Ka Makaainana, Volume VI, Number 26, 28 December 1896 — Page 2
2 HONOLULU, OAHU, POAKAHI, DEKEMABA 28, 1896.
LEONE DE BOANE
-
KA MEA OHUMU KIPI O COADOVA
-
MOKUNA II.
KE ALOHA I KA IWIHILO
[Mai ka Helu 25.]
Ua kaulona pono aku ko Sa Leone nana ana maluna ona a hiki wale i kona wa i lilo ai iloko o ka aina hoopahaohao no ka ua mea o ka ui a ka launa ole mai, a aohe no hoi oia i hoomaopopo hou ae iaia iho aia wale no a hiki i ko ka ui ea a kau pono ana ae i kona mau maka iluna ona, akahi no oia a noonoo nona iho. Iaia hoi i hui aku ai me ko ia la awihi mai, me ke ano kulipolipo o ka manao piha hoomaikai no kona hoopakeleia ana mai na powa mai, akahi no a olu ae kona alelo a hiki iaia ke kamailio aku.
"E ka lede ui nohea," wahi ana, "ke hilinai nei au aole oe e manao mai ana ua hou mai au ia'u iho imua ou. Mai hoea ole mai no paha au e like me ia i nei wa imua ou, ina aole na ka ino i kipaku mai ia'u e komo."
"E ke keonimana piha loko maikai," i pane aku oia me ka awiwi a me ke kuio, "e hoehaeha no oe ia'u ina oe e manao ana e hoolilo aku au i kou noho mai ma ke ano he mea i komo mai me ka hoihoi ole ia a me ke ano onou poo mai. He oiaio, ua nui loa ko'u aie ia oe. Ua oi loa aku ka pono e manao iho au owau ka i komo mai ma ke ano hoihoi ole ia."
"Me ka ino e lokuloku ana mai ke aouli mai, a me na powa punikoko e uhai mai ana mahope, ke manao nei au he mea kupono ole loa no kakou ka hoomaopopo lea ana iho e pili ana i kahi a i ke ano paha o ko kakou puuhonua," i pakali aku ai o Gaberiela ma ke ano kokua i kona haku.
"He mau olelo naauao keia a ke kanaka," wahi a Dorisi.
"Ae, a me ka oiaio loa no," i pakui aku ai o Alecasina.
"Alaila, e hana kakou ia kakou iho a oluolu e like me ka mea e hiki ana, a e hoomanawanui hoi me na mea i hiki ole ia kakou ke alo ae," i puana aku ai hoi ka naita; a iaia i kamailio ai pela, ua hilinai aku la oia i hope o kona wahi e noho ana, me he la, e hookuu aku ana oia i na poe e ae e hoomau aku i na kukai olelo ana.
Oiai hoi, ua makili loa ae la hoi na kumu alailai, ua aano loa aku o Leone ma ke kamailio pololei ana i ka ui nohea, no ka mea, ua manaoio oia ua hiki loa iaia ke kilo aku aia iloko o ka ui he ake, a i ole ia, he iini loa e kukai kamakamailio pu me ia.
"E ka lede," wahi aku ana, "e kala mai oe ia'u ina au e ano nieniele loa aku ana, oia nae hoi, ua ake loa au e maopopo pehea la keia popilikia ou i akelekele ai kou palekana ana ai hoea mai ai maluna ou."
"Ae, he mea oiaio ia, e ka naita," i pane aku ai oia, me ka leha ana ae i kona mau maka hulalali i kau pono aku maluna ona me ke ano ume aku ia loko ona a lilo pau loa e no me ke koe koena ole iho, "ka i no hoi o oe, mamua ae o na poe a pau, ka i kuleana e maopopo pono ia mea; a ia'u e hahai aku ai i ko'u moolelo a pau ia oe, aole no oe e manao iho ana o ka hoopai au i hookau ai maluna o kela mau hehena ua kupono ole. He mea maa mau ia'u, no kekahi wa i hala ae, ka hele holoholo-lio ana ma o a maanei o ka aina me ko'u poe ukali wahine, eia nae hoi, me ka manao hoohuoi a haohao ole ae paha hoi o ko'u luaui ua hele aku au a hala mawaho o na palena o ko makou mau mala mea kanu a me na kauhale me na kokua ole o na poe lima oolea. I nei la nae hoi, ua hoowalewaleia au a mamao e ka pa oluolu aka makani huihui a hoolana koko. Ua hele aku au me eha o ko'u poe ukali i hilinaiia, a ma kahi hoi o ko'u huli hoi aku iloko o ka wa kupono, ua hoomau aku no au i ka hele ana a hoea i kuahiwi.
"Ua hoomaha iki iho makou i na lio malalo o kekahi mau kumulaau, a e liuliu ana hoi no ko makou huli hoi, o ka wa no ia o eha poe maluna o na lio i holo paukiki mai ai mai loko mai o ka nahelehele e uhi paa pu ana ma ia wahi a loaa makou. Mamuli o ko lakou eleu loa, a me ko makou pau hoi kahi i ka hoopuiwaia, ua pau ko'u poe hoa i ka hopu pio ia mamua ae o ka hiki ana ke noonoo no ke kue aku. Ua lohe au i na leo uwa o na hehena, a ua hooia awiwi ia mai au he powa lakou, a no ka puali hoi lakou a Miramolina ka weliia. Hookahi hehena nui a nepunepu i hopu mai i ko'u lio ma ke kaulawaha, aka, ua hiki ole iaia ke paa iho i ko'u lio hiwa hiwa, a hoomaka mai la oia e holo. Aole e hiki ia'u ke kokua aku i ko'u mau hoa popilikia-mai hana aku no au pela ina me a'u ia mana - eia nae, auwe, ua mamao aku lakou mai ia'u aku. I ko'u lio i holo mai ai, elua o na powa i kiola mai i ka laua mau iho mahope ona, a hookahi o ia mau mea eha hoomainoino i komo pono i kona aoao. Eia nae, aole oia i ku iho - aole no hoi oia i hoakakuu iho i kona holo. Ua maopopo iaia ke uhaiia mai la oia mahope mai, a ua hooia loa aku oia i kona ikaika a pau. Ma ia hope iho i hoea mai ai ka ino, a ua lilo ia i mea e hooluolu iki ai iaia no ka manawa. Ua kokoke loa na powa elua mahope o'u i ka wa i haule mai ai o ka ua; aka, i keia wa a ka ua e haule nei maluna iho o ko'u holoholona wela, ua onou loa aku oia i kona holo imua me kekahi ikaika hou, a o ka hopena loa, ua lawe mai oia ia'u imua o kau malama oluolu a hoopakele ana. E ka naita, aohe a'u mau olelo e hiki ai ke hoike aku ia oe no ka nui o ko'u hoomaikai no kau i hana ai no'u."
"A eia nae, e ka lede," i panai aku ai ka naita, me ka leo haahaa, aka, me ka maka i hele a lamalama, "aole e oi ae kou olioli no keia palekana ana ou mamua ae o ko'u."
Aole i pau.
-
I kahi wa o ka Poalua, la l5 nei, i hihia ai ka huelo o kekahi Pake o ka hale kahi a olo papa o Ving Fat & Co. kihi o na alanui Betela me Moi, i kekahi pahiolo e niniu poahi ana, a e ole e loaa koke i na kokua ana a kahi poe e ae o lakou iho no, pakele ai.
-
Hauoli Karisimaka!
-
MAU
DAIMANA
-
HE BALOTA DAIMANA i kela
a me keia e kuai ana he
$1 ma na Waiwai
Eia ke Hoikeikeia nei ke
Komo Daimana
Ma ko makou Halekuai, i kuaiia mai ia H.E. Wikimana mai, a e HAAWI WALE ia aku ana i ka mea e paa ana i ka heluna nui loa o na BALOTA i Dekemaba 31, 1896.
-
H.W. Schmidt & Sons
Hale vona Holo, Alanui Moi.
-
Aloha Karisimaka!
dek 14-mhp
-
HOOLAHA A KA LUNAHOOPONOPONO WAIWAI.
Ua hookohu pono ia ka mea nona ka inoa malalo iho i Lunahooponopono no ka waiwai o Apela Kukamana o Pukoo, Molokai, i make. Ke hoikeia aku nei ka lohe i na mea a pau he mau koi ka lakou ma ka moraki a palapala e ae paha e hoike koke mai i ka mea nona ka inoa malalo iho nei iloko o na mahina eono mai keia la aku, a i ole, e hooleia aku mahope o ia manawa. A o ka poe he mau aie ko lakou i ka mea i make, e hookaa koke mai i ka mea nona ka inoa malalo ma kona hale noho ma Pukoo, Molokai.
S.K. KUPIHEA,
Lunahooponopono Waiwai o ka Waiwai o Apela Kukamana, i make.
Pukoo, Molokai, Dekemaba 1, 1896.
dek 14-4mnw.
DR. C.A. PETERSON,
(KAUKA PITASONA),
Ua Nee Ae Oia a ka Helu 28,
ALANUI EMA.
NA HORA KEENA: - 8-10A.M.; 2-4 a me 7-8 P.M.
nov. 30 TELEPONE 752. 3ml
-
Hoolaha Mano Hooko a Kuai
a ka Mea Paa Moraki.
I kulike ai hoi me na hoakaka ana o kekahi Moraki i hanaia e GEORGE WOND a me HATTE K. WOND, kana wahine, ia Emma M. Nakuina, i Sepatemaba 30, 1891, i kopeia ma ke keena o ka Luna Kakau Kope, Oahu, iloko o ka Buke 129, ma na aoao 450 a me 451, a ua hooliloia hoi ua moraki la e Emma M. Nakuina i oleloia, ia Miss Agnes McIntyre, ke hoolahaia aku nei ma keia ua manao ka mea i lilo ai o ka Moraki i oleloia e hooko aku no ka uhakiia o ke kumu aelike, oia hoi, no ka uku ole ia o ke kumupaa, ka ukupanee a me na auhau i ka wa i kauohaia ai no ka hookaa ana.
Ke hoolahaia aku nei no hoi, mahope iho o ka pau ana o na pule ekolu mai keia la aku, e hoolahaia aku no ka waiwai i hoopaaia ma ua Moraki la no ke kuai a e hooliloia aku no ma ke kuai kudala akea ma na keehia kudala o Jas. F. Morgan, Honolulu, ma ka Poakolu, la 27 o Ianuari, 1897, ma ka hora 12 awakea o ia la.
MISS AGNES MCINTYRE,
Mea i Lilo ai o ka Moraki.
No na mea hou aku i koe, e ninau ia J.A. Magoon, Loio no Miss Agnes McIntyre.
Hanaia Honolulu, Dekemaba 21, 1896.
Penei iho ka waiwai e hooliloia aku ana:
O kela mau apana aina a pau loa e waiho la ma Kaili Place, Kalihi Honolulu, a i hoakaka maopopo loa ia o na Apana Helu 11 me 12 maluna o kekahi kii-aina a palapala-aina paha, i kopeia ma ka Buke 120, ma na aoao 391 a me 392, maloko o ke Keena Kope o na Palapala Hoolilo, o ka huina ili nui o na wahi i oleloia he 12,915 kapuai kuea, oi aku a emi mai paha.
Kuike ke kumu, ma ke dala gula o Amerika Huipuia.
I ka mea kuai mai na lilo palapala.
dek 21-4mnw.
-
Hoolaha Manao Hooko a Kuai
a ka Mea Paa Moraki.
I kulike ai hoi me na hoakaka ana o kekahi Moraki i hanaia e KONALE MARKHAM, he wahine kanemake, ia O.P. Emerson, i Augate 6, 1892, a i kulike ai no hoi me na hoakaka o kela pakui hou iho i ka Moraki i oleloia i hanaia e KONALE MARKHAM i oleloia ia Emerson i oleloia, i Okatoba 18, 1892, a ua kopeia hoi ka Moraki kumu ma ke Keena Kakau Kope, Oahu, iloko o ka Buke 139, ma na aoao 174 - 5, a o kela pakui hou iloko o ka Buke 138, ma na aoao 302 - 3, a o ia Moraki a me ka pakui hou ua hooliloia e Emerson i oleloia ia J.A. Magoon, ke hoolahaia aku nei ma keia ua manao ka mea i lilo ai o ka Moraki i oleloia e hooko aku no ka uhakiia o ke kumu aelike, oia hoi, no ka uku ole ia o ke kumupaa, ka ukupanee a me na auhau i ka wa i kauohaia ai no ka hookaa ana.
Ke hoolahaia aku nei no hoi, mahope iho o ka pau ana o na pule ekolu mai keia la aku, e hoolahaia aku no ka Waiwai i hookaaia ma ua Moraki la no ke kuai a e hooliloia aku no ma ke kuai kudala akea ma na keena kudala o Jas. F. Morgan, Honolulu, ma ka Poalua, Ianuari 26, 1897, ma ka hora 12 awakea o ia la.
No na mea e ae i koe, e ninau ia
J.A. MAGOON,
Mea i Lilo ai o ka Moraki i oleloia, Hanaia Honolulu, Dekemaba 21, 1896.
-
Penei iho ka waiwai e hooliloia aku ana:
O kela apana aina a pau loa e waiho la ma Kalihi, Oahu, a i hoakakaia maloko o ka Palapala Sila Nui 679, Kuleana 1200, no Halekii, nona hoi ka ili o Elua a me 7-100 Eka;
A pela iho no hoi me kela apana aina a pau loa e waiho la ma Kalihi i olelo mua ia, i hoakakaia maloko o ka Palapala Sila Nui 1255, Kuleana 1205, nona hoi ka ili o 55-100 o ka Eka.
Kuike ke kumu, ma ke dala gula o Amerika Huipuia.
I ka mea kuai mai na lilo palapala.
dek 21 - 4mnw.