Ka Makaainana, Volume VI, Number 25, 21 Kekemapa 1896 — Page 2
2 HONOLULU, OAHU, POAKAHI, DEKEMABA 21, 1896.
LEONE DE BOANE
-
KA MEA OHUMU KIPI O COADOVA
-
MOKUNA I.
KE ALOHA I KA IWIHILO.
[Mai ka Helu 23.]
I ka wa a ka naita Noremana i komo aku ai iloko o kahi hale, ana hoi i hana aku ai me ka hoomaopopo ole, me he la, "eia au la he Kalae a he piikoi," o ka mea kaomi waina hookahi wale no ka i loaa aku iaia, e hoeueu ana i ka lapalapa ae o kekahi ahi maluna o ke kapuahi haiki. Ua eu ae ka hapauea me ka puiwa i ka wa i pa pono aku ai o kekahi kikiao makani huihui maluna ona i ka hemo ana o ka puka, a lalau ae la oia i kekahi ihe e ku kokoke ana ma kona aoao.
"He mau hoa'loha kaua, e kuu Alecasima maikai," wahi aku a Leone, iaia i hoomaopopo aku ai i ko ka elemakule eueu ana ae no ka hoopakele ana iaia iho.
"Auwe - ae, ae - ke ike nei au," i pane mai ai ka haku hale, iaia i hoomaopopo mai ai i na mea i komo aku. "Auhea ka hoi na powa?"
"Ua make laua a elua."
"Maikai! Mai hele aku no au e kokua ia olua, e Sa Naita, eia nae, ua nui no hoi ka'u hana maanei. O ko'u hali ana aku la no hoi ia i ka Lede Lula a ke keena o ka'u wahine; a oiai hoi, ua pulu a na anu oia, ua manao au e hoeu ae i ke ahi. Ke manaolana nei au aole kahi o olua i eha."
"He ola kahi pohole iki," i pane aku ai ka kakou kaeaea. "Ua hiki ole loa i na poe Araba powa o kou wahi ke hoopapa ma na mea kana me na koa Noremana. Aka, e hoike mai ia'u - ua palekana anei ka lede?"
"Pela ko'u koho, e ka makamaka opio. Aia oia malalo o ka lawelawe ana a ka'u wahine, a o ka loaa koe o na aahu maloo nona e komo iho ai."
Oiai hoi o Alecasima e kamailio nei, ua hemo mai la he puka ma kekahi kihi a nana mai ana kekahi wahine. Ua kuemi hope koke aku no oia, a aole i liuliu iho, hoea hou ana oia a komo iloko o ke keena. Aohe oia he mea e ae, aka, o Dorisi no, ka wahine a ka mea kaomi waina - he wahi wahine uuku a nanaina oluolu o ke ano hoihoi mau, he kanalima paha na makahiki, me ke ano a hiohiona Araba maopopo loa maluna ona.
"E na hoa'loha," wahi aku a ka wahine, me ka nee iki aku imua iloko o ia keena,"o nei aku hoi maua i ko olua oluolu a hoomanawanui malalo o na kumu ulia o ka manawa i ulu koko ae nei. Ua hookikinaia ka Lede Lula e hele mai imua o olua me ka nele me kona uhimaka ole."
"He mea hiki ole loa no paha hoi no kakou ke hoopaakiki iho ma na ano loina maikai mau i na wa a pau," i pane ae ai o Alecasima.
"E lilo no o ko kakou hanohano kona palekana e pakele loa ai," i pakui aku ai ka naita.
Ua luliluli ae la hoi o Gaberiela i kona poo, aohe nae hoi i puai leo ae, a me he mea la nae hoi, e noonoo nui ana oia no kekahi mea.
I nei wa no hoi o Dorisi i hele aku ai, a aole i emo iho, hoea hou ana no me ke alakai mai i ka ui nohea ma ka lima, a iaia hoi i ike mai ai i ka naita opio, ua haalulu ae la oia a puni me ka ikeia aku no o ka naka mai, eia nae, ua kilakila a ihiihi hanohano no kaha kunou ana mai i kona aloha hoomaikai. Iaia i ike mai ai i na poe a pau e nonoho ana, ua noho iho oia maluna o ka pela noho nolunolu a ka haku wahine o ka hale i hoomakaukau ai nona imua o ke ahi, a no kekahi wa pokole oia i noho ai me ka hooluaiaele ana a kona mau noonoo ponoi iho. He mea oiaio loa he wahine opio ui io no oia - ua oleloia ae hoi e ka lehulehu oia ka oi loa aku o ka ui ma Coadova holookoa. Ua umikumamaiwa ona mau makahiki ia wa, kulana ano palanaiki, oia hoi, aole i ka uuku aole i ke kiekie loa, a me na pauku kino o ke ano nani, nepunepu a malo, me ke oho eleele hinuhinu loa, mau maka poopoo, uliuli, hulalali, me ka hiolo hoi o na lihilihi ma ke ano ooi a olu waipahe loa; mau papalina piha a nepunepu poepoe; malo maikai ka waiho ana o ka ihu, me he la ua kalai maoli ia; a o na lehelehe hoi, ua like me na huaai melemele e hoomaka ae ana ke o o ka ula i ka wa e ono loa ai ke pala ae. O kona ili hoi keia, ua maemae a aiai e like la me he alabasa (pohaku keokeo) la, a na na waihooluu kinohinohi pumehana a ka ula e o ae ana ma kona ili ka mea nana i hoike ae i kona ano Mua.
Aole i pau.
-
Ua lilo aenei ka oihana kuai waiona o Lovejoy & Co. (Lawekeoe Ma) i kekahi poe ekolu, no lakou na inoa o J.D. Holt, Jr., D.H. Lewis a me Gus Mauer, no $12,500. - Oiai hoi, e ia no keia waiwai imua o ka Aha Hooponopono Waiwai, ua waihoia aku he noi e na luna-hooko kauoha no ka aponoia mai o nei hoolilo ana. Poakahi, la 14 nei, i loaa ai ka aponoia.
Hui Kalepa Hookuonoono Hawaii.
Hoeu na oiwi o ka aina, Kuloloia ke kahua hana, oni ka lae o ka i'a, oe'o'e ana nei bipi nui, samano io ula o Keomolewa.
No kekahi mau mahina i hala ae nei na hoomakaukau a me na liuliu ana o keia hui no kona kahua hana, a i keia wa, ua makaukau oia e hoike aku imua o ka lehulehu, he Hawaii oe, he Hawaii au, imi ae no a loaa i Kuloloia ke hiki aku i ka la 21 o Dekemaba o keia makahiki.
Ua ku ka hui, ua pau i ke paiia kona kumukanawai a me na kanawai, ua kohoia na luna nui no keia makahiki e nee nei, a ke alu nei ka ka pule ia Hakalau i kona mau lala no ka hoahu ana i ko lakou mau waihona hookuonoono iloko o ka hui.
O ka hana a keia hui, o ia ke kuai ana i na i'a maka, i'a maloo, bipi, samano, a me na waiwai like e ae a pau a ka puu e ono ai, a ma ka makeke ma Kuloloia e lawelaweia ai na hana a pau.
Ke ku makaukau nei keia hui e hookipa i kona mau hoa oiwi ponoi, aole ma ka heluna i mau haneri wale no, aka, i mau tausani.
O ka lu ana i ka oukou mau kenikeni ma ka makeke o keia hui, ke lilo oukou he mau lala, ua hoihoiia mai he hanu hou iloko o ko oukou mau kino no na la mamua aku.
Nolaila, ke poloaiia aku nei na hoa oiwi ponoi, "e naue i ke ola, e hoomahui ma na hana hookuonoono!" E ui, e ninau a e kipa ae ma ka hale halawai mau ma Kapalama, a e lilo no oukou i mau lala no keia hui.
-
Mamuli o ka lilo ana o ke kai lawaia o Kahala, Waialae, ia J. Aea malalo o ka hoolimalima, aia he hoolaha nana ma kahi okoa o keia helu e pili ana i kona hope ma ia wahi. E ike a e hoomaopopo ae ka lehulehu hele lawaia.
Ma ka wehe ana o ke Kuhina Kalaiaina i na kohokoho no ka hoolako ana i ka Oihana Alanui me Alahaka me ka papa a me na kua he wa i hala ae, ua ikeia o ka ka Hui Papa a Kukulu hale Oahu (Hui Papa Pake) ke koho emi loa, oia hoi, he $16.75 no hookahi tausani kapuai, nolaila, ua haawiia ka aelike ia lakou He $17 hoi ke koho a na hui papa kahiko e ku nei a na haole. O ke ano laau Nouaiki huluhulu keia.
Nee mai kaena a "moe kokolo mai ka uwahi" i hele a hohono a ko ka waoakua poe kamalii i na la hope o Okatoba aku nei, ma ka hoike mai a kekahi luina, ua hala aku nei he kauoha pepa na lakou i Kapalakiko. Mai ia wa mai a hiki i keia wa, aohe mea i ikeia. Elua aenei mau moku mai Kapalakiko i lawe pepa a hua kepau mai na makou. O ka makou no ia e hoohana ae nei iloko o ka malie a me ke akahele, a aole hoi iloko o ke kaena me ke akaka ole o ko mua a me ko hope. Lalau no paha, a nawai la e hilinai mai o ole loa ma.
Kuai Emi a Emi Loa
Iloko o keia mau la, e kuai emi a oluolu loa ia aku ana na waiwai a pau o ka
Halekuai o Eleele.
Eia ka wa no ko Kauai poe e hoomaopopo mai ai. E loaa no he 18 i-a Kalakoa maikai no $1.00; 10 i-a Keokeo a Kukaenalo, o hookahi iwilei ka laula, no $1.00, a pela aku a nui wale.
O ka wa keia, oiai hoi ke Kau Kulaia Karisimaka a me Hape Nu Ia e kokoke mai ana. He lua ole keia o ka emi a me ka oluolu i ikeia ma o Manokalanipo nei. Eia ka wa, mai kaukaulua iho.
JOHN I. SILVA, Ona
dek 7-1ml.
-
WA KARISIMAKA.
Eia ka wa kupono, no ka mea, e hoao aku ana o
H.W. Schmidt & Sons
(H.W. SIMIDA & KEIKI)
e hoolilo pau loa aku i ko alkou waiwai oia ke kau KARISIMAKA me ka hoomaopopo ole ae no ke kumulilo. O ka emi no a emi loa, aohe lua ma na halekuai o Honolulu nei i ko lakou mau waiwai KARISIMAKA.
He wa maikai loa keia e loaa ai o na Makana KARISIMAKA kupono a waiwai no ke kumukuai oluolu loa. E hoohauoli i kou mau hoa'loha ma ka La KARISIMAKA a e wae i kou makemake mai ka halekuai o
H.W. SCHMIDT & SONS,
ma ka Hale Pohaku o vona Holo, Alanui Moi, ma Waikiki iho o Ka Hale Oiwi.
dek 7-1 ml.
-
Hookahi (1,000) Tausani Apana Aina ma Kapiolani Paka no ke Kuai.
Aia no he 1,000 a oi aku Apana aina, 50 kapuai laula a he 100 kapuai loa, mauka iho o Kapiolani Paka, e pili ana me na Pa-hale o Messrs. C. Brown, H.J. Nolte, T Hollinger a me kekahi poe e ae.
E kuaiia aku ana keia mau Apana Aina me ka emi loa i ike ole ia ma Honolulu nei mamua aku nei, a mahope mai hoi o ke au i noho alii ai o Kauikeaouli, ka Lokomaikai, (Kamehameha III.)
E hoomoeia ana ka wai i ka wa e makaukau ai ka poe kuai mai e kukulu i na hale.
O ke kumukuai o na Apana Aina mai ka $100.00 no ka Apana a emi aku a hiki i ke $50.00.
Aohe wa maikai e ae e loaa ai na home.
E aeia no ma ka uku liilii.
No na mea i koe, e ninau ae ia
W.C. ACHI & Co.,
Boroka o na Waiwai Paa.
Honolulu, Novemaba 25, 1889.
dek 7-4mnw.
-
Olelo Kuahaua.
Ke kuahauaia aku nei i na lala a pau o ka HUI ALOHA AINA O NA WAHINE HAWAII mai Hawaii a Niihau, e malamaia ka Poaha o kela a me keia pule i ka haipule i ke Akua me ka hookeaia, no ka nonoi ana aku i ka lokomaikai o na Lani no ka pono o ko kakou aina hanau, e hoomaka ana mai ka Poaha elua o Dekemaba nei, la 10, a e hoomauia aku keia hana.
KUAIHELANI CAMPBELL,
Peresidena Nui o ka Ahahui Aloha Aina o na Wahine Hawaii.
JANE CLARK,
Hope-Kakauolelo.
dek 7-4mnw.
-
Olelo Hoolaha.
Mamuli o ka hooholo ana o ka AHA ELELE o ka Ahahui Aloha Aina o ko Hawaii Paeaina, ma kekahi halawai i malamaia ma la 30 o Novemaba, M.H. 1896, ke kukalaia aku nei na Ahahui Aloha Aina a pau o ka Paeaina, e malamaia ka Poaha hope o Dekemaba i la hookeai, a me ka malama ana i anaaina haipule a puni ka Paeaina.
Ma ke Kauoha.
J.L. AHOLO,
Hope-Kakauolelo Ahahui Aloha Aina, Honolulu Dekemaba 2, 1896.
dek7-3mnw.