Ka Makaainana, Volume VI, Number 19, 9 November 1896 — Page 1

Ka Makaainana.

BUKE VI ---- Ano Hou.        Honolulu, Oahu, Novemaba 9, 1896. HELU 19

 

MA KE KOHO BALOTA.

 

Palapala Uwalo a na Lala o ka Puali Puhiohe Lahui.

 

            Ua hoike aku makou ma ka helu i hala, a o ka mua loa hoi ia iwaena o na nupepa oiwi, no ka pae ana mai o Kuhina Nui Poka i pau o Amerika Huipuia, ka luaui hoi o kela kuikahi hoohuiaina e pili ana ia Hawaii nei i waihoia aku ai imua o ko Amerika Aha Senate i na la hope loa o ko Peresidena Harisona i pau kau o ka noho poo ana no ia Aupuni, a ua kau mai hoi ke koikoi maluna o Peresidena Kalivalana, iaia i komo a i kau ae ai ma ia kulana poo, o ka unuhi ana i ua kuikahi aihue aina, aupuni a lahui la.  A ua hoomahui aku no hoi makou no kekahi palapala i kakauinoaia e kekahi komite o ka Puali Puhiohe Lahui i waiho aku ai imua o ua o Kuhina Poka mamua o kona holo ana mai no nei.  Eia iho ka makou unuhi ana o ia palapala:

KAPALAKIKO, Okatoba 26, 1896.

            MEA HANOHANO J W FOSTER, Kapalakiko, Kaleponi

            Mahalo: -- O oe ke Kuhina Nui iloko o ka Aha Kuhina o Peresidena Harisona, i na la makamua o 1893, i ka wa o kekahi kuikahi i hooholoia ai e oe, ma ka aoao o Amerika Huipuia, me kekahi poe keonimana i hooia aku o lakou na elele ma ka aoao o ke Aupuni o ko Hawaii Paeaina, o ka manao o ua kuikahi la, o ia no ko Amerika Huipuia alapoho aku i ko makou aina oiwi a kinai iho i ke Aupuni Hawaii.  Eia oe ma kou ala no Honolulu, a mai na hoike a me na kukai kamailio ana i hoopukaia ae ma na nupepa o keia kulanakauhale, ua hoomaikeike ae ia mau mea no e hele aku ana ka oe no ka hooholomua hou ana aku i ke kumuhana hoohuiaina, i kaohiia hoi ma o ka hana ana o Peresidena Kalivilana, no ka makee ona i na pono kalaiaina a me na iini o ka lahui Hawaii.

            He poe Hawaii oiwi makou, he poe lala hoi no ka ahahui mele e ku ana mamua malalo o ka inoa o ka Puali Puhiohe Alii Hawaii.  Ua kaawale makou mai ko makou aina oiwi mai me ko makou makemake ole, mamuli hoi o ka hooleia ana mai o ka pono e imi ai i ola no ka noho ana ma ka aina o ko makou hanauia ana e na poe pakaha a i hele loa hoi ka maliuia aku e na makaainana, i noho hoomalu nui ia Hawaii mai Ianuari 17, 1893, ma ka oi winiwini o na eleu-pu, a ua hookahuaia hoi ia hoole ana mamuli o ko makou hoole ana e hoohiki kakoo aku i na poe pakaha, a e hoole ae hoi i na ano (loina) hooponopono aupuni o makou a malalo hoi o ia i hanauia ai makou a i noho mau loa ai a hiki mai hoi i ka la i oleloia, a i ku mau loa ai hoi ma Hawaii mai ka wa mai i ike ole ia.

            Ua koho makou, a ua manaoio hoi, mamuli o kou kulana pili aku i ke kuikahi i oleloia, ua hana oe me kou ike maopopo ole i na kulana e ku ana ma Hawaii, i na ano hana hoi i lawelaweia ai e na poe e olelo ana o lakou ke aupuni a me kahi hoi i loaa mai ai o ko lakou mana, e imi nui ana hoi e hoolilo aku i ko makou aina i kekahi aupuni okoa aku; a i na manao oiaio hoi o ka lahui i kuleana pono loa e pane no Hawaii maluna o ke kumuhana o kona alapohoia aku e Amerika Huipuia.  Nolaila, ke mahamaha hauoli aku nei makou i ka nanaina o kou kipa ike aku i ko makou aina i nei wa, a ke hilinai nei e ku mamao mai ana oe ma ke ano ume mai, no ka lawe ana mai hoi i ka ike maluna o na kulana oiaio o na manao Hawaii e pili ana i ka hoohui kalaiaina ia aku ia Amerika  A ua hilinai nui no hoi makou, mamuli hoi o kou kulana i maopopo lea ma ke ano he mea hooholomua i ka pono a i ke kaulike kalaiaina, a he mea kokua a kumu hoohalike hoi o na loina hooponopono aupuni repubalika oiaio, aole loa oe, mahope iho o ka maopopo ana i na manao o ka lahui Hawaii maluna o keia ninau ano nui o ka manawa, e imi hoi e hookauia aku maluna o lakou o kekahi kulana kalaiaina a lakou hoi e ku kuhau mai ai me ka makau, a me ua manao hopohopo kukonukonu loa hoi e pili ana i kona hopena ma nei mua aku o ko lakou noho ana ma ke ano he lahui.

            O ka paulehia i lilo i mea oleloia me ka hiipoiia e ka lahui Amerika no ke kahua hana oiaio i hoopukaia e kou Peresidena Linekona no kekahi "aupuni o ka lahui, ma o ka lahui, a no ka lahui," o ka makou hoi ia e waiho haahaa aku nei he mea pono e kuhikuhi aku i nei wa i keia Aupuni nui i ke kupono o ka hoopanee ana aku i kekahi mau keehina hou aku e pili ana no ka hoohui kalaiaina ia mai o Hawaii aia a maopopo ka manao o na poe i kupono i ke koho balota o ko makou aina, e like me ia i kauia ma na hoakaka kumukanawai e mau ana i Ianuari 17, 1893, ma ka hoopaa maopopo ia ana ma o kekahi koho balota ana o ka lahui (plebiscite).

            Me na manao oiaio loa no kou ola a me ka hoohauolila ma nei huakai au e manao nei e hele,

            O makou iho no hoi, ma ka aoao o ka Puali Puhiohe,

            JOE K. KAAUA,

            SOL. A. HIRAM,

            JOSEPH AEA,

            SAM'L K. KAMAKAIA,

            JOHN AIU.

 

Nalo ma keia Huli.

            Kakahiaka La Pule, la 1 nei, i haalele mai ai ke aho i ke kino ola o Misasa Malie Alekana, wahine a Alexander Bishaw, ma ko laua wahi noho mauka o Kapalama, makai iho o kahi noho o Pita Fenana i make.  No kahi wa i hala ae ka hoomailo ana o ka ma'i maluna ona, a no ia kumu ua hoi aku i waho o Waikiki e hooluolu ai, malalo o na ao a lawelawe ana a kona kauka.  Ua ano oluolu ae no ka hoi, aka ua hoomaka hou mai no ke ano e i ka Poaha mamua koke iho o kona make ana, a wahi a ka hoikeia mai, mamuli ka o ka hele ana e auau kai a komo hou ia e ke anu.  A pela oia a ano e loa a homaopopoia aohe wa i koe nona ma neia ao, ua hoihoiia mai no ko laua home a aili ai ke aho e like me ka hoike mamua ae.

            He wahine opiopio oia o 33 paha makahiki, a ua hanau mai nana a me kana kane he eha mau keiki e ola nei, ekolu keikikane a hookahi kaikamahine.  No Kawela, Molokai, kona hanauia ana, a o Maunaloa hoi kona luaui.  O ka hoi koke ana aku nei no ia o kona kahu hanai, H. Peelua, he pule a oi mamua aku, no ka ike ana iho nei ua oluolu a ua pohala ae ka popilikia, eia ka auanei hoi ka poino mahope mai.  I kekahi auwina la ae i hoolewaia ai kona kino wailua, ma ka maneleia ana ae mai kauhale a ka luakini o Malieokamalu, a mai laila aku hoi a nalo ma ka pa ilina o Koula, kahi hoi ona i haaleleia aku ai "e hoomaha iloko o ka maluhia."  Na ka Rev. Makua Leolono i lawelawe na hana haipule, a na Hanale Wiliama hoi na hoponopono hoolewa.

 

            Po Poaono nei i weheia ai ka Hale Opera Hawaii hou mahope iho o ka hoomaemaeia ana.  He hui keaka kuloko i ao a hoomakaukauia iho nei e Mele Kuke (Misasa Tuna) ka i unihi ae ma ia po mua o ka wehe ana, a ua hele no ka hoi a piha kumeki o loko.

 

Hala ia Hulu Makua.

            Me ka ehaeha a luuluu makou e hoike aku nei no ka hala ana aku o ia koena hulu makuahine o makou, oia o Misasa Ema Namakaokeawe, wahine a Kimo, ma Kainalu, Molokai, i ka La Pule i hala, la 1 nei, a nalo no ia la, i ke 50 paha o na makahiki a keu.  Ma ka hoike palapala mai a ke keiki a kona mua ae, Samuela K. Kamaipelekane, aole kona noonoo i haalele mai iaia a hiki i kona make ana, me ke kauoha aku ka iaia e hoike i kona aloha i kana poe keiki a me na pilikoko a pau me ka helupapa aku i na inoa o kela a me keia.  O ka makou hoi nei e hoike aku nei i kona aloha i kona poe pili a paa.  Aloha no.

 

Pakele Mahunehune.

            No lalo mai o Ewa ka lono o kakahiaka Poakolu, Okatoba 28, e hoike ana i ka pakele mahunehune wale ana iho no mai maka loa ke Paniolo e noho hana nei ma Leilehua, oiai oia e holo mai ana ma kona lio no kai o Ewa.  Ua okupe iho la kona lio a owala hope ia aku la ka mea kau lio a haule aku.  I ikeia mamuli o ka holo ana aku o ka lio, ua pii ae ka noho a kau malalo ae o ka opu.  Kupanaha, ea!  A na kekahi mea me ka puuwai aloha i hele huli a loaa aku e waiho ana ma kahi kokoke i ke alahao ma Waiawa, a kokua a hoihoiia no kona hale a pohala a oluolu ae oia, hoi loa ana no kona wahi hele mai ai.

 

Moku Ili Gainsborough.

            Awakea Poakolu nei i hooliloia aku ai ke kiapa hao Gainesboro e Kimo Mogana ma ke kuai kudala, a ua lilo ia Samu Alani no $500 wale no.  He keu no a ka emi.  Ua loheia ae mahope iho nei o keia hooliloia ana, ua hooholo ae ka ona hou inanei no oia e hana a e hoomaemae hou ia ai.  Mahope mai nei, ua hoopaaia aku oia ma ka Hale Dute a ua kaa oia malalo o ka hae Hawaii i nei wa, a malalo hoi o ka inoa hou -- Diamond Head (Daimana Hede)

 

Ahahui Aloha Aina.

            Auwina la Poaono nei, hora 1:30, i halawai ae ai ka ahahui maluna ae ma ke kahea a kona kakauolelo, J. K. Kaulia, a i malamaia hoi ma kona keena loio, no ka wae ana i mau elele no ka aha wae Peresidena a Alakai no ka Ahahui Nui.  Aohe i hoikeia mai ia makou na mea i hanaia a aole no hoi makou i hiki aku, eia nae, ua loheia mai aole no i holopono loa.