
Ua hookohuia o E S Boyd i agena maanei no Misasa Ailau Kahikina o Kalaupapa, Molokai.
Piha mau no na anaina haipule o ka La Karisimaka nei ma na luakini o Sana Anaru a me Malieokamalu.
Poaha iho e ku mai ai ka mokumakhu Kepani Ten Shin Maru mai Iokohama mai, a holo loa aku no Seatele, Wasinetona.
Auwina la o nehinei i ku mai ai ka mokumahu Miowera mai ka Hema a ua hala loa aku no ka Akau i ka hora 10:30 paha o nei kakahiaka.
Ua oluolu o Keoki Holo mai kona pilikia ulia, ua puka a eia ke hele nei mawaho. O kona hoea koke ana mai nei no ia e ike ia makou.
E hoau aku ana ka mokumahu Mauna Loa ma na kai o Maui me Hawaii, ma na wahi i maa i ka mokumahu Malulani, i kakahiaka o ka la apopo.
O ka mokumahu Kopatica ka mokumahu au moana nui e ku mua mai ana i nei makahiki ae, i Ianuari 1, mai Iokohama a hala loa aku no Kapalakiko.
Ua hoolahaia ka hoopalau o Kauka Kupa me Msii Kate Makalu. A pela no hoi ko C. Conoroda me Misi Ale Wilimana. He mau oiwi na mea hope a elua.
Mahope iho o ka hora 11 a.m. o ka Poalima nei i hoea mai ai ka mokumahu Kina a ua hala loa aku no ko Komohana i ke aumoe Poaono nei, hora 10:30 paha.
He anaina haipule kaulima ko nei kakahiaka, hora 10:30, ma ka luakini o Sana Anaru, no ka hoolilo ana i kekahi poe kakaikahi i poe hoahanau no ia Ekalesia.
He mau la helu wale no koe a pau ae na la e loaa ai o na balota no ke komo daimana haawi makana ma ko H.W. Simida & Keiki ma halekuai. E wiki, o hala ae ka wa pono.
Poakahi, la 14 nei, i panai aku ai ke Kuhina o ko na Aina E no ka manawa a me kona ukali i ka ike a ke kapena o ka mokukaua Adamu, ma ka holo ana aku no luna o ia moku.
O keia ka la hoano o na Keiki Hala Ole, a o ka Poalima iho ka la hoano o ke Okipoepoe. E hoomanaoia ana no ia mau la e like me ka mau ma na luakini o Sana Anaru a me Malieokamalu.
A hiki mai i keia wa, aole loa i ikeia ke ko o na olelo a kamalii o ka waoakua no ka helelei mai o na hoku o ka lani. Hoomakeaka no hoi paha keia ano kamalii, me he la o lakou ke Akua.
He aha hulahula hookipa ka i haawiia e ke Komopani D. no Kapena Kale Makate o ia puali o ka hoi ana mai nei mai Kapalakiko, i ka po Poalima, la 18 nei, maloko o ka halepaikau hao ma Haimoeipo . Ua nui no ka lealeaia.
He aha ike ka ke haawiia ana e Peresidena a me Misasa Kole i ka La Makahiki Hou. Ua lohe mai makou eia ka ke haha aenei iwaena o na poe o ka aoao Alii no ka aeia aku o na kaikamahine e kokua a e ukali ia Misasa Kole. E aho keia mamua ae o ka hoomanao ana i ka la aihue Aupuni o lakou.
Ua loheia mai ua hanaineia o Ata Fitisimona, kahi uuku eu nui wale nana i aihue ka pahu hali dala o ka Hui Alahao Hawaii a ki pu ai i kekahi makaikio Pake mamua aku nei, i haki o ke alanui e hanaia nei iwaho o Laeahi, Waikiki, i ka Poaono, la 5 nei, e ka luna o ia papa hana, oia o Sam Stone. Ma ka mea i hoikeia mai, ua hoohaia ua wahi eu la, hoohinaia ilalo a hauhoaia i ke kaula e like me ke kupeo ana i kekahi puaa a hoopaaia i kekahi pou telepone. I ko makou ninau pono ana, ua hoikeia mai o na whai eu la ka i hoao aku e hoeha i ka luna, aka, ua haawi ia mai ka laau lapaau kupono no kona mai.
-
Olelo Hoolaha.
E oluolu na poe hoolimalima o MRS. AILAU KAHIKINA o Kalaupapa, Molokai, i a me kahi poe e ae e hoomaopopo ma ua ho kohuia ka mea nona a inoa malalo iho i Agena no Kona Waiwai ma ka Mokupuni o Oahu, malalo o kekahi palapala hookohu hope piha, e ohi mai a e haawi aku i na palapala hookaa no na uku hoolimalima i aieia iaia. O ka hookaa koke ia mai ka mea i make makeia.
EDWARD S. BOYD.
Honolulu, Dekemaba 19, 1896.
dek 28-2mnw.
-
Kuai o na
La Kulaia
-
Hoopau i ka Noho Hui ana.
-
Oiai nei kau kulaia e nee nei, ke hoomau aku nei no au i ke kuai hoemi loa ana; a oiai no hoi, he mau la helu wale no koe a pau ae ia manawa, e hooi loa aku ana au i ke kuai hoemi loa ana i na waiwai o kela a me keia ano e like me ia malalo iho:
Kihei Huluhulu Holookoa o na Wahine..................... $1.25, 2.00, 2.50
Kihei Moo Keokeo, nunui............................................ 1.00
Kihei Moe Keokeo ano maikai loa................................ 1.50
Papale Hulu Fedora o Kane, o na waihooluu like ole.....1.50
Paalole Huluhulu Polu o Kane, waihooluu paa...............7.50
Paalole Eleele Nao..........................................................8.00
Kuka Eleele Huluhulu.....................................................3.75
Kuka Waihooluu o Kane, ano nunui..............................$2.00, 2.50
Lolewawae Waihooluuu o Kane.....................................2.50
Lolewawae Nao Polu o Kane..........................................2.00
Paalole o Keiki, heluna nui o na ano a pau....................$1.50, 2.00
Papale Huluhulu o Keiki................................................ .30
Papale-kapu Polu o Keiki.............................................. .30
Kakini o Keiki, 2 paa...................................................... .25
Kakini Eleele Waihooluu paa o na Wahine, 2 paa......... .25
Kakini maikai o Kane, waihooluu like ole, 2 paa............ .25
Palemai maikai a paa o Kane, mai ka .20 a pii aku.
Kaawe o Kane heluna nui, ma ka.................................... .25
Palule hana o Kane, mai ka ............................................. .25
Kawele ano nunui loa...................................................... .25
Kawele ano maikai loa, 2 no ka ..................................... .20
Hamaka Silika, hana maiau ia, mai ka .10 a 50.
Na Kamaa o na Kane, na Wahine a me na Keiki o kekahi heluna nui loa e wae ai ma na kumukuai a me na ano like ole.
He lua ole ka emi o keia mau kumukuai maluna ae, a o ke kipa mai no ka pono ma ko'u halekuai, mamua ae o ka hele ana i na wahi e ae, i ikemaka ai i ka mea oiaio loa.
YEE CHAN,
Alanui Nuuanu, mauka o Alanui Moi.
dek. 28.-mhp.