Ka Makaainana, Volume V, Number 25, 22 June 1896 — Page 1

Ka Makaainana.

 

WELIWELI KE KAI!

 

Na Hana Hoopoino @ e Kai Hoee ma Haw

KEAUHOU, IUNE 17, 1896.

I ka hoa'loha maikai, F. J. TESTA;

            ALOHA NUI: He nu hou weliweli ka'u e hoike aku nei ia oe ma keia leta, a o ia iho keia malalo iho nei:

            Ma ke kakahiaka Poakahi nei, o ia paha ka hora 9, i hiki mai ai kekahi kai hoee nui i ike ole ia mamua ma Keauhou nei, a na ia kai hoee weliweli i ulu@a iho i kekahi mau hale o makou nei. O na hale i poino mai na hana ana a keia ino, o ia ko J. N. Koomoa, Keawe, Kaha, Sam'l Keawe a me ke Albert K. Hoapili. Ua pii mai ke kai me ka weliweli, a ma he mea la, ua aneane no e 18 kapuai ke kiekie o ke kai mai ka @li honua maloo ae. O kekahi o na waiwai o keia mau hale i poino, ua pau aku i ka lilo i ke kai a ke emi aku no hoi ke kai, waiho wale ka papaku o ka hohonu e kihe ai ka pukaihu o ke kanaka ke luu a loaa ka papaku o lalo, aka, i na hana hoi a ke kai, waiho wale ana "ua iwi o Hua i ka la," a he ku maoli no oe i ka weliweli ke nana aku.

            Ko Kailua mau hale i poino, o ia na halekuai o George McDougall me J. Kaelemakule, na pa papa o Judge Geo. Clark me M. F. Scott, a me ka hale noho o Kupaka.

            O ka uwapo o Kailua, ua nohaha mai o mua; na uwapo o Kaawaloa, Napoopoo a me ko Hookena, pau i ka lilo i ke kai, pela mai na lono ma ke telepone. Iwaena o keia mau uwapo a pau loa, hookahi uwapo Pelekane (paa), o ia ka uwapo o Keauhou nei, aole oia i manuheu. Manao au ina oe ianei nei a ike i keia kai hoee, hoihoiia paha ko ai i ke kania-i.

            He ma-u wahi mea hou ia.

            HENRY L. KAWEWEHI.

            A mai keia makamaka mai no hoi he palapala nana i kona ohana maanei, e hoakaka pono ana i na hana weliweli a ke kai, a ua kupono hoi no na poe i kamaaina ia wahi. Eia iho ua palapala la:

            Ma ke kakahiaka Poakahi nei ia'u a me ko'u hoa i pii ai a Kaakea, noho iho kela e eli uwala, pii loa au iuka o Haleloke e hoouwai ai i na holoholona a ia'u i pakaukau ai e iho mai, kahea ana keia leo mai luna mai o Paki, "He kai mimiki e! He kai mimiki e!!" I alawa aku ka hana ia kahakai, e kuakea mai ana ka moana me he mea la ua mile a oi mai Kaukulaelae aku, auwe no hoi e! he ku i ka weleweli ke nana mai. O ka iho ino mai la no ia, a i ka hiki ana mai keia i kahakai, auwe, weliweli e! e poi ana ke kai i ke alapii o Kahalekou.

            O kahi hale o Koomoa, ua kiloiia mai e ke kai a pili pu i ka pa o Kahalekou, ma ke kihi makai, a ua nakiiia no hoi a paa i na kauia nunui, oiai ke kai e holapu ana me ka weliweli. I alawa ae ka hana mauka, ua palaha iho la ko Aki hale ua hoopiliia ae la no hoi a pili i ka pali, e noke ana no hoi ke kai i ke poi i kumu pali. O ka pahu wai no hoi ona, ma ka aoao mauka o ka hale, ua kiolaia e ke kai iloko o ka pa o Naiwalau ma, ma kahi kau waa.

            I nana aku ka hana ia Kaiaiki, aohe Kaiaiki, ua weluwelu liilii o lalo i ke kai, nahaha liilii ka pa. Me ka hana nui makou i hoohikihiki ai i na ukana a pau. Ke pii mai ke kai, holo aku la makou i kahi o Haluapo. Ua pii ae ke kai a hapalua like o na kumu loulu. Auwe, he weliweli!

            I alawa iho ka hana ia Manuia, auwe no hoi e, ku i ka ehaeha, na hoohaneeia iho la kahi hale ilalo a onouia aku la e ke kai a paa iloko o Moikeha. O ka papahele o ka aoao mauka, ua unuia mai a pii iluna. A i nana aku ka hana ia Keawe, aohe kona hale, o ka puu opala ke waiho mai ana iluna o ka heiau i ka loko wai I ha-lo aku ka hana ia Kamuela Lepo, e waiho mai ana kona hale makai iho o ka pa kao, oiai ke kai e holapu ana ilaila, ke kopi la no hoi ke kai i kumu pali o Aoao ma.

            O ke kanaka e aa ana e hele mai kona wahi mai a keia aoao, he hawawa, hupo, a he kanaka make ia. O ke Kaha hale ua loaa mahani, a o ko Kalainoanoa ma hale, ia pii ana no a ke kai kokoke e hapalua like ka hale makai loa a ia hoi ana mai, upaia iho ke alapii, waiho ana ilalo.

            O kahi o Makainai, ua pii aku ke kai a kokoke i ke alapii, i alawa mai ka hana i kahi waa o papa, auwe no hoi e! ua opaia mai a pili pu i na kumu ohai i@ i ka pili pa o Kaleinoauoa ma, a i nana iho ka hana, auwe! no ka waimaka no e hiolo. Ua haihai na wahi iako, e paa ana kahi manu o hope, oi noke i ka huli i ko mua a loaa aku iluna o ka pa o Kaleinoanoa ma. O kahi ama, e paa ana no iloko, o ka aoao hema o ka waa ua naha, aohe nae i nui loa.

            O, ko Koomoa hale, ua hooneeia a kahi pa o Kauhikoa, mamua mai o ka halekula, a o ko Aki hale, ua pau i ka wawahiia a e kukulu ana maluna aku o ke kumu ohai nui ma ka pali. Ua pau ko Kaiaiki i ka wawahiia, no ka mea, aohe ano hale, aia ka papa a me ke pili piula a me na pono hale i kahi o Haluapo a me kahi o Naiwalau; o na waiwai kuai, eia me maua. Ua neoneo ia wahi, aohe hale. O ko Manuia hale, ua pau i ka wawahii a e kukulu ana i kahi pali kahuahale kahiko maluna aku o Kaiaiki.

            Aole o Keawe me Kamuela. Nui na waiwai i lilo. O na lole no hoi keia o Amoe a me Paiwi, hui aku hui mai, weluwelu no hoi kahi, ua wiliia no hoi i ke koa a weluwelu. Ko Keawe ma hoi, lilo na kapa apana, na upena a me kahi mau lole. O ka pa mai kahi o Aki, a ku io o Manuia, na weluwelu, w kau ole iho ai kahi pohaku maluna o kahi.

            Me he mea la o ke kiekie o ke kai mai ka ili honua maloo ae, ua kokoke no e 18 kapuai, ke hele la ke kai a like a like me kahi pali o mua mai o Naiwalau ma. I ka wa o ke kai @ emi aku ai, ahuwale mai loko aku nei a hiki iwaho o Kaululaelae, ike aku oe ia Akele, kohu pali i ke ku mai iluna. O na papa keia a Aki, ka ke Kiu (@. Lazarus) no hoi, a me ka Kaiaiki, lana aku i ka moana, a i ke akakuu ana mai o ke kai kiiia no hoi maluna o na wa@ a pau pono no hoi i ka loaa. O na paa pukaaniani o ka hale ina o Keliikoa, loaa aku i kaiuli, aohe nae i naha. O kahi mea aka nae hoi, loaa pu aku he ie waina i waho o ka moana, pau i ka inuia, nui ke sahiohio o na keiki hoe waa, eia ka no Aki ia ie waina. Ke pii mai no hoi ke kai, me he mea la e apu mai ana no ia oe. Ku i ka weliweli!

            Nui ko Keanaina ikaika i ka hooponopono i na ukana o ke kupunakane a me Maka liilii. O na pahu puna elima a papa Lono i hoi pu mai nei, lilo i mea ole, aohe opala koe, o kahi mea wale no i loaa ae iaia, o kahi kini pena. Ke nana aku i kahakai, ku i ke anoano, ku ka paila o ke ako'ako'a iuka. O kahi uwapo, aohe i manuheu iho. Keu kahi uwapo Pelekane.

            O ka halekuai o George McDougall o Kailua, hui aku, hui mai ke kopaa, laiki, palaoa, palena a me na waiwai lehulehu e ae. O ka papa a Judge Geo Clark, mokaki mai iluna o ke aa, a o ka halekuai o Kaelemakule, aole no i poino loa. O kahi hale o Kupaka, lilo i ke kai, a o ka papa mai a Scott, mokaki i ke kai, a lilo na mea-ai i mea ole. Ma ka pukaaniani mahope ka lele ana o Makainai, oiai ke kai malalo kahi i hapapa ai.

            Ua nui a lehulehu wale aku na mea i poino, aole i loaa. Ka Keawe, ka Kanuha a me ka Koomoa ma pahu ai, pau i ka lilo. Ina o keia ino a i ka po, ina paha ua nui na ola uhane o poino, aka, ua hoomama mai no ke Akua i kana hoopai ana.

 

Na Lono a Puni o Hawaii.

 

            Ma Kaawaloa, ua pii ke kai a hiki paha i ke 30 kapuai ke kiekie. Ekolu mau hale i lilo i ke kai, hoopoinoia ko Mose Barrett hale. O na ukana o ka hale ukana ua pau i ka poino.

            O na halekuai Pake o Hookena a me ka uwapo, he inai na ke kai. Nui ka poino.

            Ma Kaalualu, Kau, ua lilo ka uwapo a me eha hale i ke kai. Pela no hoi ma Honuapo, ua halawai pu no me ka inaina o keia kai hoee. Aole he mau poino nui loa ma Punaluu.

            Ua hoea loa aku no i Hilo keai kai hoee a mimiki, he 8 kapuai ke kiekie o ke kai maluna o ka iliwai. Aole i maopopo loa ka nui o ka poino.

            He lono hoi no Kaalualu, Kau, ua poino ko laila uwapo, a pela no ka hoi me ko Kaiwilahilahi ma Hilo Akau. Ma keia mau wahi no, he hookahi hale pakahi i poino, i ke kai no o kahakai.

            Mai ko makou mea kakau mai hoi o Maui, ahuwale kuapa i ka wa e emi aku ai ke kai hoee. E hana ana no kanaka iluna o na kao halihali kopaa o Kahului i ka wa o ke kai i hoomaka mai ai @ I ka wa i emi aku ai me @a manaoia paha aole e pii hou mai ana, ua hele aku ke kahi kane ma kana wahine i ke kui opihi, o ia no ka wa o ke kai i pii mai ai a aneane e poino ko laua mau ola. Ma Maliko, ua pii ke kai a hoea i ke alanui Aupuni a hoopoinoia na mala

 

(Hoomauia ma ka aoao 8.)