Ka Makaainana, Volume VI, Number 22, 30 November 1896 — Page 3
HONOLULU, OAHU, POAKAHI, NOVEMABA 30, 1896. 3
NA HOOKO MOEUHANE.
-
No ka Nane a ke Kanaka Loihi
Eiwa Kapuai.
[Mai ka Helu 21]
Nane 7 - Anuu 1, aole au i anuu 3, aole au i anu; anuu 4, anu iho la.
Haina. - Nuuanu, Oahu. He kahua kaa na Kamehameha, he Na'i aina ua hiki i Kakuhihewa, ina iho a hoea, ua kokoke paha, ie aku, aia iho, a ikea aku. Ua anu, ua maaele i na la o Hoku, Mahealani, Kulu a me Laaukukahi. Wa 1, hauoli; wa 2, nanea; wa 3, hoolai; wa 4, puoho, puiwa, lele i ka pali, pau pulu, aohe koe.
Ua hookoia no keia. He na'i aina o Kamehameha ua hiki mai i Kakuhihewa, he na'i aina ka ma'i kolera ua hiki mai no i Kakuhihewa; ua hoea ae, ua ikea ae, ua ulupa iho, "pau pulu, aohe lau kanu" iluna o ka lahui. Puiwa lele ka hauli i na hana a ka Papa Ola, komo no ka apu, koe aole. Ua hala ae la ia puumake. O ke kakaina koe o ke kahua o Nuuanu e nana aku ai, no koi ana mai o na hana mawaena o Kamehameha me Kalanikupule.
Malalo o ka haina o keia nane e ikeia ai kekahi mau hana i hoea ae malalo o na kakaina o ke kahua kaua o Nuuanu, a o ia keia puoho malalo iho:
I ka la o Hua, Okatoba 1, 1895, i hului pau ia ae ai na makai no ka Halewai, a pela no hoi me Kawa, na koa iloko o Iolani Hale. A i ka la o Mahealani, ua hele na koa o ka puali G nui ma na aekai o Kakaako. Ia po no, ua hele na koa mawaho o ke kulanakauhale ma na alanui o waho, ko-ke hele ana i uka, i kai, i na-e, i lalo. O keia mau hana iloko no ia o na la o Hoku, Mahealani, Kulu a me na la o na Laau. Ua noiiia ka meheu o na kipi e ikeia ai, o ka mea i loaa aku ia lakou, o lakou wale iho no, a koe aole na kipi. Ua puiwa a puoho o Eleu, a hookikinaia oia e huli me 12 koa, 1 pu-kuniahi a me Kuhina Kalaiaina Kini. Ua ko-ke aku la o Eleu e like me ke kauoha, aole nae i loaa iki na kipi a hiki i ka loaa ana aku o ka waapa o ka Ilamuku a lilo pio mai la i ka Eleu, a o ia ka hookoia ana o ka haina, "puoho, puiwa" holo i o, holo i uka.
Aka, aole no i pau na koi ana a na anuu o ke anu, eia no ia ke koi mai nei i ke anuu oi loa o ka huihui a me ka haukeke o ka lehelehe.
He anu hu'i koni no makou na wahi hoahu opihi o makou ma o, no ka mea, aia ka hapa pulima ke kau la ilaila. Mano niuhi 1.
He anu lia o ka ili no makou na wahi apana aina o makou, a me na mahele ko o makou, no ka mea, ua kuhikuhiia e ka manamana kuhi-minute. Mano niuhi 2.
He anu haukeke no makou na koi kuapapanui, no ka mea, ua hiki ka huina i ka ha'i manomano-a. Mano niuhi 3.
He anu maeele no makou ka uhaki kuikahi manakolu, no ka mea, ua kau i ka huina o ka Papa. Ina ana ilaila la e, aohe nao-ai-i-ka-papaa, no ka mea, o Papanui-Hanau-Moku ia, he kuapapanui. Mano niuhi 4.
Nane 8 - He lei ko'u, hoolonoia aku.
Haina. - Leiolono, Aliaomanu, Moanalua. He heiau, he he no ka poe make. E hoolono aku i ka lei o ka lanakila, ina aku a hoea mai, he lono, he ulaleo, nanaia aku!
O ka lono o ka huikala piha ia ana o ko Alii, ua ikeia ae la ia, he lanakila ma na ano a pau, e hiki ai no ke olelo ae, aohe mea i koe, mai ke Aupuni a i kona nohoalii, ma ka hoopiha ana o na sekona a me na minute a kupono i ke ana hora i makemakeia; e apa ana i ke aha? Aole anei e nana iho i ka hoike a ka nane 2, e "Hoikaopuaiwalau," ua pua hoi, ua liko a ua lau. He ao opua ia e haule mai ai ke kuaua hooulu ai o ka pomaikai e emi hope ole mai ai na hana kalepa a na poe kaleoa, a e ulu pono ai ke ko a na poe kanu ko, e u-li ai ke eke a ke kanaka mahiai. Hewa ia la? O ia nae paha, o ka lono koe o ka hoi ana iluna o ka nohoalii, ea? Ka i no hoi ua lawa piha ia ma ka huikala, a o ke kapae ana ae mawaho i kahi pono a ke kanawai i haawi ai ma kona kulana Moi, aole anei ia o kapaia he huikala hoopunipuni? E apa ana i ke aha? E kali ana nae paha i ka ulaleo, ea? Oi hoi ha, nanaia aku.
Aka, o ka'u mea e lohe nei, he leo nunulu; oi la ihea? He mele pa-ha (ka Moiwahine o na Pua), ei paha iloko o ka pahu la! Aole o kana mai ka nalo e wawa nei. Ina he meli, ea, o ka helu 12 aku la kena, ua oi aku ka pono e kiko aku. E puka mai paha auanei ma ka pahu. Ina he pahu kani, e holo ana i ka Mikanele ohule la Puhi ma, a kau iluna o Poolio; ina he pahu olelo, e holo ana Waha me Pepeiaoalii, alaila, loheia. Nolaila, nanaia aku ka ulaleo.
KILIKILO DIMERATA.
-
Eia ka mokumahu Malulani ke hoomaemae hou ia nei iluna o ke alahukimoku. O ka mokumahu Mikahala ka i holo aku ma kona wahi a o ka Iwalani i ka Poalua iho la ma ko ka Mikahala wahi.
Poe Keiki Makua Ole.
Ma ka mokumahu Alameda mai o ka la 11 nei i hoea mai ai he eono poe keiki, no lakou na makahiki like ole mai ka 3 a ka 14. Oiai ka moku e ku ana ma Aukalana, Nu Zilani, ua hookauia aku keia poe keiki iluna e kekahi wahine, i manaoia o ko lakou makuahine ia, e holo ana ka e hui me kana kane ma Kapalakiko. I ka haalele ana aku o ka moku, aohe ikeia o ua wahine la, ua nalowale honua, me he la ua lele hou no uka a hele loa, a i ole ia, ua haule ka moku iaia, ua holo e mai. Ua malama maikai ia mai lakou o ke kuene o na ohua helu elua, a ma ka oluolu hoi o kekahi o na ohua helu ekahi o luna, ua hooholo kaa ia ae lakou ia auwina la maanei, no ka makaikai ana ia Honolulu nei. Ke loaa ole aku ko lakou luaui makuakane ma Kapalakiko, malia o hoihoi hou ia no kahi no o lakou i hele mai ai.
-
Ko Omoomo no ka Bia.
He mau pule i hala ae i kekahi La Pule, wahi a ka lono i laweia mai i o makou nei, ua hoouna ae kekahi makuakane e noho nei mauka o Kawaiiki, Kapalamauka, kokoke i ka Halemai Pupule, i kana keikikane uuku e hele e kuai bia, me ka haawi aku iaia i $1.00 a me kekahi kini kakai. Ua hele keia keiki mai ke kakahiaka a po, hoea ana i kauhale, a ma kahi hoi o ka mea i kauohaia ai oia e kii, ua hoolilo aku oia i kela dala hookahi a pau loa no kona ono, oia hoi, he ko omoomo. Pii ka inaina o kona luaui, a mai eha paha, ina aole i lehulehu loa na poe e ae ma ia wahi. A, lolo ia makuakane, o ka hoounauna ana i kana keiki e hele e kuai i kona makemake. Aohe no hoi ona hele ponoi ana no i kana. Ua loaa nae hoi he uku panai kupono loa no ia hana ana. Ina i maopopo kona inoa ia makou, hoikeia aku no e makou me ka hopohopo ole.
-
He haole puhiohe no ka bana Aupuni ka i holo mahuka aku no Kapalakiko maluna o ka mokumahu Alameda i ka la 12 nei me ka haalele iho i kona hoapili kapekepeke Hawaii a me na aie lehulehu mahope nei e paiauma kanikaniaula aku ai nona.
Aole o Misi Luisa Kekai mare ai i kekahi haole i noho koa Pi Gi mamua he kaikamahine na ko makou hoa'loha Peter Whitmarsh o Kapauhi, aka, o kona kaikuahine no ia, a ma kahi hoi o Misi Ane Akona i malamaia ai ka paina. Ua paewa makou ma ka hoike ana aku ma ka helu i hala, a ke awiwi nei e hoopololei ae. Pela no hoi me ko laua wahi i mareia ai, iuka no o kahi noho o ke kahunapule.
NO KE KUAI.
He hale o Elima Keena, hookahi ma kahiki o ka paa ana, a me Elua Apana Aina ma Kalia, Waikiki, ma ka mahele aina o Bruce Waring & Co., e hooliloia aku no i ka mea e makemake mai ana. Aia keia wahi ke pili kokoke la i kahi noho o E.S. Boyd.
KUMUKUAI: - $1,000; $500 ma ke kuike, a ma ka Moraki ke koena no ekolu makahiki ma ka 8 pa-keneta ukupanee.
No na mea i koe, e ninau ia
BRUCE WARING & CO.,
a i ole, ia F.J. TESTA, ma ke keena o keia nupepa. sept 7-mp
-
HALEKUAI LAHUI KALAHIKI.
Helu 405, Alanui Moi, ma Waikiki aku o Alanui Nuuanu, ma ka aoao mauka, ke keena mua o ka "Hawaii Holomua."
Ma ia halekuai o na oiwi e loaa ai na anoi a me na paihi o na ano hou loa, e laa
Na Kalakoa, Na Keokeo,
Na Makalena, Na Kinamu,
Na Huluhulu, Na Lihilihi,
Na Kamaa o na Kane, Wahine me Keiki, a pela aku.
Oluolu no ke kuai ana. Aohe hewa ke kipa mai e ikemaka, a aohe no hoi he kunukunuia no ka hoikeike ana i na mea kuai.
M. PALAU, Luna Nui.
ok 14-tf
-
DR. SLOGGETT
(KAUKA SOLOGETE),
Kauka Lapaau me Oki
Kokoke ma kahi noho o H.W. Schmidt, Esq., Alanui Beritania, Manamana.
O kona makaukau loa, aia i na Mai o ka Maka, Pepeiao. Ihu a me ka Puu.
MANAWA NOHO KEENA: Hora 8 a 10 a.m.; 1 a 2 p.m.; 7 a 8 p.m.
Telepone Helu 701.
nov 16-2m
-
Waihona Buke Hawaii.
E loaa no na buke ma ka olelo makuahine no ke kuai ma ke keena o ko makou Puuku. Penei iho kekahi o ia mau buke:
Laieikawai - - - $1 00
Gaberiela Lenoa - - - 75
R.W. Wilikoki - - - - 50
Hookahuli Aupuni o 1895 – 50
a pela aku, a pela aku.
O na buke e ae no hoi kekahi, e laa na buke kanawai, a me kahi mau ano e ae, ke ninau pololei ia mai ia
F.J. TEST (Hoke),
ok 28-tf 327 Alanui Moi.
-
AHI
[PAIKII.]
Helu 89, Alanui Nuuanu.
PAIKII - Owau no nei, o ko oukou hookamaaina kahiko loa. E kipa mai, he emi loa na kii o na ano a pau ma ko'u hale paikii.
-
NA LAKO HALE - Oluolu a makepono loa ke kuai ana o na Moe, Noho, Koki, Pahu-lole, Pahu-ume, Pahu-ku, Pahu-kupapau, Pela, Uluna, Moena, a pela aku. Emi loa.
-
E loaa no kumukuai maikai kupono no ke Keleawe a me ke Kepau.
iun 22-6ml
Aole i pau.
-
HELE HOOLUOLU.
O.R.L.Co.
MA NA POAONO A ME NA LA PULE
E haalele mai no na Kaamahu i na hora 9:15 A.M. a me 1:45 P.M., a hoea hou mai i Honolulu nei ma na hora 3:11 a me 5:55 P.M.
Na Palapala Uku Puni.
Papa 1. Papa 2
Manana - - $75 $50
Mahiko o Ewa - - 1 00 75
Waianae - - - 1 50 1 25
F.C. Smith,
Agena Ohua a Palapala Nui
feb 10-tf