Ka Makaainana, Volume VI, Number 21, 23 November 1896 — Page 6
6 HONOLULU, OAHU, POAKAHI, NOVEMABA 23, 1896.
IOSEPINE
-KA-
EMEPERESE PUUWAI OLU
O FARANI.
MOKUNA VI.
ISEPINE MA ITALIA.
[Mai ka Helu 20.]
Aole i nele ko Napoliona hoomaopopo i ka nui o kona liliia, a me kona hakiloia. A mamuli o kona hunakele i kona manao no keia mau hakiloia ona, ua lilo ia i mea ehaeha i ko Iosepine manao, no ka mea, i kekahi manawa ua makemake no o Iosepine e ike i kana mau hoolala ana no ke kulana kalai aupuni, aka, aole loa ia i hoikeike mai.
Mamuli o ko Napoliona ake nui i ka hanohano a me ke kaulana, ua nana ae oia i ka lanakila i loaa iaia maluna o na puali Auseturia me he wahi mea uuku loa la - me he mea la o ke anuu mua loa no ia o kona kulana. E pili ana no kona makaala, ua hoike ae o Iosepine i kekahi hoa'loha ona penei: "Iloko o na makahiki he lehulehu o maua i noho pu ai, aole loa he wahi manawa a'u i ike ai iaia e noho nanea ana me ke ano palaka. E makaala mau ana oia i na manawa a pau ma ke kamailio, ka hana ana, a me ka noho ana. Aole no ona hilinai ia'u. A ina i kekahi manawa e hoike mai ana oia i kona hilinai i kekahi mea, he pahele wale no ia ana e hoomoe ana no ka mea ana i makemake ai e ike i kona mau manao, aka, no kona manao ponoi iho, aole loa oia e hoike iki ana."
Ua loaa ia Napoliona he wa kupono nona e holo ai i Parisa: he mea hoopailua nona ka hoomaopopo ana i ka nawaliwali o na poe o noho mana ana maluna o ke aupuni, a ua loaa e no iaia na noonoo ana no ka hookahuli ana i ke aupuni ke hiki mai ka wa kupono. Ua noho aku la no o Iosepine me kana mau keiki ma Milana,e lualai ana i ka oluolu o ka aina me ke ohohia o na makaainana. Ua haawi ae oia i mau anaina hoolaulea. E haiamu mau ia ana kona home e na poe hanohano o ka aina. Aole no ona hoihoi i keia mau hoahaaina ana, aka, ua hana oia i keia hana ma o ka makemake la a kana kane, a me ke ano no hoi o kona kulana.
Iloko o ka Napoliona mau hooili kaua ana, o Iukini kekahi i komo pu iloko o na hakoko ana, e uhai ana ma ka meheu o kona makuakane hou, oiai no nae he umikumamahiku wale no ona mau makahiki i keia wa, a ua lehulehu kana mau hana i ikeia, e hoike mai ana aia no kona pahu i ka oioina o ka hanohano a me ke kaulana.
Ua hoolilo ae o Napoliona ia Italia i kahua a i home no kona kulana. Mamuli o ka piha inaina o na poe Italia i na poe Auseturia, ua nui ko lakou ohohia, a aneane no e hoomana aku imua o Napoliona. No ka nui o ko Napoliona ohohiaia ma Italia, ua kukulu iho la oia i Repubalika ma ia huli o na mauna Alepa; a i ka wa o hookuuia ae ai kona hae e welo i ka makani, o kona wa koke no ia o hoopuniia ai o na kanaka i lako me na mea kaua, a pela i hoolilo ai o Napoliona ia Italia i home no kona mau puali a me kona ikaika. Ina i hoohana oia ma Parisa a holopono ole kana mea i manao ai malaila, hoi koke no oia no Italia a ku mai me ka makaukau no ke kuo ana mai i kona poe enemi a pau loa.
Iloko o Iosepine ua loaa ia Napoliona he hoahana ma kana oihana i hiki ole i kekahi kane a wahine e ae paha ke lawelawe a kokua iaia Mamuli o ko Iosepine waipahe, ua haiamu mau ia kona alo e na kanaka a pau mai ke kulana kiekie a hiki i ka haahaa. O na poe i halawai me Iosepine ua lilo lakou i poe hoa'loha nona no ka wa pau ole. A oiai, he wahine o Iosepine i hanaiia mai kona wa kamalii mai iloko o na apana kuaaina, ma kana mau haawi anaina hoolau lea ana nae, he lede maopopo oia o ka paa rula o ke kamailio ana, ka hoolauna ana, ka hele ana ae iwaena o ke anaina, a me ka hooponopono ana i ke anaina ma na ano a pau.
Aole i pau.
-
O ka ukupanee maluna o $625,000 o na bona Aupuni ka i ukuia i Okatoba 1.
Ua uku ae ka mahiko o Ewa i Okatoba 1 he $250,000 o kona aie i hoopaa bona ia.
Ua hoomaopopoia ua hooholo ae ka ka Ahakuka Malu i Okatoba 29 aku nei i kekahi haawina o $50,000 no ka hana ana aku i wahi kapili moku hou ma ka uwapo Pakipika e like paha me ke alahukimoku o nei wa, koe wale no he oi ae ka nui o neia. E kohokohoia ana ka maanei, ma Kapalakiko a me Vitoria.
Ke manaoia nei e hoakea aku ana ke Aupuni i kekahi wahi o Alanui Papu e homaka ana mai ka hale hana woti mai o Wikimana a hoea i Alanui Moi E oki ae anaiia i ka halekuai o Painapa i pau ai i ke ahi. Ma nei ano like no, e weheia ana i alanui hou mai na alanui Ema a Papu, kokoke ia Keoua Hale. I keia mau la koke iho paha e hoomaopopoia ae ai. E nui ana ka hana a na Pukiki mai ko lakou luna alanui nui Pukiki aku.
Noho no i Puna Ala Onaona.
Ma ka la 25 o Okatoba i hala i malamaia ai ka poni ana ia Z. M. Naahumakua i kahunapule no na Ekalesia Huiia o Kalapana me Opihikao, ma ka luakini o Kalapana, Puna, Hawaii, o na Rev. J.N. Kamoku, S.L. Desha a me W. Kamau, a o Rev. L.K. Kalawe hoi ua haule i ka hope moku. Hai mai kekahi mea i ikemaka, a he mea no hoi i hilinaiia, ua ku i ke anoano eehia na hana i lawelaweia, a mahuahua pu me ke anaina a maluhia no hoi.
I ka pau ana o na hana poni a me na olelo ao i ka Ekalesia, na malamaia ka ahaaina barena a ka Haku. He Ekalesia loihi keia nona ka loa o 20 mile, e hoomaka ana mai ke kihi hikina ma Ahalanui, a o ke kihi komohana aia i Napaliwaiole. A o ka nui o na hoahanau i hoomaopopoia he haneri me kanalima. Nolaila, ua akea maoli no ke kihapai - o ka nui o kana mau wahi hua e ohi ai o ka mahina mai a makou aku, he umi no. Aka, o ka hoomanawnui ka mea e pono ai. Nolaila, i Puna iho la no o Z.M. Naahamakua mai kona wa keiki mai a kanakamakua, a puia iho la no i ke ala me ke onaona. A oia ka'u i hooheno ae nei: "Noho no i Puna ke ala me ke onaona."
OIHANA MAHI KOPE ME HALEKUAI
Ke ala mai nei o Puna "paia ala" ma ke kanu kope; aia ma Pahoa lehulehu na poo kanu kope; aia ma Kapehi na Misita R.A. Lyman; aia ma Pohoiki, hewa i ka wai oe ke nana aku; pela no hoi ma Kauala-uka, hoonioni i ka puuwai ke kohai mai a ka lau o ke kope; a aia mauka o Kamaili he mau haneri eka. Nui kela! A ua hala loa aku i Kaimu, Kalapana a me Pulama ke ohohia kanu kope.
Nolaila, e Puna "paia ala i ka hala me ka hinano," helea imua a lanakila, a ahai oe i ka helu ekahi.
Ma Kalapana, elua halekuai Pake, a hookahi no D. Ewaliko; ma Kamaili, hookahi halekuai no ke Kepani, a hookahi aku ana ma Opihikao. O ia ka nani.
Ke hoi nei ke keiki o ka uka leo "manu," ua malu na pali.
J.K. KANUHA.
-
Kauka Pelekane Hou.
Aia ma kahi okoa ae o keia helu e ike iho ai na makamaka heluhelu i ka hoolaha pili oihana a Kauka Sologate (Dr. H. C. Sloggett). Oia ka mea i holo mai e pani ma kahi o Kauka Makalelana. He kanaka Pelekana oia, i ao a hoonaauaoia a puka pono mai na kula ao oihana lapaau o Edineboro, Sekotia, a me Ladana, Enelani. No ko Enelani oihana kaua moana oia, a he lutanela kona kulana a pau ai. Oia kekahi lala o ka mahele akeakamai o luna o ka mokukaua Challenger, (o ka Mea Aa ka unuhi ana o ia inoa, a o Kalene ka paha ma ko kakou hoohepa ana,) oiai ia moku ma kana huakai kaapuni honua e imi ana i na mea pohihihi o ka hohonu o ka moana, aole nae hoi i kipa mai i o kakou nei. Ma Amerika Huipuia oia kahihi noho ai no umi makahiki i hala ae, a he mau mahina i hala ae kona hiki ana mai i o kakou nei. Iaia ma Amerika, ua waiho aku oia i kana noi no kona makemake e lilo i kupa, oiai, ua makemake oia e loaa ona aina malaila, a o ke ala ia e hiki ai ke loaa mai ka aina. Ua makaukau oia e lawelawe i na ano a pau o ka oihana lapaau oki, pale keiki, a pela aku, aka, o na ma'i o ka maka, ihu, pepeiao a me ka waha nae hoi kona oi loa aku.
-
Ua hookohuia o F.S. Dodge i Komisina Palena Aina no ka Apana Kaapuni Ekahi.
-
S.K. PUA,
He Agena no na Waiwai Paa
He Mea huli i na Kuleana Aina i mea e maopopo ai,
He Mea Ohi i na Aie i hiki ole ke Ohiia e na Poe no lakou na Aie, a
He Mea Hana i na Ano Palapala P Kanawai a pau.
KEENA HANA: - Ma ke keena o R.W. Wilikoki, Alanui Konia. aug. 31-1mk.
-
C.B. DWIGHT
[KALE KUAIKA.]
Mea Hana Pohaku Kaekae Alanui, na He Kupapau a me na Kia Hoomanao Mabala.
-
E loaa no oia ma kona wahi noho ma Koiuiu, Honolulu nei. Telepona Helu 833. feb 17-1mk
-
HOOLAHA HOOKAPU
Ke hoolahaia aku nei ma keia ua hookapu a papa loa ia ka lawaia ana ma ke kai o na aina o ke Kahua Hanai Holoholona Puuhue Puuhue Ranchi, a pela no hoi ke kiki pu ana mauka o ke kula. O na poe a pau e kue ana, e hoopiiia no ma ke kanawai.
PALMER P. WOODS.
Luna Nui.
Puuhue, Kohala, Hawaii, Okatoba 7, '96.
okt. 12-2ml.
-
MORIKAWA,
Ka Oi me Kana Hana
Ua nee ae nei kona hale hana mai
Alanui Betela a i ka Halelio o
Akana, Alanui Konia, mauka
o Alanui Hotele.
Amara a Mea Hana Kaa me ke Kapili
Kapuai Hao Lio
Oluolu loa ka uku o ka hana, i hiki ole i na poe e ae ke lihi launa aku.
Jun 8-3ml.
-
Hui Papa a Kukulu
Hale Oahu.
OAHU LUMBER & BUILDING CO.)
Leleo, Alanui Moi, kokoke i ke Kahua o ka Hui Alahao & aina Oahu.
-
Poe Kalepa Laau, Hana Aelike
a me Kukulu Hale.
Poe Hookomo Mai a Hoolilo aku i na
Puka, Olepelepe, Kui,
Pepa, Pena, Aila,
Na Pono Kamana,
A pela aku, a pela aku.
Telepone 53. Pahu Leta.
apl 20-tf