Ka Makaainana, Volume V, Number 21, 25 May 1896 — Page 8

8 HONOLULU, OAHU, POAKAHI, MEI 25, 1896.

HOOKUKU MAU KA HOI
Kiki Pu a na Koa o ka Repubalika Oehaa.

                Ma na ho ra like ole o ka Poaono, he nui ka ikeia o na koa e hele ae ana me ko lakou mau aahu me na pu a me na lei poka, e moe ana kaoo no ka Halekoa a hele loa no ko lakou kahua kiki pu iuka o Makiki. He pu raifela ka makana a lakou i kiki ai. Ma ka ulele ana, ua lilo ka eo i ke Komopani B, ukali aku hoi ke Komopani F, a pai a pai hoi na Komopani D a me G, a hopu hoi na Komopani A a me H i ka huelo o ka bipi. Penei iho na helu i loaa i kela a me keia: B, 405; F, 396; D a me G, 379 pakahi; A, 345; a H, 346.
            E hoomaopopoia, o na poe wae wale no keia o kela a me keia puali. Ua hoikeia mai hoi ia makou, iwaena ka o kekahi o na lala o ka puali G, ua hiki aku kahi me kona ona a ua ki oia. Heaha la ka mea i hana ai pela? Mamuli hoi o ko makou kamaaina i ua mea la, o kona ano mau no ia.

            Ua hopuia o Lau Chong, o ka Hui o Wing Wo Tai i ka Poaha nei no ke kue i ke Kanawai Hoopae Limahana Pake, ma ke ano ohumu ino, a ua hookuuia mai malalo o $1,000 bona.
            I ke Kinau ma Maalaea i kela holo mua ana aku nei ana i kela pule aku nei a hoi mai, a i ka waapa o ka moku e holo ana no uka me na ohua, ua puhi hele ia aku la ka waapa e ka makani a hoopaeia ma kekahi wahi okoa aku, he mamao o hookahi mile me ka hapa mai ke awapae aku.
            Ma Alanui Maunakea i ke kakahiaka Poaono nei, ua holo ae kekahi kaapio e kalaiwaia ana e Akana, Pake, a pii maluna o kekahi Pake okoa a eha loa ia. Ua hoihoi koke ia aku oia no ka Halemai Moiwahine e lapaau ai, no ka mea, ua kukonukonu loa kona eha. Ua hopuia hoi o Akana no ka hewa he holonui me ka hooponopono ole.
            He mau pule i hala ae ka hanaia ana o ka hoopii a Bihopa Ma kue i na lunahooko kauoha o ka waiwai o W. M. Kipikona, no ka hooko ana i kekahi moraki imua o Lunakanawai Kaapuni Kaaka. Ua aeia ke noi a ka aoao hoopii, a ma na nupepa o na aina e e hoolahaia ai no ekolu malama no ka hoolilo aku i ke kahua hanai holoholona o Lanai.
            Ma ke alo o ka halepai o ko makou Puuku i ka auwina la Poalima nei i holo puiwa ae ai ka lio me ke kaa a huli malalo o Alanui Moi, a hookui me ka pukaaniani o ka hale pohaku ma ka aoao malalo iho o ka rumi telepone o ka hui kaa o na Pake, a nohaha liilii ke aniani, a paa no hoi ka lio malaila. E kau ana no ke kalaiwa iluna o ke kaa ia wa.

KELA A ME KEIA.

                Aohe paani kinipopo o keia Poaono ae.
            O ka Au seteralia ke ke mai ana i keia Poalima iho.
            Nui ka mahaloia o na hana a ka puali keaka lio Hawaii i ka po Poaono nei.
            O ka makani a me ka lepo e puehu ana ma na alanui ka mea ike mau ia i na la i hala iho la.
            Poakolu, Iune 3, e hoike ai ke kula hanai kaikamahine o Kawaiahao maloko no o ka halekula.
            I keia la, a i ole, i ka la apopo paha, e haalele mai ai ka moku holo lealea Koroneta no Iokoh ama.
                Maluna mai o ke Dorika i hoea mai ai o Porofesa Paraise me na poe hana keaka ana i kii aku nei i Kaleponi.
            Ua hopuia i ka Poaono nei o S. K. Aki, mamuli o ka hoopii a kekahi poe no ka aihue i ka waiwai i haawiia e malama.
            Ua hookohuia aku o Kauka Lokeke i kakauolelo no ka Papa Hoonaauao ma kahi o J. F. Scott i hookiekieia ae ma kekahi kulana hou.
            Hookahi makahiki hoopaahao o ka haole apuka o ka Halepai Kekake i haawiia mai e ka Aha Kaapuni i ka Poakahi i hala. Ua ae okoa no i kona hewa.
            Mamuli o ke onawaliwali o ke ola kino o ke Komisina Beritania, aole oia e haawi ana he aha hoolaulea ma ka la hanau o ka Moiwahine Vitoria i keia makahiki.
            Ua hoopaiia imua o ke kiure i ka Poalima nei kela poe Pukiki hoohaunaele o Puowaina, he hookahi mahina pakahi. Ua hoohalahala nui hou aku la imua o ka Aha Kiekie.
            Ahiahi Poakahi i hala, maloko o ka luakini o Sana Anaru, ua hipuu polena ia e ka Bihopa o Honolulu, o Misi Mine Boloka, kaikuahine o Kimo Boloka, ia J. W. Hardy.
            Ua lele loa ke aho a ua pau ka maalo ana ae ma na pipa alanui o Ka Leo o ka Lahui i kela mau la aku nei. Aloha no ia makamaka o ka alo pu ana i na kai anu o Alika.
            Ua hoouluwehiwehiia ae na pahuhae o ke kulanakauhale nei a me ko na moku i nehinei, me na hae like ole, no ka hoomanao ana i ka la hanau o ka Moiwahine o Beritania Nui a Emeperese hoi o Inia.
            Awakea o ka Poalua iho la i auewaia ai o Ho sina, ke Kepani hana o ka Hale Dute i hoopae malu mai ai i ka opiuma, e ke kiure haole, a ua hoohalahala hou aku oia i ka Aha Kiekie. O kona kokoolua ua hookuuia.
            Ma ka ho ra 6 o ke ahiahi Poakahi i hala i ku mai ai ka mokumahu Dorika mai Kapalakiko, iloko o 6 mau la holo. Ua ano like no kona nui me ke Kopotika. Ua ahiahi loa no hoi o ka Poalua nei i haalele mai ai i keia awa no Iokohama a me Honokona.
            Ke emi loa mai la ka a ana o ke ahi iluna o Mokuaweoweo, a pela pu no hoi me ko Kilauea.
            Iuka o Puania ka ihu o ka moku kahi i haulani ai i ka la i nehinei. Nui ka hauoli o na kane.
            Hookahi ho ra me hapa ka loihi o ka manawa i paaniia ai e na hui kinipopo i ka Poaono nei. Maikai!
            Ua kepa aku maluna o ka moku holo lealea Ko roneta kekahi o na keiki hoehoe waapa, he haole.
            Na na poe ki pu pololei ke eo o ka hookuku kiki pu o nehinei me na makai, makai o Iwilei, he 403 kue ia 401 Haule na makai.
            Ua ku mai ka mokumahu Chittagong mai Potolana mai i ka Poakahi i hala, a i ka Poaha nei i haalele mai ai i keia awa no Iapana a me Kina.
            Ua hookui ae ke kaa o na Misi Widifila a me Konuwela ma alanui Hotele i ka Poaono nei, me kekahi kaa huilalua he wahine haole, a poino ke kaa, a eha kela wahine.
            O kahi mokukuna Henerieta hali opiuma i lilo iho nei ia T. W. Rawlins (Kamaki hana kopa), eia ke hoomaemae hou ia nei. Ke maemae oia, alaila, holo aku no Hilo, kona awa e holoholo mau ai o keia mua aku.
            Elua mau keiki hana o ko makou halepai i nalowale honua i ka Poaono nei, aole he lono i loaa mai e pili ana no laua a hiki i keia la. He mau keiki kino pilalahi wale no, a he 800 maka ka makana ke loaa laua.
            Ua ku mai ka mokukuna Noma, i haalele mai ai ia nei i keia makahiki me Kapena Rosehila, i kakahiaka Poalima nei, he 90 na la holo mai Kusaie mai. Ua manao wale ia no ua holoaia la ua wahi moku la i ka moana, aole ka.
            He wahi keiki Pukiki uuku ka i piholo a make loa i ke kahawai auau o Waikahalulu mahope iho o ka hora 5 o ke ahiahi Poaono. I hele oia i ka auau a loaa keia poino ulia wale iaia. I nehinei i nalo aku ai oia.
            Ma ka po Poakolu iho e haawiia ai he aha hulahula maloko o ka Paka Kuokoa, he hoomanao hoi no ka la hanau o ka Moiwahine Vitoria. O na pomaikai e loaa ana ia po no ka hoopuipui ana aku no ia i ka waihona o ka Ahahui Kokua Manawalea Beritania.
            He haunaele a he kue maoli no i ka maluhia o ka po ka i malamaia ma Alanui Liliha (Lehelehe), ma kela hale e hele mau ia ana e ko makou mau keiki wili papapai i ka po Poaono nei, mawaena o kekahi mau keiki o Kikihale aenei a me ko Alanui Liliha. Ua hoea aku kekahi poe ma ia wahi e nana ai i ka lakou mau hana a me ka makai pu e papa ai. He keu no hoi kela a kahi pipili mau ia e kamalii, he io bipi paha, a i ole, he poe eepa paha?
            Ma kahi noho o na makua o ka wahine ma Alanui Kuakini, ua hanau mai na ka wahine a Misita Daniela Sanfoda, Jr, he kaikamahine ma ka la 6 nei. O ka elua iho la keia o ka laua mau keiki, a o ka ekolu hoi o na moopuna a ka lunahooponopono o ke Kuokoa. Ola no ko makou makamaka.
            Mahope iho o ka hora 9 o ka po Poalima nei i lawe aku ai ka Iwalani i na Komite Ahaolelo no ke kahua ma'i lepe ra o Molokai, a me kekahi poe e ae i loaa ka aeia mai ka Papa Ola aku, a me na lala o ka Papa. I ka po Poaono nei ka huli hoi nui ana mai me ka maopopo ole o ke ano o ka lakou hana ma o, no ka mea, aole aeia o na poe kakau nupepa e holo pu ma ia huakai. Ua lohe wale mai no nae makou, aole he ohohiaia o ka lakou huakai i hele aku nei.
            Uluwehiwehi o loko o ka pa o ka luakini Katolika i ka Poaono nei a me nehinei me na hae like ole, a me na lau nahele o ka wao, he mea hoomanao hoi no ka la i iho mai ai ka Uhane Hemolele mai ka lani mai. I ka Poaono nei, ua haawi wale ia ka mea-ai i na poe ilihune, a pela aku. A i nehinei hoi ma ke anaina pule o ka hora 10, no na Pukiki wale no ia manawa, oiai, ua noi lakou i ka Epikopo ia manawa no lakou e malama ai i ke anaina pule hoomanao.
            I ke ahiahi poeleele o nehinei, ilalo o Moanalua, oiai kekahi poe kamalii ua hele a lena na auwae e walea ana i ka himeni me ka uwauwa pu ana iluna o ke kaa basa, ua hele mai la ka he makai kauwai a papa ia lakou aole pono e uwauwa loa, ua ano pii ae la ko lakou kai a manao e lawelawe lima i ka makai, aka nae, no ka nui loa paha o na poe e nana mai ana ia lakou ua hiki ole ke ko ko lakou iini. O ka mea aka loa, i ka wa o ua wahi makai la i manao ai e kau mai maluna o ke kaa basa, ua hookina koke aku la kamalii i ke kalaiwa e holo nui i na lio i ole e kau ka makai, a ua ko ia no pela.

OLELO HOOLAHA.

ME K A MINAMINA ke Komisina a Kanikela-Kenerala Beritania e hoike aku nei mamuli o ke kulana nawaliwali o kona ola kino aole loa e hiki ana iaia ke malama i aha ike i keia makahiki no ka hoohanohano ana i ka La Hanau o ke Alii ka Moi Beritania. OIHANA KANIKELA-KENERALA BERITANIA. Honolulu, Mei 22, 1896. mei 25 1mnw

Waihona Buke Hawaii.

E loaa no na buke ma ka olelo makuahine no ke kuai ma ke keena o ko makou Puuku. Penei iho kekahi o ia mau buke: Laieikawai - - - $1 00 Gaberiela Lenoa - - - 75 R. W. Wilikoki - - - - 50 Hookahuli Aupuni o 1895 - 50 a pela aku, a pela aku. O na buke e ae no hoi kekahi, e laa na buke kanawai, a me kahi mau ano e ae, ke ninau pololei ia mai ia F. J. TESTA (Hoke), 327 Alanui Moi. ok 28-tf