Ka Makaainana, Volume VI, Number 26, 28 December 1896 — Page 6
6 HONOLULU, OAHU, POAKAHI, DEKEMABA 28, 1896
IOSEPINE
-KA-
EMEPERESE PUUWAI OLU
O FARANI.
-
MOKUNA VII.
-
IOSEPINE MA MALAMAISONA.
[Mai ka Helu 25.]
Mamua iho o ko Napoliona hoomaka ana e hele no kana huakai no ka Hikina, ua ninau aku la o Buriene iaia, ina ua paa io kona manao e mauna wale i kona ola ma keia huakai pohihihia ku i ka pilikia. "Ae," wahi ana, "ina au e noho ana, e hookahuliia ana e a a'u keia aupuni, a e hoolilo au ia'u iho i moi. Aka, mai noonoo kana no ia mea i keia wa. Aole i ae mai na alii o ka aina. Ua hapapa au ia lakou, a ua hoomaopopo au aole i hiki mai ka manawa no ia hana. Ua makemake au e hoalohilolohi mua i ko lakou mau maka me ka'u mau hana kaulana."
Ma ke kakahiaka o ka la 19 o Mei, 1798, ua hoomaka aku la ka nee ana o ke aumoku mai ke awa aku o Tulona. O kekahi paha keia o na aumoku nani a ka la i kilohi iho ai ma kela kakahiaka, a kona mau kukuna malamalama i keakea ole ia e na ao, - no ka mea, ua kalae ka lani - i hoolilelile ae ai i na pukuniahi maluna o ka oneki o na mokukaua he umikumamakolu o ka papa ekahi, a me umikumamaha moku kialua. Mawaho ae la o keia mau moku, ua hoopuipuiia keia huakai au moana a Napoliona me na moku lawe koa he eha haneri.
E lawe ana keia aumoku holookoa i ka heluna nui o na koa i waeia he kanaha tausani a me na aliikoa o ke kulana kiekie. Mawaho ae o na kanaka i laweia no ke kaua, o ka mua loa, keia i aeia ai o na kanaka akeakamai e holo pu ma kekahi huakai kaua. Na Napoliona ponoi i wae he hookahi haneri o keia poe no ka imi ana a hoiliili i na waiwai kahiko o Aigupita, a he poe kilo hoku no hoi kekahi no ke kilo ana i na kino lani mai na aina a pau a lakou e ku aku ai.
Ua ukali aku o Iosepine i kana kane a hiki i Tulona, a malaila laua i noho ai a hiki i ko Napoliona ee ana iluna o kona . moku. Ua iini loa oia e hele me kana kane i Aigupita, a ua noi aku no hoi oia i kana kane me na waimaka e ae mai iaia e kaana pui kona mau pilikia me na poino.
Ua hoole o Napoliona i ke nei a kaua wahine mamuli o kona hoomaopopo ana i ka nui o na pilikia a me ka luhi o keia hele ana, e hiki ole ai paha ia Isepine ke auamo.
Iloko nae o ua minute o ko laua mau noonoo pilihua no ke kaawale aku o ke kane mai ka wahine, ua lilo mai la i Iosepine ka olelo hoohiki a kana kane, e hooia mai ana i kona ae ia Iosepine e holo aku mahope ona ke ike oia (Napoliona) ua kupono ke kulana o na aina hikina no kana wahine e holo aku ai.
Ua hoike ae o Napoliona i kekahi o na kumuhana nui o keia huakai, a oia keia: 1 - E kukulu i panalaau Farani ma na kapa o ka muliwai o Nile, me ka hookae ana i na hana hookauwa kuapaa, a e pani ana hoi i ka makalua o Sana Dominigo. 2 - E wehe i makeke no na waiwai kalepa o Farani ma Aferika, Arabia, a me Suria, a e hoopomaikai hoi i kona lahui me na waiwai o ia mau aina. 3 – E hele aku mai Aigupita aku me kekahi pualikoa o kanaono tautani kanaka no Inia, hoouluolu aku i na Maharata e kipi, a e hoalaala i na lahui kanaka o ia mau aina nui e ala kue ae i na Pelekane.
O keia kanaono tausani koa, e maheleia i na mahele elua, he mahele Europa kekahi, a he mahele paele kekahi, e laweia ana e na kamelo he kanalima tausani, me na lio he umi tausani, me ka lawe ana i na lako ai no ua la he kanalima, me hookahi haneli me kanalima pu-kuniahi me na lako kau e ae, a e hoohiki ana iloko o na mahina eha.
I ka aumoku e nee malie ana mai ke awa aku o Tulona, aia o Iosepine ke ku mai la iluna o ka aleo o kona home euana pono ana ia mau hiohiona nani me kona mau maka e haloiloi ana me na waimaka. Aia kana kane me ke keiki maluna o ka Oriana, he moku i oi ae ka nui a me ka nani mamua ae o ka nui moku. Ke hele la laua e komo iloko o na poino nui, kahi i akaka ole ko laua palekana hou mai. Haka pono aku la ko Iosepine mau make i ka moku a hiki wale i kona nalowale ana, a hoi aku la ia iloko o kona keena me ka naau luuluu o ke aloha kane me ke keiki, i pakuiia mai e ka mehameha.
Aole i pau.
-
Ke pii ae nei ka oluolu o kela luina manuwa i ki ai no iaia i ka pu, aia ma ka Halemai Moiwahine, a makou no hoi i hoike aku ai ma ka helu i hala E ike a e hui aku ana paha hoi oia me kana mea i aloha kupouli ai, a lea ka hoi ka hana naaupo o ka haole iaia iho la.
Kahukaa Hana Pololei.
I ka la o nei holo ana aku nei o ka Mariposa, ua kau aku ka luna nui o ka hui hana keaka i ohi iho nei i na kenikeni o nei maluna o ko S. Kalaluhi kaapio me na puolo lehulehu, a iwaena o ia mau ukana he eke ili kekahi i piha me ke dala gula. Hiki i ka uwapo, ua lele aku ua haole la a lawe i na mea a pau a koe kela eke me ke gula, a ua huli ae no ke kaa a holo no uka. I ka ike ana o ua haole la aole ia eke, ua ano o kona noonoo, me ka manao ua hana wahapaa ia oia e kahi no o lakou, aka, i ka maopopo ana aole, ua awiwi oia a loaa kahakai kaa a hoike aku no ia mea me ka maopopo ole nae o ka helu o ke kaa. Oiai e huliia ana ke kaa makai, hoea aku ana o S. Kalaluhi me ua eke la. I ke kahua ku mau o ko lakou kaa oia i ike ai, ua owaka iki ka waha a e hulalilali mai ana ka lelo. Ua kii koke mai ua haole la a lawe aku i kana me ka mahalo mai, aole hoi ka haawi wahi makana iho.
-
Lehulehu na halekuai e hamama nei o ka po i keia wa, a o ka Halekuai Oiwi kekahi o lakou, a pela no hoi me ka Halekuai Kalahiki.
-
Kuai Emi a Emi Loa
Iloko o keia mau la, e kuai emi a oluolu loa ia aku ana na waiwai a pau o ka
Halekuai o Eleele.
Eia ka wa no ko Kauai poe e hoomaopopo mai ai. E loaa no he 18 i-a Kalakoa maikai no $1.00; 10 i-a Keokeo a Kukaenalo, o hookahi iwilei ka laula, no $1.00, a pela aku a nui wale.
O ka wa keia, oiai hoi ke Kau Kulaia Karisimaka a me Hape Nu Ia e kokoke mai ana. He lua ole keia o ka emi a me ka oluolu i ikeia ma o Manokalanipo nei. Eia ka wa, mai kaukaulua iho.
JOHN I. SILVA, Ona
dek 7-1ml.
-
Kuai Hoemi Nui
-
Elua Halekuai i ka Wa
Hookahi.
-
Kwong Sing Loy
a me Sing Loy
-
E hoomaka ana i keia la 30 o Novemaba, 1896, pela no e hoomauia
aku ai no Hookahi Mahina.
-
Na MUUMUU, Na PALEKOKI,
a me na Pono e ae o na Wahine, i
hana maiau ia, emi a emi loa!
Na LIHILIHI, NA PAPALE a me
Na KAMAA o na Wahine,
aohe emi aku a koe mai!
Na PAA LOLE PIHA, na PAPALE
a me na KAMAA o na Kane,
oluolu loa Kumukua!
Na PAA LOLE o na KEIKIKANE
a me na KAIKAMAHINE,
he Makepono Loa! He keu aku a ka olu
waiphae a ka launa ole mai.
O na Waiwai no a pau loa ke kuai hoemi loa ia aku ana, a he mau Waiwai hou loa wale mai nei no ka hapanui.
E Hoomanao i na Halekuai a Elua.
nov. 30-5mnw.
Ma ke Kauoha
-
OLELO HOOLAHA WAI.
I kulike ai me ka Pauku 1 o ka Mokuna XXVI, o na Kanawai o 1896:
O na poe a pau e paa ana i na pono wai, a o na poe hoi e uku ana no na kuleana wai, ke hoolahaia aku nei ma keia, o na uku wai no ka manawa e pau ana i Iune 30, 1897, e hookaaia no ma ke Keena o ka Oihana Wai o Honolulu, ma ka la 1 o Ianuari, 1897.
O na uku wai a pau i hookaa ole ia a hala na la he umikumamalima mahope iho o ka wa no ka hookaa ana, e uku kaulele ia no he 10 keneta.
E hookaaia no na uku wai ma ke Keena o ka Oihana Wai ma Kapuaiwa Hale.
ANDREW BROWN,
Luna Nui o ka Oihana Wai o Honolulu.
Honolulu, H. I. Dekemaba 17, 1896.
dek 21-3mnw.
-
OLELO HOOLAHA.
-
OIHANA WAIWAI,
HONOLULU, Dekemaba 1, 1896.
Ke hoolahaia aku nei ma keia i na poe a pau e paa ana i na Bona o ke Aupuni Hawaii o na la a me na heluna dala mahope iho, mai a mahope aku o ka piha ana o ka wa hookaa o keia kupona (coupon-palapala hooia ukupanee) ae, iloko o na malama o Maraki a me Mei o 1897, e pau no ka ukupanee.
E ukuia no ke kumupaa o ua mau bona la ka waihoia ae ma ka la o keia piha ana ae o ke kupona.
KANAWAI O AUGATE 5, 1882.
Papa U, Bona Helu 74, hanaia Sept. 1, 1882, no $5,000
Papa U, Bona Helu 73, hanaia Sept. 1, 1882, no $5,000.
Papa U, Bona Helu 76, hanaia Sept. 7, 1882, no $5,000.
Papa A, Bona Helu 347, hanaia Sept 1, 1862, no $1,000.
Papa A, Bona Helu 348, hanaia Sept 1, 1882, no $1,000.
Papa A, Bona Helu 349, hanaia Sept 1, 1882, no $1,000.
Papa A, Bona Helu 350, hanaia Sept 1, 1882, no $1,000.
Papa A, Bona Helu 361, hanaia Sept 7, 1882, no $1,000.
KANAWAI O SEPT. 27, 1876.
Papa A, Bona Helu 327, hanaia Nov 1, 1878, no $1,000.
Papa a E, Bona Helu 249, hanaia Nov. 9, 1878, no $500.
S.M. DAMON,
Kuhina Waiwai.
nov 20-4mnw.
-
Olelo Hoolaha.
E ike auanei na mea a pau loa, o ke Kai Lawaia o Kahala me ka pa-hale, ua lilo mai ia'u ma ka hoolimalima, a ua hookohu aku au ia Akana Kalauki oia ka mana ma na ano a pau, a hoopii paha ma ke kanawai.
J. AEA.
Honolulu, Dekemaba 7, '96, dek 14 - 4mnw
-
C.E Williams me Keiki.
Ed. A. Williams, Luna Nui
Helu 611, Alanui Moi, ma Ewa iho o ka Pa o Aigupita.
-
He mau mea kuai lako hale o na ano a pau loa.
-
He mau mea Hana Pahu Kupapau a Hooponopono Hoolewa.
-
E hoolakoia no na Kaa Kupapau, na Kaapio a me na Kaa-ohana.
Ina no e ninau ia laua, e loaa no na Pohaku Kia Hoomanao no na He Kupapau.
-
O ka Ialoa kekahi hana hiki loa ia laua, aia ia malalo oka lawelawe ponoi ana a Ed. A Williams, F.D., he mea i puka pono mai ka Kalaka Kula o ka Ialoa Maikai ana iloko o Mei, 1894.
-NA TELEPONA-
Keena, Helu 179 - Kauhale a me Kahea Po,
Helu 815.
nov 2-mp. feb 3-mp.