Ka Makaainana, Volume VI, Number 21, 23 November 1896 — Page 1
Ka Makaainana .
BUKE VI - Ano Hou. Honolulu, Oahu, Novemaba 23, 1896. HELU 21
PUALI PUHIOHE LAHUI.
-
Hoi Nui Mai me ko ka Lehulehu Ohohia.
Ma ka mokumahu Auseteralia mai o kakahiaka Poalua iho la i huli hoi io mai ai na lala o keia puali mai ka lakou huakai kaahele imi wahi pono ma Amerika Huipuia, o ko lakou hele ana no hookahi makahiki me ka hapa, a ike nui hou no hoi i ka aina nei mai ka haalele ana iho iloko o na la hope o Mei, 1895. O lakou ka mageneti i ume aku i ka lehulehu i kai o na uwapo ia kakahiaka, a ua hookipa ohaoha ia mai no hoi lakou me ke ohohia nui. He mea ole na lono koho balota peresidena o Amerika Huipuia, oiai nae hoi ka moku ua ohuohu me na hae o na waihooluu like ole. I ke kaalo ana mai i ka hale-kukui , ua hoao mai lakou e puhi i ka lakou mau ohe, aka, ua hiki ole i ka hiolo makawalu o na waimaka i ka ike hou ana mai i ka aina a me na maka lehulehu e kaunui aku nei o ka ike hou. He kanakolu ko lakou nui o ka hoi ana mai la, he 27 poe puhiohe, elua mau mea himeni a me hookahi oiwi opio o ka loaa ana ia lakou ma Kikako a hoihoi mai la, nona ka inoa o Mareko Solomona, poki o Kale Keahinui e hana nei ma ka hale humuhumu lole o ka oopa i make.
Ma ka aoao o ka Ahahui Aloha Aina, ua holo aku o J.K. Kaulia, Kakauolelo Nui, ma kekahi waapa a kau iluna o ka moku oiaio no iwaho, a ma ka inoa hoi o ia ahahui a me ka lahui aloha aina a pau, ua panai aku oia i ke aloha ohaoha a mahamaha loa ia lakou. Ia lakou i lele mai ai i kula nei me ka lakou mau ohe, a i ka ike aku no hoi, he maikai ko lakou mau ola, na hiohiona a me na oiwi. Ua nui na leo aloha i pae aku ia lakou mai waena aku o ka lehulehu, a pela no hoi me na aloha lululima ana. Elua o lakou i hoi pu ole mai.
Aole ka lakou kumu Paniolo, J.S. Libonio, i hoi pu mai. Wahi mai a ka loheia, oia pu no ka hoi kekahi iluna o ka moku, a mamua iki iho o ka wa e holo mai ai, ua hoi hou oia i kula no ke kii ka i kekahi mea i poina, o kona hele loa aku la no ka ia, aohe i ike hou ia aku. Ma kekahi oleloia mai nei no hoi, ua mare mai nei ka oia i wahine Paniolo nana, a poina hoi ka wahine "Waihi," A o kekahi oleloia no hoi, he hanai puaa aku la ka kana hana o ka noho ana aku la o o, a o ka puaa paha ia la, ke hele la no me na wahi kenikeni a pau loa i uku ole ia i na keiki e like me ka lakou i ae like ai. E kawowo a e pulapula loa aku ana paha hoi kana mau puaa hanai o ke ano ewe Aniolo.
Ia lakou mai ka hoi i ka moana, wahi mai a ko makou lohe, ua nui ko lakou hoolealea i ko ka moku poe me na leo mele puhiohe a me na himeni. A i ka pae hui ana mai ka hoi a hoea i na home; ua hele ino iho la ka ai ana i ko ka aina nei mau mea-ai. Ua ano e mai kahi poe o lakou, a aole no hoi kahi i ano e.
He ahaaina hookipa ka i haawiia ae no lakou i ka Poalima nei, ma ka pa o Kimo Pelekane ma Apua, ma kahi huli ae o alanui Puowaina mai Honuakaha, ma ka hora 12 awakea a pau i ka hora 4:30 auwina la. O ka hua mai keia i loaa mamuli o na noi hele ana a na wahine a lakou no ka haawi i ahaaina hookipa no lakou ke hoi nui mai. Ua hoolealea mua ae lakou i ka lehulehu i hiki aku ia awakea me na leo houhene o ka lakou mau ohe ponoi, a mahope iho ka nonoho nui ana e ai. Pau ka ai ana, ua uhene hou ae no na ohe a me na leo himeni pu no hoi kekahi a hiki i ka hookuu wale ana. Lehulehu no na poe i hiki aku, mai na oiwi a na ilikea malihini, na hoa mai o luna o ka moku. Ua ai ka lehulehu a ua lawa, a ua hookuuia na hana me ka maluhia.
Ke haawi aku nei KA MAKAAINANA i kona aloha no lakou a pau, ua hiki nui hou mai la hoi i ka aina nei.
-
Poaono iho ko kakou o Hawaii nei La Kuokoa.
Ua lohe mai makon ua hoao ae ka kekahi koa Aupuni me kana pu-raifela e kia kekahi oiwi i ka po Poaono nei, ma ke kihi ma Ewa aku o ko makou keena. E ole e keakeaia, pau wale ai. Pehea la ka loihi o ka lehulehu e hoomanawanui ai i nei ano hoohemahema a hoomaopopo ole ae
o ke Aupuni?
Ua hoopaneeia ko Lahaina mare a makou i hoike aku ai ma ka helu i hala mai ke ahiahi Poaha a ke ahiahi Poalima ae la 27, ka la hanau o ka wahine opio e mare ana. Ia kakahiaka e haalele mai ai ka Bihopa o Honolulu ma ka Malulami, a i ka hora 7 e hookoia ai, ke pae koe aku nae hoi oia. He luhi mua ia wahine opio na makou.
KOHO PERESIDENA.
-
Eo ka Lanakila i na Moho a ka
Aoao Repubalika.
No ke ulolohi a ka launa ole mai o ko na mokumahu ku mai i ka Poakahi iho la me na lono no ke kau koho Peresidena o Amerika Huipuia o ka la 3 nei, ua lilo ia hiona i mea e hooulu ae ai i na hoohuoi a me na houpuupu no ke kumu o ko lakou ulolohi. O kekahi o ia mau hoohuoi ana, ua ulu a ua ala ae paha he haunaele mamuli o ko Baraiana kohoia ana, a nolaila, ua keao na poe waiwai kakoo gula a hoala haunaele. Eia ka auanei aole pela ka pololei, ua lilo no ke eo i na moho o ka aoao Repubalika, oia o Mekia Wiliama Makinile, o Ohio, ma ke ano Peresidena, a o Gareta A. Hobata, o Nu Ierese, ma ke ano Hope Peresidena. Ua loaa mai keia lono ma ka mokumahu Kulanakauhale o Pekina ia aumoe Poakahi mai Kina a me Iapana mai. Piha o kai o na uwapo a nui no hoi ka hauoli o ko kakou poe Repubalika a aka hoohuiaina.
Ma ke ku ana mai hoi a ka mokumahu Auseteralia i ka hora 7:30 o kakahiaka Poalua ae i hooiaio loa ia mai ai keia lono o ka po mai. A holo mai nei no na mokumahu like ole i ku mai i o kakou nei, aohe no i maopopo loa ka huina nui o na balota i loaa i kela a me keia aoao, aka, eia iho nae hoi ka papa hoonohonoho i hoikeia ae e ka nupepa la o Nu Ioka o ka la 5 nei:
Na Koho no Makinele.
Balota Koho Moho. Huina Balota Oi.
Na Mokuaina
Kalepono........9 8,000
Coneticuta......6 54,000
Delawea.........3 2,000
Ilinoi..............24 165,000
Inidiana.........15 20,000
Iowa..............13 72,000
Kenetuke.......13 1,000
Maine............6 47,000
Merelana.......8 32,000
Masekuseta...15 164,000
Mikigana.......14 50,000
Minesota.......9 50,000
Nu Hamesire..4 23,000
Nu Ierese.......10 86,000
Nu Ikoa..........36 273,000
Dakota Akau...3 8,000
Ohio................23 70,000
Oregona..........4 7,000
Peneselivania..32 296,000
Mokupuni Rode.4 27,000
Dakota Hema......4 3,000
Veremona...........4 41,000
Viriginia Kom.....6 15,000
Wiseconesina......12 10,000
- -
Huina.....277 1,611,500
Na Koho no Baraiana.
Balota Koho Moho Huina Balota Oi
Na Mokuaina
Alabama........11 40,000
Akanasasa.....8 50,000
Colorado......4 126,000
Felorida...........4 9,000
Georgia...........13 40,000
Idaho...............3 12,000
Kanasasa.........10 13,000
Luisiana..........9 50,000
Misouri..........17 10,000
Monotana.......3 15,000
Neberasaka.....8 5,000
Nevada...........3 5,000
Carolina Hema..9 20,000
Tekasa..............15 75,000
Uta...................3 15,000
Viriginia...........12 15,000
Wasinetona.......4 4,000
- -
Huina...144 408,000
Na Mokuaina Kanalua.
Eia iho na mokuaina i kanaluaia ko lakou mau balota koho moho.
Carolina Akau....................11
Tenesi.................................12
Waomina............................3
Huina..................................26
Huina Houluulu o na Balota.
Makinile............................277
Baraiana............................144
Na Mokuaina kanalua.......26
Huina...............................447
Na balota e puka ai ka moho Peresidena he 224 wale no, mailoko ae o ka huina o na balota he 447. A o ko Makinili oi pakela loa, hoi ma ko ka lehulehu manao nona, maluna ae o ua moho holo balota a pau, he 1,203,500.
Ma na lono hope loa mai nei hoi, ua lilo a Dakota Hema ia Baraiana, a haule iho la e Makinile i ka huina o 273. A ua hoopehu ae hoi o Karolina Akau a me Tenesi i ko Baraiana huina a 167.
Na Kukai Mahamaha a na Moho.
I ka mapopo lea ana ia Baraiana ua haule oia a ua kohoia kona hoa uhaiaholo Makinile, wahi a ka hoikeia ae ma Kikako o ka la 6 nei, a ua haalele oia i ka hoomau ana aku i ka hakoko ana, ua hoouna aku oia i kona haawi pio ma o ke telegarama mahope iho e haawi aku ana i ka hoomaikai ia Mekia Makinile, penei:
"Lincoln, Neb., Nov. 5
"Ia William McKinley, Jr., Canton, Ohio: O ka hoike ana mai nei no ia a Senetoa Jones ia'u ua maopopo loa ma o na hoike la no kou kohoia, a keawiwi nei au e pahola aku i ko'u mau hoomaikai ana. Ua waiho aku kaua i ka ninau imua o ka lahui, a o ko lakou makemake ke kanawai.
W.J. BRYAN."
A i ka loaa ana aku hoi o ka Baraiana telegarama hoomaikai, ua panai koke mai no hoi o Makinile i ka hooia mahope iho:
"Hon. W.J. Bryan, Linlcon, Neb.: Ke hoike aku nei au me na mahale ana no ka loaa ana mai o kau elele mahamaha ohohia o ka hoomaikai, a ke noi aku nei hoi i kou apo mai i kou mau manao maikai loa no kou ola a me kou oluolu.
WILLIAM MCKINLEY."