Ka Makaainana, Volume V, Number 26, 29 Iune 1896 — Page 1

KA MAKAAINANA.
BUKE V---Ano Hou Honolulu, Oahu, Iune 29, 1896. HELU 26

 

NA MOHO PERESIDENA
A ka Poai Repubalika i Wae ai no Amerika Huipuia.

 

                Ma ka la 10 nei i hookuine pono iho ai ka aha wae moho peresidena a ka aoao Repubalika ma Sana Lui, Misouri, a i ke koho mua ana no i kinohi, ua lilo ka eo ia Wiliiam McKinley (Makinile) o Ohio. Ua puka ino loa oia maluna o na moho e ae, a penei iho na heluna balota i kohoia no kela a me keia: McKinley, 661½:Rae d. 33½; Morton, 55; Quay, 61½; Allison, 35½. Ma ia hope iho, ua hooliloia ko Mikinile kohoia ana i mea lokahi.
                O ka pauku e pili ana i ke dala iloko o ke kahua alakai hana Repubalika, e apono ana i ke kahua dala gula, ka mea nana i hookuemi hope aku i na poe kokua i ke dala sileva iwaena o ia poai. Iwaena o na poe i ku ae a hele aku mai ka aha wae me ka haalele iho i ka aoao Repubalika, o ia no na elele a pau o Colorado, ekolu no Uta, ko Idaho a pau loa, Pettigrew o Dakota Hema, Hartmen o Monotana, a me elua o Nevada.
                No ka moho hope-peresidena hoi, o ka inoa o Garrett A. Hobart (Hobata) ka i waihoia ae e Lunakanawai Franklin o Nu Ierese, a ua kohoia oia i ka balota mua ana no. Peneia iho ka heluna balota o ke kohoia ana: Hobart, 532½; Evans, 277½, Bulkeley, 39; Lippit, 8; Walker, 24; Reed, 3; Thurston, 2; Frederick Grant, 2; Depew, 3; Mor 1. Kaawale, 23.
                Iloko aenei o Novemaba e malamaia ai ke koho balota laulaha ana. O ka ka aoao Demokarata mau moho koe, a i keia malama ae e maopopo ai.

 

Make o Generala Daimana.

                Ma ke Kopa tika i loaa mai ai ka lono no ka make ana o Mekia Generala W.H. Daimana ma Nu Ioka ma ka la 18 nei, i ke ahiahi. Ua hanauia oia ma Honolulu nei ma ka la 11 o Novemaba, 1838, a o kona makuakane kekahi o na misionari mua loa i hoea mai i Hawaii nei. He hookahi wale no o kana mau keiki i ku iho ma kona aoao i kona wa hope loa, oia o Hale, a eia no hoi kekahi i Honolulu nei, oia o Wile Daimana. I ka poha ana ae o ke au o kela kaua huliamahi o ka Akau a me ka Hema, ua holo aku oia no Wasinetona e noi ai e aeia mai oia e komo i ke kaua, a ua komisinaia mai oia ma ke kulana he kapena. Mahope iho o ke kaua ua hoi mai oia a noho i kona aina hanau, a ua holo hou aku no nae no Kapalakiko mahope mai. Ua ialoaia kona kino a hoihoiia no Kapalakiko e hoomoe ai.
                Ua paniku ae o Wile Daimana i kona halekuai i ka Poaono nei no ka hoomanao i ka make o kona luaui makuakane.

 

Nee ka Mahaloia.

                Mahope iho o ka hoopukaia ana aku o kahi huki pule uuku no ka pomaikai o na hoahanau o ka Ekalesia Anagalikana, i kapaia "He Alakai i ke Anaina Hemolele", mai ka halepai aku o ko makou Puuku, na hoouna aku ka Bihopa o Honolulu he hookahi kope pakahi i na keena poo o ka Ahahui Hoolaha Ike Karistiano a me ka Ahahui Hale Ekalesia ma Ladana. He mau palapala ka i loaa mai nei i ka Bihopa mai na kakauoleio mai o ia mau ahahui, e hoike mai ana na loaa he wahi hanohano no ia wahi buke ma na waihona hoahu bako a elua, a e mahaloia mai ana hoi no ka maemae a maikai o ke pai a me ka humuia ana o ka buke, oiai, ua hoikeia aku he poe Hawaii wale no hoi ua poe na lakou i hana.

 

Makena ua Opiuma.

                Kakahiaka nui poniponi e ka Poalima nei, ua paa iho la i ka hopuia o Manuela Pere, he Pukiki kalaiwa kaa, e na makai Sekota a me Kodesa, oiai oia e kuiee ana ia elua mau eke me 90 mau tini opiuma iloko no kekahi wahi alanui ololi ma ka aoao mauka o Alanui Moi, kokoke i ka halepai o ko makou Puuku. Ua kahaha loa ia ke Pukiki i kona wa ipaaia aku ai e na makai a hoolei iho la i na eke ilalo. Ua lawe koke ia aku la ke pio no ka Halewai a me na eke elua a hoopaaia. Aole i loihi loa ua hookuuia mai la oia mahope iho o ka loaa ana he mau mea na laua e ku bona iaia, a he $1,000 kona bela. Ua hooloheia ae kona hihia i ka Poaono nei, a hoopanee hou ia mai la a ka Poakolu iho.

 

                E holo hoomaha aku ana o J. Aukai Kamakana, kekahi o ua kakauolelo o ka Aha Kiekie, no Kapalakiko ma ka Auseteralia o keia la.

 

OLAI ME KAI HOEE.
No Iapana mai Paha ke Kumu o ko Kakou Kai Hoee.

                Ma ka mokumahu Kopatika i loaa mai ai na lono e hiki ole ai ke hoohuoiia no ke kumu o ke kai hoee mimiki i ikeia maanei i ka la 17 iho nei. Penei iho ke ano nui o na Iopu i loaa mai:
                He palapala no Iokohama o Iune 17 nei ka i olelo ae ua nui na ola i poino ma ka akau o Iapana mamuli o na hoonaue olai a me ke kai hoee mimiki. Iloko o 20 hora, he 159 mau hoonaueue maopopo loa ana a ke olai. Nui ka poino ma ka aekai mai ke kai mimiki. Ma ka mokupuni o Ieso (Yesso) ka hoomaka ana o keia hoonaueue ana, a ma ia mokupuni na apana akau loa o Iapana, a ua pau holookoa no paha ia mau apana i ka holapaiia. Ua hoakakaia ua ano like loa no ka na hoohalulu ana mai me ke kani ana o ka pukuuiahi ma kahi mamae. I kela a me keia ewalu minute paha i ukali pinapinai mau aku ai na hoonaueue ana me ke ko-o ole.
            Ua olelo ae he palapala no ka la 19 nei: Ua kohoia he 10,000 poe i pau i ke amuia e ke kai hoee ma ka mokupuni o Ieso o ka ikahi ana aku hoi i na hoonane weliweli ana a ke olai, a na mau aku no aneane e iwakalua hora. mawaho ae hoi o ke kulanakauhale o Kumasiri, i hoopoino holookoa ia, he mau kaona aekai lehulehu e ae no kekahi i pau holookoa a pau hapa paha i ka anaiia e ke kai.

 

Kuai Hoopau Nui

                E hoomanao na makamaka oiwi i ka Poakolu iho, Iulai 1, e hoomaka ai ke kuai hoopau ana ma ka halekuai o Kwong Sing Loy, e like ho me ia e hoolahaia aku nei ma keia pepa. Aia ilaila ka oluolu, ka emi a me ka makepono loa. Ua kamaainaia no hoi o Sini Lui o ka Huina a Kale aenei, oia no nei mauka ae o Polelewa. O ke kipa ae no ka pono, a i ole ia, ke kaalo ae no, hele no a komo loa, a he ole loa hoi ka lohe pepeiao wale aku no.

 

                Na ka Regimana Ekahi ka eo o ka hookuku kinipopo o ka auwina la Poaono me 8 ai-puni, oiai hoi kona hoa paonioni Hoku, he 7 wale no. Ua kaenaia na ka Hoku ka make, aka nae, i ka ulele ana iho keia ua lilo aku la i ka Regimana me hookahi puni oi wale no.

 

Heihei Kaa Hehihehi Wawae.

                He mau heihei kaa hehihehi wawae ko Kapiolani Paka i ka auina la o ka Poaono nei, a he eiwa ka nui o na heihei ma ka papakuhikuhi. Heihei mua, eo ia R. Boyd, manawa 2.41½; elua, hookahi mile, eo ia R.A. Dexter, manawa 2.32; ekolu, hookahi mile, eo ia C. Bred, manawa 3.13.2.5; eha, hapalua mile, eo ia Albert K. Nawahi, manawa 1.51¾; elima, hapalua mile, eo ia Sam Johnson, manawa 1 3 3-5; eo o, hookahi mile, eo ia F.H. Grace, manawa 3.54; ehiku, hookahi mile eo ia J.F. Sylva, manawa 3 12 ½; ewalu, hookahi mile, na ke kaa Rambler ka eo, manawa, 2 39 3 5; eiwa, elua mile, eo ia Sam Johnson, manawa 4 51 1 5. Aohe laukanaka loa o waho o laila, no ka lilo i ka nana kinipopo.

 

Ko Hawaii La Eha o Iulai.

                Malalo iho nei ka Papa Hoonohonoho o na hana o ka la 4 o Iulai ae nei, ma ke ano la kulaia Hawaii, he ano hoopalaimaka Amerika hoi:
            Ike ia Peresidena a me Misasa Dole, mai ka hora 10 a 12 o ke kakahiaka. Hora 7 kakahiaka, heihei kaa hehihehi wawae. Paikau hookahakaha a ka Regimana Ekahi i ka hora 8. Ki pu Aupuni, 21 pu, hora 12 awakea. Na lealea hooikaika kino ma ke kahua kinipopo ma Makiki, hora 1:30 a 4 auwina la. kinipopo, hora 4. Heihei waapa, hora 4:30. Hoolele ahikao, hora 7:30 ahiahi.
                Aohe uku no ka makaikai ana i keia mau lealea a pau.

 

                E ku mai ana ka Alameda i ka Poaha iho mai Kapalakiko, a o ka Warimu ma ia la like no mai na Panalaau Hema.
                O keia ka la hoano o Sana Petero, a e hoomanaoia ana e like no me ka mea mau ma na luakini o Sana Anaru a me Malieokamalu.
                Ua laweia aku no Molokai maluna o Hawaii i ke awakea Poakolu nei na poe i loaa i na haawina a ka ma'i hookaawale ohana i hoomaluia iho nei mauka o ka pa ma'i o Kalihi.
                He palapala noi na kekahi poe ma'i e noho la iloko o ka halepaahao ma Kalaupapa ka i heluheluia ae imua o ka halewai o ka Papa Ola i ka Poakolu nei, e noi ana ia Peresidena Dole e kalaia lakou mai ka noho paahao ana. Ua waiho loa ia aku ua palapala la i ka Luna Nui o ke kahua ma'i.